1. Нәјә ҝөрә Иса шаҝирдләрини горумағы Јеһовадан хаһиш етди?

ЈЕР ҮЗҮНДӘКИ һәјатынын сон ҝеҹәси Иса шаҝирдләринин үзләшәҹәји чәтинликләр барәдә дүшүнүрдү. Шаҝирдләринә олан севҝисиндән ирәли ҝәләрәк, Иса Атасындан хаһиш етди ки, онлары Шәрирдән горусун (Јәһ. 17:14, 15). Иса билирди ки, о, ҝөјә галхандан сонра Шејтан Јеһоваја ибадәт едән кәсләрлә вурушмаға давам едәҹәк. Ајдындыр ки, Јеһованын халгынын мүдафиәјә еһтијаҹы олаҹагды.

2. Јеһованын дуаларымыза ҹаваб верәҹәјинә нәјә ҝөрә әмин ола биләрик?

² Јеһова Исаны севдији үчүн онун хаһишини јеринә јетирди. Әҝәр биз Јеһованы разы салмаг үчүн вар ҝүҹүмүзлә чалышсаг, О бизи дә севәҹәк вә дуа едиб Ондан көмәк истәјәндә бизи горујаҹаг. Јеһова гајғыкеш Ата кими өвладларыны һәмишә севәҹәк вә онларын гајғысына галаҹаг. Әкс һалда, Онун адына ләкә ҝәләр.

3. Нәјә ҝөрә Јеһованын бизи горумасына инди һәмишәкиндән даһа чох еһтијаҹ вар?

³ Јеһованын бизи горумасына инди һәмишәкиндән даһа чох еһтијаҹ дујуруг. Ҝөјдән атылан Шејтан бөјүк гәзәб ичиндәдир (Вәһј 12:12). О, бәзи инсанлары инандырыб ки, бизи тәгиб етмәклә онлар «Аллаһа гуллуг» етмиш олурлар (Јәһ. 16:2). Аллаһа инанмајан инсанлар исә бу дүнјанын мејарына ујмадығымыз үчүн бизи тәгиб едир. Сәбәб һәр нә олурса олсун, биз горхмуруг. Чүнки Аллаһын Кәламында дејилир: «Аға вәфалыдыр. О, сизи мөһкәмләндирәҹәк вә Шәрирдән горујаҹаг» (2 Салон. 3:3). Јеһова бизи неҹә горујур? Ҝәлин бунун ики үсулуна бахаг.

4. Ефеслиләрә 6:13—17 ајәләринә әсасән, Јеһова бизи неҹә горујур?

⁴ Јеһова бизи јарагларла тәмин едир. Бу јараглар бизи  Шејтанын һүҹумларындан горујур. (Ефеслиләрә 6:13—17 ајәләрини охујун.) Аллаһын вердији бу јараглар мөһкәм вә кејфијјәтлидир. Амма бу јарагларын бизи горумасы үчүн ҝәрәк онларын һәр бирини ҝејинәк вә әјнимиздән чыхармајаг. Сөһбәт һансы јараглардан ҝедир? Онларын һәр бири нәји тәмсил едир? Ҝәлин бахаг.

5. Һәгигәт гуршағы нәдир вә нәјә ҝөрә ону белимизә бағламалыјыг?

⁵ Һәгигәт гуршағы. Аллаһын Кәламындакы һәгигәтләри тәмсил едир. Нәјә ҝөрә бу гуршағы белимизә бағламалыјыг? Чүнки «јаланын атасы» олан Шејтан минилликләрдир ки, јалан данышыр вә «бүтүн дүнјаны» алдатмаға мүвәффәг олуб (Јәһ. 8:44; Вәһј 12:9). Амма Мүгәддәс Китабдакы һәгигәтләр бизи алданмаға гојмајаҹаг. Бу мәҹази гуршағы белимизә неҹә бағлаја биләрик? Јеһова һаггында һәгигәти өјрәнмәклә, Она «руһа вә һәгигәтә ујғун ибадәт» етмәклә вә һәр саһәдә дүрүст давранмагла (Јәһ. 4:24; Ефес. 4:25; Ибр. 13:18).

6. Салеһлик зиреһи нәдир вә нәјә ҝөрә ону тахмалыјыг?

⁶ Салеһлик зиреһи. Јеһованын гојдуғу салеһлик нормаларыны тәмсил едир. Нәјә ҝөрә салеһлик зиреһини тахмалыјыг? Зиреһ әсҝәрин үрәјини горудуғу кими, салеһлик зиреһи дә бизим мәҹази үрәјимизи, јәни дахили варлығымызы горујур вә гојмур ки, бу дүнја бизи өз гәлибинә салыб пис инсана чевирсин (Мәс. 4:23). Јеһова истәјир ки, биз бүтүн гәлбимизлә Ону севәк вә Она хидмәт едәк (Мәт. 22:36, 37). Шејтан бу дүнјанын тәклиф етдији, Јеһованын исә нифрәт етдији шејләри бизә севдирәрәк үрәјимизи һачаламаға чалышыр (Јаг. 4:4; 1 Јәһ. 2:15, 16). Бу фәнди ишә јарамајанда о, һәдә-горхулара әл атараг бизи Јеһованын јолундан сапдырмаға ҹәһд едир.

7. Салеһлик зиреһини неҹә таха биләрик?

⁷ Биз «салеһлик зиреһини» неҹә таха биләрик? Јеһованын ҝөзүндә нәјин дүзҝүн, нәјин јанлыш олдуғуну өјрәнмәклә вә она ујғун јашамагла (Зәб. 97:10). Бәзи инсанлара елә ҝәлир ки, Јеһованын гојдуғу гајда-ганунлар инсанын азадлығыны әлиндән алыр. Әҝәр һәјатымызын һансыса мәгамында Мүгәддәс Китаб принсипләринә даһа әмәл етмәсәк, дөјүшүн гызғын јериндә зиреһинин ағыр олдуғуну дүшүнүб ону әјниндән чыхаран әсҝәрә бәнзәмиш олаҹағыг. Бу, ағылсыз һәрәкәт оларды. Амма Јеһованы севәнләр үчүн Онун әмрләри ағыр дејил, әксинә, мүдафиәдир (1 Јәһ. 5:3).

8. Сүлһ мүждәсини тәблиғ етмәк һазырлығыны ајаға ҝејинмәк нә демәкдир?

⁸ Сүлһ мүждәсини тәблиғ етмәк һазырлығы. Бу јарағы ајаға ҝејинмәк о демәкдир ки, Падшаһлыг мүждәсини тәблиғ етмәјә һәмишә һазыр олмалыјыг. Мүгәддәс Китаб һәгигәтләрини башгалары илә бөлүшәндә иманымыз мөһкәмләнир. Чох руһландырыҹыдыр ки, бүтүн дүнјада Јеһованын халгы һәр фүрсәтдән истифадә едиб, мүждәни тәблиғ едир. Онлар ев-ев тәблиғ етмәклә јанашы, ишдә, мәктәбдә, ишҝүзар әразиләрдә, мағазаларда тәблиғ едирләр. Гоһумларына, растлашдыглары һәр кәсә шаһидлик верирләр. Һәтта евдән чыха билмәмәк дә онлар үчүн манеә дејил. Амма биз горхуја гапылыб тәблиғ етмәсәк, дөјүш вахты сәндәлләрини чыхардан әсҝәрә бәнзәјәҹәјик. Белә вәзијјәтдә әсҝәрин ајағы тез зәдәләнәҹәк. Нәтиҹәдә, о нә дүшмәнин һүҹумуна мүгавимәт ҝөстәрә биләҹәк, нә дә сәркәрдәсинин тапшырыгларыны иҹра едә биләҹәк.

9. Нәјә ҝөрә бөјүк иман галханыны ҝөтүрмәлијик?

 ⁹ Бөјүк иман галханы. Јеһоваја олан иманымызы тәмсил едир. Биз инанырыг ки, Јеһова бүтүн вәдләрини јеринә јетирәҹәк. Бу бизә Шәририн бүтүн аловлу охларыны сөндүрмәјә көмәк едәҹәк. Нәјә ҝөрә бөјүк иман галханыны ҝөтүрмәлијик? Чүнки бунун сајәсиндә дөнүкләрин тәлимләринә ујмајаҹағыг вә ришхәндчиләрин истеһзалы сөзләринә ҝөрә руһдан дүшмәјәҹәјик. Иманымыз олмаса, инсанлар бизи Јеһованын гајда-ганунларыны позмаға тәһрик едәндә тәслим олаҹағыг вә бу шејләрә гаршы дурмаға ҝүҹүмүз олмајаҹаг. Амма һәр дәфә ишдә вә ја мәктәбдә иманымыза ујғун давраныб Јеһованын бәјәнмәдији әмәлләрдән узаг дуранда иман галханы бизи горујур (1 Бут. 3:15). Һәр дәфә ибадәтимизә мане олан јүксәк маашлы иши рәдд едәндә иман галханыны әлимизә алырыг (Ибр. 13:5, 6). Вә һәр дәфә мүгавимәтә бахмајараг, Јеһоваја хидмәт едәндә бу галхан бизи мүдафиә едир (1 Салон. 2:2).

10. Хилас дәбилгәси нәдир вә нәјә ҝөрә ону тахмалыјыг?

¹⁰ Хилас дәбилгәси. Јеһованын бизә бәхш етдији үмиди тәмсил едир. Үмид едирик  ки, һәјатымызы итирсәк дә, Јеһова бизи дирилдәҹәк вә ирадәсини јеринә јетирән һәр бир кәсә мүкафат верәҹәк (1 Салон. 5:8; 1 Тим. 4:10; Тит. 1:1, 2). Дәбилгә әсҝәрин башыны горудуғу кими, хилас үмиди дә бизим дүшүнҹәмизи горујур. Неҹә? Бу үмид бизә диггәтимизи Аллаһын вәдләринә ҹәмләмәјә вә проблемләримизә алудә олмамаға көмәк едир. Бу дәбилгәни башымыза неҹә таха биләрик? Дүшүнҹә тәрзимизи Аллаһын дүшүнҹә тәрзинә ујғунлашдырмагла. Мисал үчүн, биз үмидимизи ҝәлди-ҝедәр вар-дөвләтә јох, Аллаһа бағлајырыг (Зәб. 26:2; 104:34; 1 Тим. 6:17).

11. Руһун гылынҹы нәдир вә нәјә ҝөрә ондан истифадә етмәлијик?

¹¹ Руһун гылынҹы. Аллаһын сөзүнү, јәни Мүгәддәс Китабы тәмсил едир. Бу гылынҹ һәр ҹүр јаланы ифша етмәјә вә инсанлары јалан тәлимләрин, зәрәрли вәрдишләрин көләлијиндән азад етмәјә гадирдир (2 Кор. 10:4, 5; 2 Тим. 3:16, 17; Ибр. 4:12). Биз мүталиә едәрәк вә Аллаһын тәшкилатындан тәлим алараг бу гылынҹдан дүзҝүн истифадә етмәји өјрәнирик (2 Тим. 2:15). Бу јараглардан әлавә, Јеһова бизи диҝәр бир үсулла да горујур. Бу һансы үсулдур?

12. Бизим башга нәјә еһтијаҹымыз вар вә нәјә ҝөрә?

¹² Тәҹрүбәли әсҝәр билир ки, о, бөјүк бир гошунун габағына тәк чыха билмәз. Она әсҝәр јолдашларынын көмәји лазымдыр. Ејнилә, биз дә Шејтанла вә онун тәрәфдарлары илә тәкбашына мүбаризә апара билмәрик. Бизә баҹы-гардашларымызын көмәји лазымдыр. Јеһованын сајәсиндә бизим бүтүн дүнјада баҹы-гардашларымыз вар. Онлар һәмишә бизә көмәк етмәјә һазырдырлар (1 Бут. 2:17).

13. Ибраниләрә 10:24, 25 ајәләринә әсасән, јығынҹаг ҝөрүшләринин һансы фајдалары вар?

¹³ Биз бир нечә јолла көмәк алырыг. Онлардан бири јығынҹаг ҝөрүшләридир. (Ибраниләрә 10:24, 25 ајәләрини охујун.) Бәзән һәр биримиз руһ дүшкүнлүјүнә гапылырыг. Амма јығынҹаг ҝөрүшләриндә оланда руһән тәравәтләнирик. Баҹы-гардашларымызын вердији сәмими шәрһләр бизи руһландырыр. Мүгәддәс Китаба әсасланмыш чыхышлар, сәһнәҹикләр Јеһоваја хидмәт етмәк әзмимизи мөһкәмләндирир. Ҝөрүшдән әввәл вә сонра баҹы-гардашларла етдијимиз хош үнсијјәт әһвалымызы јүксәлдир (1 Салон. 5:14). Һәмчинин ибадәт ҝөрүшләриндә башгаларына көмәк етмәк имканымыз олур, бу да бизим севинҹимизә севинҹ гатыр (Һәв. 20:35; Ром. 1:11, 12). Ҝөрүшләримиз башга саһәдә дә бизә көмәк едир. Мәҹази диллә десәк, дөјүш баҹарығымызы итиләјир, јәни хидмәт етмәк габилијјәтимизи тәкмилләшдирир. Мәсәлән, Хидмәт үчүн вәсаитләрдәки нәшрләрдән еффектив шәкилдә истифадә етмәји өјрәнирик. Буна ҝөрә дә јығынҹаг ҝөрүшләринә јахшы һазырлашын. Ҝөрүшә диггәтлә гулаг асын. Ҝөрүшдән сонра исә өјрәндикләринизә әмәл един. Белә етмәклә сиз «Мәсиһ Исанын ҹәсур әсҝәри» олаҹагсыныз (2 Тим. 2:3).

14. Јеһова бизә башга неҹә көмәк едир?

¹⁴ Бизә һәмчинин милјонларла гүдрәтли мәләкләр көмәк едир. Тәкҹә бир мәләјин нәјә гадир олдуғуну јадымыза салаг (Әшј. 37:36). Инди дүшүнүн ҝөрүн бир орду мәләк нәләрә гадирдир! Һеч бир инсан, һеч бир ҹин Јеһованын гүдрәтли ордусуна бата билмәз. Јеһова Каинатда ән гүдрәтли Варлыгдыр. Буна ҝөрә дә әлејһдарлар нә гәдәр чохлуг тәшкил етсә дә, бир  инсан үстәҝәл Јеһова һәр заман ҝүҹлү тәрәф олур (Һак. 6:16). Бу, реаллыгдыр, буна әмин ола биләрик! Иш јолдашыныз, мәктәб јолдашыныз, јахуд иманыныза шәрик олмајан гоһумунуз сөзләри вә ја һәрәкәтләри илә сизи горхуја саланда бу фикирләри јадыныза салын. Унутмајын, сиз бу дөјүшдә тәк дејилсиниз, чүнки Јеһованын ҝөстәриши илә һәрәкәт едирсиниз.

15. Әшија 54:15, 17 ајәләринә әсасән, нәјә ҝөрә Аллаһын халгыны һеч кәс сусдура билмәз?

¹⁵ Шејтанын рәһбәрлик етдији бу дүнја бир чох сәбәбә ҝөрә бизә нифрәт едир. Биз сијаси битәрәфлији горујуруг вә мүһарибәдә дөјүшмүрүк. Биз Аллаһын адыны бәјан едир, јалныз Онун Падшаһлығынын бәшәријјәтә сүлһ ҝәтирәҹәјини тәблиғ едир вә Онун адил гајда-ганунлары илә јашајырыг. Биз бу дүнјанын һөкмдарынын, јәни Шејтанын јаланчы вә гатил олдуғуну ифша едирик (Јәһ. 8:44). Шејтан дүнјасынын мәһвинин гачылмаз олдуғуну бәјан едирик. Шејтан вә онун тәрәфдарлары бизи һеч вахт сусдура билмәјәҹәкләр. Биз һәр бир васитәдән истифадә едәрәк Јеһоваја һәмд етмәјә давам едәҹәјик! Шејтан нә гәдәр гүдрәтли олса да, Падшаһлыг һагда мүждәнин бүтүн дүнјаја јајылмасынын гаршысыны ала билмир. Чүнки бизи горујан Јеһовадыр. (Әшија 54:15, 17 ајәләрини охујун.)

16. Јеһова бөјүк мүсибәт вахты халгыны неҹә горујаҹаг?

¹⁶ Гаршыда бизи нә ҝөзләјир? Бөјүк мүсибәт вахты Јеһова ики дәфә бизи мөһтәшәм сурәтдә горујаҹаг. Биринҹи дәфә јерин падшаһларыны јалан дини тәмсил едән Бөјүк Бабили мәһв етмәјә тәһрик едәндә (Вәһј 17:16—18; 18:2, 4). Икинҹи дәфә Армаҝеддонда Шејтан дүнјасынын галан һиссәсини мәһв едәндә (Вәһј 7:9, 10; 16:14, 16).

17. Јеһоваја јахын олмағын бизә һансы фајдасы вар?

¹⁷ Јеһоваја јахын олсаг, Шејтан бизә сағалмаз јара вура билмәјәҹәк. Әслиндә, онун өзү сағалмаз јара алаҹаг, бирдәфәлик мәһв едиләҹәк (Ром. 16:20). Беләликлә, бүтүн јараглары әјнинизә ҝејинин вә һеч вахт әјниниздән чыхартмајын! Шејтанла, онун дүнјасы илә тәкбашына дөјүшмәјин. Баҹы-гардашлара дәстәк олун, Јеһованын ҝөстәриши илә һәрәкәт един. Әҝәр бу ҹүр даврансаныз, әмин ола биләрсиниз ки, сәмави Атаныз сизи мөһкәмләндирәҹәк вә горујаҹаг (Әшј. 41:10).