• ДОҒУЛДУҒУ ИЛ: 1963

• ӨЛКӘ: БРИТАНИЈА

• КЕЧМИШДӘ: ПРЕСТИЖЛИ ИШИ ОЛУБ

КЕЧМИШИМ.

Мән Ҹәнуби Лондонун Кројдон бөлҝәсиндә доғулмушам. Аиләдә доггуз ушагдан алтынҹысы идим. Валидејнләрим әслән Кариб дәнизиндә јерләшән Сент-Винсент адасындан идиләр. Анам методист килсәсинә ҝедирди. Мәним исә Аллаһ барәдә өјрәнмәјә һеч марағым јох иди. Анҹаг елм алмаға бөјүк һәвәсим вар иди. Мәктәб тәтилләрини јахынлыгдакы ҝөлүн кәнарында кечирирдим. Орада отуруб китабханадан ҝөтүрдүјүм китаблары охујурдум.

Мәктәби битирдикдән бир нечә ил сонра баша дүшдүм ки, мәзлум инсанлара көмәк етмәк истәјирәм. Елә ишә дүзәлдим ки, орада евсиз-ешиксизләрә, физики гүсурлу вә өјрәнмәдә чәтинлији оланлара көмәк едирдим. Сонра университетдә тибб саһәси илә әлагәли факүлтәјә дахил олдум. Университети битирдикдән сонра ард-арда престижли ишләрдә ишләдим. Дәбдәбә ичиндә јашајырдым. Сәрбәст мәсләһәтчи вә сосиал тәдгигатчы идим. Иш үчүн мәнә тәкҹә нотбук вә интернетә чыхыш лазым иди. Вахташыры бир нечә һәфтәлијә хариҹи өлкәләрә учурдум, хошума ҝәлән һотелләрдә галырдым, ҝөзәл јерләрдә олурдум, формада галмаг үчүн спа салонларына, идман залларына ҝедирдим. Һәјатымдан чох разы идим. Амма мәзлум инсанлар да һеч вахт јадымдан чыхмырды.

МҮГӘДДӘС КИТАБ ҺӘЈАТЫМЫ ДӘЈИШДИ.

Илләрлә дүшүнмүшәм ки, биз нијә мөвҹудуг, һәјатын мәнасы нәдир. Амма һеч вахт бу суаллара Мүгәддәс Китабдан ҹаваб тапмаға чалышмамышам. 1999-ҹу илдә, артыг Јеһованын Шаһиди олан кичик баҹым Маргарет бир рәфигәси илә мәнә баш чәкмәјә ҝәлди. Рәфигәси мәнә чох диггәт, гајғы ҝөстәрди. Онунла Мүгәддәс Китабы өјрәнмәјә разылашдым. Амма чох јаваш инкишаф едирдим. Карјерам, һәјат тәрзим вахтымы чох алырды.

2002-ҹи илин јајында Инҝилтәрәнин ҹәнуб-гәрбинә көчдүм. Орада докторлуг дәрәҹәсини алмаг үчүн јенидән университетдә тәһсилими давам етдирдим. Оғлуму да ҝөтүрүб тез-тез ибадәт ҝөрүшләринә ҝетмәјә башладым. Али тәһсили чох севирдим. Амма Мүгәддәс Китабы өјрәндикҹә дүнјадакы проблемләри вә онларын һәлли јолуну даһа јахшы баша дүшүрдүм. Мәтта 6:24 ајәсиндәки сөзләрин мәнасыны дәрк етмәјә башладым. Орада дејилир ки, инсан ики ағаја гуллуг едә билмәз. Ја Аллаһа гуллуг етмәлидир, ја да вар-дөвләтә. Анлајырдым ки, артыг сечим етмәлијәм.

Ондан әввәлки ил тез-тез евдә груп шәклиндә кечирилән Мүгәддәс Китаб дәрсинә ҝедирдим. Орада Јеһованын Шаһидләри «Гајғыкеш Јарадан мөвҹуддурму?» * нәшрини арашдырырдылар. Мән әмин олдум ки, јалныз Јарадан Аллаһымыз Јеһова бәшәријјәтин проблемләрини һәлл едә биләр. Университетдә бизә өјрәдирдиләр ки, инсанын Аллаһа еһтијаҹы јохдур. Бу мәним һеч хошума ҝәлмәди. Ики ајдан сонра университетдән чыхдым вә руһани мәгсәдләрә ҹан атмаг гәрара ҝәлдим.

Мәсәлләр 3:5, 6 ајәләри мәни тәшвиг етди ки, һәјат тәрзими дәјишим. Орада јазылыб: «Бүтүн гәлбинлә Јеһоваја етибар ет, өз ағлына ҝүвәнмә. Һәр ишиндә Ону дүшүн, О да јолларыны рәван едәр». Сәмави Атамыз барәдә өјрәнмәк докторлуг дәрәҹәсинин ҝәтирәҹәји вар-дөвләтдән вә вәзифәдән гат-гат дәјәрли иди. Јеһованын јер үзү илә бағлы нијјәти һагда, Иса Мәсиһин бизим уғрумузда һәјатыны гурбан вермәси барәдә өјрәндикҹә һәјатымы Она һәср етмәк истәјирдим. 2003-ҹү илин апрел ајында вәфтиз олундум. Сонра исә тәдриҹән һәјатымы садәләшдирмәјә башладым.

МӘНӘ ФАЈДАСЫ.

Јеһова илә достлуг мисилсиз бир немәтдир. Ону таныдыгдан сонра гәлбимә раһатлыг, севинҹ һаким кәсилиб. Һәмчинин Јеһованы севән инсанларла достлуг етмәк дә һәјатыма севинҹ гатыр.

Һәлә дә өјрәнмәји севирәм вә Мүгәддәс Китаб, ибадәт ҝөрүшләри бу һәвәсими там тәмин едир. Етигадымы севә-севә инсанларла бөлүшүрәм. Бу, һәјатымда ән ваҹиб ишдир, чүнки бунун сајәсиндә инсанлара көмәк едирәм ки, һәм инди хошбәхт олсунлар, һәм дә ҝәләҹәјә ҝөзәл үмидләри олсун. 2008-ҹи илин ијун ајындан тамвахтлы хидмәт едирәм. Инди даһа хошбәхтәм. Һәјатын мәнасыны тапмышам. Буна ҝөрә Јеһоваја үрәкдән миннәтдарам.