1, 2. Нәјә ҝөрә Јеһова бизи јахшылыг едәндә даһа чох севинҹ дујмаг габилијјәти илә јарадыб?

 БИЗ алмагдан чох, вермәкдән хошбәхтлик дујуруг. Јеһова бизи белә јарадыб (Һәв. 20:35). Онда белә чыхыр ки, кимсә бизим үчүн нәсә едәндә биз һеч бир хошбәхтлик дујмуруг? Хејр. Кимдәнсә һәдијјә алмағын инсана севинҹ ҝәтирдијини һамымыз билирик, амма јенә дә инсан ән чох хошбәхтлији верәндә дујур. Әслиндә, Јеһованын бизи бу ҹүр јаратмасы өз хејримизәдир. Нәјә ҝөрә?

² Јеһованын бизи белә јаратмағы сајәсиндә хошбәхтлијимиз өз әлимиздә олур. Биз башгаларына јахшылыг етмәк үчүн имканлар ахтарараг севинҹимизә севинҹ гата биләрик. Белә һејрәтамиз хәлг олунмағымыз валеһедиҹидир (Зәб. 139:14).

3. Нәјә ҝөрә Јеһова «хошбәхт Аллаһ» адланыр?

³ Мүгәддәс Китабдан башгаларына јахшылыг етмәјин хошбәхтлик ҝәтирдијини билирик. Буна ҝөрә дә Јеһованын «хошбәхт Аллаһ» адланмасы тәәҹҹүблү дејил (1 Тим. 1:11). Илк вә ән чох сәхавәт ҝөстәрән варлыг Одур. Һәвари Булус демишкән: «Биз Онун сајәсиндә јашајырыг, һәрәкәт едирик вә мөвҹудуг» (Һәв. 17:28). Доғрудан да, «һәр бир ҝөзәл пај вә һәр бир камил немәт» Јеһовадандыр (Јаг. 1:17).

4. Даһа чох севинҹ дујмағымыза нә көмәк едәҹәк?

⁴ Јәгин, һәр биримиз сәхавәт ҝөстәриб даһа чох севинҹ дујмаг истәјирик. Бу саһәдә бизә Јеһованын нүмунәси көмәк едәҹәк (Ефес. 5:1). Ҝәлин һәм буну арашдыраг, һәм дә ҝөрәк инсанлар сәхавәтимизә ҝөрә миннәтдарлыг билдирмәјәндә нә едә биләрик. Бу мәсләһәтләр бизи тәшвиг едәҹәк ки, даима башгалары үчүн нәсә едәк вә беләҹә, севинҹимизи даһа да артыраг.

 ЈЕҺОВА КИМИ СӘХАВӘТЛИ ОЛУН

5. Јеһова бизи мадди ҹәһәтдән нәләрлә тәмин едир?

⁵ Јеһова неҹә сәхавәт ҝөстәрир? Бир нечә нүмунәјә бахаг. Јеһова бизә мадди шејләр верир. Ола билсин, дәбдәбәли һәјат сүрмәјәҹәјик, амма Јеһоваја шүкүрләр олсун ки, әксәријјәтимизин еһтијаҹ дујдуғу һәр шеји вар. Мәсәлән, Онун сајәсиндә јемәјимиз, палтарымыз вә галмаға јеримиз вар (Зәб. 4:8; Мәт. 6:31—33; 1 Тим. 6:6—8). Бәс Јеһова физики тәләбатларымызы садәҹә борҹ һиссиндән ирәли ҝәләрәк өдәјир? Гәтијјән! Бәс онда буну нәјә ҝөрә едир?

6. Мәтта 6:25, 26 ајәләриндән нә өјрәнирик?

⁶ Гысаҹа десәк, Јеһова физики тәләбатларымызы бизи севдији үчүн өдәјир. Исанын Мәтта 6:25, 26 ајәләриндә дедији сөзләрә фикир верәк. (Ајәләри охујун.) Орада о, јарадылышы нүмунә чәкир вә гушлардан данышараг дејир: «Онлар нә әкир, нә бичир, нә дә анбара мәһсул топлајырлар». Ҝөрүн Иса ардынҹа нә дејир: «Сизин ҝөјдәки Атаныз онлары једиздирир». Даһа сонра исә о, белә бир суал верир: «Мәҝәр сиз онлардан гијмәтли дејилсиниз?» Исанын сөзүнүн ҹаны нә иди? Јеһованын ҝөзүндә хидмәтчиләри јаратдығы һејванлардан гат-гат дәјәрлидир. Әҝәр Јеһова онларын еһтијаҹыны өдәјирсә, бизимкини өдәмәз?! Биз сәмави Атамызын аиләсинин бир үзвүјүк, буна ҝөрә дә О бизим тәләбатларымызы севҝидән ирәли ҝәләрәк өдәјир (Зәб. 145:16; Мәт. 6:32).

7. Јеһова кими сәхавәтли олмағын јолларындан бири һансыдыр? (Һәмчинин шәклә бахын.)

⁷ Јеһова кими биз дә инсанлара олан мәһәббәтимизи мадди дәстәјимизлә ҝөстәрә биләрик. Һансыса диндашынызын гида вә ја ҝејим сарыдан корлуг чәкдијини билирсиниз? Јеһова сизин васитәнизлә онун бу еһтијаҹыны өдәјә биләр. Јеһованын Шаһидләри, әсасән, тәбии фәлакәт заманы ҝөстәрдикләри сәхавәтлә танынырлар. Мәсәлән, COVID-19 пандемијасы заманы баҹы-гардашлар көмәјә еһтијаҹы оланлара әрзаг, ҝејим вә лазым олан диҝәр шејләри ҝөндәрмишди. Чохлары үмумдүнја ишинә дә ианә етмишди. Бу, бүтүн дүнјада апарылан јардым ишләрини малијјәләшдирмәјә көмәк етмишди. Бу әлиачыг баҹы-гардашлар Ибраниләрә 13:16 ајәсинә ујғун давранырдылар: «Јахшылыг етмәји, варынызы башгалары илә бөлүшмәји јаддан чыхартмајын, чүнки бу ҹүр гурбанлар Аллаһа хошдур».

8. Јеһованын вердији ҝүҹ бизә неҹә көмәк едир? (Филиппилиләрә 2:13).

 ⁸ Јеһова ҝүҹ верир. Сонсуз ҝүҹүндән хидмәтчиләринә вермәк Јеһоваја хошдур. (Филиппилиләрә 2:13 ајәсини охујун.) Јәгин, нәфсинизи боғмаг, һансыса сынаға таб ҝәтирмәк үчүн дуада Јеһовадан ҝүҹ истәдијиниз вахтлар олуб. Бәлкә дә садәҹә бу ҝүнү баша вурмаг үчүн ҝүҹ диләмисиниз. Дуаныза ҹаваб аланда, ола билсин, һәвари Булусун кечирдији һиссләри кечирмисиниз. О демишди: «Мәнә гүввәт верәнин сајәсиндә һәр шејә ҝүҹүм чатыр» (Филип. 4:13).

9. Јеһованын ҝүҹүндән сәхавәтлә истифадә етмәси бизим үчүн һансы саһәдә нүмунәдир? (Һәмчинин шәклә бахын.)

⁹ Јеһовадан фәргли олараг биз сонсуз ҝүҹә саһиб дејилик вә ону башгаларына бәхш едә билмәрик. Амма Јеһовадан нүмунә ҝөтүрәрәк өз ҝүҹүмүзү башгаларынын рифаһы наминә истифадә едә биләрик. Мәсәлән, јашлы вә ја хәстә диндашымыза ев ишләриндә көмәк етмәк вә ја онун үчүн базарлыг етмәк олар. Вәзијјәтимиз имкан верирсә, ибадәт евинин тәмизлијиндә вә гуллуғунда иштирак едә биләрик. Ҝүҹүмүздән бу ҹүр истифадә едәндә Јеһоваја ибадәт едән инсанлара фајда ҝәтиририк.

10. Сөзләримизлә башгаларына неҹә ҝүҹ верә биләрик?

¹⁰ Һәмчинин унутмајын ки, сөзләрин бөјүк ҝүҹү вар. Мәсәлән, кими тәрифләјиб руһландыра биләрсиниз? Јахуд кимин тәсәллијә еһтијаҹы вар? Бәлкә, һәмин инсана севҝинизи һисс етдирмәк үчүн тәшәббүс ҝөстәрәсиниз? Онун јанына ҝетмәк, она зәнҝ етмәк, месаж јазмаг вә ја ачыгҹа ҝөндәрмәк олар. Гејри-ади нәсә јазмаға, нәсә демәјә еһтијаҹ јохдур. Үрәкдән ҝәлән бир-ики садә сөз мәһз диндашыныза лазым олан шеј ола биләр, она һәмин ҝүн Јеһоваја садиг галмаға вә ја вәзијјәтинә дүзҝүн јанашмаға көмәк едә биләр (Мәс. 12:25; Ефес. 4:29).

11. Јеһова һикмәтиндән неҹә истифадә едир?

¹¹ Јеһова һикмәт верир. Шаҝирд Јагуб јазмышды: «Әҝәр сизләрдән киминсә һикмәти чатышмырса, гој һәр кәсә сәхавәтлә вә гынамадан верән Аллаһдан диләсин вә она вериләҹәк» (Јаг. 1:5). Бу сөзләрдән ҝөрүндүјү кими Јеһова һикмәтини Өзүндә сахламыр. Ону сәхавәтлә башгалары илә бөлүшүр. Һәм дә фикир вердинизсә, Јеһова һикмәт верәндә буну «гынамадан», башга сөзлә, мәзәммәт етмәдән верир. О истәмир ки, Онун бизә јол ҝөстәрмәсинә еһтијаҹ дујдуғумуза ҝөрә өзүмүзү пис һисс едәк. Әслиндә, О елә Өзү бизи буна тәшвиг едир (Мәс. 2:1—6).

12. Билдикләримизи башгалары илә бөлүшмәк үчүн һансы имканларымыз вар?

¹² Бәс биз Јеһовадан нүмунә ҝөтүрүб саһиб олдуғумуз һикмәти башгалары  илә бөлүшә биләрик? (Зәб. 32:8). Јеһованын хидмәтчиләринин өјрәндикләрини башгалары илә бөлүшмәк үчүн чох имканы вар. Мәсәлән, биз һәгигәтдә јени аддымлајанлара тәблиғ етмәји өјрәдирик. Ағсаггаллар сәбирлә јығынҹаг хидмәтчиләринә вә вәфтиз олунмуш гардашлара јығынҹагдакы мәсулијјәтләринин өһдәсиндән ҝәлмәји өјрәдирләр. Һәмчинин тикинти саһәсиндә тәҹрүбәси оланлар Јеһованын јолунда истифадә олунан биналарын тикинтиси вә гуллуғу илә бағлы даһа аз тәҹрүбәси оланлара тәлим кечирләр.

13. Башгаларына тәлим верәркән Јеһованын гојдуғу нүмунәни неҹә изләјә биләрик?

¹³ Башгаларына тәлим верәндә чалышын буну Јеһованын етдији кими едәсиниз. Јеһова һикмәтини сәхавәтлә верир. Ејнилә биз дә киминләсә өз билијимизи, тәҹрүбәмизи бөлүшәндә хәсислик етмәмәлијик. Горхмамалыјыг ки, билдијимиз һәр шеји она өјрәтсәк, о ҝәлиб бизим јеримизи тутар. Белә дүшүнмәјимиз дә јанлыш олар: «Мәнә һеч ким тәлим вермәјиб. Мән неҹә өјрәнмишәм, гој о да елә өјрәнсин!» Јеһованын хидмәтчиләриндә бу ҹүр дүшүнҹә олмамалыдыр. Биз тәлим вердијимиз инсана нәинки билијимизи, «һәтта өз ҹанымызы да вермәјә һазыр» олмалыјыг (1 Салон. 2:8). Үмид едирик ки, онлар да башгаларына «тәлим вермәк үчүн јарарлы» олаҹаглар (2 Тим. 2:1, 2). Һәр биримиз билдикләримизи сәхавәтлә бөлүшсәк, һәм өзүмүз даһа һикмәтли вә хошбәхт олаҹағыг, һәм дә башгалары.

СӘХАВӘТ ҜӨСТӘРИБ МИННӘТДАРЛЫГ ҜӨРМӘЈӘНДӘ

14. Чохлары ҝөстәрдијимиз сәхавәтә неҹә јанашыр?

¹⁴ Баҹы-гардашлар башда олмагла, инсанлара сәхавәт ҝөстәрәндә чох вахт онлар бунун гаршылығында миннәтдарлыгларыны билдирирләр. Кимиси ачыгҹа јазыр, кимиси дә башга јолла «чох сағ ол» дејир (Кол. 3:15). Етдијимиз јахшылығын мүгабилиндә миннәтдарлыг сөзләрини ешидәндә хошбәхтлијимизә хошбәхтлик гатылыр.

15. Инсанлар миннәтдарлыгларыны билдирмәјәндә нәји јадда сахламалыјыг?

¹⁵ Амма һеч дә һамы етдијимиз јахшылыға ҝөрә миннәтдарлығыны билдирмир. Ола биләр ки, инсан үчүн вахтымызы, ҝүҹүмүзү, вәсаитимизи сәрф едәк, амма онун бизим етдикләримизә гијмәт вердијини һеч һисс етмәјәк. Бу заман севинҹимизи итирмәмәк вә ја аҹыгланмамаг үчүн нә едә биләрик? Мәгаләнин әсас ајәсини — Һәвариләрин ишләри 20:35 ајәсини јадымыза салаг. Сәхавәт ҝөстәрәркән дујдуғумуз хошбәхтлик гаршы тәрәфин «сағ ол»ундан асылы дејил. Ҝөстәрдијимиз сәхавәтә дәјәр верилмәдијини дүшүнсәк дә буну етмәкдән ваз кечмәмәлијик. Ҝәлин бизә көмәк едәҹәк бир нечә үсула бахаг.

16. Сәхавәт ҝөстәрәркән нәји јадда сахламалыјыг?

¹⁶ Јеһованын нүмунәсини изләдијинизи јадда сахлајын. О, инсанлардан јахшылығыны әсирҝәмир, онлар бунун гәдрини билсә дә, билмәсә дә (Мәт. 5:43—48). Јеһова сөз верир ки, Онун кими сиз дә етдијиниз јахшылығын гаршылығында һеч нә ҝөзләмәсәниз, мүкафатыныз бөјүк олаҹаг (Лука 6:35). Одур ки, кимсә «сағ ол» демәсә, мәјус олмајын. Сиз ки инсанлара јахшылыг едирсиниз, онлар гијмәтләндирсә дә, гијмәтләндирмәсә дә, әсас одур, Јеһова ҝүләрүзлә етдијиниз јахшылығы ҝөрүр вә бунун мүкафатыны мүтләг верәҹәк (Мәс. 19:17; 2 Кор. 9:7).

17. Сәхавәт ҝөстәрәркән Јеһованын нүмунәсини башга неҹә изләјә биләрик? (Лука 14:12—14).

¹⁷ Сәхавәт ҝөстәрәркән Јеһовадан бир саһәдә дә нүмунә ҝөтүрә биләрик. Бу  барәдә Лука 14:12—14 ајәләриндә јазылыб. (Ајәләри охујун.) Әлбәттә, бизим үчүн ејни шеји едә биләҹәк кәсләрә гонагпәрвәрлик вә ја сәхавәт ҝөстәрмәкдә гәбаһәт бир шеј јохдур. Амма әҝәр ҝөрсәк ки, нә исә умдуғумуз үчүн јахшылығы едирик, онда неҹә? Исанын вердији мәсләһәти сынагдан кечирмәк олар. Бизә гонагпәрвәрлик ҝөстәрмәјә имканы чатмајан кәсә гонагпәрвәрлик ҝөстәрә биләрик. Онда Јеһованын нүмунәсини изләдијимизә ҝөрә үрәјимиздә бөјүк бир севинҹ олаҹаг. Етдијимиз јахшылығын гаршылығында һеч нә ҝөзләмәмәји өјрәнсәк, сабаһ кимсә миннәтдарлығыны билдирмәјәндә севинҹимизи итирмәјәҹәјик.

18. Нә етмәмәлијик вә нәјә ҝөрә?

¹⁸ Инсан һагда пис фикирләшмәјин (1 Кор. 13:7). Кимсә бизә миннәтдарлығыны билдирмәјәндә нөвбәти суал үзәриндә дүшүнә биләрик: «О, доғрудан да нашүкүр инсандыр, јохса садәҹә олараг миннәтдарлығыны билдирмәји унудуб?» Онун «чох сағ ол» демәмәсинә башга сәбәбләр дә ола биләр. Ола билсин, бәзиләри һәдсиз дәрәҹәдә миннәтдардырлар, амма буну дилә ҝәтирмәјә чәтинлик чәкирләр. Бәлкә дә, онлар вахтилә өзләри башгаларына әл тутуб, инди исә кимсә онлара көмәк едәндә утанырлар. Сәбәб һәр нә олса да, диндашларымызы һәгигәтән севириксә, онлар һагда пис дүшүнмәјәҹәјик вә бундан сонра да сәхавәт ҝөстәрмәкдән севинҹ дујаҹағыг (Ефес. 4:2).

19, 20. Сәхавәт ҝөстәрәркән сәбирли олмағын һансы фајдасы вар? (Һәмчинин шәклә бахын.)

¹⁹ Сәбирли олун. Сәхавәтли олмагла бағлы мүдрик Сүлејман падшаһ демишди: «Чөрәјини суја бурах, ҝүнләр кечәр, ону јенидән тапарсан» (Ваиз 11:1). Бу сөзләрдән ҝөрүндүјү кими бәзиләри ҝөстәрдијимиз сәхавәтә ҝөрә миннәтдарлығыны «ҝүнләр» кечәндән сонра билдирә биләр. Ҝәлин бунунла бағлы бир һадисәјә бахаг.

²⁰ Узун илләр әввәл бир рајон нәзарәтчисинин арвады јени вәфтиз олунмуш баҹыја сәмими ачыгҹа јазыб Јеһоваја садиг  галмаға тәшвиг етмишди. Баҹы тәхминән 8 ил сонра она белә бир мәктуб јазмышды: «Сәнә бир шеј демәји өзүмә борҹ билирәм. Билирсән, бу илләр боју сән һеч өзүн дә билмәдән мәнә неҹә көмәк етмисән!» Мәктубунун давамында о белә сөзләр јазмышды: «[Ачыгҹада] чох хош кәлмәләр јазмышдын. Мәнә ән чох тәсир едән исә гејд етдијин ајә иди. Ону һеч вахт унутмарам» a. Илләр әрзиндә һансы чәтинликләрлә үзләшдијини гејд едәндән сонра баҹы сөзүнә белә давам етмишди: «Бәзән һәгигәтдән, мәсулијјәтләримдән, бир сөзлә, һәр шејдән узаглашмаг истәјирдим. Амма белә анларда һәмишә сәнин јаздығын ајә јадыма дүшүрдү вә мәнә тәслим олмамаға ҝүҹ верирди». О, сөзүнә әлавә едир: «Бу сәккиз ил әрзиндә һеч бир шеј мәнә бу дәрәҹәдә тәсир етмәјиб». Тәсәввүр етмәк олар рајон нәзарәтчисинин арвады «ҝүнләр» кечәндән сонра мәктубу аланда неҹә севинмишди! Вахт ҝәләр, биз дә етдијимиз јахшылығын әвәзиндә бу ҹүр миннәтдарлыг сөзләри ешидәрик.

21. Нәјә ҝөрә бундан сонра да Јеһованын сәхавәтини нүмунә ҝөтүрмәјә әзмлисиниз?

²¹ Өјрәндијимиз кими Јеһова бизи хүсуси габилијјәтлә јарадыб. Кимсә бизә сәхавәт ҝөстәрәндә севинирик, амма ән бөјүк хошбәхтлији өзүмүз башгалары үчүн нәсә едәндә дујуруг. Нә јахшы ки, диндашларымыз үчүн нәсә едә билирик. Етдијимиз јахшылығын мүгабилиндә ешитдијимиз миннәтдарлыг сөзләри исә үрәјимизә јағ кими јајылыр. Амма инсан бизә миннәтдарлығыны билдирсә дә, билдирмәсә дә дүзҝүн даврандығымыза ҝөрә үрәјимиз раһат олаҹаг. Бир шеји һеч вахт унутмајын: «Јеһова [сизә] ондан да артығыны верә биләр» (2 Салн. 25:9). Бизим сәхавәтимиз һеч вахт Јеһованын сәхавәтинә чата билмәз. Етдијимиз јахшылығын әвәзиндә мүкафаты Јеһовадан алмагдан ҝөзәл нә ола биләр?! Одур ки, ҝәлин сәхавәтли Аллаһымыз Јеһовадан өрнәк алмаға давам едәк.