DIOSAR taqe chuyma serviri Gayo jilatasa, mayni cristianonakasa jan walinakanwa uñjasipjjäna. Yaqhepajj kʼarinak yatichasaw tamarojj aynachtʼayañsa, tʼaqanoqtayañsa munapjjäna (1 Juan 2:18, 19; 2 Juan 7). Tamankiri Diótrefes chachaw apóstol Juanatsa yaqha cristianonakatsa ‘kʼari arunak’ parläna, viajapkäna uka cristianonakarus janiw katoqañ munkänti, yaqhanakarus jupjam lurapjjañapatakiw chʼamañcharakïna (3 Juan 9, 10). Ukanak paskäna ukhaw Juanajj Gayo jilatar qellqäna. Juanajj 98 maranakanwa qellqäna, ukasti “Juanan kimsïr qellqat cartapa” sasinwa Griego Arut Qollan Qellqatanakan uñtʼasi.

Jan walinakas utjkchïnjja, Gayo jilatajj jan jitheqtasaw Diosar serviskakïna. ¿Kunjamsa Diosar taqe chuym servitap uñachtʼayäna? ¿Kunatsa Gayo jilatat yateqasiñasa? ¿Kunjamsa Juanan cartapajj Diosar taqe chuyma serviñatak yanaptʼistaspa?

Kimsïri Juan qellqerejja, jupa pachpat ‘jilïri’ sasiwa. Uka aruw Gayo jilatarojj apóstol Juanan cartapätap yatiñatakejj yanaptʼäna, juparusti Diosar serviñan wawapjamwa Juanajj uñjäna. Juanajj Gayo jilatar akham qellqäna: “Munat Gayo amigojjaru, kawkïrirutejj cheqpachan munastjja ukaru” sasa. Ukatsti Gayon jan usuntañapa, ukhamarak Diosar serviñan jan aynachtʼañap munatapwa cartapan qhanstayäna. ¡Ukajj suma arunakawa, wal chʼamañchtʼarakïna! (3 Juan 1, 2, 4).

Inas Gayo jilatajj taman jilïri irpirita sirvchïna, uk janiw Juan librojj qhanañchkiti. Ukampis jan uñtʼata cristianonakar sum katoqtʼatapatwa Juanajj Gayo jilatar jachʼañchtʼäna. Ukhamatwa Diosar taqe chuyma servitap Juanajj amuyarakïna, cheqas nayratpachaw Diosan servirinakapajj sum katoqtʼasirit uñtʼatäpjjäna (Gén. 18:1-8; 1 Tim. 3:2; 3 Juan 5).

Juanajj Gayon sum katoqtʼatapat parlki ukajja, Juanajj jakkäna uka cheqat tamanakar sarapkäna ukanakajj kuntï uñjapkäna uk yatiyapjjatapwa qhanstayi. Inas Juanajj uka viajerinak toqejj tamanakat yatchïna.

Viajipkäna uka cristianonakajj jilat kullakanakan utapanwa alojasipjjerïpachäna. Alojasiñatak utjkäna uka utanakajj jan walit uñjatänwa, janiw visitanakar sum katoqapjjerïkänti, qʼañu luririnakaw sarapjjarakirïna. Ukatwa  amuytʼasir viajirinakajj amigonakapan utanakapar puripjjerïna, cristianonakasti jilat kullakanakan utaparuw puripjjarakirïna.

Juanajj mayampiw Gayo jilatarojj sum katoqtʼañapatak chʼamañchtʼäna. Akham sänwa: “Yanaptʼakimay sarañanakapana, kunjämtï Diosarojj kusisiyki ukhamarjama” sasa. “Yanaptʼakimay sarañanakapana” siski uka arunakajja, yaqha cheqar sarasin puriñapkamajj kunatï wakiski uk churaña sañwa muni. Gayojja, alojkäna ukanakarojj ukhamwa nayrajj yanaptʼäna, ukatwa Juanarojj munasiñapatsa Diosar confiyatapatsa yatiyapjjäna (3 Juan 3, 6).

Gayon utapar puripkäna ukanakajja, inas Juanan khitata misioneröpjjchïna, jan ukajj inas tamanak tumptʼirinakäpjjchïna. Khitinakas utapan alojasipjjerïna uk janis sum yatkstanjja, Diosan Arupat yatiyañatakiw viajipjjerïna. Juanajj akham sänwa: “Jupan sutiparu munasawa mistupjje” sasa (3 Juan 7, MT). 3 Juan 6 qellqatanjja, Juanajj Diosatwa parlaskäna, ukhamajja, “Jupan sutiparu” sasinjja, inas Diosan Jehová sutipat parlaskchi. Cristian tamankirïpjjänwa, ukatwa munasiñamp katoqtʼañajj wakisïna. Juanajj akham sänwa: “Ukatpï jiwasanakajj jupanakar uñjañasajja jupanakar yanaptʼañataki, Diosan cheqa arunakap parläwina” sasa (3 Juan 8).

Juanajja, janiw Gayor yuspärañatakik qellqkänti. Jan ukasti mä jan wali askichañwa yanaptʼañ munäna. Cristian tamankiri Diótrefes chachajja, viajipkäna uka cristianonakar janiw katoqañ munirïkänti, kunatsa ukhamäna ukajj janiw yatiskiti. Janiw mayni jilat kullakanakampis katoqayañ munirïkänti (3 Juan 9, 10).

Diótrefes chachan utaparu sarañjamäkchïspänsa, Diosar taqe chuym servirinakajj janiw sarañ munapkaspänti. Jupajj taman nayrankañ munäna, Juanan arunakap janiw respetomp katoqkänti, Juanatsa mayninakatsa jan walinakwa parlarakïna. Diótrefes chachajj kʼarinak yatichiriwa sasin janis Juanajj siskchïnjja, uka chachajj apostolonakarojj janiw jilïrirjam uñjkänti. Jachʼa jachʼa tukutapata, cristianjam sarnaqañ jan munatapatwa, Diosar taqe chuym jan servitapajj amuyasïna. Jichhürunakanjja, Diótrefes chachjam jilïrit uñtʼatäña muniri, jachʼa jachʼa tukuri jaqenakaw Diosan markap tʼaqanoqtayaspa. Uk yatisaw Juanajj Gayor akham säna: “Jan wali luräwinakarojj jan arkamti” sasa (3 Juan 11). Uka arunakajj jiwasamppachatakiwa.

Diótrefes chachat sipansa, yateqaskay sarnaqeri Demetrio jilatatwa Juanajj parlarakïna. Juanajj akham sänwa: “Taqeniw Demetriotjja sum parlapjje [...]. Jiwasanakas yatiraktanwa ukjja, jumanakas yatipjjaraktawa kuntï cheqak sasipksma ukjja” sasa (3 Juan 12). Inas Demetrio jilatajj Gayo jilatampi yanaptʼayasiñ munchïna, ukatwa Juanajj kimsïr cartap jupar uñtʼayañataki ukhamarak sum parlañatak qellqpachäna. Inas uka cartjja, Demetrio jilat pachpajj Gayor churchïna. Juanan mä khitapjama jan ukajj tamanak tumptʼirjamajja, Juanan arunakapajj cheqätapwa uñachtʼaypachäna.

Gayojj sumsa jilatanakar katoqkchïnjja, ¿kunatsa Juanajj sum katoqaskakiñapatak chʼamañchtʼpachäna? ¿Gayor jukʼamp chʼamachtʼañ wakisitapti amuypachäna? Diótrefes chachajj katoqtʼiri jilatanakar tamat jaqsuñ munatap uñjasajja, ¿Gayojj janiw jilatanakar katoqañ munjjaspati sasat Juanajj llakispachäna? Ukhamäkchïn janisa, Juanajj akham sasaw Gayor chʼamañchtʼäna: “Khititejj aski lurki ukïrejja Diosankiwa” sasa (3 Juan 11). Ukatwa kunatï askïki uk luraskakiñasa.

¿Juanan cartapajj jilat kullakanakar katoqtʼaskakiñapatak Gayorojj yanaptʼpachänti?  Jïsa, yanaptʼänwa. Juanan qellqat kimsïr cartajj Bibliankiwa, yaqhanakarus ‘askïki uk lurañatakiw’ chʼamañchtʼaraki.

Gayo jilatat janiw jukʼampejj yatiskiti. Ukampis jupat mä jukʼa amuytʼasajja, walja toqenakanwa yateqassna.

Maya, Diosar taqe chuyma serviri yaqha markat jutapki uka jilat kullakanakaw cheqa yatichäwinak yatichawayistu. Kunjamtï yatktanjja, jichhürunakan janiw taqe jilat kullakanakajj suma yatiyäwinak yatiyirejj wali jayanak viajipkiti. Ukampis Gayo jilatat yateqasisaw viajipki uka tamanak tumptʼirinakarusa, esposanakaparusa, yanaptʼsna ukhamarak chʼamañchtʼsna. Maysa toqetjja, yatiyirinakajj munaski ukar yanaptʼañataki markas pachpan yaqha cheqanakaru jan ukajj anqäjj markanakar sarapki ukanakaruw yanaptʼsna. Ukhamasti, ‘sum katoqtʼaskakiñäni’, jan ukajj yanaptʼasipkakiñäni (Rom. 12:13; 1 Tim. 5:9, 10).

Paya, tama taypin jilïr irpirinak contra parlir istʼasajj janiw aynachtʼañasäkiti. Nayra tiempojj apóstol Juanatsa Pablotsa jan walinakwa parlapjjarakïna (2 Cor. 10:7-12; 12:11-13). Tama taypin ukhamanak uñjasajja, ¿kunsa lursna? Pablojj Timoteor akham sänwa: “Tatitun mä serviripajj janiw nuwasiñanakan sarnaqañapäkiti, ukatsipana taqenimpis sumankañapawa. Munasirïñapawa yatichañatakejj sumäñapawa, ukhamarak llampʼu chuymanïñaparakiwa. Jan istʼasirinakarusti llampʼu chuymampi ewjjtʼañaparakiwa” sasa. Ukhamajj janiw jankʼak colerasiñasäkiti, ukhamatwa jiskʼachañ yatipki ukanakajj jan wali amtanakap apanukupjjaspa. Ukatsti, “inampis Diosajj jan wali luräwinakapat kuttayasinkaspa, ukhamat jupan cheqa arunakap uñtʼapjjañapataki” (2 Tim. 2:24, 25).

Kimsa, jan walinakan uñjaskasas Jehová Diosar taqe chuyma servipki ukanakat amtasiñasawa, aguantapjjatapat chʼamañchtʼañasawa. Juanajj Gayor taqe chuymaw chʼamañchtʼäna, sum luraskatapsa amtayarakïnwa. Jilïr irpirinakajj Juanat yateqasisaw ‘jan qarjtapjjañapatakejj’ jilat kullakanakar chʼamañchtʼapjjañapa (Isa. 40:31; 1 Tes. 5:11).

Juanajj Gayor qellqkäna uka librojja, Biblian utjki uka mayni libronakat sipan jukʼa arunakanikiwa, griego arut qellqatanjja 219 arunakakiw utji. Ukampis jichha tiempon jakiri cristianonakarojj wal yanaptʼi.