1. «Аллаһын сүлһү» нәдир вә о бизә нәдә көмәк едир? (Филиппилиләрә 4:6, 7).

 «АЛЛАҺЫН СҮЛҺҮ». Дүнјанын бу сүлһдән хәбәри јохдур. Бу сүлһ сәмави Атамызла мүнасибәтдән гајнагланан гәлб раһатлығыдыр. Аллаһын сүлһү сајәсиндә үрәјимиздә горху-һүркү олмур. (Филиппилиләрә 4:6, 7 ајәләрини охујун.) Јеһованы севән инсанларла арамызда ҝөзәл достлуг мүнасибәтләри олур. Ән әсасы исә «сүлһ мәнбәји» олан Аллаһла јахын, сәмими дост олуруг (1 Салон. 5:23). Сәмави Атамызы таныјанда, Она ҝүвәнәндә вә итаәт едәндә Онун сүлһү һәтта чәтин вахтларда белә гәлбимизә сакитлик верир.

2. Нәјә ҝөрә әмин ола биләрик ки, биздә Аллаһын сүлһү ола биләр?

² Доғруданмы, хәстәликләр, фәлакәтләр, иғтишашлар, тәгибләр вә башга чәтинликләр вахты гәлб раһатлығыны горумаг мүмкүндүр? Бу чәтинликләр гәлбимизи горхуја сала биләр. Амма Иса давамчыларына нөвбәти мәсләһәти вермишди: «Гој үрәјиниз нараһат олмасын, горхмајын» (Јәһ. 14:27). Нә јахшы ки, баҹы-гардашлар Исанын мәсләһәтинә әмәл едирләр. Јеһованын көмәји сајәсиндә онлар ән чәтин сынаглар вахты белә гәлб раһатлығыны итирмирләр.

3. Епидемија вә ја пандемија инсанлара неҹә тәсир едир?

³ Епидемија вә ја пандемија һәјатымызы көклү шәкилдә дәјишә биләр. COVID-19 пандемијасы да чохларынын һәјатына тәсирсиз өтүшмәди. Бир һесабламаја әсасән, инсанларын јарысындан чоху пандемијада јухусузлугдан әзијјәт чәкиб. Бу хәстәлик нәтиҹәсиндә нараһатлыг, депрессија һаллары, спиртли ичкидән суи-истифадә, наркотик гәбулу, аилә зоракылығы вә интиһара ҹәһд һаллары хејли артыб. Јашадығыныз  әразидә хәстәлик јајылыбса, нараһатлығынызы азалтмаға вә Аллаһын сүлһүнү дујмаға нә көмәк едәр?

4. Нәјә ҝөрә Исанын ахырзаманла бағлы пејғәмбәрлији бизә гәлб раһатлығы верир?

⁴ Иса Мәсиһ пејғәмбәрлик етмишди ки, ахырзаманда «ҝаһ бурада, ҝаһ орада» хәстәликләр олаҹаг (Лука 21:11). Буну билмәк сајәсиндә хәстәликләр баш галдыранда тәәҹҹүбләнмирик вә гәлб раһатлығыны горуја билирик. Биз ҝөрүрүк ки, бүтүн һадисәләр Исанын дедији кими ҹәрәјан едир. Буна ҝөрә дә Иса Мәсиһин ахырзаманда јашајан кәсләрә вердији мәсләһәтә әмәл етмәлијик. О демишди: «Тәшвишә дүшмәјин» (Мәт. 24:6).

5. а) Филиппилиләрә 4:8, 9 ајәләринә әсасән, хәстәлик јајыланда нә барәдә дуа едә биләрик? б) Мүгәддәс Китабын аудиојазыларыны динләмәјин һансы хејрини ҝөрүрсүнүз?

⁵ Хәстәликләр түғјан едәндә инсан асанлыгла нараһатлыг кечирә, һәтта паникаја дүшә биләр. Белә бир шеј Дези b адлы баҹынын да башына ҝәлмишди. Онун әмиси, әмиси оғлу вә һәкими COVID-19 хәстәлијиндән вәфат етмишди. Дези горхурду ки, өзү дә хәстәлијә јолухар вә јашлы анасыны да јолухдурар. Бир тәрәфдән дә нараһат иди ки, пандемијаја ҝөрә бирдән ишини итирәр, белә олса, неҹә доланар, кирајә пулуну неҹә өдәјәр. О, фикирдән ҝеҹәләр јата билмирди. Амма Дези јенидән гәлб раһатлығы тапды. Она бу саһәдә нә көмәк етди? Дези Јеһоваја дуа едиб хаһиш етди ки, ону сакитләшдирсин вә мүсбәт дүшүнмәјә көмәк етсин. (Филиппилиләрә 4:8, 9 ајәләрини охујун.) Мүгәддәс Китабын аудиојазысына гулаг асараг о, санки Јеһованы динләјирди. «Охуҹуларын мүлајим сәсини ешитдикҹә нараһатлыгларым азалырды вә Јеһованын мәрһәмәтини һисс едирдим»,— дејә Дези бөлүшүр (Зәб. 94:19).

6. Фәрди мүталиә вә јығынҹаг ҝөрүшләри сизә неҹә көмәк едә биләр?

⁶ Хәстәликләр јајыланда инсанын һәјаты әввәлки кими олмур. Амма чалышын, фәрди мүталиә едәсиниз, јығынҹаг ҝөрүшләриндән галмајасыныз. Нәшрләримиздән, видеоларымыздан охшар чәтинликләрлә үзләшән, амма садиг галан диндашларымызын һәјат һекајәләри илә таныш олун (1 Бут. 5:9). Ибадәт ҝөрүшләриндә оланда чохлу руһландырыҹы фикирләр ешидәҹәксиниз. Бу ҝөрүшләрдә һәм өзүнүз руһланаҹагсыныз, һәм дә диндашларынызы руһландыраҹагсыныз (Ром. 1:11, 12). Һәмчинин дүшүнүн ҝөрүн Јеһова хәстәләнән, горхуја дүшән вә өзүнү тәнһа һисс едән хидмәтчиләринә неҹә дәстәк олмушду. Бу, иманынызы мөһкәмләндирәҹәк вә әмин олаҹагсыныз ки, Јеһова сизи дә тәк гојмајаҹаг.

7. Һәвари Јәһјадан нә өјрәнирик?

 ⁷ Диндашларынызла әлагәни кәсмәјин. Дүздүр, хәстәлик јајыланда биз инсанларла физики мәсафә сахламалы олуруг, һәтта диндашларымызла бир јердә оланда да онлара јахын ҝедә билмирик. Бәлкә дә, белә вахтларда өзүмүзү һәвари Јәһја кими һисс едирик. О, досту Гајла үз-үзә данышмаг истәјирди (3 Јәһ. 13, 14). Амма Јәһја баша дүшүрдү ки, бу, һәлә мүмкүн дејил. О һәмин вәзијјәтдә баҹардығыны етди, Гаја мәктуб јазды. Әҝәр сиз дә баҹы-гардашларла ҹанлы шәкилдә ҝөрүшә билмирсинизсә, онларла телефон, видеозәнҝ васитәсилә әлагә јарадын вә ја месаж јазын. Диндашларынызла даим үнсијјәтдә олсаныз, өзүнүзү әввәлки гәдәр тәнһа һисс етмәјәҹәксиниз вә гәлбиниз арамлыг тапаҹаг. Ҝүҹлү нараһатлыг кечирәндә ағсаггалларла данышын, онлар сизә үрәк-дирәк верәҹәк (Әшј. 32:1, 2).

8. Фәлакәтлә үзләшәндә инсан адәтән һансы һиссләри кечирир?

⁸ Дашгын, зәлзәлә, јанғын баш верәндә бәзи инсанлар узун мүддәт тәлаш һиссиндән гуртула билмирләр. Инсан әзизини итирәндә, ев-ешији дағыланда кәдәр, үмидсизлик вә һәтта гәзәб һисси кечирир. Әҝәр сиз дә бу ҹүр һиссләр кечирирсинизсә, бу, о демәк дејил ки, иманыныз аздыр, јахуд малпәрәстсиниз. Һәјатын бу кими кешмәкешли ҝүнләриндә белә һиссләр кечирмәк тәбиидир. Ола билсин, башгалары да сизин мәнфи реаксија верәҹәјинизи ҝөзләсин (Әјј. 1:11). Амма белә чәтин вахтларда да гәлб раһатлығыны горумаг мүмкүндүр. Неҹә?

9. Иса бизи фәлакәтләрә неҹә һазырлајырды?

⁹ Исанын сөјләдији пејғәмбәрлији унутмајын. Бу дүнјада бәзи инсанлар нә вахтса фәлакәтлә үзләшәҹәкләрини ағылларына ҝәтирмирләр. Амма биз билирик ки, фәлакәтләр ҝет-ҝедә артаҹаг вә һәтта бу бизим дә башымыза ҝәлә биләр. Иса давамчыларына демишди ки, сон ҝәлмәздән әввәл «ҝүҹлү зәлзәләләр» вә диҝәр фәлакәтләр олаҹаг (Лука 21:11). Һәмчинин о демишди ки, һәрҹ-мәрҹлик баш алыб ҝедәҹәк (Мәт. 24:12). Бу ҝүн бунун ҹанлы шаһидијик. Мәсәлән, зоракылыг, ҹинајәткарлыг вә терроризм бүтүн дүнјаны өз ҹәнҝинә алыб. Һәтта Јеһованын бир чох садиг хидмәтчиләри белә бу бәлалара туш ҝәлир. Иса һеч вахт демәмишди ки, башымыза белә бир бәла ҝәлибсә, демәли, Аллаһ бизи атыб (Әшј. 57:1; 2 Кор. 11:25). Јеһова бизи мөҹүзәви шәкилдә бүтүн фәлакәтләрдән горумаса да, бу фәлакәтләр заманы бизә сакитлик, гәлб раһатлығы верир.

10. Нәјә ҝөрә фәлакәтләрә индидән һазырлашмаг иманын ҝөстәриҹисидир? (Мәсәлләр 22:3).

¹⁰ Фәлакәтләрә габагҹадан һазырлашсаг, фәлакәт баш верәндә сакитлијимизи горумаг асан олаҹаг. Бәс габагҹадан һазырлашмағымыз Јеһоваја иманымызын олмадығындан хәбәр верир? Әлбәттә ки, јох. Әслиндә, фәлакәтләрә һазырлашмагла ҝөстәририк ки, Јеһованын бизим гајғымыза галаҹағына инанырыг. Нәјә ҝөрә? Чүнки Аллаһын Кәламында мәсләһәт ҝөрүлүр ки, фәлакәтләрә һазырлыглы олаг. (Мәсәлләр 22:3 ајәсини охујун.) Һәмчинин Аллаһын тәшкилаты нәшрләр, ибадәт ҝөрүшләри вә еланлар васитәсилә хәбәрдарлыг едир ки, фәлакәтләрә һазырлашаг c. Әҝәр Јеһоваја етибар едириксә, елә индидән, фәлакәт баш вермәмишдән өнҹә верилән мәсләһәтләрә риајәт едәҹәјик.

11. Маргарет баҹыдан нә өјрәнирик?

 ¹¹ Ҝәлин Маргарет адлы баҹынын нүмунәсинә бахаг. Онун јашадығы әразидә ҝүҹлү јанғын баш вердији үчүн һөкумәт әһалијә әразини тәрк етмәји тапшырмышды. Һамы ејни вахтда чыхдығындан јолларда тыхаҹ јаранмышды вә һәрәкәт дајанмышды. Үстәлик, түстү һәр јаны бүрүмүшдү; Маргарет бир мүддәт машындан чыха билмәди. Амма габагҹадан һазырлашдығы үчүн сағ галды. О, әввәлҹәдән чантасына хәритә гојмушду. Хәритәнин көмәјилә башга јолла һәмин әразидән чыха билди. Һәм дә баҹы әввәлҹәдән бу јолу машынла ҝетмишди ки, фөвгәладә һал јаранарса, јолу асанлыгла тапсын. Габагҹадан һазырлашдығы үчүн Маргарет һәјатыны хилас етди.

12. Тәһлүкәсизликлә бағлы ҝөстәришләрә нәјә ҝөрә әмәл етмәк лазымдыр?

¹² Идарә органлары һәм әһалини, һәм дә асајиши горумаг үчүн комендант сааты вә ја тәхлијә елан едә биләр. Јахуд һансыса башга ҝөстәришләр верә биләр. Бәзи инсанлар ев-ешикләрини гојуб ҝетмәк истәмирләр, буна ҝөрә дә ҝөстәришләрә әмәл етмирләр. Бәс мәсиһиләр неҹә давранмалыдыр? Мүгәддәс Китабда дејилир: «Ағанын хатиринә инсан һакимијјәтләринә табе олун. Ән јүксәк вәзифә тутдуғуна ҝөрә падшаһа, јахуд… падшаһ тәрәфиндән ҝөндәрилмиш һакимләрә табе олун» (1 Бут. 2:13, 14). Бундан әлавә, Аллаһын тәшкилаты да тәһлүкәсизлијимизи горумаг үчүн бизә ҝөстәришләр верир. Тез-тез елан едилир ки, сон әлагә мәлуматларымызы ағсаггаллара верәк. Фөвгәладә һал баш верәндә онда онлар бизимлә әлагә јарада биләҹәкләр. Бәс сиз буну етмисиниз? Бәзән биз мүәјјән саһәләрлә, мәсәлән, зәрәрчәкәнләр үчүн ајрылан јардымы әлдә етмәк, башгаларына көмәк етмәк, евдән чыхмамаг, јахуд әразини тәрк етмәклә бағлы ҝөстәришләр алырыг. Әҝәр бу ҝөстәришләрә табе олмасаг, һәм өзүмүзүн, һәм дә ағсаггалларын һәјатыны тәһлүкәјә атарыг. Унутмајын ки, бу садиг кишиләр бизим гејдимизә галырлар (Ибр. 13:17). Маргарет дејир: «Мән там әминәм ки, ағсаггалларын вә тәшкилатын вердији ҝөстәришләрә әмәл етмәк мәним һәјатымы хилас етди».

13. Јурд-јуваларындан дидәрҝин дүшән мәсиһиләрә севинҹ вә гәлб раһатлығы дујмаға нә көмәк едир?

¹³ Бир чох баҹы-гардашлар фәлакәтләр, мүһарибәләр, иғтишашлар уҹбатындан  јурд-јуваларыны тәрк едибләр, амма буна бахмајараг, онлар тез бир заманда јени вәзијјәтә ујғунлашыблар вә руһани фәалијјәтләрини бәрпа едибләр. Тәгибләр уҹбатындан башга әразиләрә дағылышан илк мәсиһиләр кими, онлар да Аллаһын сөзүнү мүждәләмәјә давам едирләр (Һәв. 8:4). Тәблиғ иши онлара диггәтләрини чәтинликләрә јох, Аллаһын Падшаһлығына ҹәмләмәјә көмәк едир. Беләҹә, онлар севинҹләрини горујурлар вә гәлб раһатлығы тапырлар.

14. Тәгибләр бизә неҹә тәсир едә биләр?

¹⁴ Бир чох ишләр вар ки, онларла мәшғул оланда үрәјимиз раһат олур. Анҹаг тәгибләр баш галдыранда биз бу ишләрлә мәшғул ола билмирик. Адәтән биз сәрбәст шәкилдә бир јерә јығышанда, тәблиғ едәндә вә һәбс олунмаг горхусу олмадан ҝүндәлик ишләримизи ҝөрәндә мәмнунлуг дујуруг. Бу сәрбәстлик әлимиздән алынанда ҝәләҹәјә ҝөрә нараһат олуруг, тәлаш кечиририк. Бу ҹүр һиссләр кечирмәк тәбиидир. Амма јенә дә еһтијатлы олмалыјыг. Иса билдирмишди ки, бәзи давамчылары тәгибләрлә үзләшәндә ондан үз дөндәрәҹәкләр (Јәһ. 16:1, 2). Бәс тәгибләр заманы гәлб раһатлығымызы неҹә горуја биләрик?

15. Нәјә ҝөрә тәгибләрдән горхмамалыјыг? (Јәһја 15:20; 16:33).

¹⁵ Аллаһын Кәламында дејилир: «Мәсиһ Исанын шаҝирди кими мөмин һәјат сүрмәк истәјәнләрин һамысы тәгиб олунаҹаг» (2 Тим. 3:12). Андреј адлы бир гардашын јашадығы өлкәдә фәалијјәтимиз гадаған олунанда о, бу вәзијјәтлә һеч ҹүр барыша билмирди. О белә фикирләширди: «Бурада бу гәдәр Јеһованын Шаһиди вар. Неҹә ола биләр ки, һамыны һәбс етсинләр?» Амма бу ҹүр фикирләшмәси һеч дә она раһатлыг ҝәтирмирди, әксинә, тәшвишә салырды. Башга гардашлар исә һәр шеји Јеһованын өһдәсинә бурахмышдылар, онлар өзләрини һәбс олунмајаҹагларына инандырмаға чалышмырдылар. Баша дүшүрдүләр ки, һәбс олуна биләрләр, анҹаг Андреј гәдәр нараһат олмурдулар. Андреј онлара бахыб дүшүнҹәсини дәјишди вә һәр шеји Јеһованын өһдәсинә бурахды. Чох тезликлә онун үрәји сакитләшди вә һазырда вәзијјәт дәјишмәсә дә, о, севинҹини горуја билир. Ејни шеј бизә дә аиддир.  Дүздүр, Иса демишди ки, тәгиб олунаҹағыг, амма ејни заманда әмин етмишди ки, тәгибләр заманы садиг гала биләҹәјик. (Јәһја 15:20; 16:33 ајәләрини охујун.)

16. Тәгибләр заманы һансы ҝөстәришләрә табе олмалыјыг?

¹⁶ Фәалијјәтимиз гадаған олунанда филиалдан вә ағсаггаллардан ҝөстәришләр алырыг. Бу ҝөстәришләр бизи горумаг, руһани гиданы әлдә етмәк вә тәблиғ ишини мүмкүн гәдәр давам етдирмәк үчүн нәзәрдә тутулуб. Алдығыныз ҝөстәришләрә табе олмаг үчүн әлиниздән ҝәләни един, һәтта онларын нәјә ҝөрә верилдијини баша дүшмәсәниз дә (Јаг. 3:17). Һәмчинин баҹы-гардашлар барәдә, јығынҹағын ишләри илә бағлы мәлуматлары аидијјәти олмајан инсанлара вермәјин (Ваиз 3:7).

17. Биринҹи әсрдәки мәсиһиләр кими нә етмәјә әзмлисиниз?

¹⁷ Шејтанын Аллаһын халгына гаршы вурушмасынын сәбәбләриндән бири онларын «Иса һаггында шәһадәт» етмәсидир (Вәһј 12:17). Гојмајын ки, Шејтан вә онун дүнјасы сизи горхуја салсын. Тәгибләрә рәғмән, тәблиғ ишиндә иштирак етмәк бизә севинҹ вә гәлб раһатлығы верир. Биринҹи әсрдә јәһуди дин хадимләри һәвариләрә тәблиғ етмәји гадаған етмишдиләр. Амма онлар Аллаһа итаәт едәрәк тәблиғи давам етдирдиләр, бу исә онлара севинҹ ҝәтирди (Һәв. 5:27—29, 41, 42). Сөзсүз ки, фәалијјәтимиз гадаған олунанда биз еһтијатла тәблиғ етмәлијик (Мәт. 10:16). Анҹаг хидмәтдә әлимиздән ҝәләни етсәк, Јеһованы разы салдығымыза, инсанлара мүждә чатдырдығымыза ҝөрә гәлбимиздә сүлһ һөкм сүрәҹәк.

18. Бизә әсл сүлһү ким верә биләр?

¹⁸ Әмин олун ки, һәјатынызын ән чәтин анларында белә гәлб раһатлығы дуја биләрсиниз. Белә вахтларда Јеһовадан сүлһ диләмәји унутмајын, чүнки јалныз Јеһованын вердији сүлһлә чәтинлијә дөзмәк мүмкүндүр. Хәстәликләр, фәлакәтләр, тәгибләр заманы Јеһоваја архаланын, Онун тәшкилатына бағлы галын. Сизи гаршыда ҝөзләјән мөһтәшәм ҝәләҹәк барәдә дүшүнүн. Онда «сүлһ Аллаһы сизинлә олаҹаг» (Филип. 4:9). Нөвбәти мәгаләдә өјрәнәҹәјик ки, бәлаларла үзләшән диндашларымыза Аллаһын сүлһүнү дујмаға неҹә көмәк едә биләрик.