1, 2. Һансы сәбәбә ҝөрә «Вәһј» китабында јазыланлар бизим үчүн әһәмијјәтли олмалыдыр?

 НӘ ВАХТСА киминсә шәкил албомуна бахмысыныз? Ҝәлин һәмин ана гајыдаг. Сиз албому вәрәгләдикҹә таныш олмајан сималар ҝөрүрсүнүз, амма бир шәкил сизин диггәтинизи чәкир. Чүнки бу шәкилдә сиз дә варсыныз. Шәклә диггәтлә бахырсыныз, шәкли һарада, нә вахт чәкдирдијинизи јадыныза салырсыныз. Еләҹә дә шәкилдә олан диҝәр сималары хатырламаға чалышырсыныз. Диҝәр шәкилләрдән фәргли олараг, бу шәкил сизин үчүн хүсуси олур.

² «Вәһј» китабы һәмин шәклә бәнзәјир. Буну ән азы ики сәбәбә ҝөрә белә демәк олар. Биринҹиси, Мүгәддәс Китабын бу бөлмәси бизим үчүн јазылыб. Елә илк ајәдән белә сөзләр охујуруг: «Иса Мәсиһдән ҝәлән вәһј. Аллаһ тезликлә баш верәҹәк һадисәләри гулларына ҝөстәрмәк үчүн бу вәһји Исаја верди» (Вәһј 1:1). Демәли, «Вәһј»дә јазыланлар үмумиликдә һамы үчүн јох, бизләр үчүн, Аллаһын һәср олунмуш хидмәтчиләри үчүндүр. Буна ҝөрә дә «Вәһј» китабындакы мөһтәшәм пејғәмбәрликләрин иҹрасында иштирак етмәјимиз бизи тәәҹҹүбләндирмәмәлидир. Башга сөзлә, «шәкилдә» биз дә варыг.

3, 4. «Вәһј» китабында орадакы пејғәмбәрликләрин јеринә јетәҹәји вахтла бағлы нә дејилир? Буну билмәк һәр биримизи нәјә тәшвиг етмәлидир?

³ Икинҹи сәбәб исә пејғәмбәрликләрин һансы дөврдә јеринә јетмәсидир. Һәмин дөврлә бағлы аһыл јашларында олан һәвари Јәһја белә демишди: «Мән мүгәддәс руһун тәсири илә Ағанын ҝүнүнә апарылдым» (Вәһј 1:10). Һәвари  Јәһја бу сөзләри тәхминән ерамызын 96-ҹы илиндә јазмышды. Ағанын ҝүнүнүн башламасына һәлә чох вар иди (Мәт. 25:14, 19; Лука 19:12). Мүгәддәс Китаб пејғәмбәрликләринә әсасән, һәмин ҝүн 1914-ҹү илдә Иса Мәсиһ ҝөјдә падшаһ оланда башлады. Һәмин илдән етибарән Аллаһын халгы барәдә јазылан пејғәмбәрликләр јеринә јетир. Бәли, биз инди Ағанын ҝүнүндә јашајырыг!

⁴ Белә бир һәјәҹанлы, әламәтдар дөврдә јашадығымыза ҝөрә Вәһј 1:3 ајәсиндәки мәсләһәт хүсусилә бизә аиддир. Орада дејилир: «Бу пејғәмбәрлик сөзләрини уҹадан охујан, онлары ешидән вә орада јазыланлара әмәл едән адам хошбәхтдир, чүнки вахт јахындыр». Бәли, биз пејғәмбәрлик сөзләрини уҹадан охумалы, ешитмәли вә онлара әмәл етмәлијик. Бу һансы сөзләрдир? Ҝәлин бәзиләрини нәзәрдән кечирәк.

5. «Вәһј» китабына әсасән, ибадәтимизин Јеһоваја мәгбул олуб-олмадығыны јохламаг нәјә ҝөрә ваҹибдир?

⁵ «Вәһј» китабынын елә илк фәслиндән ајдын ҝөрүрүк ки, Иса Мәсиһ јығынҹагда баш верәнләрдән там аҝаһдыр (Вәһј 1:12—16, 20; 2:1). Буну Исанын Кичик Асија әјаләтиндәки једди јығынҹаға үнванладығы сөзләрдән ҝөрмәк олар. О, биринҹи әсрдәки һәмин мәсиһиләрә конкрет ҝөстәришләр вермишди вә бунун сајәсиндә онлар ибадәтләринин Јеһоваја мәгбул олуб-олмадығыны јохлаја биләрдиләр. Онун дедикләри Аллаһын буҝүнкү хидмәтчиләринә дә аиддир. Шәхсән һәр биримиз үчүн бунлар нә мәна кәсб едир? Өндәримиз Иса Мәсиһ бизим дә руһани вәзијјәтимизин нә јердә олдуғуну чох јахшы билир. Биз онун һимајәси вә нәзарәти алтындајыг, һеч нә онун ҝөзүндән јајынмыр. О билир, Јеһованын разылығыны газанмаг үчүн нә етмәлијик. Ҝәлин ҝөрәк онун вердији һансы мәсләһәтләрә биз дә әмәл етмәлијик.

6. а) Вәһј 2:3, 4 ајәләринә әсасән, Ефес јығынҹағынын башлыҹа проблеми нә иди? б) Биз бундан өзүмүз үчүн һансы нәтиҹәни чыхарырыг?

⁶ Вәһј 2:3, 4 ајәләрини охујун. Јеһоваја әввәлки мәһәббәтимиз сојумамалыдыр. Иса Мәсиһин Ефес јығынҹағына үнванладығы сөзләрдән ҝөрмәк олар ки, онлар дөзүмлү идиләр, чәтинликләри олса да, Јеһоваја хидмәти дајандырмырдылар. Амма онларын әввәлки мәһәббәти сојумушду. Онлар мәһәббәтләрини аловландырмалы идиләр. Әкс һалда, ибадәтләри Аллаһа мәгбул олмајаҹагды. Бу бизә дә аиддир. Садәҹә дөзүмлү олмаг кифајәт дејил, чәтинликләрә дүзҝүн сәбәбләрдән ирәли ҝәләрәк дөзмәлијик. Чүнки Јеһова үчүн тәкҹә нә етдијимиз јох, һәм дә нәјә ҝөрә етдијимиз ваҹибдир. Јеһова истәјир ки, бизи Она ибадәт етмәјә дәрин мәһәббәт вә миннәтдарлыг һисси тәшвиг етсин (Мәс. 16:2; Марк 12:29, 30).

7. а) Вәһј 3:1—3 ајәләринә әсасән, Сард јығынҹағынын һансы проблеми вар иди? б) Биз нә етмәлијик?

⁷ Вәһј 3:1—3 ајәләрини охујун. Биз һәмишә ојаг галмалыјыг. Сард јығынҹағындакы мәсиһиләрин исә башга бир проблеми вар иди. Онлар әввәлләр Аллаһа хидмәтдә актив олсалар да, вахт кечдикҹә пассивләшмишдиләр. Елә буна ҝөрә дә Иса онлары «ојанмаға» сәсләмишди. Бурада бизим үчүн һансы ҹидди хәбәрдарлыг вар? Әлбәттә ки, Јеһова Онун јолунда чәкдијимиз зәһмәти унутмур (Ибр. 6:10). Бунунла белә, дүшүнмәмәлијик ки, әввәлләр Јеһоваја хидмәтдә нә етмишиксә, кифајәтдир. Ола биләр ки, инди әввәлки гәдәр хидмәт едә билмәјәк, амма биз  «Рәббин ишиндә» чох чалышмалыјыг вә ахыра кими ојаг галмалыјыг (1 Кор. 15:58; Мәт. 24:13; Марк 13:33).

8. Лаодикијадакы мәсиһиләрә үнванланан сөзләрдән нә өјрәнирик? (Вәһј 3:15—17).

⁸ Вәһј 3:15—17 ајәләрини охујун. Јеһоваја шөвглә вә бүтүн гәлбимизлә ибадәт етмәлијик. Лаодикија јығынҹағынын исә башга бир проблеми вар иди. Иса Мәсиһ онларын ибадәтләри илә бағлы демишди ки, «илыгдырлар». Ибадәтә һәвәссиз јанашдыгларына ҝөрә онлар «бәдбәхт» вә «аҹынаҹаглы ҝүндә» идиләр. Бу мәсиһиләр Јеһованын јолунда гејрәт ҝөстәрмәли, јәни бөјүк шөвглә хидмәт етмәли идиләр (Вәһј 3:19). Шәхсән һәр биримиз үчүн бунлар нә мәна кәсб едир? Әҝәр хидмәтдә шөвгүмүз азалыбса, саһиб олдуғумуз руһани немәтләрә ҝөрә миннәтдарлығымызы артырмалыјыг (Вәһј 3:18). Еһтијатлы олмасаг, раһат һәјата ҹан атдығымыз үчүн руһани ишләр икинҹи плана кечә биләр.

9. Иса Мәсиһ Пергам вә Тиатира јығынҹагларына һансы мәсләһәти вермишди вә биз өзүмүзү һансы тәһлүкәдән ҝөзләмәлијик?

⁹ Дөнүкләрин тәлимләрини рәдд етмәлијик. Иса Мәсиһ Пергам јығынҹағында инсан фикирләрини јајанлара вә тәригәт јараданлара ирад тутмушду (Вәһј 2:14—16). Тиатира јығынҹағында исә «Шејтанын дәрјасына» баш вурмајанлары тәрифләмишди вә онлара демишди ки, һәгигәтдән бәрк јапышсынлар (Вәһј 2:24—26). Сахта тәлимләрә алданан зәиф мәсиһиләр төвбә етмәли идиләр. Бәс бизим барәдә нә демәк олар? Јеһованын фикирләринә зидд ҝедән истәнилән тәлими рәдд етмәлијик. Дөнүкләр «үздән өзләрини мөмин» ҝөстәрирләр, әслиндә исә Аллаһын јолу илә ҝетмирләр (2 Тим. 3:5). Биз Аллаһын Кәламыны дәриндән мүталиә етмәјин сајәсиндә јалан тәлимләри асанлыгла ајырд едиб, рәдд едә биләҹәјик (2 Тим. 3:14—17; Јһд. 3, 4).

10. Иса Мәсиһин Пергам вә Тиатира јығынҹағына дедији сөзләрдән даһа нә өјрәнирик?

¹⁰ Биз әхлагсызлығын һеч бир нөвүнә нормал јанашмамалы вә ондан узаг дурмалыјыг. Пергам вә Тиатира јығынҹағынын башга бир проблеми дә вар иди. Иса онлары әхлагсызлыға ҝөз јумдугларына ҝөрә мәзәммәт етмишди (Вәһј 2:14, 20). Шәхсән һәр биримиз үчүн бу нә мәна кәсб едир? Биз Јеһоваја узун илләр хидмәт етсәк дә вә һал-һазырда мүәјјән мәсулијјәтләримиз олса да, дүшүнмәмәлијик ки, әхлагсыз  әмәлләрлә мәшғул олсаг, Јеһова бизә ҝүзәштә ҝедәҹәк (1 Ишм. 15:22; 1 Бут. 2:16). Дүнјанын әхлаг дәјәрләри нә дәрәҹәдә тәнәззүлә уғрајыр уғрасын, Јеһова бизим јүксәк әхлаг нормаларына риајәт етмәјимизи истәјир (Ефес. 6:11—13).

11. Бура гәдәр нә өјрәндик? ( «Нә өјрәндик?» адлы чәрчивәјә бахын.)

¹¹ Демәли, бура гәдәр нә өјрәндик? Өјрәндик ки, ибадәтимизин Јеһоваја мәгбул олуб-олмадығыны јохламалыјыг. Әҝәр ҝөрсәк ки, һансыса әмәлимиз дүзҝүн дејил, Аллаһын разылығыны газанмаг үчүн дәрһал дәјишиклик етмәлијик (Вәһј 2:5, 16; 3:3, 16). Иса јығынҹаглара үнванладығы мәктубларда башга мәгамлара да тохунур. Ҝәлин онлары нәзәрдән кечирәк.

12. Исанын Смирна вә Филаделфијадакы баҹы-гардашлара дедикләриндән нә өјрәнирик? (Вәһј 2:10).

¹² Ҝәлин Исанын Смирна вә Филаделфија јығынҹағына дедикләринә нәзәр салаг. Иса онлара демишди ки, тәгибләрдән горхмасынлар, чүнки садиг галсалар, мүкафат алаҹаглар. (Вәһј 2:10 ајәсини охујун; Вәһј 3:10.) Шәхсән һәр биримиз үчүн бу нә мәна кәсб едир? Биз тәгибләрин олаҹағыны ҝөзләмәлијик вә онлара дөзмәјә һазыр олмалыјыг (Мәт. 24:9, 13; 2 Кор. 12:10). Нәјә ҝөрә бу, ваҹиб хатырлатмадыр?

13, 14. Вәһј 12-ҹи фәсилдә тәсвир олунан һадисәләрин Аллаһын халгына һансы тәсири олду?

¹³ «Вәһј» китабына әсасән, Аллаһын халгы Ағанын ҝүнүндә, јәни бизим јашадығымыз дөврдә тәгибләрлә үзләшмәлидир. Вәһј 12-ҹи фәсилдә јазылыб ки, Аллаһын Падшаһлығы гурулан кими ҝөјдә мүһарибә гопур. Микајыл, јәни шәрәфә јүксәлмиш Иса Мәсиһ вә онун ордусу Шејтанла ҹинләринә гаршы вурушур (Вәһј 12:7, 8). Нәтиҹәдә, Аллаһын дүшмәнләри мәғлуб олур вә јер үзүнә атылыр. Бу, јерә вә јер үзүндәки инсанлара олмазын бәлалар ҝәтирир (Вәһј 12:9, 12). Бәс бу баш верәнләрин нәтиҹәсиндә Аллаһын халгы нәләрлә үзләшир?

¹⁴ Даһа сонра «Вәһј» китабында Шејтанын нәләр етдијиндән бәһс олунур. Артыг ҝөјә галха билмәдији үчүн о, бүтүн гәзәбини јер үзүндәки мәсһ олунмушларын үзәринә төкүр. Онлар Аллаһын Падшаһлығынын јер үзүндәки нүмајәндәләридирләр вә Иса һаггында шәһадәт едирләр (Вәһј 12:17; 2 Кор. 5:20; Ефес. 6:19, 20). Бу пејғәмбәрлик неҹә јеринә јетиб?

15. Вәһј 11-ҹи фәсилдәки «ики шаһид» кимләрин тәсвиридир вә онларла нә баш верди?

 ¹⁵ Шејтан Аллаһын дүшмәнләрини Падшаһлығын тәблиғи ишинә рәһбәрлик едән гардашлара гаршы галдырды. Һәмин гардашлар «Вәһј» китабында «ики шаһид» кими тәсвир олунур. Китабдан бу ики шаһидин өлдүрүлдүјүнү охујуруг * (Вәһј 11:3, 7—11). Тәшкилата рәһбәрлик едән сәккиз мәсул гардаш 1918-ҹи илдә һагсыз јерә иттиһам олунду вә һәр биринә узунмүддәтли һәбс ҹәзасы кәсилди. Чохлары елә дүшүндү ки, артыг бу мәсһ олунмушларын фәалијјәти дајанды, јәни мәҹази мәнада өлдүрүлдү.

16. 1919-ҹу илдә һансы ҝөзләнилмәз һадисә баш верди, бунунла белә, Шејтан о вахтдан бәри нә едир?

¹⁶ Вәһј 11-ҹи фәсилдәки пејғәмбәрликдә һәмчинин дејилир ки, гыса мүддәт сонра «ики шаһид» һәјата гајыдыр. Бу пејғәмбәрлик һејрәтамиз шәкилдә јеринә јетди. Мәсһ олунмуш гардашларын һәбс олунмасындан һеч бир ил кечмәди ки, 1919-ҹу илин әввәли онлар азадлыға бурахылдылар. Даһа сонра үзәрләриндән мәһкумлуг да ҝөтүрүлдү. Гардашлар дәрһал ишләринин башына гајытдылар. Амма буна бахмајараг, Шејтан Аллаһын халгына һүҹумуну дајандырмады. О вахтдан бәри онларын үзәринә тәгибләр сели јағдырыр (Вәһј 12:15). Она ҝөрә дә һәр биримизә «дөзүм вә иман ҝәрәкдир» (Вәһј 13:10).

17. Аллаһын халгы Шејтанын һәдәфи олса да, һансы көмәји алыб?

¹⁷ Вәһј 12-ҹи фәсилдә даһа сонра гејд олунур ки, Аллаһын халгы ҝөзләмәдикләри бир јердән көмәк алаҹаг. «Вәһј» китабында тәсвир олундуғу кими, «јер» тәгибләр «сел»ини удаҹаг (Вәһј 12:16). Пејғәмбәрликдә дејилдији кими дә олуб. Шејтан дүнјасынын гисмән стабил үнсүрләри, мәсәлән, мүәјјән мәһкәмә системләри бәзән Аллаһын халгынын көмәјинә чатыб. Јеһованын хидмәтчиләри дәфәләрлә мәһкәмәдә галиб ҝәлибләр вә бунун да сајәсиндә мүәјјән азадлыг әлдә едибләр. Бәс онлар бу азадлыгдан неҹә истифадә едибләр?  Онлар јаранан фүрсәтләри әлдән вермәјиб Јеһованын бујурдуғу иши јеринә јетирибләр (1 Кор. 16:9). Бу ишә нәләр дахилдир?

18. Ахырзаманда ҝөрдүјүмүз әсас ишимиз нәдир?

¹⁸ Иса Мәсиһ пејғәмбәрлик етмишди ки, сон ҝәлмәздән әввәл Аллаһын халгы Падшаһлыг һаггындакы мүждәни бүтүн јер үзүндә тәблиғ едәҹәк (Мәт. 24:14). Онлара бу ишдә «јер үзүнүн сакинләринә — һәр халга, тајфаја, дилә вә үммәтә ҹар чәкмәк үчүн» әбәди мүждәси олан мәләк, јахуд бир груп мәләк көмәк едир (Вәһј 14:6).

19. Јеһованы севәнләр башга һансы хәбәри бәјан етмәлидирләр?

¹⁹ Аллаһын халгынын өһдәсинә тәкҹә Падшаһлыг һагда мүждәни тәблиғ етмәк дүшмүр. Онлар һәмчинин Вәһј 8-дән 10-а кими фәсилләрдә гејд олунан ишдә мәләкләрә дәстәк олмалыдырлар. Бу мәләкләр Аллаһын Падшаһлығына гаршы чыханларын үзәринә бир сыра бәлаларын ҝәләҹәјини бәјан едирләр. Белә ки, Јеһованын Шаһидләри «долу вә алов»а бәнзәјән һөкм хәбәрини чатдырырлар. Онлар Шејтан дүнјасынын мүхтәлиф һиссәләри үзәриндә Аллаһын иҹра едәҹәк һөкмләрини ачыглајырлар (Вәһј 8:7, 13). Инсанлар сонун јахын олдуғуну билмәлидирләр ки, һәјатларында көклү дәјишикликләр етсинләр вә Јеһованын гәзәб ҝүнүндә сағ галсынлар (Сәф. 2:2, 3). Амма бу хәбәри бәјан етмәјимиз чохларына хош ҝәлмир. Буна ҝөрә дә бизә ҹәсарәт лазымдыр. Бөјүк мүсибәт заманы сонунҹу һөкм хәбәри бәјан едиләҹәк вә бу хәбәр даһа сәрт олаҹаг (Вәһј 16:21).

20. Нөвбәти ики мәгаләдә нә һагда данышаҹағыг?

²⁰ Бу пејғәмбәрлик сөзләринә әмәл етмәјимиз чох ваҹибдир, чүнки «Вәһј» китабында јазыланларын иҹрасында биз дә иштирак едирик (Вәһј 1:3). Бәс тәгибләрә сәдагәтлә дөзмәјә вә бу хәбәрләри бундан сонра да ҹәсарәтлә бәјан етмәјә бизә нә көмәк едә биләр? Ики шеј бизи ҝүҹләндирәҹәк: биринҹиси, «Вәһј» китабында Аллаһын дүшмәнләри һагда јазылан мәлумат, икинҹиси, садиг галдығымыз тәгдирдә алаҹағымыз немәтләр. Бу һагда нөвбәти ики мәгаләдә данышаҹағыг.