1935 maranwa Darlaston (Inglaterra) markan nasiwayta, ukajj Black Country markan mä markapawa, uka markan sutipajj “chʼiyar marka” sañ muni. Niyakejjay uka markan walja fabricanakajj utjchejja, chʼiyar jewqʼe phoqakiwa, ukatwa uka markajj ukham sutini. Pusi maranïkayäta ukhaw papit mamitajajj Testigonakamp Bibliat yateqañ qalltapjjäna. 14 jan ukajj 15 maranëjjasajja, kuntï yateqkayäta ukajj cheqäskapunitapwa amuyjjayäta, ukatwa 16 maranirojj 1952 maran bautisasiyäta.

Uka tiemponjja, autonakatak herramientanaka, repuestonak lurapki uka fabricanwa trabajiñ qalltawayta. Uka fabrican mä jachʼa cargonïñatakiw yatichapjjetäna, ukajj wal kusisiyitäna.

Mä urojja, superintendente de circuitojj ¿Congregacionan Librot Yatjjatañataki tantachäwi sarayasmati? sasaw sitäna, ukajj semanan may kutiw Willenhall sat congregacionajan apasïna. Ukhamïpan mä amtar puriñajj wali chʼamänwa, kuna laykutejj pä congregacionaruw uka tiempon sarayäta. Semananjja trabajojat jakʼankir congregacionaruw sarayäta, ukajj Bromsgrove markankiwa, 32 kilometronak utajat sarañana. Papit mamitajan utapar sarirïta ukhajja, seman tukuyanakajj Willenhall congregacionaruw sarirïta.

Diosan markapar wal yanaptʼañ munayäta, ukatwa superintendente de circuiton invitacionapar iyaw sayäta. Ukham lurasajj wal gustkitäna uka trabajwa jaytawayta. Jakäwijan Jehová Diosampi irpayasiñ amtatajat janipuniw arrepentiskti, wali kusisitaw jakasirakta.

Bromsgrove congregacionar sarkayäta ukhajja, Anne sat mä suma kullakaruw uñtʼawayta, jupatakejj Diosar serviñaw nayrankäna. 1957 maranwa casarasipjjta. Ukat aksarojj precursor regularata, precursor especialata, superintendente de circuitota, ukat Betelanwa serviwayapjjta. Wali kusisitapuniw taqe uka maranakan serviwayapjjta.

1966 maranjja, Escuela de Galaad, clase 42 ukaruw sarapjjta. Ukajj ¡wali kusiskañapunïnwa! Malaui markaruw asignapjjetäna, niyakejjay África toqenkir Malaui markan jaqenakajj wali munasiri katoqtʼasiri ukhamäpjjchejja, suma chuyman  jaqet uñtʼatäpjjewa. Ukampis jukʼa tiempokiw uka markan quedasipjjayäta.

1 de febrero 1967 maranwa Malaui markar puripjjta. Uka markan parlaski uka arjja, mä phajjsiw yatichapjjetäna. Ukatsti superintendente de distritot khitapjjetäna. Mä Kaiser autotwa viajipjjerïta, uka autojj taqe cheqnamaw sarani, jawiranaks paskatakiniwa sasaw amuyapjjayäta. Ukampis janiw ukhamäkänti, jukʼa uman jawiranakakwa paskatäna. Awisajj ñeqʼet lurata jichhu techoni utanakanwa alojasipjjerïta. Jallupach tiemponjja, techo manqharojj mä carpa uchapjjerïta, ukhamat umajj jan mantaniñapataki. Misionerot serviñajj chʼamakïnwa, ¡ukampis kusisitäpjjayätwa!

Uka markan jan waltʼäwinakaw qalltaskäna, ukwa abril phajjsin amuyawayta. Malaui markankir Hastings Banda sat presidenten discursopwa radion istʼayäta. Testigonakajj janiw impuestonak pagapkiti, gobiernorus jan waltʼayapjjewa sasaw jupajj säna. Ukampis ukajj kʼarïnwa, politicar jan mitisipjjatajaw jupar jan gustkänti. Jukʼampis partidopar afiliasiñatak tarjetanak jan alañ munapjjatajaw jan gustkänti.

Septiembre phajjsitakejja, Testigonakajj taqe cheqanwa problemanak utjayapjje sasaw presidentejj jilat kullakanakar kʼarintäna, ukaw periodiconakan yatiyasïna. Politiconakan mä tantachäwipanjja, Testigonakan jan utj-jjañapatakiw mä ley jankʼak apsöjja sasaw gobiernojj arsüna. Ukasti 20 de octubre 1967 maranwa phoqasiñ qalltäna. Mä jukʼa tiempotjja, policianakampi inmigracionan trabajir oficialanakampiw sucursalar puripjjäna, ukhamat uk llawintañataki ukat taqe misioneronakar uka markat alisnukuñataki.

Kimsa urunak carcelar llawintapjjetäna uka qhepatjja, Mauricio markaruw alisnukupjjetäna, ukajj Gran Bretaña markamp apnaqatänwa. Ukampis uka markankir autoridadanakajj janiw misionerjam quedasiñ dejapkitänti, ukatwa  Diosan markapajj Rodesia markar asignapjjetäna (jichhajj Zimbabue satäjjewa). Ukar puripjjayäta ukhajja, inmigracionan trabajir mä qhoru oficialaw katoqapjjetäna, janiw markar mantayañ munapkitänti. Jupajj akham sapjjetänwa: “Malaui markat alisnukunipjjtamwa, janiw Mauricio markan quedasiñ dejapktamti, jichhajj convienipktam ukatakwa akankapjjtajja” sasa. Esposajajj jachänwa. Janis kawkjans munapkitaspa ukhamwa amuyasipjjayäta. Uka horasajj Inglaterra markarukiw kuttʼañ munjjayäta. Ukhamäkchïnsa uka arumajj sucursalan quedasipjjasmawa sasaw autoridadanakajj sapjjetäna. Ukampis qhepürojj mayampiw ukar kuttʼapjjañajäna. Wali qaritäpkchiyätsa Jehová Diosan amparaparuw ukanak jaytjjapjjayäta. Qhepür jaypʼojj visitanakjam Zimbabue markan quedasipjjañajatakiw dejapjjetäna. Ukürojj jan armkañapunïnwa. Diosaw jakäwinakajan yanaptʼasipkitäna, janiw ukat payachaskayätti.

Zimbabue sucursalanjja, Departamento de Servicio ukaruw asignapjjetäna, ukhamat Malaui ukat Mozambique markanakar predicacionan yanaptʼañataki. Malaui markankir jilat kullakanakajj wali arknaqataw uñjasipjjäna. Uka markankir superintendente de circuitonakajj informenak apayanipkäna ukanakwa traduciñajäna. Mä urojja, mä informe traduciñ tukuyañatakejj wali arumkamaw quedasiyäta. Jilat kullakanakan wal tʼaqesipjjatap liytʼasajj jachaqtʼasiyätwa. a Ukampis Jehová Diosar jan jitheqtas servisipkakitapasa, Diosar confiyapjjatapasa, aguantapjjatapas chuymarupuniw purtʼitäna (2 Cor. 6:4, 5).

Malaui markan quedasipkäna uka jilat kullakanakarusa, Mozambique markar escapapkäna uka jilat kullakanakarus Bibliat apstʼat qellqatanak kunjamats apayapjjapunirïtwa. Malaui markan jilapartejj parlapki uka chichewa arur traducir jilat kullakanakajja, Zimbabue markaruw sarjjapjjäna. Ukanjja mä jilataw jupanakar mä jachʼa oraqe churäna. Uka jilatajj mä oficinampi utanakampwa traducir jilat kullakanakatak luräna. Ukhamatwa Bibliat apstʼat qellqatanak traducisipkakïna.

Malaui markankir superintendente de circuitonakajj sapa mara Zimbabue markar jutapjjañapatakiw taqe kuns organiztʼapjjayäta, ukhamat chichewa arut asamblea de distritojj apaskäna ukan chʼamañchtʼasipjjañapataki. Ukanwa asamblean arstʼaskäna uka bosquejonak katoqapjjäna. Malaui markar kuttʼkasajja, kunanakattï asamblean yatjjataskäna ukanak jilat kullakanakar yatiyañatakiw chʼamachasipjjäna. Mä marajja, Zimbabue markan Escuela del Ministerio del Reino uk apasiñapatakiw organiztʼapjjayäta, ukhamat uka jan ajjsartʼir superintendente de circuito jilatanakar chʼamañchtʼañataki.

Febrero 1975 maranjja, Malaui markat escapapkäna uka jilat kullakanakar visitiriw Mozambique markar viajta. Ukankir jilatanakajj Diosan markapan instruccionanakaparjamaw lurasipkäna. Cuerpo de ancianos uksa uttʼayapjjataynawa. Machaq ancianonakasti, discursonak arstʼañataki, Diosan Arupat sapür yatjjatañataki, Yatiyañataki revistat yatjjatañataki ukat asambleanak kunwa organiztʼapjjatayna. Jilat kullakanakajj jakapkäna ukanwa asambleanakajj apasïna. Ukanjja manqʼañanak churañataki, jilat kullakanakar cuidañataki ukat qʼomachañatak departamentonakaw utjäna. Jehová Diosan bendicionapampejja, Diosat jan jitheqtir uka jilat kullakanakajj walja musparkañanakwa lurapjjäna. ¡Wali kusisitaw ukat kuttʼanjjayäta!

1980 mara jakʼajja, Zambia markankir sucursalaw Malaui markankir jilat kullakanakat encargasjjäna. Ukampis Malaui markankir jilat kullakanakat amtasiskakiyätwa, jupanakatakis orarakiyätwa, kunjamtï jikjjataskayäta ukham waljaniw jikjjatasipjjarakïna. Niyakejjay Zimbabue markan Comité de Sucursal ukan sirvchiyätjja, Malaui, Sudáfrica ukat Zambia markanakan predicación pʼeqtʼapkäna uka jilatanakampejj walja kutiw central mundialankir jilatanakamp tantachasipjjerïta. “¿Malaui markankir jilat kullakanakar yanaptʼañatakejj kunampsa lurapjjerista?” sasaw sapa kuti jupanakar jisktʼapjjerïta.

 Tiempompejja janiw Testigonakar añch arknaqasjjänti, ukatwa escapapkäna uka jilat kullakanakajj Malaui markar jukʼat jukʼat kuttʼjjapjjäna. Malaui markan quedasipkäna ukanakajj janiw añch tʼaqesjjapjjänti. Uka jakʼankir markanakas jukʼat jukʼat janiw predicacionsa, tantachäwinaksa jarkʼjjapjjänti. 1991 maranjja Mozambique markan ukaw pasarakïna. Ukampis akham sasaw jisktʼasisipkakiyäta: “¿Kunapachas Malaui markankir Testigonakajj librëjjapjjpachäni?” sasa.

Qhepatjja, Malaui markan utjkäna uka leyinakajj mayjtʼänwa. Ukat 1993 maransti janiw gobiernojj predicación jarkʼjjänti. Mä jukʼa tiempotjja, “¿Malaui markar kuttʼjjätati?” sasaw mä misionerojj jisktʼitäna. Niyakejjay 59 maranëjjchiyätjja, akham sasaw jupar sayäta: “¡Janiwa, ukatakejj nayajj wali jilïrëjjtwa!” sasa. Ukampis ukürpachaw Malaui markar kuttʼañatak mä invitación Cuerpo Gobernantet katoqapjjayäta.

Zimbabue markajj wal gustapjjetäna, ukatwa mä amtar puriñajj jan faciläkänti. Uka markan wali yatitäjjapjjayätwa, walja amigonakanïpjjarakiyätwa. Cuerpo Gobernantenkirinakajj wali munasiñampiw uñjapjjetäna, ukatwa “Zimbabue markan quedasiñ munapjjsta ukhajj ukan quedasisipkasmawa” sasin sapjjetäna. Zimbabue markan quedasiñ amtañajj jukʼamp facilakïspänwa, ukampis Abrahán ukat Sara chacha warmin sarnaqäwipatwa amtasiyäta. Jupanakajj jilïrëjjapjjäna ukhajj utapan sum jakasiñ jaytasaw Jehová Diosamp irpayasipjjäna (Gén. 12:1-5).

Jehová Diosan markapar istʼañwa amtapjjayäta, ukatwa 1 de febrero, 1995 maran Malaui markar kuttʼapjjta, 28 maranak qhepata. Ukanjja mä Comité de Sucursalaw uttʼayasïna, ukan pä jilatampi nayampiw servipjjayäta. Mä jukʼa tiempotsti predicacionsa tantachäwinaksa yaqha ukhamanaksa organiztʼjjapjjayätwa.

Jehová Diosajj jankʼakiw markapar jiltayäna, ukajj wali kusiskañänwa. 1993 marat 1998 marakamajj walpun jiltawayi. ¡30.000 publicadoranakat 42.000 jila publicadoranakaruw jiljjattäna! b Walja trabajow utj-jjäna, ukatwa Cuerpo Gobernantejj mä machaq sucursal lurasiñapatak aprobäna. 12 hectareanakani oraqwa Lilongüe cheqan alapjjayäta, ukhamïpansti Comité de Construcción ukan yanaptʼañatakiw asignapjjetäna.

Mayo 2001 maranjja, Cuerpo Gobernantenkir  Guy Pierce jilataw machaq sucursal Diosar katuyjjañatak mä discurso arstʼäna. Uka markat 2.000 jila Testigonakaw discurso istʼir sarapjjäna. Jupanakat jilapartejj 40 jila maranak bautisatäjjapjjänwa. Arknaqat uñjasipkäna uka tiemponjja, Diosar jan jitheqtas serviri uka jilat kullakanakajj walja maranakaw wali tʼaqesiyat uñjasipjjäna. Jukʼa utjirinikïpjjchïnsa Diosar serviñan wali qamirïpjjänwa. Jichhajj machaq Betel visitasajj wali kusisitäpjjänwa. Tantachäwinakan cantaski uka cancionanakjja, kunjamtï África toqen cantapki ukham cantasaw taqpach Betel visitapjjäna. Taqe ukanak uñjañajj chuymaruw purtʼitäna, janipuniw uk armaskäti. Jehová Diosajj jupar confiyasa aguantirinakarojj wal bendisi, ukaw uka jilat kullakanakan qhan amuyasïna.

Sucursalajj tukuyasjjäna uka qhepatjja, Tantachasiñ Utanak Jehová Diosar katuyañatak discursonak arstʼañatakiw khitapjjetäna. Jilat kullakanakajj jukʼa qollqenikïpki uka markanakanjja, Tantachasiñ Utanak jankʼak lurasiñapatakejj mä programwa Diosan markapajj uttʼayawayi. Malaui markankir congregacionanakajj uka programat beneficiasipjjarakïnwa. Nayrajja yaqhep congregacionanakajj eucalipto lawat lurat lugaranakanwa tantachasipjjerïna. Techonakapajj junco alin soqosanakapat luratänwa. Qonuñanakapas ñeqʼet luratarakïnwa. Jilat kullakanakajja, hornonakar ladrillonak qhatiyasaw wal trabajipjjerïna, ukhamatwa suma tantachasiñ lugaranak lurapjjäna. Sillanakar qontʼasiñat sipansa, ñeqʼet lurat qonuñanakaruw qontʼasipjjerïna. Kunjamtï jupanakajj sapkejja, “ñeqʼet lurat qonuñanakarojj waljaniw qontʼasipjjaspa”.

Kunjamsa Jehová Diosajj suma cristianöpjjañapatak jaqenakar yanaptʼawayi uk uñjañajj wal kusisiyarakitäna. Cheqansa África toqenkir wayna jilatanakajj kunjamsa yanaptʼañatakejj jankʼakïpjjäna uk uñjañajj wal musparayitäna. Jupanakajj jankʼakiw kuntï Diosan markapajj yatichkäna uk yateqapjjäna. Ukham lurasajja, jukʼamp privilegionakwa Betelansa congregacionanakansa katoqapjjäna. Janiw ukakïkiti, pachpa markankir machaq superintendente de circuitonakajja, congregacionanakar wal chʼamañchtʼapjjäna. Jupanakat waljaniw casadöpjjäna. Uka markankir jaqenakasa, awisajj familiapas “kunapachas wawanëjjapjjäta” sasaw sapjjäna. Ukampis Jehová Diosar jukʼamp serviñatakejj jan wawanïñwa uka matrimonionakajj amtapjjäna.

52 maranak African sirvjjapjjayäta ukhajj usuntjjayätwa, ukatwa Comité de Sucursalajj Gran Bretaña markankir sucursalar cambiasipjjañajatak Cuerpo Gobernanter mayïna, jupanakajj iyaw sapjjänwa. Wal munasipkayäta uka asignación jaytasajj llaktʼasipjjayätwa, ukampis Gran Bretaña markankir Betelanjja, wali sumwa cuidasipkitu.

Jehová Diosamp jakäwijan irpayasiñ amtatajajj wali suma amtapunïnwa. Amuyujarjamak kuns luririskayäta ukhajja, jakäwijajj mayjäspänwa. Diosajja cheqa thaknam sarañatakejj kunas wakisi uk sumwa yatïna (Prov. 3:5, 6). Waynäkayäta ukhajj kunjamas mä jachʼa empresan trabajisi uk wal yatiñ munayäta. Ukampis Jehová Diosan markapan trabajisajj jukʼamp kusisitätwa. Cheqas Jehová Diosar servisajj wali kusisitaw jakasta.