1. Чохумузун һансы чәтинлији олур?

 НӘ ВАХТСА олуб ки, гаршыныза руһани мәгсәд гојасыныз, амма она чатмагда чәтинлик чәкәсиниз? b Белә вәзијјәтлә чохлары үзләшиб. Мәсәлән, Филип адлы бир гардаш мәгсәд гојмушду ки, дуаја тез-тез вахт ајырсын вә дуаларыны јахшылашдырсын. Амма о, дуа етмәк үчүн вахт тапмаға чәтинлик чәкирди. Ерика баҹынын мәгсәди о иди ки, тәблиғ ҝөрүшләринә вахтында ҝетсин. Амма о, јенә дә, демәк олар ки, һәр ҝөрүшә ҝеҹикирди. Томаш дәфәләрлә гаршысына мәгсәд гојмушду ки, Мүгәддәс Китабы башдан ахыра охусун. О дејир: «Мүгәддәс Китабы охумаг хошума ҝәлмирди. Үч дәфә ҹәһд етсәм дә, һәр дәфә “Лавилиләр” китабындан о тәрәфә кечә билмирдим».

2. Мәгсәдимизә һәлә чатмамышыгса, нәјә ҝөрә руһдан дүшмәмәлијик?

² Ола билсин, сиз дә гаршыныза һансыса мәгсәд гојмусунуз, амма һәлә бу мәгсәдинизә чатмамысыныз. Дүшүнмәјин ки, даһа мәгсәдинизә чата билмәјәҹәксиниз. Ән садә мәгсәдә белә чатмаг бир ҝүнүн ичиндә мүмкүн дејил. Бунун үчүн вахт вә зәһмәт чәкмәк лазымдыр. Мәгсәдинизә һәлә дә ҹан атмағыныз ҝөстәрир ки, Јеһова илә мүнасибәтләриниз сизин үчүн әзиздир вә Онун үчүн әлиниздән ҝәләнин ән јахшысыны етмәк истәјирсиниз. Јеһова сизин ҹәһдләринизи гијмәтләндирир. Әлбәттә, О сиздән баҹарығыныздан артығыны ҝөзләмир (Зәб. 103:14; Мик. 6:8). Одур ки, гаршыныза чата биләҹәјиниз мәгсәд гојун. Шәраитинизи нәзәрә алын. Белә бир мәгсәд гојмусунузса, она чатмаг үчүн нә едә биләрсиниз? Ҝәлин бәзи төвсијәләрә нәзәр салаг.

3. Нәјә ҝөрә мотивасија ваҹибдир?

³ Руһани мәгсәдләримизә чатмагда мотивасија мүһүм рол ојнајыр. Мотивасија оланда инсанын мәгсәдинә доғру ирәлиләмәк үчүн ҝүҹлү истәји олур. Мотивасијаны гајығы үнванына доғру апаран күләјә бәнзәтмәк олар. Күләк давам етсә, дәнизчи мәнзилбашына чатаҹаг. Күләк ҝүҹлү әсәндә исә, о, ҝедәҹәји јерә даһа тез чата биләр. Ејнилә мотивасијамыз нә гәдәр ҝүҹлү олса, мәгсәдимизә чатмаг еһтималымыз бир о гәдәр чох олаҹаг. Салвадорда јашајан Дејвид адлы гардаш дејир: «Адамын мотивасијасы оланда даһа чох чалышыр. Гојмурсан ки, нәсә сәнә мәгсәдинә чатмаға мане олсун». Бәс ҝөрәсән, мотивасијаны неҹә артырмаг олар?

4. Нә барәдә дуа едә биләрик? (Филиппилиләрә 2:13). (Һәмчинин шәклә бахын.)

⁴ Мотивасијаны артырмаг үчүн Јеһовадан көмәк истәјин. Јеһова мүгәддәс руһу илә сизи мәгсәдинизә чатмаға һәвәсләндирә биләр. (Филиппилиләрә 2:13 ајәсини охујун.) Бәзән билирик ки, филан шеји етмәлијик, она ҝөрә гаршымыза мәгсәд гојуруг. Бу, јахшыдыр. Амма, ола билсин, һәмин мәгсәдә чатмаг үчүн истәјимиз елә дә ҝүҹлү дејил. Угандада јашајан Норина адлы бир баҹы илә белә бир шеј баш вермишди. О, гаршысына мәгсәд гојмушду ки, Мүгәддәс Китаб дәрсинә башласын. Бунунла белә, өзүнү баҹарыглы мүәллим һесаб етмәдији үчүн бу мәгсәдинә чатмаға елә дә һәвәсли дејилди. Бәс она нә көмәк етди? О дејир: «Һәр ҝүн Јеһоваја дуа едирдим ки, Мүгәддәс Китаб дәрсинә башламаг истәјими артырсын. Дуаларыма ујғун олараг, тәлим вермәк габилијјәтими пүхтәләшдирмәјә чалышдым. Бир нечә ајдан сонра ҝөрдүм ки, инди дәрс кечмәјә даһа чох һәвәсим вар. Елә һәмин ил мән ики Мүгәддәс Китаб дәрсинә башладым».

5. Мәгсәдимизә чатмаг һәвәсимизи неҹә артыра биләрик?

⁵ Јеһованын сиздән өтрү етдикләри барәдә дүшүнүн (Зәб. 143:5). Һәвари Булус Јеһованын она нә гәдәр бөјүк лүтф ҝөстәрдији барәдә дүшүнмүшдү вә бу ону тәшвиг етмишди ки, Јеһова үчүн чох иш ҝөрсүн (1 Кор. 15:9, 10; 1 Тим. 1:12—14). Ејнилә сиз дә Јеһованын сиздән өтрү етдикләри барәдә нә гәдәр чох дүшүнсәниз, мәгсәдинизә чатмаг үчүн һәвәсиниз бир о гәдәр чох олаҹаг (Зәб. 116:12). Ҝөрүн Һондурасда јашајан бир баҹы өнҹүл олмаг мәгсәдинә неҹә чатмышды. О дејир: «Јеһованын мәни нә гәдәр чох севдији барәдә дүшүндүм. О мәни Өз халгынын арасына дахил едиб, мәним гејдимә галыр, мәни горујур. Бунлар барәдә дүшүнәндә Јеһоваја севҝим артды, өнҹүл олмаға даһа да һәвәсләндим».

6. Мотивасијамызы артырмаға даһа нәләр көмәк едә биләр?

⁶ Мәгсәдинизә чатмағын ҝәтирәҹәји немәтләр барәдә дүшүнүн. Ҝөрүн бајаг ады чәкилән Ерика баҹыја мәгсәдинә чатмаға нә көмәк етмишди. О, мәгсәд гојмушду  ки, пунктуал олсун. Ерика дејир: «Баша дүшдүм ки, тәблиғ ҝөрүшүнә ҝеҹикмәклә чох шеј итирирәм. Тез ҝетсәм, баҹы-гардашлары саламлаја, онларла сөһбәт едә биләрәм. Һәмчинин ҝөрүшдә сәсләнән ҝөзәл төвсијәләрә гулаг асыб хидмәтими пүхтәләшдирә биләрәм, ондан севинҹ дујарам». Ерика пунктуал олмағын хејри барәдә дүшүндү вә мәгсәдинә чатды. Бәс мәгсәдинизә чатмағын сизә һансы фајдасы олаҹаг? Әҝәр мәгсәдиниз Мүгәддәс Китабы охумаг вә ја дуа етмәклә бағлыдырса, дүшүнүн ки, буна наил олсаныз, Јеһова илә достлуғунуз неҹә мөһкәмләнәҹәк (Зәб. 145:18, 19). Әҝәр мәгсәдиниз өзүнүздә һансыса мәсиһи хүсусијјәти јетишдирмәкдирсә, дүшүнүн ки, бу сизин башгалары илә мүнасибәтинизи неҹә јахшылашдыраҹаг (Кол. 3:14). Бәлкә, мәгсәдинизә чатмаг үчүн һансы сәбәбләринизин олдуғу илә бағлы бир сијаһы тутасыныз? Тез-тез бу сијаһыја ҝөз ҝәздирин. Әввәлдә данышдығымыз Томаш дејир: «Мәгсәдимә чатмаг үчүн сәбәбим нә гәдәр чох олурса, тәслим олмаг еһтималым бир о гәдәр аз олур».

7. Хулио илә арвадына мәгсәдләринә чатмаға нә көмәк етди?

⁷ Сизи һәвәсләндирәҹәк инсанларла отуруб-дурун (Мәс. 13:20). Ҝөрүн Хулио вә онун арвады хидмәтләрини ҝенишләндирмәклә бағлы гојдуглары мәгсәдә неҹә чатдылар. Хулио дејир: «Өзүмүзә елә достлар сечдик ки, бизи мәгсәдимизә чатмаға тәшвиг етсинләр. Онларла тез-тез бу барәдә данышырдыг. Достларымызын әксәријјәти артыг охшар мәгсәдләрә чатмышдылар, она ҝөрә дә бизә фајдалы мәсләһәтләр верирдиләр. Һәмчинин онлар марагланырдылар ки, планларымыз нә јердәдир вә лазым оланда бизи руһландырырдылар».

8. Әҝәр јалныз һәвәсимиз олан вахт мәгсәдимиз үзәриндә ишләсәк, нә баш верәр? (Һәмчинин шәклә бахын.)

⁸ Дүзүнү десәк, һамымызда елә ҝүнләр олур ки, өзүмүзү һәвәссиз һисс едирик. Бу о демәкдир ки, һәмин ҝүнләр мәгсәдимизә чатмаға ҹан атмамалыјыг? Хејр. Белә бир нүмунәјә бахаг. Күләк гајығын мәнзилбашына чатмасына көмәк едән чох ҝүҹлү бир гүввәдир. Амма күләк ҝаһ ҝүҹлү олур, ҝаһ да хәфиф. Бәзи ҝүнләр исә үмумијјәтлә күләк олмур. Бу о демәкдир ки, дәнизчи елә олдуғу јердә галаҹаг? Јох. Бәзи гајыгларда мүһәррик олур, бәзиләриндә исә авар. Дәнизчи мәнзилбашына чатмаг үчүн бу васитәләрдән истифадә едә биләр. Бизим дә һәвәсимиз күләк кими ҝаһ ҝүҹлү, ҝаһ да зәиф олур. Бәзи ҝүнләр исә мәгсәдимизә чатмаг үчүн үмумијјәтлә һәвәсимиз олмур. Әҝәр јалныз һәвәсимиз олдуғу ҝүнләр мәгсәдимизин үстүндә ишләсәк, она һеч вахт чатмарыг. Дәнизчи мәнзилбашына чатмаг үчүн башга јоллар тапдығы кими биз дә һәвәсимиз олмајанда белә, мәгсәдимизә чатмаг үчүн нәсә едә биләрик. Дүздүр, бу, бәзән асан олмур, амма мәгсәдинизә чатанда ҝөрәҹәксиниз ки, буна дәјәрди. Нә едәҹәјимизи мүзакирә етмәздән әввәл ҝәлин јарана биләҹәк бир суалы арашдыраг.

9. Үрәјимиз истәмәјәндә белә, мәгсәдимизә чатмаг үчүн чалышмалыјыг? Изаһ един.

 ⁹ Јеһова истәјир ки, Она севинҹлә, көнүл хошлуғу илә хидмәт едәк (Зәб. 100:2; 2 Кор. 9:7). Бәс онда көнлүмүздән кечмәјәндә белә, мәгсәдимизә чатмаға чалышмалыјыг? Һәвари Булусун нүмунәсинә бахаг. О демишди: «Бәдәнимә ҹәфа вериб ону көлә кими өзүмә табе етдирирәм» (1 Кор. 9:25—27). Булусун үрәјиндән бәзән башга ҹүр давранмаг кечирди, амма о өзүнү мәҹбур едирди ки, Јеһованын бәјәндији кими даврансын. Бәс Јеһова Булусун хидмәтиндән разы иди? Сөзсүз. Јеһова онун зәһмәтинә бәрәкәт верди (2 Тим. 4:7, 8).

10. Һәвәсимиз олмајанда белә, мәгсәдимизә ҹан атмағын һансы фајдалары вар?

¹⁰ Јеһова ҝөрәндә ки, биз дә, һәвәсимиз олмаса белә, мәгсәдимизә чатмаға чалышырыг, чох севинир. Чүнки бәзән ҝөрәҹәјимиз иши севмәсәк дә, Јеһованы севдијимиз үчүн буну едирик. Јеһова һәвари Булусу зәһмәтинә ҝөрә мүкафатсыз гојмады, ејнилә бизи дә мүкафатсыз гојмајаҹаг (Зәб. 126:5). Һәтта ола биләр ки, Јеһованын вердији мүкафатлары ҝөрүб мотивасијамыз артсын. Полшадан олан Лүтсина баҹы дејир: «Бәзән тәблиғә ҝетмәк истәмирәм, ән чох да јорғун оланда. Амма тәблиғә ҝедәндән сонра дујдуғум севинҹин әвәзини һеч нә вермир». Беләликлә, ҝәлин ҝөрәк мотивасијамыз олмајанда нә едә биләрик.

11. Јеһова өзүмүзә һаким олмаға неҹә көмәк едә биләр?

¹¹ Дуа един ки, өзүнүзә һаким оласыныз. Өзүнә һаким олмаг һиссләри, һәрәкәтләри идарә етмәк баҹарығыдыр. Чох вахт бу ифадә өзүмүзү пис шејдән чәкиндирмәк мәнасыны верир. Амма јахшы ишләри ҝөрмәк үчүн дә өзүмүзә һаким олмалыјыг, хүсусилә дә чәтин тапшырыглары иҹра едәндә вә ја һәвәсимиз олмајанда. Билдијимиз кими, өзүнә һаким олмаг руһун бәһрәсидир. Она ҝөрә дә Јеһовадан мүгәддәс руһ истәјин ки, бу хүсусијјәти јетишдирмәјә сизә көмәк етсин (Лука 11:13; Гал. 5:22, 23). Бајаг ады чәкилән Дејвид дејир ки, дуа она чох көмәк едиб. О истәјирди ки, фәрди мүталиәсини мүнтәзәм етсин. Дејвид бөлүшүр: «Јеһоваја дуа етдим, хаһиш етдим ки, өзүмә һаким олмағыма көмәк етсин. Онун көмәји илә мән јахшы ҹәдвәл гурдум вә мүталиәни мүнтәзәм етмәји баҹардым».

12. Ваиз 11:4 ајәсиндәки принсип бизә мәгсәдимизә чатмаға неҹә көмәк едә биләр?

¹² Мүкәммәл шәраитин јаранаҹағы вахты ҝөзләмәјин. Бу дүнјада чәтин ки белә шәраит јарансын. Әҝәр һәр шејин мүкәммәл олмасыны ҝөзләсәк, мәгсәдимизә һеч вахт чатмарыг. (Ваиз 11:4 ајәсини охујун.) Дејниел адлы бир гардаш дејир: «Идеал вәзијјәт јохдур, һәрәкәтә кечиб, идеал вәзијјәти өзүн јарадырсан». Угандада јашајан Пол адлы гардаш буну тәхирә салмамағын диҝәр сәбәбини белә ачыглајыр: «Биз чәтин олса да, һәрәкәтә кечиб башламалыјыг ки, Јеһова да бәрәкәт версин» (Мәл. 3:10).

13. Нәјә ҝөрә хырда мәгсәдләрдән башламаг даһа јахшы олар?

¹³ Хырда шејләрдән башлајын. Ола билсин, һәвәсимизин аз олмасына сәбәб гојдуғумуз мәгсәдә чатмағын бизә чәтин ҝөрүнмәсидир. Әҝәр сиздә дә беләдирсә, бәлкә, гаршыныза бөјүк мәгсәдләрә апаран хырда мәгсәдләр гојасыныз? Мәсәлән, мәгсәдиниз өзүнүздә һансыса хүсусијјәти инкишаф етдирмәкдирсә, бәлкә, бу хүсусијјәти әввәлҹә кичик јолларла ҝөстәрәсиниз? Әҝәр мәгсәдиниз Мүгәддәс Китабы башдан ахыра гәдәр охумагдырса, бәлкә, буна әввәлҹә гыса вахт ајырасыныз? Әввәлдә ады чәкилән Томаш мәгсәд гојмушду ки, Мүгәддәс Китабы бир илә охусун. Амма бу мәгсәдә  чатмаг онун үчүн чәтин иди. О дејир: «Баша дүшдүм ки, сечдијим сүрәт мәним үчүн һәддән артыг чохдур. Она ҝөрә дә гәрара ҝәлдим ки, јенидән башлајым, амма бу дәфә ҝүнә бир фәслин мүәјјән һиссәсини охујум вә үзәриндә дүшүнүм. Нәтиҹәдә, Мүгәддәс Китабы охумаг чох хошума ҝәлди». Томаш мүталиәдән зөвг алдығы үчүн ҝетдикҹә буна даһа чох вахт ајырмаға башлады. Нәһајәтдә, о, Мүгәддәс Китабы ахыра кими охујуб гуртарды c.

14. Һансы вәзијјәтләр мәгсәдимизә чатмағы чәтинләшдирә биләр?

¹⁴ Әфсуслар олсун ки, нә гәдәр һәвәсли, низамлы олсаг да, бәзән һәр шеј план үзрә ҝетмәјә биләр. Ола билсин, гәфил иш чыхсын вә мәгсәдимизи иҹра етмәјә вахт галмасын (Ваиз 9:12). Јахуд да елә проблемлә үзләшә биләрик ки, бу бизи руһдан салар, ҝүҹүмүз түкәнәр (Мәс. 24:10). Һәмчинин ҝүнаһлы олдуғумуз үчүн һансыса јанлыш һәрәкәтимизлә мәгсәдимизә чатмағы даһа да чәтинләшдирә биләрик (Ром. 7:23). Ја да садәҹә јорғун ола биләрик (Мәт. 26:43). Бу кими манеәләрә бахмајараг, тәслим олмамаға бизә нә көмәк едә биләр?

15. Мәгсәдинизә чатмаға мане олан нәсә баш верәндә нәјә ҝөрә тәслим олмамалысыныз? (Зәбур 145:14).

¹⁵ Јадда сахлајын ки, мәгсәдинизә чатмаға нәјинсә мане олмасы о демәк дејил ки, даһа сиздә алынмајаҹаг. Мүгәддәс Китабда јазылыб ки, биз тез-тез проблемләрлә үзләшә биләрик. Амма орада, һәмчинин јазылыб ки, хүсусилә дә Јеһованын көмәји илә биз ајаға галха биләрик. (Зәбур 145:14 ајәсини охујун.) Бајаг ады чәкилән Филип гардаш белә бир фикир дејир: «Мән мәгсәдимә чатмадығым вахтлары уғурсузлуг һесаб етмирәм. Мәним үчүн өнәмли олан нечә дәфә релсә дүшмәји баҹармағымдыр».  Әввәлдә ады чәкилән Дејвид исә белә дејир: «Һәр шеј план үзрә ҝетмәјәндә чалышырам, буна манеә кими јох, Јеһоваја севҝими сүбут етмәк имканы кими бахым». Бәли, нәсә мане олса да, мәгсәдинизә чатмаға чалышанда ҝөстәрирсиниз ки, Јеһованы разы салмаг истәјирсиниз. Јеһова да сизин тәслим олмадығынызы ҝөрәндә тәсәввүрәҝәлмәз дәрәҹәдә севинир.

16. Нәсә мәгсәдинизә чатмаға мане оланда бундан һансы нәтиҹәни чыхара биләрсиниз?

¹⁶ Нәсә мәгсәдинизә чатмаға мане оланда бундан нәтиҹә чыхарын. Дүшүнүн, бу нәјә ҝөрә баш верди? Нәсә едә биләрәм ки, ҝәлән дәфә ејни шеј тәкрарланмасын? (Мәс. 27:12). Бәзән исә мәгсәдинизә чата билмәмәјиниз ҝөстәрир ки, гојдуғунуз мәгсәд реал дејил. Бәлкә, сизин дә мәгсәдиниз белә бир мәгсәддир? Онда она чатмағын сизин үчүн һәлә дә реал олуб-олмадығыны ҝөтүр-гој един d. Сизин үчүн әлчатмаз олан мәгсәддән ваз кечдијиниз үчүн дүшүнмәјин ки, Јеһованын ҝөзүндән дүшәҹәксиниз (2 Кор. 8:12).

17. Нәјә ҝөрә наил олдуғумуз мәгсәдләри унутмамалыјыг?

¹⁷ Наил олдуғунуз мәгсәдләр барәдә дүшүнүн. Мүгәддәс Китабда јазылыб: «Аллаһ әдаләтсиз дејил ки,.. чәкдијиниз зәһмәти унутсун» (Ибр. 6:10). Сиз дә унутмамалысыныз. Индијә кими чатдығыныз мәгсәдләри јадыныза салын. Мәсәлән, Јеһова илә дост олмусунуз, башгаларына Онун һаггында данышырсыныз, вәфтиз олунмусунуз вә ја башга һансыса мәгсәдинизә чатмысыныз. Индијә гәдәр аддым-аддым мәгсәдләринизә чатдығыныз кими индән белә дә һазыркы мәгсәдинизә чата биләрсиниз (Филип. 3:16).

18. Мәгсәдимизә доғру ирәлиләјәркән нәји унутмамалыјыг? (Һәмчинин шәклә бахын.)

¹⁸ Нәһајәтдә, дәнизчи мәнзилбашына чатдығы кими сиз дә Јеһованын көмәји илә мәгсәдинизә чата биләрсиниз. Амма унутмајын ки, дәнизчиләрин чоху сәјаһәтин өзүндән дә зөвг алыр. Сиз дә мәгсәдинизә апаран сәјаһәтдән севинҹ дујмаг үчүн јол боју Јеһованын сизә неҹә дајаг олдуғуну ҝөрмәјә чалышын (2 Кор. 4:7). Тәслим олмасаныз, даһа да бөјүк немәтләр алаҹагсыныз (Гал. 6:9).