Мүгәддәс Китабын бахышы

«Екстремал идман нөвләри». Һәјатынызы рискә атмаға дәјәр?

«ҜЕТДИКҸӘ ДАҺА ЧОХ ИНСАН ИЗЛӘЈИҸИ МӨВГЕЈИНИ ТӘРК ЕДИБ ӨЗҮ ТӘЈЈАРӘДӘН ПАРАШҮТЛӘ ТУЛЛАНЫР, КӘНДИРЛӘ ДАҒА ДЫРМАШЫР, ШӘЛАЛӘДӘ ГАЈЫГЛА ҮЗҮР, КӨПӘКБАЛЫГЛАРЫНЫН ОЛДУҒУ СУЛАРДА ҮЗҮР» («WILLOW GLEN RESIDENT» ГӘЗЕТИ).

БУ сөзләр идман саһәсиндә ҝетдикҹә вүсәт алан бир мејли тәсвир едир. Һазырда тәһлүкәли идман нөвләри чох популјардыр *. Инсанлар велосипедлә, хизәклә, скејтбордла ән дик јамаҹлары, ән һүндүр гајалары фәтһ етмәјә, ән узун мәсафәјә тулланмаға чалышырлар. Бәли, бу инсанлар һәјатлары илә ојнајырлар. Бир журналда дејилдији кими, екстремал идман нөвләринин популјарлығынын ҝетдикҹә артмасы ҝөстәрир ки, истәр һәвәскар олсун, истәрсә дә пешәкар идманчы, милјонларла инсан ән тәһлүкәли, ән чәтин шејләрә әл атмаға һазырдыр ки, тәки горхуларына үстүн ҝәлсин, даһа чох һәјәҹан јашаја билсин» («Time»).

Лакин бу идман нөвләринин популјарлығы артдыгҹа, ади идман нөвләрини дә тәһлүкәли шәкилдә иҹра етдикҹә хәсарәт алан инсанларын да сајы артыр. 1997-ҹи илдә Америка Бирләшмиш Штатларында идман заманы хәсарәт алараг тәҹили јардыма мүраҹиәт едәнләрин сајы әһәмијјәтли дәрәҹәдә артмышды, мәсәлән, скејтборд сүрәнләр 33 фаиз, сноуборд сүрәнләр 31 фаиз, даға дырмашанлар исә әввәлки илләрдән 20 фаиз чох олмушду. Диҝәр идман нөвләринин исә нәтиҹәси даһа да фаҹиәви олур. Белә ки, екстремал идман уҹбатындан өлүм һалларынын сајы ҝетдикҹә артыр. Бу идман нөвләринин тәрәфдарлары онларын тәһлүкәләриндән хәбәрдардырлар. Мәсәлән, екстремал хизәкчи олан бир гадын демишди: «Мән даима өлүмлә үз-үзәјәм». Бир профессионал сноубордчу исә демишди: «Әҝәр зәдәләнмирсәнсә, демәли, вар ҝүҹүнлә чалышмырсан».

Бүтүн бунлары нәзәрә алсаг, мәсиһи бу кими идман нөвләри илә мәшғул ола биләр? Мүгәддәс Китаб бу мәсәләдә гәрар вермәјә неҹә көмәк едә биләр? Аллаһын һәјата бахышыны нәзәрдән кечирсәк, бу суаллара ҹаваб тапаҹағыг.

Аллаһын һәјата бахышы

Мүгәддәс Китабда дејилир ки, Јеһова һәјат мәнбәјидир (Зәбур 36:9). О, инсанлары јарадыб. Үстәлик, бизә һәјатдан зөвг алмаг үчүн һәр шеј вериб (Зәбур 139:14; Һәвариләрин ишләри 14:16, 17; 17:24—28). Буна ҝөрә дә истәјир ки, бизә бәхш етдији һәјатын гәдрини биләк. Буну Исраил халгына вердији ганун вә принсипләрдән ҝөрүрүк.

Төвратда тәләб олунурду ки, һәр кәс башгаларынын һәјатыны горумаг үчүн лазыми аддымлар атсын. Буну етмәдији үчүн киминсә өлүмүнә баис олан адам ган төкмәкдә ҝүнаһкар сајылырды. Мәсәлән, о вахтлар евләрин дамы дүз олурду. Ев тикдирән адам дамын кәнарларына мәһәҹҹәр чәкмәли иди. Әкс һалда, евинин дамындан кимсә јыхылыб өлсәјди, ганы онун бојнунда галаҹагды (Ганунун тәкрары 22:8). Јахуд ҝөтүрәк башга бир вәзијјәти. Өкүз ҝөзләнилмәдән кимисә вуруб өлдүрсәјди, өкүзүн јијәси ҝүнаһкар олмајаҹагды. Јох әҝәр өкүзүн вураған олдуғу мәлум идисә вә јијәси бу барәдә хәбәрдар едилмишдисә, амма јенә дә өкүзү бағлы сахламамышдыса, о заман адам өлдүрән өкүзүн саһиби ҝүнаһкар сајылырды вә өлдүрүлмәли иди (Чыхыш 21:28, 29). Һәјат Јеһованын ҝөзүндә гијмәтлидир, буна ҝөрә дә Төвратда һәјаты горумагла бағлы чохлу ганунлар вар.

Аллаһын садиг хидмәтчиләри баша дүшүрдүләр ки, һәтта конкрет ганун олмајанда белә, нә өзләринин, нә дә башгаларынын һәјатыны тәһлүкәјә атмамалыдырлар. Мәсәлән, бир дәфә Давуд падшаһ демишди: «Каш Бејтләһм дарвазасынын јанындакы һовузун сујундан олајды, ичәјдим!» Һәмин вахт Бејтләһм филиштлиләрин әлиндә иди. Давудун бу арзусуну ешидән үч дөјүшчү филиштлиләрин ордуҝаһына ҝирмиш, Бејтләһмдәки һовуздан су чәкиб Давуда ҝәтирмишдиләр. Давуд исә сују ичмәмишди. Ону јерә төкүб демишди: «Аллаһыма ағыр ҝедәр! Буну едә билмәрәм! Су ҝәтирмәк үчүн һәјатларыны ода атан бу адамларын ганыны неҹә ичим? Ахы онлар бу сују ҝәтирмәк үчүн ҹанларыны тәһлүкәјә атыблар» (1 Салнамәләр 11:17—19). Давудун нәзәриндә садәҹә истәјини јеринә јетирмәк үчүн һәјаты тәһлүкәјә атмаг ағласығмаз һәрәкәт иди.

Иса Мәсиһ дә ејни ҹүр дүшүнүрдү. Бир дәфә, чох еһтимал, ҝөрүнтүдә Иблис она деди ки, өзүнү мәбәдин ән һүндүр јериндән атсын, ҝөрсүн мәләкләр ону горујаҹаг. Анҹаг Иса она деди: «Аллаһын Јеһованы сынаға чәкмә» (Мәтта 4:5—7). Бәли, Давуд да, Иса да баша дүшүрдү ки, һәјаты тәһлүкәјә атмаг Аллаһын ҝөзүндә ҝүнаһдыр.

Ола билсин, дүшүнүрсүнүз: «Јахшы бәс неҹә мүәјјән едим ки, һансы идман екстремал, јахуд тәһлүкәлидир?» Индики зәманәдә һәтта ән ади, өз-өзлүјүндә тәһлүкәли олмајан әјләнҹә нөвүнү дә тәһлүкәли идман нөвүнә чевирә биләрләр. Белә олан һалда неҹә билмәк олар ки, нә мәгбулдур, нә јох?

Һәјатыны тәһлүкәјә атмаға дәјәр?

Әҝәр һансыса идман нөвү илә мәшғул олмаг истәјириксә, ҝәрәк өзүмүзлә дүрүст олаг. Бу, гәрар вермәјә көмәк едәҹәк. Мәсәлән, өзүмүзә бу суаллары верә биләрик: «Бу идмандан нә гәдәр адам зәдәләнир? Бәс хәсарәт алмамаг үчүн мән тәлим алмышам, јахуд да горујуҹу васитәләрим вар? Јыхылсам, дүз тулланмасам, јахуд да горујуҹу васитәләрим ишә дүшмәсә, нәтиҹә неҹә олаҹаг? Хырда зәдә алаҹағам, јохса бөјүк хәсарәт алмаг, һәтта өлмәк еһтималым вар?»

Әҝәр мәсиһи тәһлүкәли идман нөвләри илә мәшғул олмаға давам едирсә, Јеһова илә мүнасибәтләри позулаҹаг, һәмчинин јығынҹагда мәсулијјәтләр алмаға јарарлы олмајаҹаг (1 Тимутијә 3:2, 8—10; 4:12; Титуса 2:6—8). Ајдындыр ки, һәтта әјләнәндә дә мәсиһиләр Јараданын фикрини нәзәрә алмалы, унутмамалыдырлар ки, һәјат Онун ҝөзүндә мүгәддәсдир.

[Һашијә]