Мән Маҹарыстанын 1000 илдән артыг зәнҝин тарихә малик Секешфехервар шәһәриндә анадан олмушам. Тәәссүф ки, икинҹи дүнја мүһарибәси бурада дәһшәтли дағынтылара сәбәб олмушду. Бу һәлә дә јадымдадыр.

Балаҹа оланда нәнә-бабамла галырдым. Онларла бағлы хош хатирәләрим вар, хүсусилә дә нәнәм Елизабетлә бағлы. О мәнә Аллаһа ҝүҹлү иман ашылајыб. Үч јашымдан һәр ахшам нәнәмлә бир јердә Рәббин дуасы адланан дуаны тәкрарлајырдым. Бунунла белә, һарадаса 30 јашыма гәдәр дуадакы сөзләрин мәнасыны билмирдим.

Анамла атам ев алмаг үчүн ҝеҹә-ҝүндүз ишләјиб пул јығырдылар, она ҝөрә дә мәнә нәнәмлә бабам бахырды. Һәр ики һәфтәдән бир шәнбә ҝүнү јығышыб бирликдә јемәк јејирдик. Бу анлар мәним үчүн чох дәјәрли иди.

1958-ҹи илдә валидејнләримин арзусу чин олду: онлар ев алдылар. Артыг үчүмүз бир јердә гала биләрдик. Мән чох севинирдим, нәһајәт, валидејнләримлә бирликдә јашајаҹагдым! Анҹаг алты ајдан сонра бу хошбәхтлик гәфилдән сона чатды. Атам хәрчәнҝдән өлдү.

Чох сарсылмышдым. Јадымдадыр неҹә дуа еләмишдим: «Ај Аллаһ, мән сәнә јалвармышдым ки, атамы горујасан. Она еһтијаҹым вар. Мәним дуаларыма нә үчүн ҹаваб вермәдин?» Нараһат идим, атамын һарада олдуғуну билмәк истәјирдим. Дүшүнүрдүм: «Ҝөрәсән, О, ҝөјә ҝедиб? Јохса садәҹә өлүб вә даһа һеч вахт јашамајаҹаг?» Аталары олан ушаглара пахыллығым тутурду.

Узун илләр, демәк олар ки, һәр ҝүн гәбиристанлыға ҝедирдим. Атамын гәбринин јанында диз чөкүб дуа едирдим: «Ај Аллаһ, нә олар, де атам һарададыр». Мән һәмчинин һәјатын мәнасыны баша дүшмәк үчүн дә дуа едирдим.

13 јашым оланда гәрара ҝәлдим ки, алман дилини өјрәним. Фикирләширдим ки, суалларымын ҹавабыны зәнҝин алман әдәбијјатында тапа биләрәм. 1967-ҹи илдә Шәрги Алманијанын Јена шәһәриндә охумаға башладым. Алман фәлсәфәси барәдә китаблары һәвәслә охујурдум, хүсусилә дә инсанын мөвҹудлуғу илә бағлы оланлары. Бәзи мараглы фикирләр тапсам да, һеч бири мәни там гане етмәди. Суалларыма ҹаваб тапмаг үчүн дуа еләмәјә давам етдим.

1970-ҹи илдә Маҹарыстана гајытдым вә орада ҝәләҹәк һәјат јолдашым Роузла таныш олдум. О вахтлар Маҹарыстан коммунист режими алтында иди. Евләндикдән гыса мүддәт сонра Роузла бирҝә Австријаја гачдыг. Мәгсәдимиз дајымын јашадығы Сиднеј (Австралија) шәһәринә көчмәк иди.

Австријада тез бир вахтда иш тапдым. Бир ҝүн иш јолдашым мәнимлә сөһбәт етди вә деди ки, бүтүн суалларымын ҹавабыны Мүгәддәс Китабда тапа биләрәм. О мәнә Мүгәддәс Китаба әсасланан китаблар верди. Мән дәрһал бу китаблары охудум вә даһа чох өјрәнмәк истәдим. Буна ҝөрә дә бу китаблары нәшр едәнләрә, Јеһованын Шаһидләринә јазыб хаһиш етдим ки, мәнә јенә әдәбијјат ҝөндәрсинләр.

Роузла евлилијимизин илк илдөнүмүндә австријалы ҝәнҹ Јеһованын Шаһиди бизә ҝәлди. О истәдијим әдәбијјаты ҝәтирди вә Мүгәддәс Китабы арашдырмағы тәклиф етди, мән дә разылашдым. Мәним өјрәнмәјә бөјүк марағым вар иди, она ҝөрә дә һәфтәдә ики дәфә дәрс кечирдик. Һәр дәрс тәхминән дөрд саат чәкирди!

Шаһидләрин Мүгәддәс Китабдан өјрәтдикләри мәни һејран гојмушду. Онлар мәним маҹар дилиндә олан Мүгәддәс Китабымдан Аллаһын адынын Јеһова олдуғуну ҝөстәрәндә ҝөзләримә инана билмәдим. Мән дүз 27 ил килсәјә ҝетмишәм, амма орада бир дәфә дә олсун Аллаһын адыны чәкмәјибләр. Мүгәддәс Китабдан алдығым ајдын, мәнтигли ҹаваблар мәни һејран гојду. Мәсәлән, өјрәндим ки, өлүләр санки дәрин јухудадыр, һеч нә билмирләр (Ваиз 9:5, 10; Јәһја 11:11—15). Һәмчинин өјрәндим ки, Аллаһ өлүмүн мөвҹуд олмајаҹағы јени бир дүнја вәд едир (Вәһј 21:3, 4). Үмид едирәм ки, јени дүнјада бүтүн өлүләр дириләндә мән дә атамы јенидән ҝөрәҹәјәм (Һәвариләрин ишләри 24:15).

Роуз да ҹан-дилдән Мүгәддәс Китаб дәрсинә башлады. Биз тез инкишаф едирдик вә ҹәми ики аја дәрс вәсаитини битирдик! Јеһованын Шаһидләринин ибадәт евиндә кечирилән һәр ҝөрүшдә иштирак едирдик. Онларын арасындакы севҝи, хејирхаһлыг вә бирлик бизә ҝүҹлү тәсир етди (Јәһја 13:34, 35).

1976-ҹы илдә бизә Австралијаја ҝириш иҹазәси верилди. Бурада дәрһал Јеһованын Шаһидләрини тапдыг. Онларын сајәсиндә өзүмүзү евимиздәки кими һисс етдик. 1978-ҹи илдә өзүмүз дә Јеһованын Шаһиди олдуг.

Нәһајәт, узун мүддәт мәни нараһат едән суалларын ҹавабыны тапдым. Јеһова Аллаһа јахынлашдыгҹа, ән јахшы Атаја јахынлашырдым (Јагуб 4:8). Үстәлик, јени дүнјада доғма атамы јенидән ҝөрмәк кими мөһтәшәм бир үмидим олду (Јәһја 5:28, 29).

1989-ҹу илдә Роузла бирҝә гәрара ҝәлдик ки, Маҹарыстана гајыдыб, әгидәмизи достларымызла, гоһумларымызла вә башгалары илә бөлүшәк. Бизим јүзләрлә инсана Мүгәддәс Китабы өјрәтмәк имканымыз олду. 70-дән чоху Јеһоваја ибадәтдә бизә гошулду, онларын сырасында анам да вар.

Мән 17 ил суалларыма ҹаваб тапмаг үчүн дуа етмишәм. Бунун үстүндән 39 ил кечиб вә мән һәлә дә дуа едирәм, амма инди дуада белә дејирәм: «Шүкүр олсун сәнә, еј сәмави Атам, ушаглығымда етдијим дуалара ҹаваб вердијин үчүн».