Мүгәддәс Китаб һәјатлары дәјишир

«Мәнимлә һөрмәтлә рәфтар етдиләр» (ГВАДАЛУПЕ ВИЛАРЕАЛ).

ДОҒУЛДУҒУ ИЛ: 1964

ӨЛКӘ: МЕКСИКА

КЕЧМИШДӘ: ӘХЛАГСЫЗ

КЕЧМИШИМ. Мән Мексиканын Сонора штатынын Ермосилјо шәһәриндә бөјүјүб боја-баша чатмышам. Аиләдә једди ушаг идик. Јашадығымыз јердә инсанларын чоху јохсул иди. Мән балаҹа оланда атам вәфат етди. Анам ишләјиб бизи доландырырды. Адәтән ајагјалын ҝәзирдим, ајаггабы алмаға пулумуз олмурду. Кичик јашларымдан ишләмәјә башладым ки, аиләнин доланышығына көмәк едим. Башга аиләләр кими, биз дә чох балаҹа евдә јашајырдыг.

Анам чох вахт јанымызда олмурду дејә, бизи горуја билмирди. Алты јашым оланда 15 јашлы бир оғлан мәнә ҹинси тәҹавүз етмәјә башлады. Бу, узун мүддәт белә давам етди. Нәтиҹәдә, мән сексуал оријентасијаны итирдим. Дүшүнүрдүм ки, кишиләрә мејил салмаг нормалдыр. Һәкимләрә, кешишләрә мүраҹиәт етдим. Онлар мәни архајын етдиләр ки, бунда пис бир шеј јохдур, бу һиссләр нормалдыр.

Он дөрд јашында оланда гәрара ҝәлдим ки, һомосексуаллар кими ҝејиним, онлар кими давраным. Он бир ил о ҹүр һәјат сүрдүм. Һәтта о илләр әрзиндә бир нечә киши илә јашадым. Ахырда сач устасы олдум вә ҝөзәллик салону ачдым. Анҹаг хошбәхт дејилдим. Изтираб чәкирдим, хәјанәтлә үзләширдим. Баша дүшүрдүм ки, дүзҝүн јашамырам. Дүшүнүрдүм: «Ҝөрәсән, бу дүнјада етибарлы, ләјагәтли инсан вар?»

Баҹым һагда дүшүнүрдүм. О, Јеһованын Шаһидләри илә Мүгәддәс Китабы өјрәнмиш вә вәфтиз олунмушду. Тез-тез мәнә өјрәндикләриндән данышырды. Мән исә она мәһәл гојмурдум. Бунунла белә, онунла, аиләси илә фәхр едирдим. Ҝөрүрдүм ки, баҹымла јолдашы бир-бирини севир, бир-бири илә һөрмәтлә, меһрибан рәфтар едир. Бир гәдәр сонра бир нәфәр Јеһованын Шаһиди мәнимлә Мүгәддәс Китабы өјрәнмәјә башлады. Әввәлҹә, елә-белә өјрәнирдим, марағым јох иди. Анҹаг сонра һәр шеј дәјишди.

МҮГӘДДӘС КИТАБ ҺӘЈАТЫМЫ ДӘЈИШДИ. Шаһидләр мәни ибадәт ҝөрүшүнә дәвәт етдиләр. Дәвәти гәбул едиб ҝетдим. Санки башга бир аләмә дүшмүшдүм. Адәтән һамы мәни әлә салырды, амма Шаһидләр белә дејилди. Онлар мәни ҝүләрүзлә саламладылар, мәнимлә һөрмәтлә рәфтар етдиләр. Бу мәнә чох ҝүҹлү тәсир бағышлады.

Јеһованын Шаһидләринин топлантысына ҝедәндә онлар даһа чох хошума ҝәлдиләр. Ҝөрдүм ки, о гәдәр адамын һамысы мәним баҹым кими сәмимидир. Дүшүндүм, чохдандыр ахтардығым ләјагәтли инсанлар бәлкә елә онлардыр. Онларын арасындакы мәһәббәт, бирлик, бүтүн суаллара Мүгәддәс Китабдан ҹаваб вермәләри мәни һејран едирди. Баша дүшдүм ки, онларын јахшы инсан олмаларынын сәбәби Мүгәддәс Китабдыр. Һәмчинин ону да анладым ки, онлар кими олмаг үчүн ҝәрәк мән дә һәјатымда чох шеји дәјишим.

Әслиндә, мән бүсбүтүн дәјишилмәли идим. Ахы гадын кими јашајырдым. Данышығым, әдаларым, ҝејимим, сачым, достларым. Һәр бир шеј дәјишмәли иди. Әввәлки достларым мәни әлә салырдылар. Дејирдиләр: «Нијә белә едирсән? Олдуғун кими гал. Мүгәддәс Китабы өјрәнмә. Сәнин һәр шејин вар». Мәним үчүн ән чәтини әхлагсыз әмәлләрдән әл чәкмәк иди.

Бунунла белә, билирдим ки, һәр шеји дәјишмәк мүмкүндүр. 1 Коринфлиләрә 6:9—11 ајәләри үрәјимә ишләмишди: «Мәҝәр билмирсиниз ки, салеһ олмајанлар Аллаһын Падшаһлығына ҝирмәјәҹәкләр? Алданмајын. Нә әхлагсызлар, нә бүтпәрәстләр, нә зинакарлар, нә киши фаһишәләр, нә кишибазлар... Аллаһын Падшаһлығына ҝирмәјәҹәкләр. Сизләрдән дә бәзиләри белә иди. Анҹаг... јујулуб тәмизләндиниз». Јеһова кечмишдә инсанлара дәјишмәјә көмәк едиб, мәнә дә көмәк етди. Бу бир нечә ил чәкди. Амма Јеһованын Шаһидләринин мәсләһәти, мәһәббәти мәнә чох көмәк олду.

МӘНӘ ФАЈДАСЫ. Бу ҝүн мән мәсиһи кими јашајырам. Евлијәм, һәјат јолдашымла бирликдә оғлумузу Мүгәддәс Китабын өјүд-нәсиһәтилә тәрбијә едирик. Әввәлки һәјатым артыг кечмишдә галыб. Инди Јеһова илә јахын мүнасибәтләрим вар, Она ибадәт едирәм. Јығынҹагда ағсаггал кими хидмәт едирәм. Һәтта бир нечә нәфәрә Аллаһын Кәламындакы һәгигәтләри өјрәтмишәм. Һәјатымы дәјишмәјим анамы елә севиндирди ки, о да Мүгәддәс Китабы өјрәнмәјә разылашды вә вәфтиз олунду. Әхлагсыз һәјат сүрән баҹым да Јеһованын Шаһиди олду.

Әввәлләр мәним неҹә адам олдуғуму биләнләрдән дә бәзиләри етираф едир ки, јахшылыға доғру дәјишмишәм. Мән билирәм ки, бүтүн бу дәјишикликләри нәјин сајәсиндә етмишәм. Кечмишдә һәкимләрдән әлаҹ истәдим, мәнә пис мәсләһәт вердиләр. Анҹаг Јеһова мәнә көмәк етди. Өзүмү лајиг билмәсәм дә, О мәнә нәзәр салды, мәнимлә мәһәббәтлә, сәбирлә давранды. Белә ҝөзәл, гајғыкеш, меһрибан Аллаһын мәнә нәзәр салмасы, мәнә јахшы һәјат арзуламасы дәјишмәк үчүн мәнә ҝүҹ верди.