TATAJAJJ Arthur Guest satänwa, jupajj Diosatakjam sarnaqañwa munäna, metodista iglesiaruw sarañ munäna. Ukampis Bibliat Yatjjatirinakan qellqatapwa liytʼäna, ukatsti jupanakampiw tantachasjjarakïna, 17 maraniw 1914 maran bautisasïna. Uka tiemponjja, Primera Guerra Mundialaw apasiskäna, uka guerrar sarañapatakiw cuartelar jawsapjjäna. Jan sarañ munatapatwa Kingston (Ontario, Canadá) markan tunka phajjsitak carcelar jistʼantapjjäna. Mistjjasasti colportorat (precursor regularat) serviñ qalltäna.

Hazel Wilkinson mamajampi tatajampejj 1926 maranwa casarasipjjäna, awichajajj 1908 maranwa Bibliat yateqatayna. Nayajj abril 24, 1931 maranwa nasta, mä jilïr kullakani ukhamarak pä sullkanïtwa. Familiajanjja Diosar serviñatakiw chʼamachasipjjayäta. Tatajan Diosan Arupar wal respetatapaw Bibliar sum uñjañatak yanaptʼapjjetäna. Familjamajj taqeniw Diosan arunakap utat uta yatiyapjjayäta (Hech. 20:20).

Khä 1939 maranjja, Segunda Guerra Mundialaw qalltäna. 1940 maransti, Jehová Diosan Testigonakaparuw Canadá markan yatiyañ jarktʼapjjäna. Escuelanjja banderaruw aruntapjjerïna, himno nacionalsa cantapjjarakirïnwa, ukatsti yaqha ukhamanakamp lurapjjerïna. Ukanak lurapjjerïki ukhajja, Dorothy jilïr kullakajampejj mistjjapjjerïtwa. Mä urojja, profesorajj taqenin uñjkataw ‘ajjsarirïtawa’ sasin sitäna. Ukatwa tukuyarojj yateqer masinakajat yaqhepajj nuwjasin oraqer jaqonukupjjetäna. Ukampis taqe ukanakajj jaqenakar istʼañat sipansa, Diosar nayraqat istʼañatakiw yanaptʼitäna (Hech. 5:29).

Julio, 1942 maranwa 11 maranïkasajj uywanakar uma churañ mä tanquen bautisasta. Vacacionan precursor auxiliarat serviñaw gustitäna. Ontario markat alay cheqanjja, jaqenakajj lawanak apthapipjjerïna, jupanakar Bibliat yatiyiriw kimsa jilatanakampejj mä kutejj sarapjjayäta.

 Mayo 1, 1949 maranwa precursor regularat serviñ qalltawayta. Uka marajja, construccionan yanaptʼañatakiw Canadá markankir sucursalar jawsapjjetäna. Ukatsti diciembre 1, 1949 maranwa Canadá markankir Betel utan serviñ qalltawayta. Imprentan trabajiyäta, uka maquin apnaqañsa yateqawayaraktwa. Imprentanjja arumanakaw trabajiyäta. Imprimkayäta uka tratadonakajja, kunjamsa Canadá markan Jehová Diosan Testigonakaparojj arknaqapjjäna ukwa qhanañchäna.

Departamento de Servicio ukan yanaptʼkayäta ukhajja, Quebec markaru Diosar serviñataki sarir mä qawqha precursoranakaruw entrevistayäta. Uka maranakan Diosan arunakap yatiyañajj Quebec markan jarkʼatänwa. Visittʼirinakat maynejj Mary Zazula satänwa, jupajj Edmonton, Alberta markatänwa. Uka kullakampi Joe jilapampejj Bibliat yateqañ janiw jaytañ munapkänti. Ukatwa ortodoxo religionar sarir awk taykapajj utat alisnukupjjatayna. Jupanakajj junio 1951 maranwa bautisasipjjatayna, sojjta phajjsi qhepatsti precursor regularatwa serviñ qalltapjjarakitayna. Entrevistkayäta ukhajja, Mary kullakan Diosar serviñ wal munatap uñjasajj muspharayätwa. Ukatwa akham sayäta: “Taqe kunas kunjamtï amtkta ukhamäni ukhajja, aka kullakampiw casarasëjja” sasa. Ukarjamapuniw phoqasïna, ukatwa llätunka phajjsinak qhepat casarasipjjta, enero 30, 1954 marana. Mä semana qhepatjja, tamanak tumptʼirjam serviñatakiw wakichtʼapjjetäna. Ukatjja, Ontario markat alay toqenwa pä marajj tamanak tumptʼirit servipjjayäta.

Oraqpachan jukʼamp cheqanakan yatiyasiñapaw wakisïna, ukatwa misionerot servipjjañapatakejj waljanir invittʼasïna. Uk istʼasajj sapjjayätwa: “Canadá markan thaya tiempon aguanttanwa, juntʼu tiempon walja chhichhillankhanakajj utjki uksa aguantaraktanwa. Yaqha cheqanakan Diosar sirvkasin aguantañäniwa” sasa. Galaad Escuelatjja (clase 27) julio, 1956 maranwa mistupjjta, noviembre phajjsinsti Brasil markanwa misionerot serviñ qalltapjjayäta.

Brasil markankir sucursalar purisajja, portugués aru yateqapjjayäta. Mä jukʼa yateqasasa, revista jaytañ yateqasasa, yatiyiriw mistupjjayäta. Utanitï yatjjatañ munani ukhajja, ‘Diosan Reinopan jakañajj kunjamänisa uka toqet parlir Bibliat liytʼarapipjjäta’ sasaw chʼamañchtʼapjjetäna. Portugués arut yatiyir nayrïr kuti mistupkayäta ukhajja, mä warmiw wali sum istʼapjjetäna. Jupatakejj Apocalipsis 21:3, 4 qellqat liytʼarapiskayäta  ukhaw desmayayäta, janïraw juntʼur yatinoqtatäkayätti. Niya sapa kutiw ukhamanakan uñjasiyäta.

Campos markaruw misionerot khitapjjetäna, ukan mä jiskʼa grupokiw utjäna, jichhajj 15 tamanakaw utj-jje. Misioneronakatak mä utas utjarakïnwa, ukanjja Esther Tracy, Ramona Bauer, Luiza Schwarz ukhamarak Lorraine Brookes (jichhajj Wallen) kullakanakaw jakapjjäna. Uka utanjja, nayaw isinak tʼajjsurïta, phayañatakis lawanak apthapinirïta. Mä lunes arumajja, Yatiyañataki revista yatjjatañ tukuyatarojj esposajaw mä sillonan samartʼaskäna. Kunsa uka urojj lurapjjta uka toqetwa parltʼasisipkayäta. Esposajajj sillonat sartañampïskäna ukhajja, ¡mä asirur mistunir uñjasajj wal sustjasipjjayäta! Asirur jiwayta ukhakiw chuymas chuymäna.

Portugués aru mä mara yateqasajja, tamanak tumptʼiritwa servipjjayäta. Jiskʼa markanakar sarapkayäta ukanjja, janiw luzajj utjkänti, mä jantʼakunakwa ikipjjerïta, yaqha cheqanakarojj caballota jan ukajj carretatwa sarapjjerïta. Mä kutejja, mä qollu alayan jan yatiyaskäna uka markaruw yatiyir trenat sarapjjta. Sucursalajj 800 revistanakwa apayanipjjetäna. Alquilasipkayäta uka cuartor uka revistanak apañatakejj walja kutiw jut sarapjjerïta.

Brasil markanjja, Jilïr Irpirinakataki ukat Taman Yanapirinakapatak Escuelaw 1962 maran apasïna, ukarusti misionero jilat kullakanakaruw invittʼasïna. Sojjta phajjsinakaw ukham escuelanakan yatichañatak khitapjjetäna, ukarojj sapakiw sarayäta. Uka escuelanakajja Manaos, Belén, Fortaleza, Recife, Salvador markanakanwa apasïna. Manaus markan instrumentonak tocapjjerïki uka teatronwa kimsa uru jachʼa tantachäwitak wakichayäta. Uka urunakajj jallojj wal purintäna, umajj qʼañöjjarakïnwa, manqʼañatak lugaras janiw utj-jjänti. (Uka tiemponjja, jachʼa tantachäwinakan manqʼaw phayasirïna). Ukatwa soldadonakar pʼeqtʼirimpi parlayäta, jupasti “qʼoma umwa churapjjäma, jachʼa carpanak saytʼayañatakis soldadonakaruw khitanëjja” sasaw sapjjetäna. Ukhamatwa manqʼa phayañataki ukhamarak manqʼañatakis mä lugarajj utj-jjäna.

Mary esposajajj Portugal markat jutirinakaruw Brasilan yatiyaskäna, uka jaqenakajj aljasiñarukiw chuym uchapjjäna, janirakiw Bibliat istʼañ munapkänti. Uk uñjasaw esposajajj yaqhep betelitanakar akham säna: “Portugal markarojj janipuniw sarañ munkiristti” sasa. Ukampis mä jukʼa tiempotjja, ¡Portugal markan serviñatakiw invittʼapjjetäna! Ukan yatiyañajj jarkʼatänwa, Mary esposajajj llakitas jikjjataskchïnjja, uka markar sarapjjeristwa sasaw sapjjayäta.

Lisboa, Portugal markarojja, agosto, 1964 maranwa puripjjta. Uka markankir policiajj jilat kullakanakaruw thaqapjjäna, ukatwa nanakar katoqerejj jan jutapkänti ni jupanakampis parlapkayätti. Portugal markankañataki documentonak mistuñapkamajj mä alojamienton utjasipjjayäta. Visa apsjjasinsti mä departamento alquilasipjjayäta. Enero, 1965 maranwa sucursalamp parlapjjayäta. Phesqa phajjsit tantachäwinakar wasitat sarasajj wal kusisipjjayäta.

Jilat kullakanakan utaparu policianakan sapüru sarapjjatapwa qhepat yatipjjayäta. Tantachasiñ Utanaksa llawintapjjänwa, ukatwa aleq utanakanak tantachasipjjayäta. Walja jilat kullakanakaw policiamp apat uñjasipjjäna, ukhamat tantachäwi sarayir jilatanakan sutip yatiyapjjañapataki. Cheqas jilatanakaw jukʼamp tʼaqhesipjjäna. Ukatwa jilatanakan apellidop jan arsupjjerïkänti, jan ukasti yaqha sutipakwa arsupjjerïna, sañäni, José jan ukajj Paulo, nanakas ukham lurapjjayäta.

Jilat kullakanakar ajay toqet yanaptʼañatwa jukʼamp llakisipjjayäta. Ukatwa Mary esposajajj Yatiyañataki revista, Bibliat apstʼata yaqha qellqatanakatsa copianak luräna, uksti mä maquinampiw luräna.

Junio 1966 maranjja, Lisboa markan Feijó sat tamankiri 49 jilat kullakanakajja, mä utan tantachasipjjatapatwa taqenejj tribunalar apat uñjasipjjäna. Tribunal nayraqatan kunjams arsusipjjani ukwa yatsupjjerïta, ukatakejj nayaw juezäkiristsa ukham jisktʼirïta. ‘Janis tribunalan atipkchiñänejja, suma yatiyäwinak yatiyasiñapatakiw yanaptʼañäni’ sasaw sapjjayäta. Nanakar arjjatir abogadojja, kuntï Gamaliel chachajj nayra tiempon arskäna uka arunakampiw tukuyäna (Hech. 5:33-39). Kunatï tribunalan paskäna ukajj noticianakanwa yatiyasïna. 49 jilat kullakanakat yaqhepajja, mä phajjsi jila jan ukajj niya chika maraw carcelankapjjäna. Nanakar arjjatapkitäna uka abogadojj Bibliatwa yateqäna, janïr jiwkasas tantachäwinakar sararakïnwa, ukaw kusiskañänjja.

Sucursal sarayirjamaw diciembre, 1966 maran serviñ qalltta. Walja maranakaw jilat kullakanakaru leyinakarjam arjjatañatak sarnaqawayta. Testigonakar arjjatir mä leyiw utj-jjäna, ukatwa jan jarkʼatäsin tantachasjjapjjayäta (Fili. 1:7). 1974 mara tukuyarojj leyirjam uñtʼatäjjapjjayätwa. Uka maransti Oporto ukat Lisboa markanakan mä jachʼa tantachäwiw apasïna, ukan 46.870 jaqenakaw tantachasipjjayäta,  ukajj wali kusiskañapunïnwa. Ukarusti Brooklyn Betelatwa Nathan Knorr, Frederick Franz jilatanakajj visitapjjetäna.

Jehová Diosajja, portugués aru parlir islanakan yatiyañatakiw yanaptʼapjjarakitäna. Ukanakat yaqhepajj akanakawa: Azores, Cabo Verde, Madeira, Santo Tomé y Príncipe. 1988 maranwa sucursalan yaqha machaq utanakajj lurasiwayaraki. Abril 23, 1988 maranwa Milton Henschel jilatajj uka utanak Diosar katuyjjäna, uka tantachäwirojj 45.522 jilat kullakanakaw sarapjjäna. Nayra maranakan Portugal markan servipkäna uka 20 jilat kullakanakar mayamp uñjasajj wal kusisipjjayäta.

Aka walja maranakanjja, Diosar confiyiri jilat kullakanakamp chikäsajj kusisitaw jikjjatasipjjta. Amuytʼañataki, Theodore Jaracz jilatampejj mä sucursalaruw visittʼapjjayäta, ukan jan walinakanwa uñjasipjjatayna, sucursal sarayirinakajj uka jan waltʼäwi askichañatakejj kunatï wakiskäna ukwa lurapjjatayna. Uka jilatanakar chuymachtʼañatakejja, Jaracz jilatajj akham sänwa: “Jichhajj qollan ajayump yanaptʼayasiñ horasawa” sasa. Brooklyn markar sarkasajja, Mary esposajampi, mayni jilat kullakanakampejj akham sasaw Franz jilatar jisktʼapjjayäta: ‘¿Diosar walja maranak servisajj kunsa sapjjetasma?’ sasa. Jilatasti sänwa: “Walinsa, jan walinsa, Jehová Diosan markapat janipun jitheqtapjjamti. Uka markakiw Jesusan mayitaparjamajj ‘Diosan Reinopat’ yatiyaski” sasa.

Diosan markapar yanaptʼasajj esposajamp wal kusisipjjta. Yaqha sucursalanakar visittʼir sarapkayäta uk wali sum amtapjjta. Ukaw wayn tawaqonakaru, jilïrinakaru mä kikpak uñjañatak yanaptʼawayapjjetu. Ukhamatwa Diosan markapan jukʼamp yanaptʼasipkakiñapatakis chʼamañchtʼapjjta.

Jichhajj 80 mara jilanëjjapjjtwa. Mary esposajajj usunakampi jan aynachtʼañatakiw chʼamachasiski (2 Cor. 12:9). Jan walinakajj Diosar jukʼamp confiyañataki, Jupat jan jitheqtas serviñatakiw yanaptʼapjjetu. Diosan markapar yanaptʼawayapkta ukanak amtasajja, Jehová Diosajj nanakar munasitap amuyapjjta. *