1. Нәјә әминик?

 БИЗ Јеһованын халгыјыг. Билирик ки, О бизи севир вә бизим үчүн ән јахшы һәјаты арзулајыр (Ром. 8:35—39). Һәмчинин әминик ки, Мүгәддәс Китаб принсипләринә әмәл етмәк бизим хејримизәдир (Әшј. 48:17, 18). Бәс ҝөзләнилмәз проблемләрлә үзләшәндә нә етмәлијик?

2. Һансы проблемләримиз олур вә бу заман биздә һансы суаллар јарана биләр?

² Јеһованын һәр бир хидмәтчиси чәтинликләрлә үзләшир. Мәсәлән, ола билсин, аилә үзвүмүзүн һансыса һәрәкәти бизи мәјус етсин; сағламлығымызда јаранан проблемә ҝөрә Јеһоваја истәдијимиз кими хидмәт едә билмәјәк; тәбии фәлакәтдән зәрәр чәкәк; јахуд иманымыза ҝөрә тәгиб олунаг. Бу заман дүшүнә биләрик: «Нијә башыма белә бир шеј ҝәлди? Ҝөрәсән нәји сәһв етмишәм? Јеһова мәнә даһа көмәк етмир?» Нә вахтса бу ҹүр һиссләр кечирмисиниз? Әҝәр кечирмисинизсә, руһдан дүшмәјин. Јеһованын чох хидмәтчисиндә белә һиссләр олуб (Зәб. 22:1, 2; Һәб. 1:2, 3).

3. Зәбур 34:19 ајәсиндән нә өјрәнирик?

³ Зәбур 34:19 ајәсини охујун. Бу мәзмурда ики ваҹиб фикир вар: 1) Салеһ инсанлар проблемләрлә үзләшир, 2) Јеһова онлары бу проблемләрдән гуртарыр. Неҹә? Мәсәлән, һәјата реал бахмаға көмәк едир. Јеһова хидмәтимиздән севинҹ дујаҹағымыза сөз верир, амма бу дүнјада һәјатымызын проблемсиз олаҹағына зәманәт вермир (Әшј. 66:14).  О истәјир ки, биз үмидимизи ҝәләҹәјә — вәд етдији әбәди һәјата бағлајаг (2 Кор. 4:16—18). О вахта гәдәр исә Јеһова бизә һәр ҝүн Она хидмәт етмәјә көмәк едәҹәк (Мәрс. 3:22—24).

4. Бу мәгаләдә нәји арашдыраҹағыг?

⁴ Бу ҝүндән сабаһа ҝүман јохдур, истәнилән ан ҝөзләнилмәз проблемләрлә үзләшә биләрик. Амма бу мәгаләдән ҝөрәҹәјимиз кими, Јеһова Она архаланан хидмәтчиләринә һәмишә дајаг олур. Һәм кечмишдәки, һәм дә бизим дөврүмүздәки иманлы инсанларын нүмунәләри буну ајдын ҝөстәрир (Зәб. 55:22). Бу нүмунәләри арашдырдыгҹа өзүнүзә нөвбәти суаллары верин: «Мән ејни вәзијјәтлә гаршылашсајдым, неҹә давранардым? Бу һадисәләр Јеһоваја етибарымы неҹә мөһкәмләндирир? Нә өјрәндим, нәји һәјатымда тәтбиг едә биләрәм?»

5. Лабанын уҹбатындан Јагуб нәләр чәкди? (Үз габығындакы шәклә бахын.)

⁵ Јеһованын гәдимдә јашамыш хидмәтчиләри ҝөзләмәдикләри чәтинликләрлә үзләшмишдиләр. Онлардан бири Јагубдур. Атасы она демишди ки, дајысы Лабанын гызларындан бири илә евләнсин вә ону әмин етмишди ки, белә давранса, Јеһова она бол мүкафат верәҹәк (Јар. 28:1—4). Чүнки Лабанҝил Јеһоваја ибадәт едирди. Јагуб доғру гәрар верәрәк Кәнан дијарына јолланыр. Орада Лабанын евинә ҝедир. Лабанын Ләја вә Рәһилә адлы ики гызы вар иди. Јагуб онун кичик гызы Рәһиләни ҝөрәндә она бир көнүлдән мин көнүлә ашиг олур. Һәтта онунла евләнмәздән өнҹә Лабан үчүн једди ил ишләмәјә разы олур (Јар. 29:18). Амма һеч дә һәр шеј Јагубун истәдији кими олмур. Лабан она кәләк ҝәләрәк бөјүк гызы Ләја илә евләндирир. О, Јагуба дејир ки, бир һәфтә сонра Рәһилә илә дә евләнә биләр, амма бир шәртлә ки, онун үчүн дә једди ил ишләмәлидир (Јар. 29:25—27). Лабан Јагуба ишиндә дә фырылдаг ҝәлирди. Үмумиликдә о, Јагубу нә аз, нә чох, дүз 20 ил әрзиндә өз мараглары үчүн истифадә етмишди! (Јар. 31:41, 42).

6. Јагуб даһа һансы чәтинликләрлә үзләшмишди?

⁶ Јагубун проблемләри бунунла битмәди. Онун бөјүк аиләси вар иди вә оғланлары бир-бири илә јола ҝетмирдиләр. Һәтта онлар гардашлары Јусифи гул кими сатмышдылар. Јагубун ики оғлу Шәмун вә Лави һәм аиләләринин, һәм дә Јеһованын адына ләкә ҝәтирмишдиләр. Үстәлик, Јагубун севимли арвады Рәһилә икинҹи өвладларыны дүнјаја ҝәтирәркән вәфат етмишди. Һәлә бу азмыш кими, Јагуб аҹлыг уҹбатындан гоҹа јашында Мисирә көчмәли олмушду (Јар. 34:30; 35:16—19; 37:28; 45:9—11, 28).

7. Јеһова Јагубдан разы галдығыны неҹә ҝөстәрди?

⁷ Башына бу гәдәр бәлалар ҝәлсә дә, Јагуб һеч вахт Јеһоваја вә Онун вәдләринә иманыны итирмәди. Јеһова да Јагуба ҝөстәрди ки, ондан разыдыр. Мәсәлән, Лабан нә гәдәр һијләјә әл атса да, Јеһова Јагуба бәрәкәт верирди; онун мал-мүлкү артдыгҹа артырды. Даһа сонра о, өлмүш билдији оғлу Јусифә говушду. Ҝөрүн о буна ҝөрә Јеһоваја неҹә миннәтдар иди! Јагуб бүтүн бу чәтинликләрә Јеһова илә мөһкәм достлуғун сајәсиндә таб ҝәтирди (Јар. 30:43; 32:9, 10; 46:28—30). Ејнилә, биз дә Јеһова илә мөһкәм мүнасибәтләримизи горујуб сахламағын сајәсиндә ҝөзләнилмәз чәтинликләр гаршысында мәтин гала биләрик.

8. Давуд нә етмәк арзусунда иди?

⁸ Давуд падшаһ Јеһованын јолунда  үрәјиндән кечән һәр шеји едә билмәди. Онун ән бөјүк арзусу Јеһова үчүн мәбәд тикмәк иди. Давуд бу истәјини Натан пејғәмбәрә билдирди. Пејғәмбәр дә ону үрәкләндириб деди: «Үрәјиндә нә нијјәт тутмусан, ону да ет. Аллаһ сәнинләдир» (1 Салн. 17:1, 2). Сиз бир Давудун севинҹини тәсәввүр един! Јәгин, Давуд дәрһал бу бөјүк лајиһәни планлашдырмаға башлады.

9. Давуд бәд хәбәр аланда нә етди?

⁹ Амма чох кечмәмиш Натан бәд хәбәрлә гајытды. «Һәмин ҝеҹә» Јеһова Натана деди ки, Онун үчүн мәбәди Давуд јох, онун оғулларындан бири тикәҹәк (1 Салн. 17:3, 4, 11, 12). Буну ешидәндә Давуд нә етди? Гаршысына башга мәгсәд гојду. О, пул вә материал топламаға башлады. Бунунла да оғлу Сүлејмана лајиһәни һәјата кечирмәјә көмәк етди (1 Салн. 29:1—5).

10. Јеһова Давуда һансы немәти верди?

¹⁰ Јеһова Давуда мәбәди тикмәјәҹәјини дејәндән дәрһал сонра онунла әһд бағлады. О сөз верди ки, Давудун нәслиндән ҝәлән бир нәфәр әбәдијјән һакимијјәт сүрәҹәк (2 Ишм. 7:16). Јени дүнјада миниллик һакимијјәт заманы Давуд өјрәнәҹәк ки, Падшаһ Иса Мәсиһ онун нәслиндән ҝәлиб. Ҝөрүн буну биләндә о нә гәдәр севинәҹәк! Ола билсин ки, биз дә Јеһова үчүн үрәјимиздән кечән һәр шеји едә билмәјәк. Амма, бәлкә, Јеһова бизә еһтијатда ағлымыза белә ҝәлмәјән немәтләр сахлајыр?!

11. Падшаһлыг ҝөзләдикләри вахтда ҝәлмәсә дә, биринҹи әсрдәки мәсиһиләр һансы немәтләри алдылар? (Һәвариләрин ишләри 6:7).

¹¹ Биринҹи әсрдә јашајан мәсиһиләр дә ҝөзләнилмәз чәтинликләрлә үзләшмишдиләр. Мәсәлән, онлар Аллаһын Падшаһлығынын ҝәлишини һәсрәтлә ҝөзләјирдиләр. Амма онун нә вахт ҝәләҹәјини билмирдиләр (Һәв. 1:6, 7). Бәс бу вахт әрзиндә онлар нә едирдиләр? Тәблиғ иши илә мәшғул олурдулар. Беләҹә, хош хәбәр ҝетдикҹә вүсәт алырды вә мәсиһиләр ајдын ҝөрүрдүләр ки, Јеһова онларын зәһмәтинә бәрәкәт верир. (Һәвариләрин ишләри 6:7 ајәсини охујун.)

12. Гытлыг заманы биринҹи әсрдәки мәсиһиләр неҹә давранды?

¹² Бир мүддәт сонра ҝөзләнилмәдән «бүтүн јер үзүндә» бәрк гытлыг башлады (Һәв. 11:28). Бу, биринҹи әсрдәки мәсиһиләрдән дә јан кечмәди. Бир дүшүнүн, бу мәсиһиләр неҹә әзијјәт чәкирдиләр. Јәгин, аилә башчыларыны дәрд ҝөтүрмүшдү ки, евдәкиләри неҹә доландыраҹаглар. Бәс хидмәтләрини ҝенишләндирмәк истәјән ҝәнҹләр барәдә нә демәк олар? Онларын мәгсәдләри нә јердә галды? Јәгин, чашбаш галмышдылар. Һәр неҹә олса да, мәсиһиләр вәзијјәтә ујғунлашдылар. Онлар тәблиғ ишиндә баҹардыглары гәдәр иштирак едирдиләр вә нәләри вар идисә, Јәһудијјәдәки диндашлары илә бөлүшүрдүләр (Һәв. 11:29, 30).

13. Гытлыг заманы мәсиһиләр һансы немәтләри алдылар?

¹³ Гытлыг заманы мәсиһиләр һансы немәтләри алдылар? Мадди јардым аланлар билаваситә Јеһованын гајғысыны дујдулар (Мәт. 6:31—33). Јәгин, онларын дадына чатан диндашлары илә мүнасибәтләри даһа да мөһкәмләнди. Ианә едәнләр, һәмчинин јардым ишинә һәр һансы јолла дәстәк оланлар исә вермәјин ҝәтирдији хошбәхтлији даддылар (Һәв. 20:35). Јеһова бу јени вәзијјәтә ујғунлашан һәр кәсә бол мүкафат верди.

14. Барнәба илә Булусун башына нә ҝәлди вә бунун нәтиҹәси нә олду? (Һәвариләрин ишләри 14:21, 22).

¹⁴ Биринҹи әсрдәки мәсиһиләр тез-тез тәгиб олунурдулар. Бәзән исә бу, һеч ҝөзләмәдикләри вахтда олурду. Ҝәлин ҝөрәк  Барнәба илә Булус Листрада тәблиғ едәркән башларына нә ҝәлмишди. Әввәл-әввәл шәһәрин сакинләри Булусҝили хош гаршылајыб, онлара гулаг асдылар. Амма сонра тәгибчиләр «ҹамааты гызышдырдылар» вә онлар Булусу даша басдылар, сонра да ону өлмүш саныб шәһәрдән кәнара атдылар (Һәв. 14:19). Буна бахмајараг, Барнәба илә Булус ҝедиб башга јердә тәблиғ етдиләр. Бәс нәтиҹә нә олду? Онлар «хејли шаҝирд» һазырладылар, үстәлик, сөзләри вә нүмунәләри илә диндашларыны мөһкәмләндирдиләр. (Һәвариләрин ишләри 14:21, 22 ајәләрини охујун.) Бәли, Барнәба илә Булусун тәгибләр гаршысында тәслим олмамалары чох адама фајда ҝәтирди. Биз дә тәслим олмајыб Јеһованын бујурдуғу иши ҝөрсәк, немәт саһиби олаҹағыг.

15. Александр Макмиллан гардашдан нә өјрәнирсиниз?

¹⁵ 1914-ҹү илдән өнҹә Јеһованын халгы бәзи һадисәләрин баш верәҹәјини һәсрәтлә ҝөзләјирди. Ҝөтүрәк елә Александр Макмиллан гардашы. Һамы кими, о да дүшүнүрдү ки, тезликлә ҝөјләр мүкафатыны алаҹаг. 1914-ҹү илин сентјабр ајында сөјләдији нитгдә гардаш демишди: «Чох ҝүман ки, бу, сөјләдијим сонунҹу ачыг нитгдир». Амма әлбәттә ки, бу, Александр гардашын сон нитги дејилди. Сонралар о јазмышды: «Ҝөрүнүр, бәзиләримиз дәрһал ҝөјләр мүкафатыны алаҹағымызы дүшүнмәклә бир аз тәләсмишик. Биз ҹанла-башла Ағаја хидмәт етмәлијик». Александр гардаш белә дә етди. О, шөвглә хидмәтини јеринә јетирди. Гардаш битәрәфлијинә ҝөрә һәбсдә олан чохлу гардашы руһландырмышды. Гоҹа јашларында белә јығынҹаглардан галмырды. Ҝөрдүјүмүз кими, гардаш мүкафатыны алаҹағыны ҝөзләјәркән вахтыны Јеһоваја хидмәтә сәрф етди. Бәс о, бунунла нә әлдә етди? 1966-ҹы илдә өлүмүндән гыса мүддәт әввәл о јазмышды: «Иманым һәмишәки кими ҝүҹлүдүр». Гардаш һәр биримиз үчүн чох ҝөзәл өрнәкдир. Әҝәр сынагларымыз ҝөзләдијимиздән дә узун чәкирсә, гардашын нүмунәсиндән чох шеј өјрәнә биләрик (Ибр. 13:7).

16. Һерберт гардашла һәјат јолдашы һансы ҝөзләнилмәз вәзијјәтлә үзләшмишди? (Јагуб 4:14).

¹⁶ Јеһованын халгы арасында чохлары сәһһәтләриндә гәфил јаранан проблемләрлә мүбаризә апарыр. Онлардан бири дә Һерберт Ҹеннингс b гардашдыр. О өз биографијасында дејир ки, арвады илә Ганада хүсуси тәјинатлы мүждәчи кими хидмәт едирдиләр вә бу хидмәти чох севирдиләр. Амма бир ҝүн она ҹидди әһвал позғунлуғу диагнозу гојулду. Һерберт гардаш Јагуб 4:14 ајәсини ситат ҝәтирәрәк демишди ки, башына белә бир шејин ҝәләҹәјини ҝөзләмирди. (Ајәни охујун.) О јазыр: «Биз реаллығы гәбул етдик, Ганадан вә әзиз достларымыздан ајрылыб, [мүалиҹәм үчүн] Канадаја гајытмаг гәрарына ҝәлдик». Јеһова Һерберт гардаша вә онун јолдашына үзләшдикләри чәтинлијә бахмајараг, Она сәдагәтлә хидмәт етмәләринә көмәк етди.

17. Һерберт гардашын нүмунәси башгаларына неҹә көмәк едиб?

¹⁷ Һерберт гардашын биографијасында һиссләрини ачыг јазмасынын башгаларына бөјүк көмәји дәјиб. Бир баҹы јазыр: «Һәлә һеч бир мәгалә мәнә бу дәрәҹәдә тәсир етмәмишди… Һерберт гардашын сағламлығынын гајғысына галмаг үчүн тәјинатыны дајандырмасы мәнә өз вәзијјәтимә  таразлы јанашмаға көмәк етди». Буна бәнзәр сөзләри бир гардаш да јазмышды: «Мән он ил јығынҹагда ағсаггал кими хидмәт етмишәм. Амма әфсуслар олсун ки, психоложи хәстәлијимә ҝөрә бу дәјәрли мәсулијјәтләрими дајандырмалы олдум. Өзүмү о гәдәр уғурсуз һисс едирдим ки, һәтта баҹы-гардашларын биографијасыны охумаг мәни бәдбинләшдирирди… Лакин Һерберт гардашын дөзүмү һагда охујанда дирчәлдим». Ҝөрдүјүмүз кими, ҝөзләнилмәз вәзијјәтләрдә дөзүм ҝөстәрмәклә башгаларыны руһландыра биләрик. Һәјатда һәр шеј үмид етдијимиз кими олмаса да, биз јенә дә башгаларына иман вә дөзүм нүмунәси ола биләрик (1 Бут. 5:9).

18. Ниҝеријадан олан дул баҹынын нүмунәсиндән нә өјрәнирик? (Сәһнәләшдирилмиш шәклә бахын.)

¹⁸ COVID-19 пандемијасы кими фәлакәтләр Јеһованын чох хидмәтчисинә зијан вуруб. Мәсәлән, Ниҝеријада јашајан дул баҹымызын мадди вәзијјәти чох ашағы иди. Бир сәһәр гызы она дејир ки, биширмәјә садәҹә бир стәкан дүјүләри галыб. Бәс ондан сонра нә јејәҹәкләр? Баҹымыз гызына дејир ки, нә пуллары галыб, нә дә јемәкләри. Амма сарфатлы дул гадындан нүмунә ҝөтүрәрәк, сон јемәкләрини бишириб Јеһоваја ҝүвәнмәлидирләр (1 Пад. 17:8—16). Һәлә һеч ҝүнорта үчүн нә јејәҹәкләрини дүшүнмәмишдиләр ки, баҹы-гардашлар онлара ики-үч һәфтәлик әрзаг ҝөндәрдиләр. Баҹы дејир: «Һеч ағлыма ҝәлмәзди ки, Јеһова гызымла сөһбәтимә бу гәдәр диггәтлә гулаг асар». Доғрудан да, Јеһоваја етибар едәндә һәјатда үзләшдијимиз гәфил проблемләр бизи Она даһа да јахынлашдырыр (1 Бут. 5:6, 7).

19. Алексеј Јершов гардаш һансы тәгиблә үзләшиб?

¹⁹ Сон илләр әрзиндә чохлу баҹы-гардашымыз ҝөзләмәдикләри һалда тәгибләрлә үзләшибләр. Ҝәлин Русијада јашајан Алексеј  Јершов гардашын һадисәсинә бахаг. О, 1994-ҹү илдә вәфтиз олунуб. Һәмин вахт Русијадакы баҹы-гардашлар нисбәтән азад шәкилдә хидмәт едирдиләр. Лакин илләр сонра Русијада вәзијјәт дәјишди. 2020-ҹи илдә мүфәттишләр Алексејин евинә сохулуб, ахтарыш апардылар вә бәзи әшјаларыны мүсадирә етдиләр. Бир нечә ај сонра гардаш барәдә ҹинајәт иши ачылды. Үстәлик, иттиһамлар бир нәфәрин апардығы видеојазылар әсасында иди. Бу адам бир илдән чох иди ки, өзүнү Мүгәддәс Китабла марагланан инсан кими гәләмә верирди. Сән сатгынлыға бир бах!

20. Алексеј гардаш Јеһова илә мүнасибәтини неҹә мөһкәмләндирди?

²⁰ Гардашын үзләшдији чәтинлијин һансыса мүсбәт нәтиҹәси олду? Бәли. Онун Јеһова илә мүнасибәти даһа да мөһкәмләнди. Алексеј дејир: «Јолдашымла даһа чох дуа етмәјә башладыг. Мән баша дүшүрәм ки, Јеһованын көмәји олмадан јаранмыш вәзијјәтин өһдәсиндән ҝәлә билмәрәм». О, сөзүнә әлавә едир: «Руһ дүшкүнлүјү илә мүбаризәдә мәнә шәхси мүталиә көмәк едир. Мән кечмишдә јашамыш Аллаһын садиг хидмәтчиләринин нүмунәси үзәриндә дүшүнүрәм. Мүгәддәс Китабда сакитлији горумағын вә Јеһоваја етибар етмәјин ваҹиблијини ҝөстәрән чохлу нүмунәләр вар».

21. Бу мәгаләдән нә өјрәндик?

²¹ Бу мәгаләдән нә өјрәндик? Индики дүнјада билмирсән сабаһ башына нә ҝәләҹәк. Амма Јеһова Она етибар едән хидмәтчиләринә һәмишә дајаг олур. Мәгаләнин әсас ајәсиндә дејилдији кими, «салеһин дәрди-сәри чох олар, лакин Јеһова ону бүтүн бәлалардан гуртарар» (Зәб. 34:19). Одур ки, ҝәлин диггәтимизи бәлалара јох, Јеһованын вердији ҝүҹә ҹәмләјәк. Онда биз дә һәвари Булус кими дејәҹәјик: «Мәнә гүввәт верәнин сајәсиндә һәр шејә ҝүҹүм чатыр» (Филип. 4:13).