Kunjamsa taqe kunas utjawayi ukjja, Génesis librojj akham sasaw qhanañchi: “Taqe kunan qalltäwipanjja Diosajj alajjpacha, ukhamarak akapacha luräna” sasa (Génesis 1:1). Diosajj kunayman alinak ukat animalanaka lurtʼasajja, Adanampir Evampiruw lurarakïna, jupanakaw nayrïr jaqenakäpjjäna. Jupanakajj janiw animalanakjamäpkänti, kunattejj Diosjam munasiri, khuyaptʼayasiri ukat sinttʼasiri ukhamäpjjänwa, ukat kunatï walïki ukat jan walïki ukjja, jupanakaw ajllipjjañapäna. Ukhamajj janiw luratanakapat khitirus juchañchapkaspänti. Diosan arunakaparutï istʼapjjaspänjja, kunjamtï Diosajj amtkäna ukhamwa jupanakasa ukat wawanakapas jan juchani ukat sumankañan wiñayataki aka Oraqen jakasipjjaspäna.

Ukampis mä angelaw jupanakar pantjasiyäna. Ukhamatwa uka angelajj Supayar tukuwayäna, ukasti “Kutkatasiri” sañ muni. Diosat jitheqtasajj jukʼamp sumaw jakasjjäta sasaw Supayajj mä katari toqnam Eva warmir kʼarintäna. Adanampi Evampejj uka arunakarojj istʼapjjänwa, ukhamatwa Diosat jitheqtjjapjjäna. Ukham jan wal amtapjjatap laykojja, nayrïr awk taykasajj wiñay jakañwa aptʼasiwayapjjäna, ukat jiwasarus juchampir jiwañampiruw katuyawayistu.

Ukampis Diosajja, uka jan waltʼäw askichañ munatapwa arsuwayäna, ukhamat Adanan wawanakapajj wiñay jakañ suytʼäwinïpjjañapataki. ‘Warmin wawapawa’, mä arunjja, mä jaqew Supayarusa ukat kuna tʼaqhesiñanaktï Supayas ukat Adanamp Evampis utjayawayapki ukanak tukjani sasaw Diosajj arsuwayäna (Génesis 3:15). ¿Khitïpachänsa uka ‘wawajja’? Ukajj mä qawqha tiempotwa yatisiñapäna.

Ukañkamasti, Supayajj kuntï Diosajj amtkäna uk aynachtʼayañatak chʼamachasiskakïnwa, ukat juchasa jan walinakasa jiljjattaskakïnwa. Ukatwa Diosajj jan wali jaqenakar Uma Juiciomp tukjañ amtäna. Ukatakejj mä arca luram sasaw Diosajj Noé chachar säna. Ukhamat Noé chachasa ukat familiapasa ukhamarak animalanakas qhespipjjañapataki.

Uma Juiciojj qalltkäna ukhat mä mara pasatatwa Noé chachampi familiapampejj arcat mistjjapjjäna. Oraqenjja jan walinakajj janiw utj-jjänti, ukampis jutaniw sat ‘wawajj’ janïraw utjkänti.

(Génesis 1-11; Judas 6, 14, 15 ukat Apocalipsis 12:9 qellqatanakarjama.)