1. Бир ушаг дирилмәјә олан иманыны һансы сөзләрлә ҝөстәрмишди?

 МЕТЈУ адлы бир оғланын сәһһәтиндә ҹидди проблем вар иди вә о, бир нечә дәфә әмәлијјат олунмалы иди. Бир дәфә онлар аиләликҹә JW телевизијасынын ајлыг програмына бахырдылар. Һәмин вахт Метјунун једди јашы вар иди. Програмын сонуна јахын мусигили видео ҝөстәрилди. Видео дирилмә заманы өлән әзизләримизи гаршыламагла бағлы иди b. Програм гуртарандан сонра Метју валидејнләринә јахынлашды вә әлләриндән тутараг деди: «Ана, ата, ҝөрүрсүнүз? Мән өлсәм дә дириләҹәјәм. Мәни ҝөзләјәрсиниз. Һәр шеј јахшы олаҹаг». Тәсәввүр едирсиниз, Метјунун валидејнләри дирилмәнин оғуллары үчүн бу гәдәр реал олдуғуну ҝөрәндә һансы һиссләри кечирмишдиләр?!

2, 3. Нәјә ҝөрә дирилмә үмиди барәдә дүшүнмәлијик?

² Јахшы оларды ки, вахташыры һәр биримиз дирилмә үмиди барәдә дүшүнәк (Јәһ. 5:28, 29). Нәјә ҝөрә? Чүнки һәјатда нә илә үзләшәҹәјимизи билмирик. Ола билсин, ҹидди хәстәлијә тутулаг вә ја әзиз адамымызы гәфил итирәк (Ваиз 9:11; Јаг. 4:13, 14). Дирилмәјә үмид бизә бу ҹүр чәтинликләрә дөзмәјә көмәк едәҹәк (1 Салон. 4:13). Бу үмидимиз нәјә әсасланыр? Мүгәддәс Китабы охујанда әмин олуруг ки, сәмави Атамыз бизи чох јахшы таныјыр вә бизә дәрин мәһәббәт бәсләјир (Лука 12:7). Јеһова бизи јахшы танымаса, бизи ејни хасијјәтлә вә ејни хатирәләрлә неҹә һәјата гајтара биләр? Һәмчинин ҝөрүн Јеһова бизи нә гәдәр севир ки, бизә әбәди јашамаг имканы вериб. Һәтта өлсәк белә О бизи дирилдәҹәк.

³ Бу мәгаләдә өјрәнәҹәјик ки, дирилмәнин олаҹағына нәјә ҝөрә инана биләрик. Сонра исә иманымызы мөһкәмләндирән бир һадисәјә нәзәр салаҹағыг. Мәгаләнин әсас ајәсиндә  јазылан «Гардашын дириләҹәк» сөзләри мәһз һәмин һадисәдән ҝөтүрүлүб (Јәһ. 11:23). Сонда мүзакирә едәҹәјик ки, дирилмәјә үмидимизин даһа реал олмасы үчүн нә едә биләрик.

4. Киминсә сөзүнүн үстүндә дураҹағына инанмаг үчүн нәјә әмин олмалыјыг? Нүмунә чәкин.

⁴ Киминсә сөзүнүн үстүндә дураҹағыны неҹә билмәк олар? Бунун үчүн әмин олмалыјыг ки, о, буну етмәји үрәкдән истәјир вә буна гадирдир. Ҝәлин бир нүмунәјә бахаг. Тәсәввүр един ки, гасырға евинизә ҝүҹлү зәрәр јетириб. Бир достунуз сизә сөз вериб дејир: «Үрәјини сыхма, еви тәмир етмәјә сәнә көмәк едәҹәјәм». Достунуз бу сөзләри сәмими-гәлбдән дејир. Буна ҝөрә дә әминсиниз ки, сизә көмәк етмәји үрәкдән истәјир. Әҝәр о, тәҹрүбәли бәннадырса вә лазыми аләтләри варса, билирсиниз ки, о, буну баҹарар. Сиз онун сөзүнә инанырсыныз. Бәс Аллаһын дирилмә вәди барәдә нә демәк олар? Јеһова өлүләри дирилтмәји доғрудан да истәјир? О, буна гадирдир?

5, 6. Јеһованын өлүләри дирилтмәк истәдијинә нәјә ҝөрә әминик?

⁵ Јараданымыз өлүләри дирилтмәк истәјир? Әлбәттә. О, Мүгәддәс Китабын бир нечә јазарына өлүләри дирилдәҹәји илә бағлы вәдини јаздырыб (Әшј. 26:19; Һушә 13:14; Вәһј 20:11—13). Јеһова сөз верәндә ону јеринә јетирир, О, сөзүнүн ағасыдыр (Јуш. 23:14). Аллаһымыз өлүләри һәјата гајтараҹағы ҝүнү һәсрәтлә ҝөзләјир. Буну һарадан билирик?

⁶ Ҝәлин Әјјуб пејғәмбәрин сөзләринә нәзәрә салаг. О әмин иди ки, өлсә белә Јеһова ону дирилдәҹәји ҝүнүн һәсрәтини чәкәҹәк (Әјј. 14:14, 15). Јеһова бүтүн өлән хидмәтчиләринә ејни һиссләри бәсләјир. Јеһова онлары хошбәхт, сағлам һәјата гајтармағы арзулајыр. Бәс Ону танымадан өлән милјардларла инсан барәдә нә демәк олар? Аллаһымызын онларла бағлы нијјәти нәдир? Мәһәббәтли Јараданымыз онлары да һәјата гајтараҹаг (Һәв. 24:15). Јеһова истәјир ки, һәмин инсанларын да онунла дост олмаг, јер үзүндә әбәди јашамаг фүрсәти олсун (Јәһ. 3:16). Ҝөрдүјүмүз кими, Јеһова өлүләри дирилтмәји чох истәјир.

7, 8. Јеһованын өлүләри дирилтмәјә гадир олдуғуна нәјә ҝөрә әминик?

⁷ Бәс Јеһова өлүләри дирилтмәјә гадирдир? Әлбәттә. Ахы О, Гүдрәт Саһибидир (Вәһј 1:8). О, истәнилән дүшмәни, һәтта өлүмү мәһв етмәјә гадирдир (1 Кор. 15:26). Буну билмәк бизи гүввәтләндирир, раһатлыг верир. Ҝәлин Емма Арнолд адлы баҹынын нүмунәсинә бахаг. О вә аиләси Икинҹи Дүнја мүһарибәси заманы ҝүҹлү иман сынағы илә үзләшмишдиләр. Емма әзизләринин өлүмүнә ҝөрә пәришан олан гызына тәсәлли вермәк үчүн белә демишди: «Әҝәр өлүм әбәди олсајды, о, Аллаһдан да ҝүҹлү оларды». Тәбии ки, Аллаһдан ҝүҹлү һеч нә ола билмәз! Гадир Аллаһымыз һәјаты јаратдығы кими, өлүләри јенидән һәјата гајтармаға да гадирдир.

⁸ Јеһованын өлүләри дирилтмәјә гадир олдуғуну сүбут едән башга бир амил дә вар: Онун јаддашынын һәдди-һүдуду јохдур. Јеһова улдузларын һәр бирини ады илә чағырыр (Әшј. 40:26). Ејнилә өлән кәсләрин дә һеч бирини унутмур (Әјј. 14:13; Лука 20:37, 38). Дирилдәҹәји кәсләрлә бағлы һәр шеј — һәм ҝенетик кодлары, һәм һәјатда јашадыглары, һәм дә хатирәләри хырдалығына кими Онун јаддашындадыр.

9. Јеһованын дирилмә вәдинә нәјә ҝөрә инанырсыныз?

 ⁹ Ҝөрдүјүмүз кими, Јеһованын ҝәләҹәкдә өлүләри дирилдәҹәјинә там әмин ола биләрик. Чүнки О, буну һәм истәјир, һәм дә буна гадирдир. Бу вәдә инанмаг үчүн даһа бир әсасымыз вар: О, гәдимдә өлүләри дирилдиб. Јеһова бир нечә мөмин инсана, еләҹә дә Исаја өлүләри дирилтмәк габилијјәти вермишди. Ҝәлин Јәһја 11-ҹи фәсилдә јазылан бир дирилмә һадисәсинә бахаг.

10. Иса Иорданын о тајында оланда Бејтанијјәдә нә баш верир вә о нә едир? (Јәһја 11:1—3).

¹⁰ Јәһја 11:1—3 ајәләрини охујун. Ерамызын 32-ҹи илинин сонларыдыр. Исанын јахын достлары — Илазәр вә онун ики баҹысы Мәрјәмлә Марта Бејтанијјәдә јашајыр (Лука 10:38—42). Илазәр бәрк хәстәләнир вә баҹылары буна ҝөрә чох нараһатдыр. Онлар Исаја хәбәр ҝөндәрирләр. Һәмин вахт Иса Иорданын о тајында Бејтанијјәдән ики ҝүнлүк узаглыгда иди (Јәһ. 10:40). Тәәссүф ки, хәбәр Исаја ҝәлиб чатанда Илазәр өлүр. Амма Иса достунун өлдүјүнү билсә дә, даһа ики ҝүн олдуғу јердә галыр. Сонра исә Бејтанијјәјә ҝедир. Иса ора чатанда Илазәр артыг дөрд ҝүн иди ки өлмүшдү. Орада Иса достлары үчүн бир шеј едир вә бунунла Јеһованы да уҹалдыр (Јәһ. 11:4, 6, 11, 17).

11. Бу һадисәдән достлугла бағлы нә өјрәнирик?

¹¹ Бу һадисәдән достлугла бағлы ваҹиб бир дәрс өјрәнирик. Фикир верин ки, Мәрјәмлә Марта Исаја хәбәр ҝөндәрәндә ондан Бејтанијјәјә ҝәлмәсини хаһиш етмәдиләр. Садәҹә әзиз достунун хәстә олдуғуну дедиләр (Јәһ. 11:3). Илазәр өләндә Иса ону узагдан да дирилдә биләрди. Амма о, Мәрјәмлә Мартанын јанында олмаг үчүн Бејтанијјәјә ҝетди. Бәс сизин елә бир достунуз вармы ки, ондан хаһиш етмәдән дадыныза чатсын? Әҝәр белә достунуз варса, архајынсыныз ки, дар ҝүндә она архалана биләрсиниз (Мәс. 17:17). Ҝәлин Иса кими, биз дә башгалары үчүн белә бир дост олаг. Инди исә бахаг ҝөрәк һадисәнин давамында нә баш верир.

12. Иса Мартаја нә сөз верди вә нәјә ҝөрә бу, бош сөз дејилди? (Јәһја 11:23—26).

¹² Јәһја 11:23—26 ајәләрини охујун. Марта хәбәр тутур ки, Иса Бејтанијјәнин јахынлығындадыр. О, дәрһал Исанын јанына ҝедир вә белә дејир: «Аға, сән бурада олсајдын, гардашым өлмәзди» (Јәһ. 11:21). Дүздүр, Иса Илазәри сағалда биләрди. Амма о, даһа әламәтдар бир шеј етмәк истәјирди. Иса она белә бир сөз верир: «Гардашын дириләҹәк». Сөзүнүн әсассыз олмадығыны ҝөстәрмәк үчүн исә белә дејир: «Дирилмә вә һәјат мәнәм». Бәли, Јеһова Исаја һәјат вә өлүм үзәриндә сәлаһијјәт вериб. Бундан әввәл Иса бир гызы вә бир оғланы дирилтмишди. Гызы өлүмүндән чох кечмәмиш, оғланы исә, ҝөрүнүр, өлдүјү ҝүн дирилтмишди (Лука 7:11—15; 8:49—55). Бәс Иса дөрд ҝүндүр өлү олан вә бәдәни артыг чүрүмәјә башлајан инсаны дирилдә биләр?

13. Јәһја 11:32—35 ајәләринә әсасән, Иса Мәрјәмин вә башгаларынын ағладығыны ҝөрәндә нә етди? (Һәмчинин шәклә бахын.)

¹³ Јәһја 11:32—35 ајәләрини охујун. Ҝәлин ҝөрәк сонра нә баш верир. Илазәрин о бири баҹысы Мәрјәм Исаны гаршыламаға ҝедир. О да баҹысынын дедијини дејир: «Аға, сән бурада олсајдын, гардашым өлмәзди». Мәрјәм вә орадакы инсанлар матәм ичиндә идиләр. Онларын үзүндәки аҹыны, ҝөзләриндәки јашы ҝөрәндә Иса чох кәдәрләнди. Достларынын һалына о гәдәр аҹыды ки, ҝөз јашларыны сахлаја билмәди. Иса јахыныны итирмәјин неҹә бөјүк бир дәрд олдуғуну чох јахшы баша дүшүр. Буна ҝөрә дә о, ҝөз јашларымыза сәбәб олан өлүмү арадан галдырмағын һәсрәтиндәдир.

14. Исанын Мәрјәмин ағладығыны ҝөрүб ағламасындан Јеһова һагда нә өјрәнирик?

¹⁴ Мәрјәмин ағладығыны ҝөрүб Исанын да ағламасы ҝөстәрир ки, Јеһова рәһмли Аллаһдыр. Нәјә ҝөрә белә дејә биләрик? Кечән мәгаләдән дә ҝөрдүјүмүз кими, Иса Атасынын дүшүнҹә вә һиссләрини мүкәммәл сурәтдә әкс етдирир (Јәһ. 12:45). Иса дәрдли достларыны ҝөрәндә онларын һалына о гәдәр аҹыды ки, һәтта ағлады. Демәли, бизим кәдәр ҝөз јашларымызы ҝөрәндә Јеһованын да бизә ҝөрә үрәји јаныр (Зәб. 56:8). Буну биләндә инсан рәһмли Аллаһымыз Јеһоваја даһа да јахын олмаг истәјир.

15. Јәһја 11:41—44 ајәләринә әсасән, Илазәрин сәрдабәсинин јанында нәләр баш верир? (Һәмчинин шәклә бахын.)

¹⁵ Јәһја 11:41—44 ајәләрини охујун. Иса Илазәрин гојулдуғу сәрдабәјә јахынлашыр вә бујурур ки, дашы кәнара чәксинләр. Марта Исаны фикриндән дашындырмаға чалышыр. Дејир ки, Илазәрин ҹәсәди, јәгин, индијә ијләнәр. Анҹаг Иса она дејир: «Мәҝәр сәнә демәдим ки, инансан, Аллаһын әзәмәтини ҝөрәҹәксән?» (Јәһ. 11:39, 40). Иса һамынын гаршысында ҝөјә бахыб уҹадан дуа едир. О, бундан сонра баш верәҹәк һадисәләрә ҝөрә бүтүн шәрәфи Јеһоваја вермәк истәјир. Сонра исә уҹадан чағырыр: «Илазәр, чөлә чых!» Һәмин вахт Илазәр сәрдабәдән чөлә чыхыр. Бунунла Иса  гејри-мүмкүн ҝөрүнән бир шеји мүмкүн едир.

16. Јәһја 11-ҹи фәсилдәки һадисә дирилмәјә иманымызы неҹә мөһкәмләндирир?

¹⁶ Јәһја 11-ҹи фәсилдә јазылан бу һадисә бизим дирилмәјә олан иманымызы мөһкәмләндирир. Неҹә? Исанын Мартаја вердији сөзү јадымыза салаг: «Гардашын дириләҹәк» (Јәһ. 11:23). Атасы кими, Исанын да о вәди јеринә јетирмәјә һәм истәји, һәм дә ҝүҹү вар иди. Исанын ҝөз јашлары сүбут етди ки, онун бу истәји ҝүҹлүдүр. О, өлүмә вә өлүмүн инсанлара ҝәтирдији ағры-аҹыја сон гојмаг арзусундадыр. Илазәр сәрдабәдән чыханда Иса бир даһа сүбут етди ки, өлүләри дирилтмәјә гадирдир. Һәмчинин Исанын Мартаја дедији сөзләр үзәриндә дүшүнүн: «Мәҝәр сәнә демәдим ки, инансан, Аллаһын әзәмәтини ҝөрәҹәксән?» (Јәһ. 11:40). Бизим дирилмә вәдинин ҝерчәкләшәҹәјинә инанмағымыз үчүн әсаслы сүбутларымыз вар. Бәс дирилмәјә олан үмидимизин даһа да реал олмасы үчүн нә едә биләрик?

17. Мүгәддәс Китабдакы дирилмә һадисәләрини охујаркән нәләрин үзәриндә дүшүнмәлијик?

¹⁷ Дирилмә һадисәләрини охујун вә үзәриндә дүшүнүн. Мүгәддәс Китабда јер үзүндә јашамаг үчүн дирилдилән сәккиз нәфәрин һадисәси вар c. Бәлкә, бу һадисәләрин һәр бирини диггәтлә арашдырасыныз? Онлары арашдырдыгҹа унутмајын ки, һәмин инсанлар ҝерчәк шәхсләр иди. Онларын арасында кишиләр, гадынлар вә ушаглар вар иди. Һәмин һадисәләрдән нә өјрәнә биләҹәјиниз барәдә дүшүнүн. Ҝөрүн һәр һадисә Јеһованын өлүләри дирилтмәк истәдијини вә буна гадир олдуғуну неҹә сүбут едир. Ән әсасы исә Исанын дирилмәси барәдә дүшүнүн. Чүнки бу, баш вермиш  ән ваҹиб дирилмә һадисәсидир. Унутмајын ки, онун дирилмәсинә јүзләрлә инсан шаһид олуб вә бу бизим дирилмәјә олан иманымызы мөһкәмләндирмәјә әсас верир (1 Кор. 15:3—6, 20—22).

18. Дирилмә үмиди илә бағлы нәғмәләрдән неҹә фајдалана биләрсиниз? (Һәмчинин һашијәјә бахын.)

¹⁸ Дирилмә илә бағлы «руһани нәғмәләр» охујун вә үзәриндә дүшүнүн d (Ефес. 5:19). Бу нәғмәләр дирилмәјә үмидимизи даһа реал едир вә бу мөһтәшәм үмидә олан иманымызы мөһкәмләндирир. Онлара гулаг асын, охујуб мәшг един вә аиләви ибадәтиниздә нәғмәнин сөзләрини мүзакирә един. Һәмчинин нәғмәнин сөзләрини әзбәрләјин вә ону үрәјинизә һәкк един. Белә етсәниз, сынагларла үзләшәндә вә ја әзиз адамынызы итирәндә Јеһова мүгәддәс руһу илә бу нәғмәләри сизин јадыныза салаҹаг вә онлардан ҝүҹ, тәсәлли алаҹагсыныз.

19. Дирилмә илә бағлы нәләри хәјалынызда ҹанландыра биләрсиниз? (« Онлардан нә сорушаҹагсыныз?» адлы чәрчивәјә бахын.)

¹⁹ Тәхәјјүлүнүзү ишә салын. Јеһова бизә өзүмүзү јени дүнјада тәсәввүр етмәк баҹарығы вериб. Бир баҹы дејир: «Өзүмү јени дүнјада о гәдәр тәсәввүр етмишәм ки, санки орадакы гызылҝүлләрин әтрини дујурам». Гәдимдә јашајан мөмин киши вә гадынларла ҝөрүшәҹәјиниз ҝүнү тәсәввүр един. Сиз киминлә ҝөрүшмәк арзусундасыныз? Она һансы суаллары верәҹәксиниз? Һәмчинин вәфат етмиш доғмаларынызла ҝөрүшәҹәјиниз ҝүнү тәсәввүр един. Онлара дејәҹәјиниз илк сөзү, гуҹаглашаҹағыныз аны вә севинҹ ҝөз јашларынызы хәјалынызда ҹанландырын.

20. Нәјә гәти гәрарлы олмалыјыг?

²⁰ Бизә дирилмә үмиди бәхш етдијинә ҝөрә Јеһоваја шүкүрләр олсун! Әмин ола биләрик ки, бу вәд ҝерчәкләшәҹәк. Чүнки Јеһова буну һәм истәјир, һәм дә буна гадирдир. Ҝәлин бу дәјәрли вәдә иманымызы даим мөһкәмләндирәк. Белә етсәк, Аллаһымыза даһа јахын олаҹағыг. О Аллаһа ки, һәр биримизә белә бир сөз верир: «Доғман дириләҹәк».