1. Иса Мәсиһ тезликлә нә едәҹәк?

 БИЗ бәшәр тарихинин һәлледиҹи дөврүндә јашајырыг. Тезликлә Иса Мәсиһ јер үзүндә јашајан һәр бир инсана һөкм чыхараҹаг. О, һәмин вахтын јахынлашдығыны билмәјимиз үчүн ҝөзәҝөрүнмәз һүзуру вә «дөврүн јекуну» илә бағлы «әламәт» вермишди (Мәт. 24:3). Бу барәдә Мәтта 24 вә 25-ҹи фәсилләрдә, һәмчинин Марк 13-ҹү вә Лука 21-ҹи фәсилдә јазылыб.

2. Бу мәгаләдә нәји мүзакирә едәҹәјик вә бунун бизә һансы көмәји дәјәҹәк?

² Һөкм вахтына һазыр олмағымыз үчүн Иса Мәсиһ үч мәсәл чәкир. Бу мәсәлләр бизим үчүн бир хәбәрдарлыгдыр. Сөһбәт гојунлар вә кечиләр һагда мәсәлдән, он гыз һагда мәсәлдән вә талант һагда мәсәлдән ҝедир. Һәр мәсәли арашдырдыгҹа ҝөрәҹәјик ки, инсанын давранышы онун һагда һансы һөкмүн чыхарылаҹағына тәсир едәҹәк. Ҝәлин ҝөрәк бу мәсәлләрдән нә өјрәнирик вә буну неҹә тәтбиг едә биләрик. Илк олараг, гојунлар вә кечиләр һагда мәсәлдән данышаҹағыг.

ГОЈУНЛАР ВӘ КЕЧИЛӘР

3. Иса Мәсиһ инсанлара нә вахт һөкм чыхараҹаг?

³ Иса Мәсиһ гојунлар вә кечиләр һагда мәсәлиндә инсанлара нәјин әсасында һөкм чыхараҹағыны изаһ едир. О, инсанын хош хәбәрә неҹә һај вермәсини вә онун мәсһ олунмуш гардашларыны дәстәкләјиб-дәстәкләмәмәсини  әсас ҝөтүрәҹәк (Мәт. 25:31—46). Иса Мәсиһ һөкмүнү «бөјүк мүсибәт»ин сонуна јахын, Армаҝеддондан дәрһал әввәл чыхараҹаг (Мәт. 24:21). Чобан гојунлары кечиләрдән ајырдығы кими Иса Мәсиһ дә онун мәсһ олунмуш гардашларыны дәстәкләјәнләри дәстәкләмәјәнләрдән ајыраҹаг.

4. Әшија 11:3, 4 ајәләриндән Иса Мәсиһин инсанлара әдаләтли һөкм чыхараҹағы неҹә ҝөрүнүр? (Шәклә бахын.)

⁴ Мүгәддәс Китаб пејғәмбәрлијиндән ајдын ҝөрүнүр ки, Јеһованын Һаким кими тәјин етдији Иса Мәсиһ әдаләтлә һөкм чыхараҹаг. (Әшија 11:3, 4 ајәләрини охујун.) О, инсанларын нә дүшүндүјүнү, неҹә данышдығыны вә даврандығыны, о ҹүмләдән мәсһ олунмуш гардашларына мүнасибәтини мүшаһидә едир (Мәт. 12:36, 37; 25:40). Беләҹә, о биләҹәк, кимләр онун мәсһ олунмуш гардашларына вә онларын ҝөрдүјү ишә дәстәк олуб, кимләр олмајыб a. Мәсиһин гардашларыны дәстәкләмәјин әсас јолларындан бири онлара тәблиғ ишиндә көмәк етмәкдир. Бу иши дәстәкләјәнләр «салеһ» сајылаҹаг вә онларын гаршысында јер үзүндә әбәди јашамаг имканы ачылаҹаг (Мәт. 25:46; Вәһј 7:16, 17). Бу, сәдагәтини горујан инсанлар үчүн мөһтәшәм бир мүкафатдыр. Онларын һәм бөјүк мүсибәт заманы, һәм дә ондан сонра садиг галмасы сајәсиндә адлары «һәјат китабы»ндан силинмәјәҹәк (Вәһј 20:15).

5. Гојунлар вә кечиләр һагда мәсәл бизи нәјә тәшвиг едир вә бу мәсәл кимләрә аиддир?

⁵ Садиг галын. Иса Мәсиһин гојунлар вә кечиләр һагда мәсәли, әсасән, јер үзүндә јашамаға үмид едәнләрә аиддир. Онларын иманы тәкҹә мәсиһин гардашларыны тәблиғ ишиндә дәстәкләмәләриндән јох, һәмчинин Исанын тәјин етдији садиг вә ағыллы нөкәрин рәһбәрлијинә табе олмаларындан ҝөрүнүр (Мәт. 24:45). Амма ҝөјдә јашамаға үмид едәнләр дә бу мәсәлдәки хәбәрдарлыға ҹидди јанашмалыдырлар, чүнки Иса Мәсиһ онларын да дүшүнҹә тәрзинә, давранышына вә данышығына фикир верир. Онлардан да садиг галмаг ҝөзләнилир. Әслиндә, Иса Мәсиһ мәсһ олмушлар үчүн конкрет хәбәрдарлыгларын олдуғу ики мәсәл чәкмишди. Һәмин мәсәлләр һагда Мәтта 25-ҹи фәсилдә дә јазылыб. Ҝәлин әввәлҹә ағыллы вә ағылсыз гызлар һагда мәсәли мүзакирә едәк.

АҒЫЛЛЫ ВӘ АҒЫЛСЫЗ ГЫЗЛАР

6. Беш гыз ағыллы олдуғуну неҹә ҝөстәрди? (Мәтта 25:6—10).

⁶ Иса ағыллы вә ағылсыз гызлар һагда мәсәлиндә бәји гаршыламаға чыхан он гыздан данышыр (Мәт. 25:1—4). Онларын һамысы бәјлә тој мәҹлисинә ҝирмәјә үмид едирди. Иса гызларын бешини «ағыллы», бешини исә «ағылсыз» адландырыр. Ағыллы гызлар һазырлыглы вә ајыг-сајыг идиләр. Онлар бәји, лап лазым ҝәлсә, ҝеҹә јарысына кими ҝөзләмәјә һазыр идиләр. Буна ҝөрә дә онлар гаранлыг дүшәндә ишыг олсун дејә өзләри илә чыраг ҝәтирмишдиләр. Бу гызлар бәјин ҝеҹикмәсини дә нәзәрә алмышдылар. Буна ҝөрә дә өзләри илә әлавә јағ ҝөтүрмүшдүләр. Беләликлә, чырагларынын даим јанылы галмасы үчүн лазым олан һәр шеји етмишдиләр. (Мәтта 25:6—10 ајәләрини охујун.) Бәј ҝәләндә ағыллы гызлар онунла бирликдә тој мәҹлисинә ҝирди. Ејнилә Мәсиһ ҝәләнә кими сәдагәтини вә ајыг-сајыглығыны горујан мәсһ олунмуш мәсиһиләр дә  Аллаһын Падшаһлығына дахил олуб Бәјин јанында олмаға лајиг ҝөрүләҹәкләр b (Вәһј 7:1—3). Бәс беш ағылсыз гыз һагда нә демәк олар?

7. Беш ағылсыз гызын агибәти неҹә олду вә буна сәбәб нә иди?

⁷ Ағыллы гызлардан фәргли олараг беш ағылсыз гыз бәјин ҝәлишинә һазыр дејилди. Онларын чыраглары сөнмәк үзрә иди. Өзләри илә әлавә јағ да ҝәтирмәмишдиләр. Бу гызлар бәјин ҝәлмәк үзрә олдуғуну ешидәндә јағ алмаға ҝедирләр. Бәј ҝәләндә онлар һәлә гајытмамышдылар. Һәмин вахт «о гызлар ки һазыр иди, бәјлә тој мәҹлисинә ҝирдиләр вә гапы бағланды» (Мәт. 25:10). Сонра ағылсыз гызлар ҝәлиб тој мәҹлисинә дахил олмаг истәјәндә бәј онлара белә деди: «Мән сизи танымырам» (Мәт. 25:11, 12). Бу гызлар бәјин ҝәлишини лазыми гәдәр ҝөзләмәјә һазыр дејилдиләр. Мәсһ олунмуш мәсиһиләр бу мәсәлдән нә өјрәнирләр?

8, 9. Мәсһ олунмушлар он гыз һагда мәсәлдән нә өјрәнә биләрләр? (Һәмчинин шәклә бахын.)

⁸ Ајыг-сајыг вә һазырлыглы олун. Иса Мәсиһ бу мәсәли чәкәндә ҝәләҹәкдә ики груп мәсһ олунмуш мәсиһинин олаҹағыны нәзәрдә тутмурду. Јәни о демәк истәмирди ки, бир груп Шејтан дүнјасынын сонуна кими ҝөзләмәјә һазыр олаҹаг, диҝәри исә јох. Бу мәсәл бир хәбәрдарлыг иди вә ҝөстәрирди ки, мәсһ олунмушлар ахыра кими дөзмәјә һазыр олмасалар, онларла нә баш верәҹәк. Белә һалда онлар мүкафатларыны алмајаҹаглар (Јәһ. 14:3, 4). Бу, ҹидди мәсәләдир! Истәр ҝөјдә, истәрсә дә јердә јашамаға үмид едәк, бу мәсәлдәки хәбәрдарлығы гулагардына вурмамалыјыг. Һәр биримиз һазырлыглы, ајыг-сајыг олмалы вә ахыра кими дөзмәјә һазыр олмалыјыг (Мәт. 24:13).

⁹ Иса Мәсиһ он гыз һагда мәсәллә ајыг-сајыг вә һазырлыглы олмағын ваҹиблијини  вурғулајандан сонра талант һагда мәсәл данышыр. Бу мәсәл әмәксевәр олмағын ваҹиблији барәдәдир.

ТАЛАНТ

10. Ики нөкәр садиг олдуғуну неҹә ҝөстәрди? (Мәтта 25:19—23).

¹⁰ Иса Мәсиһ талант һагда мәсәлиндә ағасына садиг олан ики нөкәрдән вә садиг олмајан бир нөкәрдән данышыр (Мәт. 25:14—18). Ики нөкәр садиг олдуғуну ағаларынын сәрвәтини артырмаг үчүн вар ҝүҹләри илә чалышмагла ҝөстәрир. Ағасы башга өлкәјә ҝетмәздән әввәл нөкәрләринин һәр биринә талант әманәт едир. Бу, бөјүк мәбләғдә пул иди. Ики садиг нөкәр әмәксевәрдир, онлар пулдан ағылла истифадә едир. Нәтиҹәдә ағалары ҝери гајыданда ҝөрүр ки, онлар пулу икигат артырыблар. Ағалары буна ҝөрә онлары тәрифләјир. Бу ики нөкәр онунла бирҝә севинир. (Мәтта 25:19—23 ајәләрини охујун.) Бәс үчүнҹү нөкәр барәдә нә демәк олар? О, ағасынын әманәт етдији пулла нә едир?

11. «Тәнбәл» нөкәрин агибәти неҹә олду вә буна сәбәб нә иди?

¹¹ Үчүнҹү нөкәрә бир талант верилмишди, амма о, «тәнбәл» иди. Ағасы онун бу талантдан ағылла истифадә етмәсини истәјирди. Нөкәр исә бу таланты торпаға басдырыр. Ағасы гајыданда нөкәрин әлиндә она верәҹәји бир талантдан башга һеч нәји олмур. Нөкәрин дүшүнҹәси јанлыш иди. О, ағасынын сәрвәтини артырмадығына ҝөрә үзр истәмәк әвәзинә, ону һагсыз јерә «тәләбкар» адландырыр. Ағасы нөкәрин бу һәрәкәтиндән наразы галыр вә әлиндәки таланты да алыб евиндән говур (Мәт. 25:24, 26—30).

12. Ики садиг нөкәр бу ҝүн кими тәмсил едир?

¹² Мәсәлдәки ики садиг нөкәр садиг мәсһ олунмуш мәсиһиләри тәмсил едир. Ағалары Иса Мәсиһ онлары өзү илә бирҝә севинмәјә дәвәт едир. Онлар ҝөјләр мүкафатына, биринҹи дирилмәјә лајиг ҝөрүлүрләр (Мәт. 25:21, 23; Вәһј 20:5б). Тәнбәл нөкәрин давранышы исә мәсһ олунмуш мәсиһиләр үчүн бир хәбәрдарлыгдыр. Һансы мәнада?

13, 14. Мәсһ олунмуш мәсиһиләр талант һагда мәсәлдән нә өјрәнирләр? (Һәмчинин шәклә бахын.)

 ¹³ Әмәксевәр вә чалышган олун. Он гыз һагда мәсәлдә олдуғу кими талант һагда мәсәлдә дә Иса Мәсиһ мәсһ олунмушларын ҝәләҹәкдә тәнбәл олаҹагларыны нәзәрдә тутмурду. Садәҹә, зәһмәткеш, чалышган олмасалар, онларла нә баш верәҹәјини изаһ едирди. Хәбәрдарлыг едирди ки, тәнбәл олсалар, алдыглары дәвәтә вә Аллаһ тәрәфиндән сечилмәјә лајиг олмадыгларыны ҝөстәрәҹәкләр. Бунунла да онлара сәмави Падшаһлыға дахил олмаға иҹазә верилмәјәҹәк (2 Бут. 1:10).

¹⁴ Исанын он гыз вә талант һагда мәсәлиндән ајдын ҝөрмәк олар ки, бүтүн мәсһ олунмуш мәсиһиләр һазырлыглы, ајыг-сајыг, әмәксевәр вә чалышган олмалыдыр. Бәс Иса мәсһ олунмушлара башга һансыса хәбәрдарлыг вермишди? Бәли. Исанын Мәтта 24:40, 41 ајәләриндәки сөзләри дә мәсһ олунмушлара чыхарылаҹаг сонунҹу һөкмлә бағлыдыр.

КИМЛӘР «ҜӨТҮРҮЛӘҸӘК»?

15, 16. Мәтта 24:40, 41 ајәләри мәсһ олунмуш мәсиһиләрин ајыг-сајыг галмалы олдугларыны неҹә ҝөстәрир?

¹⁵ Иса Мәсиһ үч мәсәли чәкмәмишдән әввәл мәсһ олунмушлары ҝөзләјән сонунҹу һөкмдән данышыр. Бу һөкм заманы кимин ҝөјләр мүкафатыны алмаға лајиг олдуғу ајдын олаҹаг. Буну изаһ етмәк үчүн о, тарлада ишләјән ики кишидән вә дән үјүдән ики гадындан бәһс едир. Мәсәлдән елә ҝөрүнүр ки, тарлада ишләјән кишиләрин икиси дә ејни иши ҝөрүр. Буну дән үјүдән гадынлар һагда да демәк олар. Амма Иса онлардан биринин ҝөтүрүләҹәјини, диҝәринин исә галаҹағыны демишди. (Мәтта 24:40, 41 ајәләрини охујун.) Сөзүнүн давамында Иса шаҝирдләрини тәшвиг едир: «Ојаг галын, чүнки Ағанызын һансы ҝүн ҝәләҹәјини билмирсиниз» (Мәт. 24:42). Иса он гыз һагда мәсәли данышандан сонра да буна бәнзәр сөзләр ишләтмишди (Мәт. 25:13). Бу фикирләр бир-бири илә неҹәсә әлагәлидир? Ҝөрүнүр, һә. Јалныз Аллаһ тәрәфиндән сечилән вә ахыра кими садиг галан мәсһ олунмушлар «ҝөтүрүләҹәк», јәни Иса Мәсиһ онлары Падшаһлығына апараҹаг (Јәһ. 14:3).

¹⁶ Ҝөздә-гулагда олун. Руһани ҹәһәтдән ојаг олмајан мәсһ олунмуш мәсиһи Јеһованын «сечдикләри» арасында олмајаҹаг (Мәт. 24:31). Үмуми ҝөтүрдүкдә, ҝәләҹәјә үмидләриндән асылы олмајараг Јеһованын бүтүн хидмәтчиләри Исанын сәрвахт вә садиг галмагла бағлы хәбәрдарлығына ҹидди јанашмалыдыр.

17. Нәјә ҝөрә бу ҝүн кимисә мүгәддәс руһ илә мәсһ олунанда Јеһованын бу гәрарыны суал алтына алмамалыјыг?

¹⁷ Биз Јеһованы јахшы таныјырыг. Буна ҝөрә дә чыхардығы һәр бир һөкмә етибар едирик. Јеһова сон илләрдә кимисә мәсһ етмәк гәрарына ҝәләндә биз бу гәрары суал алтына алмырыг c. Исанын үзүмлүк һагда чәкдији мәсәли јадымыза салаг (Мәт. 20:1—16). Иса ахшам саат беш радәләриндә ҝәлән ишчиләр барәдә нә демишди? Демишди ки, онлар сәһәрдән ишләјән ишчиләрлә ејни зәһмәт һаггыны алды. Ејнилә мәсһ олунмушлар да нә вахт сечилмәләриндән асылы олмајараг садиг галсалар, ҝөјләр мүкафатыны алаҹаглар.

ХӘБӘРДАРЛЫГЛАРА ГУЛАГ АСЫН

18, 19. Мәсәлләрдән нә өјрәндик?

¹⁸ Нә өјрәндик? Гојунлар вә кечиләр һагда мәсәл јер үзүндә јашамаға үмид  едән мәсиһиләрә ҝөстәрир ки, онлар һәм инди, һәм дә гаршыдакы бөјүк мүсибәт заманы садиг галмалыдырлар. Ҝәләҹәкдә Иса Мәсиһ онлары садиг сајыб «әбәди һәјата» говушмаға лајиг ҝөрәҹәк (Мәт. 25:46).

¹⁹ Һәмчинин биз мәсһ олунмушлар үчүн хәбәрдарлыг олан ики мәсәлдән данышдыг. Он гыз һагда мәсәлдә гызларын беши ағыллы давраныр. Онлар ајыг-сајыг вә һазырлыглы идиләр. Бәји нә гәдәр лазымдыр, о гәдәр ҝөзләмәјә һазыр идиләр. Ағылсыз гызлар исә һазырлыгсыз иди. Буна ҝөрә дә бәј онлары тој мәҹлисинә бурахмыр. Биз дә Иса Мәсиһин бу дүнјаја һөкм кәсәҹәји ҝүнү лазым олдуғу гәдәр ҝөзләмәјә һазыр олмалыјыг. Талант һагда мәсәлдә исә биз әмәксевәр вә чалышган олан ики садиг нөкәрдән данышдыг. Онлар ағалары үчүн ҹанла-башла ишләјирдиләр вә онун разылығыны газандылар. Тәнбәл нөкәрдән исә ағасы разы галмады. Өзүмүз үчүн һансы нәтиҹәни чыхарырыг? Биз та бу дүнјанын сонуна кими Јеһованын јолунда ҝүҹүмүзү әсирҝәмәмәлијик. Нәһајәт, өјрәндик ки, сәмави мүкафатларыны алмаг үчүн мәсһ олунмушлар неҹә ҝөздә-гулагда ола биләрләр. Онлар ҝөјдә Исанын јанына топланаҹаглары вахты бөјүк сәбирсизликлә ҝөзләјирләр. Мәсһ олунмуш мәсиһиләр Армаҝеддон мүһарибәсиндән сонра Гузунун тој ҝүнүндә онун ҝәлини олаҹаглар (2 Салон. 2:1; Вәһј 19:9).

20. Јеһова Онун хәбәрдарлыгларына гулаг асанлар үчүн нә едәҹәк?

²⁰ Һөкм вахты сүрәтлә јахынлашса да, бизим горхмаг үчүн һеч бир әсасымыз јохдур. Садиг галсаг, сәмави Атамыз Јеһова бизә «инсан ҝүҹүндән үстүн олан ҝүҹү» верәҹәк вә беләҹә, биз «инсан Оғлунун гаршысында дура» биләҹәјик (2 Кор. 4:7; Лука 21:36). Ҝөјдә вә ја јердә јашамаға үмид етмәјимиздән асылы олмајараг, Исанын мәсәлләриндәки хәбәрдарлыға ҹидди јанашсаг, Јеһованын разылығыны газанаҹағыг. Аллаһымызын лүтфү сајәсиндә адымыз «һәјат китабында» галаҹаг (Дән. 12:1; Вәһј 3:5).