1. Јеһованын халгы һансы чәтинликләрлә үзләшир?

ОЛА БИЛСИН, һал-һазырда чәтин бир сынағыныз вар. Мәсәлән, јығынҹагдан кимсә хәтринизә дәјиб (Јаг. 3:2). Иш вә ја мәктәб јолдашларыныз Јеһоваја хидмәт етдијиниз үчүн сизи лаға гојур (1 Бут. 4:3, 4). Аилә үзвләриниз јығынҹаглара ҝетмәјинизә вә ја иманынызы башгаларына данышмағыныза мане олур (Мәт. 10:35, 36). Үзләшдијиниз сынаг сизә ағыр ҝәлирсә, Јеһоваја хидмәти дајандырмаг фикринә дүшә биләрсиниз. Амма әмин олун ки, Јеһова истәнилән сынағын өһдәсиндән ҝәлмәјиниз үчүн һикмәт вә дөзмәјиниз үчүн ҝүҹ верәҹәк.

2. Ромалылара 15:4 ајәсинә әсасән, Аллаһын Кәламыны охумаг бизә неҹә көмәк едә биләр?

² Мүгәддәс Китабда гејри-камил инсанларын ағыр сынаглара таб ҝәтирдији илә бағлы тәфсилатлы мәлуматлар јер алыр. Нәјә ҝөрә Јеһова бунлары јаздырыб? Чүнки О истәјир ки, биз о инсанлардан нүмунә ҝөтүрәк. Јеһованын илһамы илә һәвари Булус мәһз бу фикри вурғуламышды. (Ромалылара 15:4 ајәсини охујун.) Охудугларымыз бизә тәсәлли вә үмид верә биләр. Амма Мүгәддәс Китабдан фајда әлдә етмәк үчүн ону садәҹә охумаг кифајәт дејил. Охудугларымыз дүшүнҹәмизи формалашдырмалы вә үрәјимизин дәринлијинә нүфуз етмәлидир. Мәсәлән, һансыса проблемин өһдәсиндән ҝәлмәк үчүн мәсләһәтә еһтијаҹыныз варса, мүталиә заманы нөвбәти дөрд аддымы ата биләрсиниз: 1) дуа един, 2) тәхәјјүлүнүздә ҹанландырын, 3) охудугларынызын дәринлијинә варын вә 4) тәтбиг един. Ҝәлин ҝөрәк бу аддымларын һәр биринә нәләр дахилдир * вә бу ҹүр мүталиә үсулу илә Давуд падшаһын вә һәвари Булусун һәјатында баш верәнләрдән нә өјрәнә биләрик.

3. Мүгәддәс Китабы охумаздан әввәл нә етмәлијик вә нә үчүн?

³ 1) Дуа един. Мүгәддәс Китабы охумаздан әввәл Јеһоваја дуа един. Хаһиш един ки, охујаҹағыныз парчадан неҹә јарарлана биләҹәјинизи ҝөрмәјә көмәк етсин. Мәсәлән, һансыса проблемдән чыхыш јолу ахтарырсынызса, лазыми принсипләри тапмаг үчүн көмәк истәјин (Филип. 4:6, 7; Јаг. 1:5).

4. Мүгәддәс Китабдан охудуғунуз һадисәни тәхәјјүлүнүздә неҹә ҹанландыра биләрсиниз?

⁴ 2) Тәхәјјүлүнүздә ҹанландырын. Јеһова һәр биримизә тәхәјјүл кими мөһтәшәм габилијјәт вериб. Мүгәддәс Китабдан охудуғунуз һансыса һадисәни ҹанландырмаг үчүн ону хәјалынызда тәсәввүр един вә өзүнүзү әсас персонажын јеринә гојун. Һәмин персонажын ҝөрдүкләрини тәхмин етмәјә, кечирдији һиссләри дујмаға чалышын.

5. Охудугларымызын дәринлијинә вармаг нә демәкдир вә буну неҹә етмәк олар?

⁵ 3) Охудугларынызын дәринлијинә варын. Дәринлијинә вармаг охудуғумуз парча вә ону өзүмүзә неҹә тәтбиг едәҹәјимиз барәдә јахшыҹа дүшүнмәк демәкдир. Бунун сајәсиндә фикирләр арасында әлагәни даһа јахшы тутмаг вә мөвзуну даһа дәриндән баша дүшмәк олур. Мүгәддәс Китабын дәринлијинә вармадан охумаг она бәнзәјир ки, масанын үзәриндәки паззл һиссәҹикләринә бахырыг, амма онлары бирләшдирмирик. Охујуб дүшүнәндә исә биз санки бу һиссәҹикләри бирләшдиририк вә бүтүн шәкли ајдын ҝөрүрүк. Буна наил олмаг үчүн бу кими суаллара ҹаваб тапмаға чалышын: «Һадисәдәки әсас персонаж өзүнә көмәк етмәк үчүн нә етди? Јеһова она неҹә көмәк етди? Бурадан өјрәндикләрим чәтинликләрә таб ҝәтирмәјә неҹә көмәк едә биләр?»

6. Өјрәндикләримизи нә үчүн тәтбиг етмәлијик?

⁶ 4) Тәтбиг един. Иса Мәсиһ демишди ки, өјрәндикләринә әмәл етмәјән евини гум үзәриндә тикмиш адама бәнзәјир. О, чох чалышыр, лакин бүтүн зәһмәти һәдәр ҝедир. Чүнки шиддәтли күләк, туфан оланда ев учур, дармадағын олур (Мәт. 7:24—27). Ејнилә биз дә дуа едир, охудуғумузу тәхәјјүлүмүздә ҹанландырыр вә дәринлијинә варырыгса, лакин өјрәндикләримизи тәтбиг етмириксә, зәһмәтимиз һәдәр ҝетмиш олаҹаг. Тәгибләрлә вә сынагларла үзләшәндә онлара таб ҝәтирмәк үчүн иманымыз ҝүҹлү олмајаҹаг. Амма мүталиә едиб, өјрәндикләримизә әмәл едәндә даһа јахшы гәрарлар веририк, гәлб раһатлығы тапырыг вә иманымыз даһа ҝүҹлү олур (Әшј. 48:17, 18). Ҝәлин ҝөрәк мүзакирә етдијимиз бу дөрд аддымы тәтбиг едәрәк Давуд падшаһдан нә өјрәнә биләрик.

7. Мүгәддәс Китабдакы һансы һадисә һаггында данышаҹағыг?

⁷ Һеч олубму ки, достунуз, јахуд аилә үзвүнүз етибарынызы сарсытсын? Онда Давуд падшаһын башына ҝәлән һадисәләри охумағынызын сизә чох көмәји олаҹаг. Оғлу Абсалам она сатгын чыхмышды, тахтыны әлә кечирмәк истәјирди (2 Ишм. 15:5—14, 31; 18:6—14).

8. Јеһованын көмәјини ҝөрмәк үчүн нә едә биләрсиниз?

⁸ 1) Дуа един. Бу һадисәни охумаздан әввәл Јеһоваја дуа един. Үзләшдијиниз пис рәфтара ҝөрә һансы һиссләри кечирдијинизи Она данышын (Зәб. 6:6—9). Нә һисс едирсинизсә, һәр шеји дејин. Сонра Јеһовадан хаһиш един ки, охудуғунуз парчадан бу чәтинлијин өһдәсиндән ҝәлмәјинизә көмәк едәҹәк принсипләри тапмаға көмәк етсин.

9. Давудла Абсалам арасында олан һадисәләри гысаҹа нәгл един.

⁹ 2) Тәхәјјүлүнүздә ҹанландырын. Һадисәләрин неҹә ҹәрәјан етдијини, Давудун  кечирдији һиссләри тәсәввүр етмәјә чалышын. Оғлу Абсалам илләрлә чалышыр ки, халгын үрәјини әлә алсын (2 Ишм. 15:7). Абсалам мүнасиб мәгамын јетишдијини ҝөрәндә бүтүн Исраил әразисинә ҹасуслар ҝөндәрир. Онлара тапшырыр ки, халгы ону падшаһ кими гәбул етмәјә тәшвиг етсинләр. О һәтта Давудун ән јахын достларындан вә мәсләһәтчиләриндән бири олан Әхтуфили дә гијамда она гошулмаға тәһрик едир. Абсалам өзүнү падшаһ елан едир, даһа сонра исә һәмин вахт, ола билсин, ағыр хәстә олан Давуду тутмаға вә өлдүрмәјә ҹәһд едир (Зәб. 41:1—9). Давуд она гаршы олан суи-гәсддән хәбәр тутур вә Јерусәлимдән гачыр. Нәтиҹәдә, Абсаламын ордусу илә Давудун адамлары дөјүшүр, үсјанкар орду мәғлуб олур, Давудун оғлу Абсалам гәтлә јетирилир.

10. Давуд падшаһ сынаглар гаршысында нә едә биләрди?

¹⁰ Сонра башына ҝәләнләрә ҝөрә Давудун һансы һиссләр кечирдијини тәсәввүр един. Истәкли оғлу Абсалам вә етибар етдији досту Әхтуфил она хаин чыхды. Давуда әзиз олан бу ики нәфәр онун гәлбини јаралады, һәтта ону өлдүрмәјә ҹәһд етди. Давудун башга достларына да етибары сарсыла биләрди, дүшүнә биләрди ки, онлар да Абсалама гошулуб. Ја да тәкҹә өзүнү дүшүнәрәк башыны ҝөтүрүб өлкәдән гача биләрди. Јахуд о, дилхор олуб, өзүнә гапана биләрди. Амма Давуд бунларын һеч бирини етмәди, о, бу ағыр сынағын өһдәсиндән ҝәлди. Ҝөрәсән нәјин сајәсиндә?

11. Давуд чәтин вәзијјәтдә неҹә давранды?

¹¹ 3) Охудуғунузун дәринлијинә варын. Бу һадисәдә һансы принсипләри тапа биләрсиниз? Нөвбәти суал үзәриндә дүшүн: «Давуд өзүнә неҹә көмәк етди?» О тәлаша дүшмәди, тәләсик, дүшүнүлмәмиш гәрарлар вермәди. Нә дә горхуја гапылыб, нә едәҹәји илә бағлы чаш-баш галмады. О, көмәк үчүн Јеһоваја дуа етди. Һәмчинин достларындан да көмәк истәди. Үстәлик, ләнҝимәдән вердији гәрарлары һәјата кечирди. Давудун гәлби јаралы олса да, башгаларына етибары итмәди, үрәји нифрәтлә долмады. О, јенә дә Јеһоваја вә достларына ҝүвәнирди.

12. Јеһова Давуда неҹә көмәк етди?

¹² Јеһова Давуда неҹә көмәк етди? Бир аз ахтарыш апарсаныз, ҝөрәҹәксиниз ки, Јеһова Давуда бу сынағын өһдәсиндән ҝәлмәк үчүн ҝүҹ верди (Зәб. 3:1—8; мүгәддимә). О, Давудун атдығы һәр аддымы аванд едирди. Һәмчинин Давуда садиг олан, ону горујан достларына да дајаг олурду.

13. Кимсә гәлбинизә ағыр јара вурубса, Давуддан неҹә өрнәк ала биләрсиниз? (Мәтта 18:15—17).

¹³ 4) Тәтбиг един. Дүшүнүн: «Давуддан неҹә өрнәк ала биләрәм?» Ола билсин, мәсәләни һәлл етмәк үчүн дәрһал һәрәкәтә кечмәлисиниз. Вәзијјәтдән асылы олараг, Исанын Мәтта 18-ҹи фәсилдә јазылмыш мәсләһәтинә ја олдуғу кими әмәл едә биләрсиниз, ја да орадакы принсипә ујғун даврана биләрсиниз. (Мәтта 18:15—17 ајәләрини охујун.) Һиссләрә гапылараг тәләм-тәләсик гәрар вермәк лазым дејил. Јеһоваја дуа етмәлисиниз ки, вәзијјәтин өһдәсиндән ҝәлмәјә сизә гәлб раһатлығы вә һикмәт версин. Достларыныза етибарынызы итирмәјин, әксинә, онларын көмәјини гәбул един (Мәс. 17:17). Ән әсасы исә Јеһованын Кәламы васитәсилә вердији мәсләһәтләрә ујғун давранын (Мәс. 3:5, 6).

14. 2 Тимутијә 1:12—16 вә 4:6—11, 17—22 ајәләри һансы вәзијјәтләрдә сизә тәсәлли верә биләр?

¹⁴ Ола билсин, Јеһоваја хидмәт етдијиниз үчүн аилә үзвләриниз тәрәфиндән тәгибләрә мәруз галырсыныз. Јахуд, ола билсин, јашадығыныз өлкәдә Јеһованын халгынын фәалијјәти мәһдудлашдырылыб, јахуд гадаған олунуб. Бу һалда сизә 2 Тимутијә 1:12—16 вә  4:6—11, 17—22 ајәләри тәсәлли верә биләр *. Һәвари Булус бу ајәләри һәбсдә оларкән јазмышды.

15. Јеһовадан нә хаһиш едә биләрсиниз?

¹⁵ 1) Дуа един. Бу ајәләри охумаздан өнҹә Јеһоваја проблеминизи вә буна ҝөрә кечирдијиниз һиссләри данышын. Нә һисс едирсинизсә, һәр шеји дејин. Сонра Јеһоваја дуа един ки, Булус һагда охудугларыныздан лазыми принсипләр тапасыныз вә һазыркы чәтинлик гаршысында неҹә давранаҹағынызы биләсиниз.

16. Булусун башына ҝәләнләри гысаҹа нәгл един.

¹⁶ 2) Тәхәјјүлүнүздә ҹанландырын. Өзүнүзү Булусун јериндә тәсәввүр един. Булус Ромада һәбсдәдир. Ону гандаллајыблар. О бундан өнҹә дә һәбсдә олмушду. Амма бу дәфә едам олунаҹағына там әминдир. Бәзи достлары ондан үз дөндәриб, үстәлик, физики ҹәһәтдән тагәтдән дүшүб (2 Тим. 1:15).

17. Булус неҹә даврана биләрди?

¹⁷ Булус бундан өнҹә вердији гәрарларын пешманчылығыны чәкә биләрди. Дүшүнә биләрди ки, башга ҹүр даврансајды, инди һәбс олунмазды. Онун үрәјиндә Асија әјаләтиндә ондан үз дөндәрән инсанлара гаршы нифрәт ојана биләрди. Ја да о бири достларына етибары сарсыла биләрди. Амма Булус бунларын һеч бирини етмәди. О, достларына јенә дә ҝүвәнирди вә Јеһованын ону мүкафатсыз гојмајаҹағына әмин иди. Ҝөрәсән нәјин сајәсиндә?

18. Булус чәтин сынаг заманы неҹә давранды?

¹⁸ 3) Охудуғунузун дәринлијинә варын. Дүшүнүн: «Булус өзүнә неҹә көмәк етди?» Һәтта өлүмлә үз-үзә олса да, Булус мүһүм мәсәләни, Јеһованын адыны шәрәфләндирмәји унутмады. Ејни заманда о, һәмишә башгаларыны руһландырмаг һагда дүшүнүрдү. О, Јеһоваја ҝүвәнирди, даима дуа едирди (2 Тим. 1:3). О, бүтүн фикрини-зикрини она арха чевирәнләрә ҹәмләмирди, она мүхтәлиф јолларла дајаг олан, она садиг олан достларына миннәтдар иди. Бундан әлавә, Булус Аллаһын Кәламыны мүталиә етмәкдән галмырды (2 Тим. 3:16, 17; 4:13). Ән әсасы исә, о, там әмин иди ки, Јеһова вә Иса ону севир, ону атмајыблар вә сәдагәтли хидмәтинә ҝөрә она мүкафат верәҹәкләр.

19. Јеһова Булуса неҹә көмәк етди?

¹⁹ Јеһова Булуса габагҹадан билдирмишди ки, мәсиһи олдуғу үчүн тәгибләрә мәруз галаҹаг (Һәв. 21:11—13). Бәс О, Булуса неҹә көмәк етди? Дуаларына ҹаваб верди, даһа сонра ону ҝүҹләндирди (2 Тим. 4:17). Јеһова Булусу әмин етмишди ки, уғрунда ағыр зәһмәт чәкдији мүкафаты алаҹаг. Бундан әлавә, Булусун садиг достларыны онун көмәјинә ҝөндәрмишди.

20. Ромалылара 8:38, 39 ајәләринә әсасән, Булуса сынаглара дөзмәјә нә көмәк етди вә сиз ондан неҹә өрнәк ала биләрсиниз?

²⁰ 4) Тәтбиг един. Дүшүнүн: «Булусдан неҹә өрнәк ала биләрәм?» Булус кими, биз дә билирик ки, иманымыза ҝөрә тәгибләрә мәруз галаҹағыг (Марк 10:29, 30). Сынаглар заманы садиг галмаг үчүн Јеһоваја ҝүвәнмәли, Она дуа етмәли вә Мүгәддәс Китабы мүнтәзәм мүталиә етмәлијик. Һәмчинин Јеһованы шәрәфләндирмәјин ән мүһүм мәсәлә олдуғуну һеч вахт унутмамалыјыг. О заман Булус кими, биз дә архајын ола биләрик ки, Јеһова бизи һеч вахт атмајаҹаг. Һеч ким вә һеч нә Онун бизи севмәсинә мане ола билмәз. (Ромалылара 8:38, 39 ајәләрини охујун; Ибр. 13:5, 6.)

21. Ајаја вә Һектора үзләшдикләри чәтинликләрин өһдәсиндән ҝәлмәјә нә көмәк етди?

²¹ Мүгәддәс Китабдакы мөмин инсанларын нүмунәси бизә истәнилән чәтинлијин өһдәсиндән  ҝәлмәјә ҝүҹ верә биләр. Мәсәлән, Јапонијада өнҹүл кими хидмәт едән Аја баҹы Јунусун нүмунәси сајәсиндә иҹтимаи шаһидлик вермәк горхусунун өһдәсиндән ҝәлиб. Индонезијадан олан Һектор адлы бир ҝәнҹин валидејнләри Јеһоваја хидмәт етмир. Рутун нүмунәси ону тәшвиг етди ки, Јеһова һагда өјрәнсин вә Она гуллуг етсин.

22. Мүгәддәс Китаба әсасланан аудио вә видео материаллардан, «Иман өрнәкләри» рубрикасындан там фајдаланмаг үчүн нә едә биләрсиниз?

²² Сизә гүввәт верәҹәк Мүгәддәс Китаб нүмунәләрини неҹә тапа биләрсиниз? Видеолар, бәдии гираәт вә «Иман өрнәкләри» рубрикасы Мүгәддәс Китабдакы һадисәләри ҹанландырмаға көмәк едир *. Амма онлара бахмаздан, гулаг асмаздан вә ја охумаздан өнҹә Јеһоваја дуа един, Ондан хаһиш един ки, һәјатынызда тәтбиг едәҹәјиниз конкрет фикирләр тапмағыныза көмәк етсин. Өзүнүзү әсас персонажын јериндә тәсәввүр един. Һадисәнин дәринлијинә варын, дүшүнүн, Јеһованын бу садиг хидмәтчиләри чәтинлијин өһдәсиндән ҝәлмәк үчүн өзләри нә етди, Јеһова онлара неҹә көмәк етди. Сонра исә өјрәндијиниз дәрсләри өз вәзијјәтинизә тәтбиг един. Јеһованын сизә бу вахта гәдәр етдији көмәјә ҝөрә миннәтдарлығынызы билдирин. Һәмчинин гој миннәтдар олдуғунуз башгаларына дајаг олмағыныздан вә руһландырмағыныздан ҝөрүнсүн.

23. Әшија 41:10, 13 ајәләринә әсасән, Јеһова бизә нәји вәд едир?

²³ Шејтанын идарә етдији бу дүнјада һәјат чох чәтиндир. Һәтта бәзән инсан өзүнү чарәсиз һисс едир (2 Тим. 3:1). Амма нараһат олмағымыза, горхмағымыза әсас јохдур. Јеһова нәләр јашадығымыздан аҝаһдыр. О вәд едир ки, јыхылан анымызда гүввәтли сағ әли илә бизи бәрк-бәрк тутаҹаг. (Әшија 41:10, 13 ајәләрини охујун.) Јеһованын көмәјинә там архаландығымыз үчүн вә Мүгәддәс Китаб да бизә ҝүҹ вердији үчүн биз истәнилән чәтинлијин өһдәсиндән ҝәлә биләрик.