SEPTIEMBRE 1922 maran wali juntʼu tiempönwa, mä viernes alwajj 8.000 jaqenakaw jachʼa tantachäwir sarapjjäna. Ukan sarayir jilatajja, ‘aka tantachäwit sarjjañ munki ukajj sarjjaspawa, ukampis janiw kutintankaniti’ sänwa.

Qalltañatakejja, “servicio de alabanza” sat tantachäwin walja qʼochunak cantapjjäna, ukjjarusti, Joseph F. Rutherford jilataw arstʼarakïna. Jilapartejj sum istʼañatakiw asientonakar qontʼasipjjäna, yaqhepasti wali caloranwa maysat maysa sarnaqasipkäna, ukatwa Rutherford jilatajj mirä ampsuma, istʼañatakejj taqeni qontʼasipjjma sasin plataformat sanïna. Qalltjjäna ukhajja, ¿tantachasirinakajj altonkaskiri rollthapit mä jachʼa tela uñjapjjpachänti?

Rutherford jilatan discursopajj “Diosan Reinopajj jakʼankjjewa” satänwa. Mä hora chikataniw jachʼat arstʼäna, profetanakajj Reinon jutañapat jan ajjsartʼas yatiyapkäna ukwa qhanañchtʼäna. Niya tukuyasajja, “¿Alajjpachankir Reyejj niyat apnaqjjpacha?” sasaw jisktʼäna, tantachasirinakajj “jïsa” sasaw jachʼat artʼapjjäna.

“Ukhamajja, ¡Diosan wawanakapa, yatiyir sarañäni!” sasaw Rutherford jilatajj jachʼat säna. Ukatsti, “Reyejj apnaqjjewa, jumanakaw yatiyiripäpjjtajja. Reyimpit reinopampit yatiyapjjam, yatiyapjjam, yatiyasipkakim” sarakïnwa.

Ukhaw uka rollojj warkoqtanïna, “Reyita, Reinompita yatiyapjjam” sas qellqatänwa.

“Wali kusisitaw tʼajjllirtʼapjjayäta” sasaw Ray Bopp jilatajj amti. Anna Gardner kullakajj akham sarakiwa: “Wal tʼajjllirtʼapjjäna, uta techos khatatïnwa” sasa. “Tantachasirinakajj mäkiw saytʼasipjjayäta” sasaw Fred Twarosh jilatajj saraki. Evangelos Scouffas jilatajj akham sarakiwa: “Mä chʼamas asientonakajat saytʼayapkitaspa ukhamänwa, jachaqtʼasipjjarakiyätwa” sasa.

Tantachasirinakat waljaniw Diosan Reinopat yatiyjjapjjäna, ukampis ukürojj taqeniw yatiyañ amtapjjäna. Estudiantes de la Biblia sasin uñtʼatanakajja, “Diosan Arup yatiyañatak chʼamañchtʼata, munasiñan phoqtʼataw sarjjapjjayäta” sasaw Ethel Bennecoff jilatajj amti. 18 marani Odessa Tuck kullakajja, “¿khitis nayat arsur sarani?” sasin jisktʼarjam phoqañwa amtäna. Jupajj akham siwa: “Janiw kawkir sarañsa, ni kunjam lurañsa, ni kun sañajsa yatkayätti, ukampis Isaías profetjamaw ‘akankasktwa nayajj, nayar khitasita’ sañ munayäta” sasa (Isa. 6:8). Ralph Leffler jilatajj akham sarakiwa: “Uka urutwa Reinot yatiyañajj qalltasiwayi, jichhajj Oraqpachanwa yatiyasjjaraki” sasa.

 ¡Ukatwa 1922 maran Cedar Point, Ohio markan apaskäna uka jachʼa tantachäwejj Diosan markapan wali amtata! George Gangas jilatajj akham sänwa: “Uka tantachäwinjja, jachʼa tantachäwinakat janipun faltasiñwa amtawayta” sasa. Jupajj amtaski ukarjamajj janiw mayatsa faltasiwaykiti. Julia Wilcox kullakajj akham qellqäna: “1922 maran Cedar Point markan apaskäna uka tantachäwit parlaski ukhajja, kunja kusisitätsa uk janiw arunakampi sañjamäkiti. Jehová Diosarukiw ukankatajat walpun yuspärta” sasa.

Inas jumajj yaqha jachʼa tantachäwit ukham amtasiraksta. Inas wal yanaptʼawayktam jan ukajj Diosampir Reinopampir jukʼamp munasiñatak yanaptʼawayktam uka jachʼa tantachäwit amtasipunsta. Uka tantachäwinakat amtasajja, taqe chuymarakiw Jehová Diosar ukankatasat yuspärtanjja.