1. 1 Бутрус 5:2 ајәсинә әсасән ағсаггаллара һансы ваҹиб иш һәвалә олунуб?

 ЈЕҺОВА ағсаггаллара Өз дәјәрли гузуларынын гајғысына галмағы һәвалә едиб. Бу садиг кишиләр онлара ҝөстәрилән етимады чох гијмәтләндирирләр. Онлар әлләриндән ҝәләни едирләр ки, сүрүнү отармаг үчүн әсл чобанлар олсунлар (Әрм. 23:4; 1 Бутрус 5:2 ајәсини охујун). Нә јахшы ки јығынҹагларымызда белә гардашлар вар!

2. Бәзи ағсаггалларын һансы чәтинлији олур?

² Ағсаггаллара мәсулијјәтләрини иҹра етмәк елә дә асан баша ҝәлмир. Елә ҝөтүрәк јығынҹагда ҝөрүләси ишләри. Онларын сајы һеч дә аз дејил. Бирләшмиш Штатларда јашајан Тони адлы ағсаггал баша дүшдү ки, өһдәсинә чох иш ҝөтүрмәси мәһдудијјәтләринин фәргиндә олмадығыны ҝөстәрир. Тони бөлүшүр: «COVID-19 пандемијасы башлајанда јығынҹаглары вә тәблиғ ҝөрүшләрини тәшкил етмәк үчүн даһа чох иш ҝөрмәјә башладым. Амма һа чабалајырдым, ишләр азалмагданса, чохалырды. Бунун уҹбатындан дуам, Мүгәддәс Китабы охумағым, фәрди мүталиәм ахсамаға башлады». Косовода јашајан Илер адлы бир ағсаггалын исә башга бир чәтинлији вар иди. Дөјүш бөлҝәсиндә јашадығы вахт тәшкилатдан ҝәлән ҝөстәришләрә табе олмаг она асан дејилди. Илер дејир: «Филиал мәнә тәһлүкәли әразидә јашајан баҹы-гардашлара көмәк етмәји тапшыранда ҹәсарәтим сынанды. Мән горхурдум. Һәм дә верилән ҝөстәришләр ағлабатан ҝәлмирди». Асијада хүсуси тәјинатлы мүждәчи кими хидмәт едән Тим гардаш исә садәҹә олараг һәр ҝүн гачагачла јашамагдан јорулмушду. Тим дејир: «Бәзән мәнәви ҹәһәтдән әлдән дүшүрдүм, тагәтим галмырды». Бу ҹүр чәтинликләрлә үзләшән ағсаггаллара нә көмәк едә биләр?

3. Һаким Ҹәдунун нүмунәсини арашдырмағын һәр биримизә һансы фајдасы вар?

 ³ Һаким Ҹәдунун нүмунәси ағсаггаллара чох көмәк едә биләр (Ибр. 6:12; 11:32). О, Аллаһын халгына һәм рәһбәрлик едирди, һәм дә онлары горујурду (Һак. 2:16; 1 Салн. 17:6). Онун кими ағсаггаллар да бу тәлатүмлү дөврдә Аллаһын халгынын гејдинә галмаг үчүн тәјин олунублар (Һәв. 20:28; 2 Тим. 3:1). Ағсаггаллар Ҹәдунун тәвазөкарлығындан, итаәткарлығындан вә дөзүмүндән чох шеј өјрәнә биләр. Ҹәдунун нүмунәси диҝәр мәсиһиләрә көмәк едәҹәк ки, ағсаггаллара миннәтдарлығыны артырсынлар вә онлара даһа чох дәстәк олсунлар (Ибр. 13:17).

4. Ҹәдун тәвазөкар олдуғуну неҹә ҝөстәрмишди?

⁴ Ҹәдун тәвазөкар инсан иди b. Јеһованын мәләји Ҹәдуна демишди ки, Јеһова она ваҹиб тәјинат вериб: о, Исраили гүдрәтли мәдјәниләрин әлиндән хилас едәҹәк. Амма Ҹәдун тәвазөкарлыгла белә ҹаваб вермишди: «Мәним тајфам Мәнәссәдә бапбалаҹадыр, өзү дә атамын евиндә ән кичик мәнәм» (Һак. 6:15). Ҹәдун бу тапшырығын өһдәсиндән ҝәлә биләҹәјини дүшүнмүрдү. Амма ән јахшысыны Јеһова билирди. Јеһованын көмәји илә Ҹәдун тәјинатыны уғурла иҹра етди.

5. Ағсаггалларын тәвазөкарлығы неҹә сынана биләр?

⁵ Ағсаггаллар баҹардыглары гәдәр чалышырлар ки, һәр саһәдә тәвазөкар олсунлар (Мик. 6:8; Һәв. 20:18, 19). Онлар өз баҹарыглары илә, јахуд наилијјәтләри илә өјүнмүрләр. Ејни заманда сәһв едәндә өзләрини тәгсирләндирәрәк јарарсыз олдугларыны дүшүнмүрләр. Бунунла белә, бәзән ағсаггаллара да тәвазөкар галмаг чәтин олур. Мәсәлән, ағсаггал өһдәсинә чох иш ҝөтүрүр, сонра да бу ишләрин алтындан чыха билмир. Јахуд кимсә ону ҝөрдүјү ишә ҝөрә гынајыр вә ја тәрифләјир. Бу ҹүр вәзијјәтләрдә ағсаггаллар Ҹәдундан нә өјрәнә биләр?

6. Ағсаггаллар Ҹәдундан тәвазөкарлыгла бағлы нә өјрәнә биләр? (Һәмчинин шәклә бахын.)

⁶ Көмәк истәјин. Тәвазөкар инсан баша дүшүр ки, бәзи шејләр онун ҝүҹүндән артыгдыр. Ҹәдунун башгаларындан көмәк истәмәси онун тәвазөкар олдуғундан хәбәр верир (Һак. 6:27, 35; 7:24). Мүдрик  ағсаггаллар да бу ҹүр давраныр. Әввәлдә ады чәкилән Тони дејир: «Ушаглыгдан алдығым тәрбијәјә ҝөрә баҹара биләҹәјимдән артыг ишә бојун олурдум. Буна ҝөрә дә аиләви ибадәтдә тәвазөкарлыг мөвзусуну арашдырмаг гәрарына ҝәлдим вә јолдашыма дедим ки, мәнимлә бағлы өз мүшаһидәләрини бөлүшсүн. Һәмчинин jw.org сајтында јерләшән “Иса кими, башгаларына тәлим верин, етибар един вә сәлаһијјәт верин” адлы видеоја да бахдым». Тони үзәринә дүшән иши ҝөрмәк үчүн башгаларындан көмәк истәди. Бәс нәтиҹә нә олду? О дејир: «Јығынҹағын иши ҝөрүлүр, мәним исә Јеһова илә мүнасибәтләрими мөһкәмләндирмәк үчүн даһа чох вахтым олур».

7. Ағсаггаллар Ҹәдундан өрнәк алараг гынаға неҹә јанашырлар? (Јагуб 3:13).

⁷ Гынаға мүлајимликлә ҹаваб верин. Гынананда ағсаггала тәвазөкарлығы горумаг чәтин ҝәлә биләр. Ҹәдун бу саһәдә дә јахшы өрнәкдир. Ҹәдун баша дүшүрдү ки, сәһвсиз дејил. Она ҝөрә дә әфраимлиләр ону гынајанда о, мүлајимликлә ҹаваб верә билди, өзүндән чыхмады (Һак. 8:1—3). Ҹәдун онларын ҝилеј-ҝүзарына гулаг асды, мүлајим данышараг арадакы ҝәрҝинлији азалтды. Бунунла да тәвазөкар олдуғуну ҝөстәрди. Ағсаггаллар да Ҹәдунун нүмунәсини изләјәрәк гынағы динләјиб мүлајим ҹаваб верирләр, бунунла да јығынҹагда сүлһү горујурлар. (Јагуб 3:13 ајәсини охујун.)

8. Мәсул гардашлар тәрифә неҹә јанашмалыдыр? Нүмунә чәкин.

⁸ Шәрәфи Јеһоваја верин. Ҹәдуну Мәдјән үзәриндә чалдығы гәләбәјә ҝөрә тәрифләјәндә о, шәрәфи Јеһоваја вермишди (Һак. 8:22, 23). Мәсул гардашлар Ҹәдунун нүмунәсини неҹә изләјә биләр? Онлар бүтүн наилијјәтләринә ҝөрә Јеһованы уҹалтмалыдырлар (1 Кор. 4:6, 7). Тутаг ки, һансыса ағсаггалы тәлим вермәк баҹарығына ҝөрә тәрифләјирләр. О, вердији тәлимин Јеһованын Кәламына әсасландығыны вурғулаја биләр, јахуд да Јеһованын тәшкилатындан алдығы тәлим сајәсиндә буну баҹардығыны дејә биләр. Ағсаггаллар диггәти өзләринә чәкиб чәкмәдикләрини вахташыры јохламалыдырлар. Тимоти адлы бир ағсаггалын нүмунәсинә бахаг. Тәзә ағсаггал тәјин олунанда о, ачыг нитглә чыхыш етмәји чох севирди. О дејир: «Ҝириш сөзләрим, чәкдијим нүмунәләр узун вә тәфәррүатлы олурду, чох вахт буна ҝөрә мәни тәрифләјирдиләр. Әфсуслар олсун ки, диггәти Мүгәддәс Китаба, Јеһоваја јох, өзүмә чәкирдим». Вахт кечдикҹә Тимоти баша дүшдү ки, диггәт мәркәзиндә олмамаг үчүн тәлим вермәк тәрзини дәјишмәлидир (Мәс. 27:21). Бәс бунун нәтиҹәси неҹә олду? О изаһ едир: «Чохлары ҝәлиб мәнә дејир ки, нитгим онлара проблемләрин өһдәсиндән ҝәлмәјә, сынаглара дөзмәјә, јахуд да Јеһоваја јахынлашмаға көмәк едиб. Бу кими сөзләри ешитмәк даһа хошдур, нәинки илләр әввәл шәхсән мәним өзүмү тәрифләмәк үчүн дејилән сөзләри».

9. Ҹәдунун итаәткарлығы вә ҹәсарәти неҹә сынанмышды? (Үз габығындакы шәклә бахын.)

⁹ Ҹәдун һаким тәјин олунандан сонра итаәткарлығы вә ҹәсарәти сынанды. Она чох тәһлүкәли бир тапшырыг верилмишди. О, атасынын Баал гурбанҝаһыны дағытмалы иди (Һак. 6:25, 26). Даһа сонра Јеһова ики дәфә Ҹәдуна тапшырды ки, топладығы ордунун сајыны азалтсын (Һак. 7:2—7). Бундан сонра исә о, ҝеҹәнин гаты зүлмәтиндә дүшмәнин ордуҝаһына һүҹум етмәли иди (Һак. 7:9—11).

10. Ағсаггалларын итаәткарлығы неҹә сынаныр?

 ¹⁰ Ағсаггаллар «итаәткар» олмалыдыр (Јаг. 3:17). Итаәткар ағсаггал Кәламда јазыланлара вә Аллаһын тәшкилатындан ҝәлән ҝөстәришләрә үрәкдән табе олур. Бунунла о, башгаларына нүмунә гојур. Амма бәзән ағсаггаллара да итаәткар олмаг чәтин олур. Ола билсин, ағсаггал алдығы ҝөстәришләрин чохлуғуна ҝөрә онларла ајаглаша билмир, јахуд һансыса ҝөстәриш она практики, ағлабатан ҝәлмир. Бәлкә дә азадлығыны тәһлүкәјә атан тәјинат алыр. Бу ҹүр вәзијјәтләрдә ағсаггаллар Ҹәдундан неҹә өрнәк ҝөтүрә биләр?

11. Ағсаггаллар итаәткар олмаг үчүн нә етмәлидир?

¹¹ Ҝөстәришләрә диггәтлә гулаг асын вә әмәл един. Јеһова Ҹәдуна демишди ки, атасынын гурбанҝаһыны неҹә дағытсын, Јеһова үчүн јени гурбанҝаһы һарада тиксин вә һансы һејванлары гурбан ҝәтирсин. Ҹәдун Јеһованын бир сөзүнү ики етмәди. Нә демишдисә, етди. Бу ҝүн дә ағсаггаллар Јеһованын тәшкилатындан руһани вә физики сағламлығымызла бағлы мәктублар, еланлар вә ҝөстәришләр алырлар. Ағсаггаллар бу ҝөстәришләрә сәдагәтлә әмәл едирләр. Бу да бүтүн јығынҹаға фајда ҝәтирир. Буна ҝөрә дә ағсаггаллары чох севирик (Зәб. 119:112).

12. Тәшкилатдан дәјишикликләр ҝәлән заман ағсаггаллар Ибраниләрә 13:17 ајәсини неҹә тәтбиг едә биләр?

¹² Дәјишиклик етмәјә һазыр олун. Билдијимиз кими Јеһованын бујруғу илә Ҹәдун ордунун сајыны 99 фаиздән чох азалтмышды (Һак. 7:8). О белә дүшүнә биләрди: «Бу дәјишиклији етмәк чох ваҹибдир? Бунун һансыса хејри олаҹаг?» Бунунла белә, Ҹәдун Јеһованын ҝөстәришинә бојун әјди. Ағсаггаллар да тәшкилатдан ҝәлән дәјишикликләрә Ҹәдун кими јанашырлар. (Ибраниләрә 13:17 ајәсини охујун.) Мәсәлән, 2014-ҹү илдә Рәһбәрлик Шурасы ибадәт евләринин, топланты залларынын тикинтисинин малијјәләшдирилмәсинә дәјишиклик етди (2 Кор. 8:12—14). Әввәлләр тәшкилат јығынҹаглара јени ибадәт евләринин тикилмәси үчүн борҹ верирди вә јығынҹаг даһа сонра бу пулу ҝери гајтарырды. Инди исә тәшкилат бүтүн јығынҹагларын вердији ианәләри еһтијаҹ олан әразиләрдә јени ибадәт евләринин, топланты залларынын тикинтиси үчүн истифадә едир вә бу, јерли јығынҹағын нә гәдәр ианә етмәјә ҝүҹү чатдығындан асылы дејил. Бу барәдә ешидәндә Хосе адлы бир гардаш дәјишиклијин ишә јарајаҹағына шүбһә етди. О белә дүшүнүрдү: «Бундан сонра бир дәнә дә олсун ибадәт еви тикилмәјәҹәк. Бу бизим әрази үчүн дејил». Хосејә ҝөстәриши дәстәкләмәјә нә көмәк етди? О дејир: «Мәсәлләр 3:5, 6 ајәләри мәнә хатырлатды ки, Јеһоваја етибар етмәлијәм вә нәтиҹә инанылмаз олду. Инди даһа чох ибадәт евләри тикилир. Үстәлик, бу јени үсул сајәсиндә ианәләр һәр кәсә фајда ҝәтирир, бәрабәрлик јарадыр».

13. а) Ҹәдун нәјә әмин иди? б) Ағсаггаллар Ҹәдунун нүмунәсини неҹә изләјә биләр? (Һәмчинин шәклә бахын.)

 ¹³ Јеһованын ирадәсини ҹәсарәтлә јеринә јетирин. Јеһовадан алдығы тапшырыг Ҹәдун үчүн горхулу, тәһлүкәли оланда белә о, итаәт едирди (Һак. 9:17). Јеһова Ҹәдуну она дајаг олаҹағына дәфәләрлә әмин етмишди. Буна ҝөрә дә о архајын иди ки, Јеһова она халгы горумаға көмәк едәҹәк. Фәалијјәтимизин гадаған олундуғу әразиләрдә јашајан ағсаггаллар Ҹәдундан өрнәк ҝөтүрүр. Онлар ҹәсарәтлә јығынҹаға вә тәблиғ ишинә рәһбәрлик едирләр, һалбуки буна ҝөрә һәбс олуна, сорғу-суала тутула, ишләрини итирә вә ја гәддарлыгла үзләшә биләрләр c. Бөјүк мүсибәт заманы ағсаггаллара ҹәсарәт лазым олаҹаг ки, һәтта тәһлүкәли олса белә ҝөстәришләрә әмәл етсинләр. Мәсәлән, онлар долуја бәнзәр һөкм хәбәрини чатдырмагла вә Мәҹуҹ өлкәсиндән олан Јәҹуҹун һүҹумундан хилас олунмагла бағлы ҝөстәришләр ала биләрләр (Һизг. 38:18; Вәһј 16:21).

14. Ҹәдунун дөзүмү неҹә сынанды?

¹⁴ Ҹәдуна бир һаким кими өһдәсинә дүшән ишләри ҝөрмәк үчүн чохлу ҝүҹ сәрф етмәк лазым иди. Мәсәлән, бир дәфә ҝеҹәјарысы олан дөјүшдә мәдјәниләр гачмышдылар. Ҹәдун Јизраил вадисиндән Иордан чајына гәдәр онлары тәгиб етмишди. Бу јол исә кол-косла долу иди (Һак. 7:22). Бәс Ҹәдун Иордан чајына чатыб дајанды? Хејр. О вә јанындакы 300 нәфәр јорғун-арғын олса да, чајы кечиб дүшмәни тәгиб етмәјә давам етдиләр. Ахырда онлар мәдјәниләри тутдулар вә мәғлуб етдиләр (Һак. 8:4—12).

15. Ағсаггалларын дөзүмү нә вахт сынана биләр?

¹⁵ Һәм јығынҹағын, һәм дә аиләләринин гејдинә галмаг ағсаггаллары физики вә мәнәви ҹәһәтдән әлдән сала биләр. Бәс бу вәзијјәтдә Ҹәдунун нүмунәси ағсаггаллара неҹә көмәк едә биләр?

16, 17. а) Ҹәдуна дөзмәјә нә көмәк етмишди? б) Ағсаггалларда һансы әминлик олмалыдыр? (Әшија 40:28—31). (Һәмчинин шәклә бахын.)

 ¹⁶ Јеһованын сизә ҝүҹ верәҹәјинә етибар един. Ҹәдун Јеһованын она ҝүҹ верәҹәјинә етибар едирди вә етибары боша чыхмады (Һак. 6:14, 34). Бир дәфә Ҹәдун адамлары илә бирликдә ики Мәдјән падшаһыны тәгиб едирди. Падшаһлар дәвәнин белиндә иди, онлар исә пијада (Һак. 8:12, 21). Јеһованын көмәји илә Ҹәдунҝил онлары тутуб галиб ҝәлдиләр. Ағсаггаллар да Ҹәдун кими әсла јорулмајан, тагәтдән дүшмәјән Јеһова Аллаһа ҝүвәнмәлидирләр. Јеһова онлара ҝүҹ верәҹәк. (Әшија 40:28—31 ајәләрини охујун.)

¹⁷ Ҝәлин ҝөрәк Хәстәханаларла әлагә комитәсинин үзвү олан Метју гардаша дөзүм ҝөстәрмәјә нә көмәк едир. Метју дејир: «Филиппилиләрә 4:13 ајәсинин доғрулуғуна өз һәјатымда шаһид олмушам. Дәфәләрлә олуб ки, өзүмү јорғун, түкәнмиш һисс етмишәм. Бу заман Јеһоваја үрәкдән дуа едиб јалвармышам ки, мәнә ҝүҹ версин вә мән баҹы-гардашлара дәстәк ола билим. Белә мәгамларда Јеһованын руһунун мәни гүввәтләндирдијини вә мәнә дөзүм вердијини һисс едирдим». Ҹәдун кими ағсаггаллар да баҹы-гардашларын гејдинә галмаг үчүн ҹан гојурлар. Һалбуки буну етмәк һәмишә асан олмур. Дүздүр, онлар билмәлидирләр ки, физики вә мәнәви ҹәһәтдән нәјә ҝүҹләри чатыр вә буна ујғун давранмалыдырлар. Бу өз јериндә. Амма онлар һәмчинин етибар етмәлидирләр ки, Јеһова дуаларыны ҹавабсыз гојмајаҹаг вә дөзмәјә ҝүҹ верәҹәк (Зәб. 116:1; Филип. 2:13).

18. Хүласә етсәк, ағсаггаллар Ҹәдундан неҹә өрнәк ҝөтүрә биләр?

¹⁸ Ағсаггаллар Ҹәдундан чох шеј өјрәнә биләр. Онлар үзәрләринә мәсулијјәт ҝөтүрәндә, гынананда вә ја тәриф олунанда тәвазөкарлыг ҝөстәрмәјә борҹлудурлар. Нәзәрә алсаг ки, бу шәр дүнја артыг өз сонуна јахынлашыр, ағсаггаллар итаәткар вә ҹәсарәтли олмалыдыр. Һәмчинин һансы чәтинликлә үзләшәҹәкләриндән асылы олмајараг, Јеһованын онлара ҝүҹ верәҹәјинә етибар етмәлидирләр. Сөзсүз, биз бу фәдакар, зәһмәткеш ағсаггаллары гијмәтләндиририк вә онларын гәдрини билирик (Филип. 2:29).