1, 2. Нәјә ҝөрә Аллаһын хидмәтчиләри хошбәхтдирләр? (Јагуб 1:22—25).

 ЈЕҺОВА вә Иса Мәсиһ бизим хошбәхт олмағымызы истәјир. Зәбур 119:2 ајәсиндә дејилир: «Нә хошбәхтдир Онун өјүдләринә риајәт едән, бүтүн гәлби илә Ону ахтаран инсан!» Иса Мәсиһ дә буна бәнзәр фикир сөјләмишди: «Аллаһын сөзүнү ешидиб она әмәл едәнләр хошбәхтдирләр!» (Лука 11:28).

² Биз, Јеһованын хидмәтчиләри хошбәхт инсанларыг. Бунун үчүн чох сәбәбимиз вар. Онлардан бири Аллаһын Кәламыны һәр ҝүн охумағымыз вә орада јазыланлара әмәл етмәјә чалышмағымыздыр. (Јагуб 1:22—25 ајәләрини охујун.)

3. Аллаһын Кәламындан охудугларымыза әмәл етмәјин һансы хејрини ҝөрүрүк?

³ Кәламда јазыланлары иҹра етмәјин бизә бир чох саһәдә хејри вар. Мәсәлән, бунунла биз Јеһованы разы салырыг, бу исә бизә хошбәхтлик ҝәтирир (Ваиз 12:13). Аилә үзвләримизлә вә диндашларымызла мүнасибәтләримиз јахшылашыр. Јәгин, буну өзүнүз дә һисс етмисиниз. Бундан башга, Јеһованын бујурдуғу кими давранмајан инсанларын үзләшдији хејли проблемдән узаг олуруг. Давуд падшаһ бир нәғмәдә Јеһованын ганунларындан, бујругларындан вә һөкмләриндән бәһс едәркән белә бир нәтиҹәјә ҝәлмишди: «Онлара әмәл едәнин бөјүк мүкафаты вар» (Зәб. 19:7—11). Биз бу сөзләрлә тамамилә разыјыг.

4. Нәјә ҝөрә Аллаһын Кәламынын иҹрачысы олмаг елә дә асан дејил?

⁴ Аллаһын Кәламынын иҹрачысы олмаг үчүн биз Мүгәддәс Китабы мүталиә едиб Онун ирадәсини гаврамаға чалышмалыјыг. Амма ишимиз башымыздан ашдығы үчүн буну етмәк һәмишә асан олмур. Одур ки, мүталиә үчүн вахт  тапмалыјыг. Ҝәлин Мүгәддәс Китабы һәр ҝүн охумаға көмәк едәҹәк бәзи мәсләһәтләри арашдыраг. Һәмчинин охудугларымызын үзәриндә дүшүнмәјин вә онлары тәтбиг етмәјин јолуну өјрәнәк.

АЛЛАҺЫН КӘЛАМЫНЫ ОХУМАҒА ВАХТ АЈЫРЫН

5. Вахтымызын чоху һансы ишләрә ҝедир?

⁵ Јеһованын хидмәтчиләри чох мәшғулдурлар. Биз Мүгәддәс Китабда бујрулан мүхтәлиф мәсулијјәтләримизи иҹра етмәјә хејли вахт сәрф едирик (1 Тим. 5:8). Мәсәлән, һәм өзүмүзү, һәм аилә үзвләримизи доландырмаг үчүн ишләјирик. Кимиси јашлы вә ја хәстә гоһумларына бахыр. Үстәлик, һәр биримиз өз сағламлығымызын гејдинә галмалыјыг. Буна да аз вахт ҝетмир. Бүтүн бунлардан башга јығынҹагда да мүәјјән ишләримиз олур. Өһдәмизә дүшән ән ваҹиб ишләрдән бири дә хош хәбәри тәблиғ етмәкдир. Бәс сиз өз мәсулијјәтинизи јеринә јетирә-јетирә, Аллаһын Кәламыны һәр ҝүн охумаға, охудугларынызын үзәриндә дүшүнмәјә вә онлара әмәл етмәјә неҹә вахт тапа биләрсиниз?

6. Мүгәддәс Китабы һәр ҝүн охумаг үчүн нә етмәлијик? (Һәмчинин шәклә бахын.)

⁶ Мәсиһиләр үчүн Мүгәддәс Китабы охумаг «даһа ваҹиб» шејләрин сырасындадыр. Одур ки, бу мәсәләјә ҹидди јанашмалыјыг (Филип. 1:10). «Зәбур» китабынын лап әввәлиндә хошбәхт инсанла бағлы белә сөзләр јазылыб: «О, Јеһованын ганунундан һәзз алыр, ҝеҹә-ҝүндүз Онун ганунунун дәринлијинә варыр» (Зәб. 1:1, 2). Ајдын мәсәләдир ки, бу ҹүр охумаг үчүн вахт ајырмаг лазымдыр. Бәс Мүгәддәс Китабы охумағын ән јахшы вахты һансыдыр? Һәрәјә бир вахт ујғун ҝәлә биләр. Амма ҝәрәк елә вахт сечәк ки, буну һәр ҝүн етмәк мүмкүн олсун. Виктор адлы гардаш дејир: «Мән Мүгәддәс Китабы сәһәрләр охумағы хошлајырам. Дүздүр, сәһәрләр тез дурмаг мәнә чәтин ҝәлир, амма һәмин вахт фикрими јајындыран даһа аз шеј олур, бејним ајыг олур вә диггәтими ҹәмләјә билирәм». Бәлкә, бу сизә дә ујғун  вахтдыр? Өзүнүздән сорушун: «Мәним үчүн Мүгәддәс Китабы нә вахт охумаг даһа ујғундур?»

ОХУДУГЛАРЫНЫЗЫН ДӘРИНЛИЈИНӘ ВАРЫН

7, 8. Охудугларымыздан там фајда әлдә етмәјә нә мане ола биләр? Нүмунә чәкин.

⁷ Мүгәддәс Китабы охумаг үчүн вахт тәјин етсәниз дә, диггәт јетирмәли олдуғунуз башга бир мәгам да вар. Олубму ки, нә исә охујандан аз сонра һеч нә јадынызда галмасын? Бу һамымызла баш вериб. Тәәссүф ки, Мүгәддәс Китабы охујанда да белә шеј ола биләр. Бәлкә дә, һәр ҝүн бир нечә фәсил охумағы мәгсәд гојмушуг. Бу, тәрифәлајигдир. Бәли, биз мәгсәдләр гојмалыјыг вә онлара чатмаг үчүн сәј ҝөстәрмәлијик (1 Кор. 9:26). Амма Мүгәддәс Китабы охумаг садәҹә башланғыҹдыр — ҝөзәл бир башланғыҹ. Аллаһын Кәламынын мүталиәсиндән там фајдаланмаг истәјириксә, даһа чохуну етмәлијик.

⁸ Белә бир нүмунәјә бахаг. Биткинин бөјүмәси үчүн јағыш ваҹибдир. Амма гыса вахтда лејсан јағса, торпаг сују ҹанына һопдура билмәјәҹәк вә јағышын чох јағмасынын һеч бир фајдасы олмајаҹаг. Амма јағыш јаваш-јаваш јағанда торпаг сују ҹанына чәкә билир, бу да биткинин бөјүмәсинә көмәк едир. Ејнилә Мүгәддәс Китабы тез-тәләсик охусаг, охудугларымызы гаврамајаҹағыг, онлар јадымызда галмајаҹаг вә тәтбиг едә билмәјәҹәјик (Јаг. 1:24).

9. Мүгәддәс Китабы сүрәтлә охумаг вәрдишимиз варса, нә етмәлијик?

⁹ Мүгәддәс Китабы сүрәтлә охудуғунузу ҝөрсәниз, нә етмәлисиниз? Арам-арам охујун. Чалышын ја охуја-охуја дүшүнәсиниз, ја да охујандан сонра дүшүнмәјә вахт ајырасыныз. Буну етмәк елә дә чәтин дејил. Охудугларынызын дәринлијинә вармаг үчүн мүталиәјә ајырдығыныз вахты узада биләрсиниз, јахуд даһа аз ајә охујуб, галан вахты охудугларыныз үзәриндә дүшүнә биләрсиниз. Бајаг ады чәкилән Виктор дејир: «Чалышырам, Мүгәддәс Китабын охунмасыны гыса едим.  Адәтән бир фәсил охујурам. Сәһәр тездән охудуғум үчүн ҝүнүн галан һиссәсини дүшүнмәјә вахтым олур». Нә гәдәр охумағыныздан асылы олмајараг, елә бир сүрәтлә охујун ки, охудугларыныз үзәриндә дүшүнә биләсиниз. (Зәб. 119:97; « Дүшүнмәк үчүн суаллар» адлы чәрчивәјә бахын.)

10. Өјрәндикләринизи неҹә тәтбиг едәҹәјинизә даир нүмунә чәкин (1 Салоникилиләрә 5:17, 18).

¹⁰ Мүталиәни нә вахт етмәјиниздән вә она нә гәдәр вахт ајырмағыныздан асылы олмајараг, охудугларынызы неҹә тәтбиг едәҹәјиниз барәдә дә дүшүнүн. Аллаһын Кәламындан бир парча охујандан сонра өзүнүздән сорушун: «Бу мәлуматы инди вә ја јахын ҝәләҹәкдә неҹә тәтбиг едә биләрәм?» Туталым, мүталиә едәркән 1 Салоникилиләрә 5:17, 18 ајәләрини охујурсунуз. (Ајәләри охујун.) Бу ики ајәни охујандан сонра дајаныб дүшүнүн: «Нә гәдәр тез-тез дуа едирәм? Дуаларым сәтһи дејил ки? Нәләрә ҝөрә миннәтдарам?» Бәлкә дә, гәрара ҝәләҹәксиниз ки, үч конкрет шејә ҝөрә Јеһоваја миннәтдарлығынызы билдирәсиниз. Мүгәддәс Китабдан өјрәндикләриниз үзәриндә бу ҹүр дүшүнмәјә бир нечә дәгигә вахт ајырмағыныз белә ону баша дүшмәјә вә тәтбиг етмәјә көмәк едәҹәк. Ҝөрүн һәр ҝүн ајәләри белә тәһлил етсәниз, бунун сизә нә гәдәр фајдасы олаҹаг! Бах онда Аллаһын Сөзүнүн даһа јахшы иҹрачылары олаҹагсыныз. Јахшы, бәс ҝөрсәниз ки, үзәриндә ишләмәли олдуғунуз чох шеј вар, онда нә едә биләрсиниз?

ҜҮҸҮНҮЗ ЧАТАН МӘГСӘДЛӘР ГОЈУН

11. Бәзән бизи нә руһдан сала биләр? Нүмунә чәкин.

¹¹ Мүгәддәс Китабы охујанда чох шејин үзәриндә ишләмәли олдуғунузу ҝөрмәк сизи руһдан сала биләр. Белә бир сәһнәни тәсәввүрүнүздә ҹанландырын: Бу ҝүн Мүгәддәс Китаб мүталиәниздән ајры-сечкилик етмәмәклә бағлы мәсләһәт охујурсунуз (Јаг. 2:1—8). Ҝөрүрсүнүз ки, башгаларына гаршы рәфтарынызы јахшылашдырмалысыныз. Буна ҝөрә дә бәзи дәјишикликләр етмәк гәрарына ҝәлирсиниз. Сизә әһсән! Сәһәри ҝүн охудуғунуз ајәләр дили ҹиловламағын ваҹиблијиндән бәһс едир (Јаг. 3:1—12). Бу ајәләр үзәриндә дүшүнәндә ҝөрүрсүнүз ки, һәрдән сиз дә хошаҝәлмәјән сөзләр ишләдирсиниз, мәнфи шејләр дејирсиниз. Буна ҝөрә дә мүсбәт, руһландырыҹы данышмағы гаршыныза мәгсәд гојурсунуз. Нөвбәти ҝүн исә охудуғунуз ајәләр дүнја илә достлуг етмәмәк барәдәдир (Јаг. 4:4—12). Фикирләширсиниз ки, әјләнҹә мәсәләсиндә даһа сечиҹи олмалысыныз. Артыг дөрдүнҹү ҝүнә чатанда нә гәдәр шејин үзәриндә ишләмәли олдуғунузу ҝөрүб руһдан дүшә биләрсиниз.

12. Мүгәддәс Китабы охујаркән дәјишиклик етмәли олдуғунузу ҝөрәндә нәјә ҝөрә руһдан дүшмәмәлисиниз? (Һәмчинин һашијәјә бахын.)

 ¹² Әҝәр өзүнүздә чох шеји дүзәлтмәлисинизсә, руһдан дүшмәјин. Бу, үрәјинизин вәзијјәтинин јахшы олдуғундан хәбәр верир. Тәвазөкар вә дүрүст инсанын Мүгәддәс Китабы охумагда мәгсәди зәиф јөнләрини ҝөрүб үзәриндә ишләмәкдир a. Нәзәрә алын ки, «јени шәхсијјәти» ҝејинмәк бир дәфәјә мүмкүн дејил. Бу, давамлы просесдир (Кол. 3:10). Бәс бундан сонра да Аллаһын Сөзүнүн иҹрачысы олмаға сизә нә көмәк едәҹәк?

13. Ҝүҹүнүз чатан сајда мәгсәд гојмаға сизә нә көмәк едәр? (Һәмчинин шәклә бахын.)

¹³ Охудуғунуз һәр шеји бир дәфәјә тәтбиг етмәјә чалышмајын. Ҝүҹүнүз чатан сајда мәгсәд гојун (Мәс. 11:2). Белә бир шеј едә биләрсиниз: үзәриндә ишләмәк истәдијиниз саһәләрин сијаһысыны тутун. Сонра сијаһыдан бир вә ја ики саһәни сечин. Әввәлҹә онларын үзәриндә ишләјин, сонра исә башгаларына кечин. Бәс нәдән башламаг олар?

14. Һансы мәгсәдләрдән башлаја биләрсиниз?

¹⁴ Сизә асан олан мәгсәддән башлаја биләрсиниз. Јахуд үзәриндә даһа чох ишләмәли олдуғунуз саһәни сечә биләрсиниз. Мәгсәдинизи мүәјјән едәндән сонра нәшрләримиздән ахтарыш апарын. Мәсәлән, «Ҝөзәтчи Гүлләсинин ОНЛАЈН КИТАБХАНАСЫ», јахуд «Јеһованын Шаһидләринин нәшрләри үзрә ахтарыш» вәсаити сизә бу саһәдә көмәк едә биләр. Мәгсәдиниз барәдә Јеһоваја дуа един, Ондан гәлбиниздә һәм арзу ојатмасыны, һәм дә сизә ҝүҹ вермәсини диләјин (Филип. 2:13). Сонра исә өјрәндикләринизи һәјата кечирин.  Гојдуғунуз илк мәгсәдә чатдығынызы ҝөрдүкҹә, чох ҝүман, диҝәр мәгсәдләринизин дә үзәриндә ишләмәјә һәвәсләнәҹәксиниз. Һансыса саһәдә дәјишиклијә наил оланда, јахуд һансыса мәсиһи хүсусијјәтинизи јахшылашдыранда, еһтимал ки, диҝәр саһәләрин үзәриндә дә ишләмәк сизә асан олаҹаг.

ГОЈ АЛЛАҺЫН СӨЗҮ СИЗДӘ ФӘАЛИЈЈӘТ ҜӨСТӘРСИН

15. Јеһованын халгыны Мүгәддәс Китабы охујан бир чох инсандан фәргләндирән нәдир? (1 Салоникилиләрә 2:13).

¹⁵ Бәзи инсанлар Мүгәддәс Китабы дәфәләрлә охујуб. Бәс онлар охудугларына үрәкдән инанырлар? Мүгәддәс Китабын өјрәтдији кими јашамаға вә өзләриндә дүзәлиш етмәјә чалышырлар? Хејр. Тәәссүф ки, инсанларын чоху Мүгәддәс Китаба ујғун јашамыр. Бу, һәмин инсанларла Јеһованын Шаһидләри арасында неҹә бөјүк фәргин олдуғуну ҝөстәрир. Биринҹи әсрдә јашајан мәсиһиләр кими бизләр дә Мүгәддәс Китабы «неҹә вар елә, Аллаһын сөзү кими» гәбул едирик. Үстәлик, онун биздә фәалијјәт ҝөстәрмәси үчүн әлимиздән ҝәләни едирик. (1 Салоникилиләрә 2:13 ајәсини охујун.)

16. Аллаһын Сөзүнүн иҹрачысы олмаға бизә нә көмәк едәр?

¹⁶ Аллаһын Кәламыны охујуб тәтбиг етмәк һәмишә асан олмур. Ола билсин, вахт тапыб охумаға чәтинлик чәкирик. Јахуд да сүрәтли охумаға мејиллијик вә охудугларымызын үзәриндә дүшүнмүрүк. Бәлкә дә дәјишмәли олдуғумуз саһәләрин чохлуғу бизи руһдан салыр. Чәтинлијимиз нә олурса олсун, ашылмаз дејил. Јеһованын көмәји илә бунун өһдәсиндән ҝәлә биләрик. Ҝәлин Онун көмәјини гәбул едәк вә унутган динләјиҹи олмајыб Аллаһын Сөзүнүн иҹрачысы олаг. Шүбһәсиз, Аллаһын Кәламыны нә гәдәр чох мүталиә етсәк вә өјрәндикләримизи тәтбиг етсәк, бир о гәдәр хошбәхт олаҹағыг (Јаг. 1:25).