1. Ҹидди ҝүнаһ етмиш бәзи инсанларла бағлы һансы үмид вар?

 ӘВВӘЛКИ мәгаләдә Коринф јығынҹағындакы бир нәфәрин ҹидди ҝүнаһ ишләдији һагда данышдыг вә Булусун бу мәсәләни неҹә һәлл етдијини ҝөрдүк. Һәмин инсан төвбә етмәдији үчүн јығынҹагдакыларын арасында гала билмәзди. Амма мәгаләмизин әсас ајәсиндән ҝөрдүјүмүз кими ҹидди ҝүнаһ ишләмиш бәзи инсанларын төвбәјә ҝәлмәси мүмкүндүр (Ром. 2:4). Ағсаггаллар онларын төвбә етмәсинә неҹә көмәк едә биләр?

2, 3. Әҝәр диндашымызын ҹидди ҝүнаһ ишләдијини билириксә, нә етмәлијик вә нәјә ҝөрә?

² Ағсаггалын инсана көмәк етмәси үчүн илк нөвбәдә мәсәләдән хәбәри олмалыдыр. Бу сәбәбдән әҝәр диндашымызын ҹидди ҝүнаһ ишләдијини билириксә, нә етмәлијик? Һәмин инсаны ағсаггаллардан көмәк истәмәјә тәшвиг етмәлијик (Әшј. 1:18; Һәв. 20:28; 1 Бут. 5:2).

³ Бәс әҝәр ҝүнаһ едән инсан ағсаггалларла данышмаг истәмирсә, онда неҹә? Бу заман диндашымыза лазыми көмәјин ҝөстәрилмәси үчүн өзүмүз ағсаггаллара јахынлашаҹағыг. Белә едәндә һәмин диндашымызы севдијимизи вә ону итирмәк истәмәдијимизи ҝөстәрәҹәјик. Әҝәр о өз әмәлиндән дөнмәсә, Јеһова илә мүнасибәтләрини даһа да корлајаҹаг. Бундан әлавә, онун һәрәкәти јығынҹағын адына ләкә ҝәтирә биләр. Буна ҝөрә дә биз Јеһоваја вә һәмин инсана севҝимиздән ирәли ҝәләрәк ҹәсарәтли аддым атыб ағсаггалларла данышаҹағыг (Зәб. 27:14).

 АҒСАГГАЛЛАР ҸИДДИ ҜҮНАҺА ЈОЛ ВЕРМИШ ИНСАНА НЕҸӘ КӨМӘК ЕДИРЛӘР?

 4. Ҹидди ҝүнаһ ишләјән инсанла ҝөрүшәркән ағсаггалларын мәгсәди нә олур?

⁴ Јығынҹагдан кимсә ҹидди ҝүнаһ ишләјәндә ағсаггаллар шурасы комитә јаратмаг үчүн араларындан үч ағсаггал сечир a. Бу гардашлар тәвазөкар вә һәлим олмалыдырлар. Онлар инсаны төвбә етмәјә тәшвиг етсәләр дә, баша дүшүрләр ки, һеч кими дәјишилмәјә мәҹбур едә билмәзләр (Ган. 30:19). Ағсаггаллар бүтүн ҝүнаһ ишләјәнләрин Давуд кими төвбә едәҹәјини ҝөзләмирләр (2 Ишм. 12:13). Ола биләр, кимләрсә Јеһованын нәсиһәтинә гулаг асмаг истәмәјәҹәк (Јар. 4:6—8). Бунунла белә, ағсаггалларын мәгсәди одур ки, ҝүнаһ ишләјән инсаны мүмкүн гәдәр төвбәјә тәшвиг етсинләр. Ағсаггаллар онунла ҝөрүшән заман һансы принсипләр әсасында давранырлар?

 5. Ағсаггаллар ҝүнаһ едән инсанла ҝөрүшән заман һансы мәсләһәтә әмәл едирләр? (2 Тимутијә 2:24—26; һәмчинин шәклә бахын.)

⁵ Ағсаггаллар ҝүнаһ едән инсана Јеһованын итмиш дәјәрли гузусу кими бахыр (Лука 15:4, 6). Буна ҝөрә дә һәмин инсанла ҝөрүшәндә онунла сәрт данышмырлар, кобуд рәфтар етмирләр. Һәм дә бу ҝөрүшә суаллар вериб дәлилләр топладыглары формал бир ҝөрүш кими јанашмырлар. Онлар 2 Тимутијә 2:24—26 ајәләриндә садаланан кејфијјәтләри әкс етдирирләр. (Ајәләри охујун.) Ағсаггаллар ҝүнаһ ишләјән инсанын үрәјинә јол тапмаг истәдикләри үчүн онунла мүлајим, һәлим вә меһрибан шәкилдә данышырлар.

 6. Ағсаггаллар ҝүнаһ едән инсанла ҝөрүшмәздән әввәл өз үрәкләрини неҹә һазырлајырлар? (Ромалылара 2:4).

⁶ Ағсаггаллар әввәлҹә өз үрәкләрини һазырлајырлар. Онлар Булусун бу сөзләрини јадда сахлајырлар: «Аллаһ Өз хејирхаһлығы илә сәни төвбәјә чәкмәк истәјир». (Ромалылара 2:4 ајәсини охујун.) Буна ҝөрә дә онлар Јеһовадан нүмунә ҝөтүрүб ҝүнаһ едән инсанла хејирхаһ давранмаға чалышырлар. Ағсаггаллар јадда сахламалыдырлар ки, онлар ади чобанлардыр вә Мәсиһин ҝөстәришинә табедирләр (Әшј. 11:3, 4; Мәт. 18:18—20). Комитәдәки гардашлар ҝүнаһ едән инсанла ҝөрүшмәздән өнҹә ону төвбәјә тәшвиг етмәк мәгсәдләри барәдә дуа едәҹәкләр. Онлар Јеһованын бу мәсәләјә бахышыны өјрәнмәк үчүн Мүгәддәс Китабдан вә нәшрләримиздән ахтарыш апараҹаг, һәмчинин дуа едиб Јеһовадан дәрракә истәјәҹәкләр. Онлар инсанын дүшүнҹәсинә,  әһвали-руһијјәсинә, давранышына нәләрин тәсир етдијини, нәләри билмәли олдугларыны нәзәрдән кечирмәлидирләр (Мәс. 20:5).

7, 8. Ағсаггаллар ҝүнаһ ишләјән инсанла данышаркән Јеһованын сәбриндән неҹә нүмунә ҝөтүрә биләр?

⁷ Ағсаггаллар Јеһованын сәбрини өрнәк алырлар. Онлар Јеһованын гәдимдә ҝүнаһ ишләјән инсанларла неҹә рәфтар етдијини јаддан чыхармырлар. Мәсәлән, Јеһова Габиллә сәбирлә данышмышды. Әмәлиндән дөнмәсә, бунун нәјә ҝәтириб чыхараҹағыны демишди, итаәт етдији тәгдирдә исә јенидән Онун разылығыны газанаҹағыны билдирмишди (Јар. 4:6, 7). Јеһова Давуда нәсиһәт вермәк үчүн Натан пејғәмбәри ҝөндәрмишди. Пејғәмбәр падшаһын үрәјинә јол тапан бир нүмунә чәкмишди (2 Ишм. 12:1—7). Бундан әлавә, Јеһова Она аси чыхан Исраил халгынын јанына «дөнә-дөнә» пејғәмбәрләрини ҝөндәрмишди (Әрм. 7:24, 25). О, хидмәтчиләринә көмәк етмәк үчүн онларын төвбә етмәсини ҝөзләмирди. О Өзү илк аддым атыб онлары төвбәјә чағырырды.

⁸ Ағсаггаллар ҹидди ҝүнаһ ишләјән инсана көмәк едәркән Јеһованын нүмунәсини изләјирләр. Онлар 2 Тимутијә 4:2 ајәсиндә јазылдығы кими онунла «бүтүн сәбирләрини топлајараг» рәфтар едирләр. Буна ҝөрә дә ҝүнаһ едән инсанын үрәјиндә дүзҝүн давранмаг истәји ојатмаг үчүн ағсаггал онунла сакит тәрздә вә сәбирлә данышмалыдыр. Әҝәр ағсаггал тәмкинсиз давранса вә ја әсәбиләшсә, инсан мәсләһәтә гулаг асмаз, һәтта төвбә етмәк истәмәз.

9, 10. Ағсаггаллар инсанын өз әмәлләри барәдә дүшүнмәси үчүн нә едә биләр?

⁹ Ағсаггаллар инсанын ҝүнаһ етмәсинә ҝәтириб чыхаран амилләри нәзәрә алырлар. Мәсәлән, инсанын Јеһова илә мүнасибәтләринин зәифләмәсинә нә ҝәтириб чыхарыб? Ола биләрми ки, о, мүнтәзәм Мүгәддәс Китабы арашдырмырды вә хидмәтә чыхмырды? Бәлкә, о, Јеһоваја һәрдәнбир, сәтһи дуалар едирди? Бәлкә дә, нәфси илә мүбаризә апармағы дајандырмышды. Дост вә әјләнҹә сечиминдә јанлыш гәрарлар вермишди? Бу гәрарлары онун дүшүнҹәсинә неҹә тәсир етмишди? О, етдији һәрәкәтләрин Јеһованы кәдәрләндирдијини баша дүшүр?

¹⁰ Ағсаггаллар бу кими дүшүндүрүҹү суаллар вермәклә ҝүнаһ ишләјән инсана көмәк едәҹәк ки, о, руһани ҹәһәтдән зәифләмәсинә вә ҝүнаһ етмәсинә нәләрин ҝәтириб чыхардығы барәдә дүшүнсүн (Мәс. 20:5). Онлар буну мүлајим шәкилдә етмәли вә лазымсыз тәфәррүатлара вармамалыдырлар. Бундан әлавә, онлар инсаны дүшүндүрмәк вә һәрәкәтләринин јанлыш олдуғуну баша салмаг үчүн Натан пејғәмбәр кими нүмунәләр чәкә биләрләр. Бәлкә дә, инсан елә илк ҝөрүшдән јанлыш дүшүнҹәдә олдуғуну баша дүшәҹәк вә гәрарларына ҝөрә үрәкдән пешман олмаға башлајаҹаг. Һәтта, ола билсин, төвбә едәҹәк.

11. Иса Мәсиһ ҝүнаһ едән инсанларла неҹә рәфтар едирди?

¹¹ Ағсаггаллар Исадан өрнәк алмаға чалышырлар. Иса Мәсиһ дириләндән сонра Тарслы Шаула белә бир суал вермишди: «Шаул, Шаул, мәни нијә тәгиб едирсән?» Бу суалла Иса Шаула тутдуғу ишин јанлыш олдуғуну ҝөрмәјә көмәк етди (Һәв. 9:3—6). Иса бир «гадынын, Изәбилин» барәсиндә белә демишди: «Төвбә етмәси үчүн она вахт вердим» (Вәһј 2:20, 21).

12, 13. Ағсаггаллар ҝүнаһ едән инсана төвбә етмәси үчүн неҹә вахт верирләр? (Һәмчинин шәклә бахын.)

¹² Ағсаггаллар Исадан нүмунә ҝөтүрәрәк тез-тәләсик инсанын төвбә етмәјәҹәји гәнаәтинә ҝәлмирләр. Бәлкә дә, кимсә илк  ҝөрүш заманы төвбә едәҹәк. Кимәсә даһа чох вахт лазым ҝәлә биләр. Буна ҝөрә дә ағсаггаллар ҝүнаһ едән инсанла, ола билсин, бир јох, бир нечә дәфә ҝөрүшсүнләр. Бәлкә дә, илк ҝөрүшдән сонра ҝүнаһ едән мәсиһи она дејиләнләр барәдә ҹидди дүшүнмәјә башлајаҹаг. Ола билсин, тәвазөкар давраныб Јеһовадан ҝүнаһларынын бағышламасы үчүн әфв диләјәҹәк (Зәб. 32:5; 38:18). Беләҹә, нөвбәти ҝөрүш заманы о, илк ҝөрүшдәкиндән фәргли бир руһда олаҹаг.

¹³ Ағсаггаллар ҝүнаһ едән инсаны төвбәјә тәшвиг етмәк үчүн она шәфгәт вә хејирхаһлыг ҝөстәрирләр. Онлар Јеһоваја дуа едиб хаһиш едирләр ки, чәкдикләри зәһмәт јердә галмасын. Һәмчинин бу диндашларынын әмәлинин ҹиддилијини дәрк едиб төвбә едәҹәјинә үмидләрини итирмирләр (2 Тим. 2:25, 26).

14. Инсанын төвбә етмәси кимин сајәсиндә мүмкүндүр вә нәјә ҝөрә белә демәк олар?

¹⁴ Ҝүнаһ едән инсан төвбә едәндә биз чох севинирик (Лука 15:7, 10). Бәс онун төвбә етмәси кимин сајәсиндә мүмкүн олур? Ағсаггалларын? Булусун ҝүнаһ едән инсанларла бағлы нә дедијини јадымыза салаг: «Бәлкә, Аллаһ онларын төвбә етмәсинә изин верәр» (2 Тим. 2:25). Мүгәддәс Китабын тәлим нәшриндә бу ајә илә бағлы белә гејд вар: «Онун дүшүнҹәсиндә вә әһвали-руһијјәсиндә баш верән дәјишиклијә ҝөрә тәшәккүр һәр һансы инсана јох, Јеһоваја дүшүр. Она көклү дәјишикликләр етмәјә көмәк едән мәһз Јеһовадыр. Ардынҹа Булус төвбәнин башга ҝөзәл нәтиҹәләриндән данышыр. Бу, ҝүнаһкара һәгигәт барәсиндә даһа чох дәгиг билијә јијәләнмәјә, ағлыны башына јығмаға вә Шејтанын торундан гуртулмаға көмәк едә биләр» (2 Тим. 2:26).

15. Ағсаггаллар төвбә едән инсана давамлы көмәк етмәк үчүн нә едирләр?

¹⁵ Ҝүнаһ едән инсан төвбә едәндән сонра да комитә она ағсаггал зијарәтләри етмәјә давам едәҹәк. Она Шејтанын тәләләринә дүшмәмәси вә дүз јолдан ајрылмамасы үчүн лазым олан көмәји ҝөстәрәҹәкләр (Ибр. 12:12, 13). Әлбәттә,  ағсаггаллар инсанын нә етдијини һеч кимә ачыгламајаҹаглар. Бәс јығынҹаға нә барәдә мәлумат вермәк лазым ҝәлә биләр?

«ҺАМЫНЫН ГАРШЫСЫНДА ТӘНБЕҺ ЕТ»

16. 1 Тимутијә 5:20 ајәсинә әсасән Булус «һамы» дејәндә кими нәзәрдә тутурду?

¹⁶ 1 Тимутијә 5:20 ајәсини охујун. Һәвари Булус бу сөзләри диҝәр ағсаггала, Тимутијә јазмышды. О, ҝүнаһ ишләјәнләри «һамынын гаршысында тәнбеһ ет» дејәндә нәји нәзәрдә тутурду? Һәмин инсан бүтүн јығынҹағын гаршысында тәнбеһ олунмалы иди? Хејр. Булус бурада «һамы» дејәндә бу ҝүнаһ барәдә хәбәри олан һәр кәси нәзәрдә тутурду. Ола билсин, онлар ја өзләри буну ҝөрмүшдүләр, ја да ҝүнаһ едән инсан өзү буну онлара данышмышды. Ағсаггаллар јалныз бу инсанлара ајрыҹа дејәҹәкләр ки, мәсәләјә бахылыб вә лазыми тәдбир ҝөрүлүб.

17. Инсанын төһмәт алмасы һансы һалда јығынҹаға елан едилир вә нәјә ҝөрә?

¹⁷ Бәзән елә ола биләр ки, инсанын ҝүнаһ ишләмәси јығынҹагда чох адама мәлум олур вә ја ола билсин, мәлум олаҹаг. Белә олан һалда «һамы» сөзүнә артыг бүтүн јығынҹаг аид олаҹаг. Буна ҝөрә дә ағсаггалдан бири јығынҹагда елан едәҹәк ки, филан гардаш вә ја баҹы төһмәт алыб. Нәјә ҝөрә? Булусун сөзләринә әсасән, бунун сајәсиндә диҝәрләринин дә ҹидди ҝүнаһ ишләмәкдән ҝөзү горхаҹаг.

18. Вәфтиз олунмуш азјашлы мәсиһи ҹидди ҝүнаһ ишләдәндә ағсаггаллар мәсәләни неҹә һәлл едирләр? (Һәмчинин шәклә бахын.)

¹⁸ Бәс әҝәр ҹидди ҝүнаһ ишләмиш кәс 18 јашына чатмамыш вәфтиз олунмуш мәсиһидирсә, онда неҹә? Ағсаггаллар шурасынын тәјин етдији ики ағсаггал бу азјашлы илә вә онун мәсиһи валидејнләри илә ҝөрүш тәшкил едәҹәкләр. Онлар валидејнләрин ушаға төвбә  етмәјә көмәк етмәк үчүн артыг һансы аддымлары атдығыны өјрәнәҹәкләр b. Әҝәр азјашлы ушаг валидејнләринин мәсләһәтинә гулаг асырса вә сәһвини баша дүшүб дүзәлирсә, онда һәмин ики ағсаггал гәрар верә биләр ки, башга тәдбир ҝөрмәјә еһтијаҹ јохдур. Ахы өвладларына мәһәббәтлә тәрбијә вермәк, сәһвини баша салмаг Аллаһын валидејнләрә вердији мәсулијјәтдир (Ган. 6:6, 7; Мәс. 6:20; 22:6; Ефес. 6:2—4). Бундан сонра ағсаггаллар ушағын лазыми көмәк алыб-алмадығы илә бағлы вахташыры валидејнләри илә марагланаҹаглар. Бәс әҝәр азјашлы төвбә етмирсә, дәјишмәк истәмирсә, онда неҹә? Бу заман ағсаггаллар комитәси ушағын мәсиһи валидејнләри илә бирҝә онунла ҝөрүшәҹәкләр.

ЈЕҺОВА «ЧОХ МЕҺРИБАН ВӘ МӘРҺӘМӘТЛИДИР»

19. Ағсаггаллар ҹидди ҝүнаһ ишләјән инсанла ҝөрүшәркән Јеһованын нүмунәсини неҹә изләјирләр?

¹⁹ Комитәдәки ағсаггаллар Јеһованын гаршысында јығынҹағы тәмиз сахламаг мәсулијјәти дашыјырлар (1 Кор. 5:7). Онлар ејни заманда ҝүнаһ ишләјән инсаны мүмкүн гәдәр төвбәјә тәшвиг етмәјә чалышырлар. Буна ҝөрә дә ағсаггаллар инсанын сәһвини баша дүшүб дәјишәҹәјинә үмидләрини һеч вахт итирмирләр. Чүнки «чох меһрибан вә мәрһәмәтли» олан Јеһоваја бәнзәмәк истәјирләр (Јаг. 5:11). Јаша долмуш һәвари Јәһја мәһз белә әһвали-руһијјәдә иди. О јазмышды: «Әзиз балаларым! Бунлары сизә јазырам ки, һеч бир ҝүнаһ иш тутмајасыныз. Әҝәр кимсә бир ҝүнаһ иш тутса, Атанын јанында салеһ олан Иса Мәсиһ кими јардымчымыз вар» (1 Јәһ. 2:1).

20. Бу силсиләнин сонунҹу мәгаләсиндә нә һагда данышаҹағыг?

²⁰ Әфсуслар олсун ки, бәзән мәсиһи төвбә етмәк истәмир. Бу һалда о, јығынҹагдакыларын арасында гала билмәз. Бәс ағсаггаллар бу ҹүр ҹидди вәзијјәтләрдә нә едир? Бу силсиләнин сонунҹу мәгаләсиндә бу һагда данышаҹағыг.