1, 2. 1) ¿Jiwayatäñapäki uka jan wali jaqempi akapachampejj kunansa niya kikpaki? (Aka janankir dibujo uñjjattʼäta). 2) Akapachajj tukjatäkani uka qhepatjja, ¿alajjpachana ukhamarak aka Oraqen jakirinakajj kunjamsa jakasipjjani?

SINTI jan walinak lurir mä jaqes cárcel manqhan maysat maysa sarnaqkaspa ukham amuytʼañäni. Uk uñjasinjja guardianakajj akham artʼapjje: “¡Jiwat jaqe!” sasa. ¿Kunatsa ukham sapjjpacha? Uka jaqejj jakaskchisa, kʼumaräskchisa, jiwayatäñapatakiw juzgasi, jiwañapas wali jakʼankarakiwa. Ukatwa niyas jiwatäkaspa ukham uñjatäjje. *

² Aka jan wali pachajj carcelankiri uka jan wali jaqempi sasiwa, niyaw tukjatäni. Bibliajj akham siwa: “Akapachajj tukusirikiwa” sasa (1 Juan 2:17). Jehová Diosaw akapachar tukjañ amtawayi, niyaw uka amtaparjam phoqarakini. Ukampis akapachan tukusiñapampi, uka jan wali jaqen jiwañapampejj janiw kikpäkiti. Jan wali luriri jaqer jiwayañ amtapki ukajj janiw walïki sasinwa yaqhepajj sapjjaspa, ukhamat jan jiwayatäñapataki. Ukampis Jehová Diosajj cheqapa Juezawa,  aka pachar tukjañ amtasajj janiw pantjaskiti (Deu. 32:4). Aka pachar tukjañ amtawayki uksa, tiempoparuw phoqani, janiw ni mä jukʼsa suytʼkaniti. Aka pachajj tukjatäkani uka qhepatjja, alajjpachana, ukhamarak aka Oraqen jakirinakajja, Jehová Diosajj cheqaparuw lurawayi sasaw sapjjani. ¡Taqeniw kusisit jakasipjjarakini!

3. Diosan Reinopajj apnaqjjestani ukhajja, ¿kuna jan walinakas chhaqtayatäni?

³ ¿Kunanakas akapachampi chikajj tukjatarakïni? Kuna jan walinaktï jichhürunakan uñjktan ukanakaw chhaqtani. Ukajj ‘Diosan Reinopat suma yatiyäwinakawa’ (Mat. 24:14). Diosan Reinopajj apnaqjjestani ukhajj kuna pusi jan walinakas chhaqtani ukwa yatjjataskañäni: jan wali jaqenaka, jan waltʼayir organizacionanaka, jan wali lurañanaka, taqe jan walinakaw chhaqtayatäni. Ukanakat yatjjatkasajja aka jisktʼanakaruw qhanañchaskañäni: 1) ¿Kuna jan walinakansa uñjasiyistu? 2) ¿Kunsa Jehová Diosajj jan walinakampi lurani? 3) ¿Jan walinak lantejj kunanaksa Jehová Diosajj utjayani?

4. ¿Kuna jan walinakansa jan wali jaqenakajj uñjasiyistu?

⁴ ¿Kuna jan walinakansa jan wali jaqenakajj uñjasiyistu? Qhepa urunakanjja, “jan wali tiemponakaw jutani” sasaw apóstol Pablojj säna. Ukatsti akham sarakïnwa: “Jan wali jaqenakajj ukhamarak sallqjerinakasa jan walit jukʼamp jan waliruw sarapjjani” sasa (2 Tim. 3:1-5, 13). ¿Uka arunakajj phoqasiskiti? Aka tiemponjja, waljaniw jan wali jaqenakampi tʼaqesiyat uñjastanjja. Kunattejj jan sinttʼasis jaqe masipar jan walinak luririnakaw wal utji, yaqha casta jaqew sasin uñisirinakas walirakiwa. Jupanakat yaqhepajja, taqen uñjkataw uka jan walinak lurapjje. Yaqhepasti, jaqenakar yanaptʼañsa munapkaspa ukham tukupjje, ukampis jan wali jaqenakäpjjewa. Janis jiwas kikpajj ukham tʼaqeskstanjja, jan walinak lurapjjatap uñjasasa jan ukajj istʼasasa wal chuym usuyastanjja. Yamas kunapachatï wawanakaru, chuymaninakaru jan ukajj jan chʼamani jaqenakaru jan walinak lurapjjatap yattan ukhajja wal chuym usuyastanjja. Jan walinak luriri jan chuyman jaqenakajja, mä animalar uñtata jan ukajj demonionakar uñtatäpjjewa (Sant. 3:15). Ukampis ¡Jehová Diosajj kusiskañ yatiyäwinakwa Arup toqejj yatiyistu!

5. 1) ¿Jan wali lurañanak apanukuñajj tiempöskiti? 2) ¿Khitinakatï jan wali lurañanakap jan apanukupkani ukanakarojj kunas pasani?

⁵ ¿Jan wali jaqenakampejj kunsa Jehová Diosajj lurani? Jichhürunakanjja, jan wali luratanakap apanukupjjañapatakiw Jehová Diosajj tiempo churaski (Isa. 55:7). Aka pachan tukusiñapajj wali jakʼankjjewa, ukampis khitinakas tukjatäpjjani ukajj janïraw yatiskiti. Ukhamarus khitinakatï jachʼa tʼaqesiñ tiempokam jan walinak lurasipkakini, akapachan munañaparjam sarnaqasipkakini ukanakarojj ¿kunas pasani? Taqe khitinakatï jan walinak lurasipki ukanakarojj tukjäwa sasaw Jehová Diosajj arsuwayi (Salmo 37:10 liytʼañataki). Jichhürunakanjja, waljaniw jan walinak jamasan lurapjje, jila partejj janirakiw castigatäpkiti (Job 21:7, 9). Ukampis Bibliajj akham siwa: “Diosaw jaqen sarnaqäwipjja uñji, taqe sarnaqäwipwa yatiraki. Janiwa jukʼampi chʼiyara chʼamakajj ñanqha jaqer imantañatakejj utjkiti” sasa (Job 34:21, 22). Ukhamajja jan wali luratanakap janiw Jehová Diosat khitis imtʼkaspati. Jan wali jaqenakajj kunanaktï lurapki ukanak sumwa Jehová Diosajj yati. Armagedón sat jachʼa guerra pasatatjja, jan wali jaqenakajj janiw  utj-jjaniti. ¡Jupanakajj wiñayatak tukjatäpjjaniwa! (Sal. 37:12-15).

6. Jan wali jaqenakajj chhaqtjjani ukhajja, ¿kunjam jaqenakas aka Oraqen jakasjjapjjani? ¿Uk yatiñajj kunatsa kusisiyistu?

⁶ Jan wali jaqenakajj chhaqtjjani ukhajja, ¿kunjam jaqenakas aka Oraqen jakasjjapjjani? Jehová Diosajj akham siwa: “Llampʼu chuymaninakasti oraq katoqapjjani, jilarkir sumankañampiw kusisipjjarakini” sasa. Ukatsti akham sarakiwa: “Aski jaqenakajj oraq katoqapjjani, wiñayatakiw ukan jakapjjarakini” sasa (Sal. 37:11, 29). ¿‘Llampʼu chuymaninakasa’ ‘aski jaqenakas’ khitinakäpjjesa? Llampʼu chuymaninakajja, Jehová Diosat yateqapki Juparus istʼapki ukanakawa. Aski jaqenakasti, Jehová Diosatakejj kunatï walïki uk lurañ munirinakawa. Jichhürunakanjja, jila partejj jan walinak luriri jaqenakaw utji. ¡Ukampis paraisonjja, llampʼu chuymaninaka, aski jaqenakakiw utjani!

7. ¿Jan wali organizacionanakajj kuna jan walinakansa uñjasiyistu?

⁷ ¿Jan wali organizacionanakajj kuna jan walinakansa uñjasiyistu? Jichhürunakanjja, jan wali organizacionanakan causapatwa jan walinakajj utjaraki. Kʼari religionanakajj walja jaqenakaruw eñgañapjje. Sañäni: kʼarinakwa Jehová Diosat yatichapjje, Bibliarojj janiw confiyañasäkiti sasaw yatichapjjaraki, kunatï jaqenakarusa oraqerusa jutïrin paskani ukatsa janiw cheq yatichapkiti. Maysa toqetjja, askipak thaqer gobiernonakajj guerranak utjañapataki, yaqha markankir jaqenakar uñisiñatakiw chʼamañchapjje, pobrenakarusa, jan chʼamani jaqenakarus tʼaqesiyapjjarakiwa. Uka gobiernonakajj mä qhawqhaniruk sum uñjasa, kun lurañatakis qollqe katoqasisaw qamiriptapjje, wali chʼamanis tukupjjaraki. Ukatjja, jukʼamp qollqe muniri jachʼa empresanakasa fabricanakasa ukhamarakiw aire qʼal contaminapjje, recursos naturales satäki ukanaksa tukjasipkiwa, mä qhawqhanin askipatakikiw waljanir wal trabajiyapjje. Ukhamajja, jan wali organizacionanakaw kunayman jan walinak utjayapjjaraki.

8. ¿Jaqenakatakejj wali chʼamanjamäki uka organizacionanakat kunsa Bibliajj qhanañchi?

⁸ ¿Kunsa Jehová Diosajj lurani? Gobiernonakajj kʼari religionanak contra sartapkani ukhaw jachʼa tʼaqesïwejj qalltani, Bibliarjamajja, kʼari religionanakajj qʼañu warmimpi sasiwa, Jachʼa Babilonia satarakiwa (Apo. 17:1, 2, 16; 18:1-4). Cheqas taqpach kʼari religionanakaw tukjatäni. ¿Jan wali organizacionanakampejj kunas pasani? Jupanakajj qollunakjama, islanakjam wali chʼollqëpkaspas ukhamäpjjewa sasaw Bibliajj qhanañchi (Apocalipsis 6:14 liytʼañataki). Ukampisa, Diosan Reinopar jan yanaptʼiri gobiernonakasa, organizacionanakasa tukjatäpjjaniwa sasaw Bibliajj qhanañcharaki. Jachʼa tʼaqesïwejj tukuskani ukhaw tukjatäpjjani (Jer. 25:31-33). Uka qhepatjja jan wali organizacionanakajj janiw utj-jjaniti.

9. ¿Kunatsa paraison jakirinakajj suma organizatäpjjaniwa sistanjja?

⁹ ¿Jan wali organizacionanak lantejj kunanaksa Jehová Diosajj utjayani? Armagedón qhepatjja, ¿aka pachan utjki uka organizacionanakajj utjaskakiniti? Bibliajj akham qhanañchi: “Jiwasajj arsutaparjamaw suytʼasktan mä machaq oraqe, mä machaq alajjpachampi, kuntejj Diosajj: ‘Churapjjämaw’ siskistu uka. Ukansti taqe kunasa cheqapapunïniwa” sasa (2 Ped. 3:13). Nayra alajjpachasa, nayra oraqes jan wali gobiernonakawa, ukhamarak jupanakan apnaqat jaqenakawa. ¿Tukjatäpkani uka qhepatjja kunas  utjani? “Machaq oraqe[mpi], mä machaq alajjpachampi[w]” utjani. Machaq alajjpacha sasinjja, mä machaq gobiernot parlaski, ukajj Diosan Reinopawa. Jesucristompi, 144.000 ajllit cristianonakampiw ukankapjje. Machaq oraqe sasinjja, Diosan Reinopampi apnaqatäpkani uka jaqenakatwa parlaskaraki. Jesucristosa, 144.000 ajllit cristianonakas Jehová Diosat yateqasisaw sum apnaqanipjjani (1 Cor. 14:33, NM). Ukatsti, machaq oraqejja, mä arunjja, jaqenakajj suma organizatäniwa. Suma chuymani chachanakaw taqe kunsa sum sarayapjjani (Sal. 45:16). Jesusampi, 144.000 ajllit cristianonakampiw uka chachanakarojj pʼeqtʼapjjani. Jan wali organizacionanak lantejj mayachtʼata mä suma organizacionakiw utj-jjani, uk yatisajj wal kusistanjja.

10. Jakaskta uka cheqanjja, ¿kuna jan walinaksa lurapjje, ukanakajj familiamarusa jumarusa kuna jan walinsa uñjasiyapjjtamjja?

¹⁰ ¿Jan wali lurañanak utjki ukanakajj kuna jan walinakansa uñjasiyistu? Jichhürunakanjja, taqe cheqanwa qʼañu juchanaka, engañonaka, nuwasiñanakas utji. Uka jan wali lurañanakajj walikïskaspas ukhamwa kusistʼañanakan uñjasi, ukatsti Jehová Diosajj kunatï walïki, kunatï jan walïki uk qhanañchki ukarus janiw respetapkiti (Isa. 5:20). Awk taykanakajja, taqe uka jan wali lurañanakatwa wawanakapar jarkʼaqapjjañapa. Maysa toqetjja, Diosan leyinakap jan istʼiri aka pachanjja, taqe cristianonakaw Jehová Diosampi sum apasiñatak chʼamachasiñasa.

11. ¿Sodoma Gomorra markanakar Jehová Diosajj tukjkäna ukajj kunsa yatichistu?

¹¹ ¿Jan wali lurañanak utjki ukanakampejj kunsa Jehová Diosajj lurani? Sodoma ukhamarak Gomorra markanakan sinti jan walinak lurapkäna ukhajj kunsa Jehová Diosajj luräna uk amuytʼañäni (2 Pedro 2:6-8 liytʼañataki). Kuna jan walinakatï uka markanakan luraskäna ukanakajja, Lot chacharusa familiaparusa tʼaqesiyänwa. Jehová Diosajj taqe jan walinak chhaqtayañatakiw uka markanak qʼal tʼunjäna. Ukham luratapajja, aka tiempon utjki uka jan wali lurañanakampejj kunsa lurani ukwa uñachtʼayistu. Kunjamtï nayra tiempon Diosajj taqe qʼañu lurañanak chhaqtaykänjja ukhamarakiw aka jan wali pacha tukjkani ukhajj taqe qʼañu lurañanak chhaqtayani.

12. Taqe jan walinakajj jan utj-jjani ukhajja, ¿kunanak lurañsa jumajj munasma?

¹² ¿Jan wali lurañanak lantejj kunas utj-jjani? Machaq oraqenjja, kunanakatï sum jakasiñatak yanapkistu ukanakakwa lurañani. Sañäni: Oraqpachwa mä suma paraisor tukuyañäni, jiwasatakisa familiaranakasatakisa utanak lurasiñäni. Waranq waranqa jiwatanak jaktanipkani ukanakarus sum katoqañäni, Jehová Diosat yatichañäni ukhamarakiw kunanaksa Jupajj jaqenak layku lurawayi ukanaksa yatichañäni (Isa. 65:21, 22; Hech. 24:15). Uka tiemponjja, kusisit jakañatak yanaptʼkistani ukwa lurañäni, ukasti Jehová Diosar jachʼañchañatakïniwa.

13. ¿Jehová Dios contra saytʼasipjjatapat kuna jan walinakas utjawayi?

¹³ ¿Akapachan jan walëjjatapajj kuna jan walinakansa uñjasiyistu? Oraqpachanwa jan wali jaqenaka, jan wali organizacionanaka, jan wali lurañanakajj utji, ukanak kawsaw jan sum jakasjjtanti. Taqeniruw guerranakasa, pobrëñasa, yaqha castätaw sasin uñchʼukisiñanakasa, usuntañanakasa, jiwañasa tʼaqesiyistu. Taqe uka jan walinakajj Supayampina, Adanampina, Evampina Dios contra saytʼasipjjatapatwa  utji. Taqe jaqerakiw jupanakan juchapat tʼaqestanjja.

14. ¿Jan walinakampejj kunsa Diosajj lurani?

¹⁴ ¿Jan walinakampejj kunsa Diosajj lurani? Ukanak mä qhawqha uñjañäni: Jehová Diosajj taqe guerranak chhaqtayani (Salmo 46:8, 9 liytʼañataki). Taqe usunak chhaqtayani (Isa. 33:24). Wiñayatakiw jiwañarojj tʼunjani (Isa. 25:8). Janiw khitis pobrëjjaniti (Sal. 72:12-16). Taqe kunatï jaqenakar tʼaqesiyki ukanakjja Jehová Diosajj chhaqtayjjaniwa. Kuna jan walinaktï Supayasa, jan wali angelanakasa (demonionakasa) utjayapki ukanak qʼal chhaqtayarakini (Efe. 2:2).

15. ¿Armagedón pasatat kunanakas wiñayatak chhaqtayatäni?

¹⁵ Guerranakasa, usuntañanakasa, jiwañasa jan utjkaspa ukhajja, ¿kunjamas jakassna? Janiw soldadonakasa, ni guerratak armamentonakas utj-jjaniti. Janirakiw hospitalanakasa, doctoranakasa, enfermeranakasa, morguesa ni cementerionakas munasjjaniti. Janiw jaqe jiwayirinakasa jan ukajj lunthatanakasa utj-jjaniti, ukatsti janiw policianakasa, alarmanakasa, candadonakasa ni llaves munasjjaniti. Kunanakatï jichhürun tʼaqesiykistu ukanakajj wiñayatak chhaqtayatäjjaniwa.

16, 17. 1) ¿Armagedón pasatat kunjamas jakasjjañäni? Mä uñachtʼäwimpi qhanañchtʼma. 2) ¿Aka jan wali pachamp chika jan tukjatäñatakejj kunsa lurañasa?

¹⁶ ¿Taqe jan walinakajj jan utj-jjani ukhajja kunjamas jakasiñäni? Uk amuytʼañajj inas chʼamakïchispa. Kunattejj walja maranakaw kunayman jan walinakampi phoqantat tiempon jaktanjja, ukatwa uka jan walinakajj kunjamsa jan waltʼayistu uk jan sum amuyjjsnati. Sañäni, trenanakajj purki uka jakʼan jakirinakajja, inas walja ruidonak utjki uk jan amuyjjapjjchiti. Ukat walja basuranak jaqtaski uka jakʼanakan jakirinakajj inas thujsatap jan amuyjjapjjarakchiti. Ukampis kunapachatï Jehová Diosajj taqe jan walinak chhaqtayjjani ukhajja, uka jan walinakat samarjjañäniwa, sumaw jakasjjañäni.

¹⁷ Jan walinakampi phoqantat tiemponwa jakastanjja, ukampis ¿kunjamas jutïrin jakasiñäni? Salmo 37:11 qellqatajj akham siwa: “Jilarkir sumankañampiw kusisipjjarakini” sasa. Jehová Diosajj ukham sum jakasiñaswa muni ukajj wali kusiskañawa. Aka jan wali tiemponjja, Jehová Diosampita markapampita jan jitheqtañatakiw wal chʼamachasiñasa. Kunja sumas jutïrin jakasiñäni uk janiw kunampis alksnati. Paraisojj kunjamänisa uk lupʼiñasawa, taqe chuymaw creyiñasaraki, yaqhanakarus uka paraisot parlañasarakiwa (1 Tim. 4:15, 16; 1 Ped. 3:15). Ukhamtï lurañänejja, janiw aka jan wali pachamp chikajj tukjatäkañäniti, wiñayatakiw sum jakasirakiñäni.