1. Нәјә ҝөрә һәр биримизин илаһи һикмәтә еһтијаҹы вар? (Мәсәлләр 4:7).

 ЈӘГИН, һансыса мүһүм гәрары вермәздән өнҹә дуа едиб Јеһовадан һикмәт истәмисиниз. Чүнки һикмәтә еһтијаҹ дујдуғунузу баша дүшүрдүнүз (Јаг. 1:5). Сүлејман падшаһ јазмышды: «Ән әсасы һикмәтдир». (Мәсәлләр 4:7 ајәсини охујун.) Сөзсүз ки, Сүлејман бурада бәшәри һикмәтдән јох, Јеһованын вердији һикмәтдән данышырды (Мәс. 2:6). Бәс илаһи һикмәт бизә бу ҝүн үзләшдијимиз проблемләри һәлл етмәјә көмәк едә биләр? Бәли, мәгаләдән ҝөрәҹәјимиз кими көмәк едә биләр.

2. Әсл һикмәтә јијәләнмәјин бир јолу һансыдыр?

² Әсл һикмәтә јијәләнмәјин бир јолу өз һикмәтләри илә танынан ики инсанын мәсләһәтләринин дәринлијинә варыб, онлара әмәл етмәкдир. Онлардан бири Сүлејман падшаһдыр. Онун һаггында Мүгәддәс Китабда белә јазылыб: «Аллаһ Сүлејмана һәдсиз һикмәт вә бәсирәт... верди» (1 Пад. 4:29). Икинҹиси исә бәнзәрсиз һикмәтә саһиб олан Иса Мәсиһдир (Мәт. 12:42). Онун һаггында габагҹадан белә дејилмишди: «Јеһованын руһу онун үзәриндә олаҹаг, һикмәт вә дәрракә руһу... онун үзәриндә олаҹаг» (Әшј. 11:2).

3. Бу мәгаләдә нә һагда данышаҹағыг?

³ Һәм Сүлејман падшаһ, һәм дә Иса Мәсиһ Аллаһын вердији һикмәт сајәсиндә һәјатымызын ваҹиб саһәләри илә бағлы ҝөзәл мәсләһәтләр верибләр. Мәгаләдә бу саһәләрин үчүндән, пула вә ишә дүзҝүн јанашмагдан, һәмчинин өзүмүзә дүзҝүн гијмәт вермәкдән данышаҹағыг.

4. Сүлејманла Исанын мадди дуруму арасында һансы фәрг вар иди?

⁴ Сүлејман падшаһ һәдсиз вар-дөвләтә саһиб иди, о, ҹаһ-ҹалал ичиндә јашајырды (1 Пад. 10:7, 14, 15). Иса Мәсиһ исә елә дә чох шејә саһиб дејилди, һеч өз еви дә јох иди (Мәт. 8:20). Бунунла белә, онларын һәр икиси мадди шејләрә дүзҝүн јанашырдылар. Чүнки һәр икисинин саһиб олдуғу һикмәтин мәнбәји Јеһова Аллаһ иди.

5. Нәјә ҝөрә дејә биләрик ки, Сүлејман падшаһ пула дүзҝүн јанашырды?

⁵ Сүлејман падшаһ пулун инсанын «сипәри» олдуғуну инкар етмирди (Ваиз 7:12). Пулла инсан јашамаг үчүн зәрури шејләри әлдә едә билир, јери ҝәләндә, үрәји истәјән нәсә ала билир. Амма бу гәдәр вар-дөвләтә саһиб олмасына бахмајараг, Сүлејман дәрк едирди ки, пулдан даһа дәјәрли шејләр вар. Мәсәлән, о јазмышды: «Тәмиз ад бөјүк сәрвәтдән үстүндүр» (Мәс. 22:1). О һәмчинин фикир вермишди ки, пулу севән инсанлар надир һалларда әлләриндә олана гане олурлар (Ваиз 5:10, 12). Бундан әлавә, о, пула бел бағламамағы мәсләһәт ҝөрмүшдү, чүнки пул бу ҝүн вар, сабаһ јохдур (Мәс. 23:4, 5).

6. Исанын мадди шејләрә дүзҝүн јанашдығыны нәдән ҝөрмәк олар? (Мәтта 6:31—33).

⁶ Иса Мәсиһ мадди шејләрә дүзҝүн јанашырды. О, јејиб-ичмәји хошлајырды (Лука 19:2, 6, 7). Бир дәфә о, әла нөв шәраб дүзәлтмишди, бу, онун илк мөҹүзәси иди (Јәһ. 2:10, 11). Һәмчинин өлән ҝүнү онун әјниндә баһалы палтар вар иди (Јәһ. 19:23, 24). Амма мадди шејләр Исанын һәјатында ән ваҹиб јери тутмурду. О, давамчыларына демишди: «Һеч ким ики ағаја гуллуг едә билмәз... Сиз һәм Аллаһын, һәм дә вар-дөвләтин гулу ола билмәзсиниз» (Мәт. 6:24). Иса өјрәдирди ки, биз Падшаһлығы һәр шејдән үстүн тутсаг, Јеһова бизи лазым олан шејләрлә тәмин едәҹәк. (Мәтта 6:31—33 ајәләрини охујун.)

7. Бир гардаш пула дүзҝүн јанашмағын һансы хејрини ҝөрүб?

 ⁷ Бир чох баҹы-гардашларымыз Јеһованын пула дүзҝүн јанашмагла бағлы вердији һикмәтли мәсләһәтләрин фајдасыны ҝөрүбләр. Ҝөрүн Даниел адлы субај бир гардаш нә дејир: «Јенијетмә јашларымда гәрара ҝәлдим ки, һәјатымда ән әсас јери руһани ишләрә верәҹәјәм». Даниел садә һәјат сүрдүјү үчүн Јеһованын ишиндә мүхтәлиф тәјинатлары иҹра едә билмишди. О, сөзүнә белә давам едир: «Там сәмимијјәтимлә дејирәм, сечдијим һәјат јолуна ҝөрә һеч вахт пешман олмамышам. Әлбәттә ки, һәјатымда пула өнәм версәјдим, чох пул газана биләрдим. Бәс онда индики кими ҝөзәл достларым оларды? Падшаһлығы һәр шејдән үстүн тутдуғум үчүн инди дујдуғум гәлб раһатлығыны дујардым? Нә гәдәр пулум олурса-олсун, һеч нә Јеһованын вердији немәтләрин дәјәринә чата билмәз». Доғрудан да, фикримизи пула јох, руһани шејләрә ҹәмләјәндә чох хејир тапырыг.

8. Сүлејман падшаһын ишә дүзҝүн јанашдығыны һарадан билирик? (Ваиз 5:18, 19).

⁸ Сүлејман падшаһ инсанын әлинин зәһмәтиндән севинҹ дујмасыны «Аллаһын бәхшиши» адландырмышды. (Ваиз 5:18, 19 ајәләрини охујун.) О јазмышды: «Һәр зәһмәтдә фајда вар» (Мәс. 14:23). Данышдығы шејләр Сүлејмана јад дејилди. О, чох зәһмәткеш инсан иди! О, евләр тикмишди, үзүмлүкләр, бағча-бағлар салмышды, су һөвзәләри дүзәлтмишди, шәһәрләр инша етмишди (1 Пад. 9:19; Ваиз 2:4—6). Бунлар бөјүк зәһмәт тәләб едән ишләр иди, шүбһәсиз ки, бу, она мәмнунлуг ҝәтирирди. Амма Сүлејман хошбәхтлији јалныз бу шејләрдә ахтармырды. О, Јеһованын да јолунда чохлу ишләр ҝөрмүшдү. Мәсәлән, о, Јеһованын әзәмәтли мәбәдинин тикинтисинә рәһбәрлик етмишди. Бу лајиһәни о, једди илә баша чатдырмышды! (1 Пад. 6:38; 9:1). Сүлејман һәм руһани, һәм дә диҝәр ишләрлә мәшғул олмушду вә белә гәнаәтә ҝәлмишди ки, инсанын һәјатында әсас јери Аллаһа ибадәт тутмалыдыр. О јазмышды: «Хүласә, дејиләнләрин мәғзи будур: Аллаһдан горх, Онун әмрләрини јеринә јетир» (Ваиз 12:13).

9. Иса Мәсиһин ишә дүзҝүн јанашдығы нәдән ҝөрүнүр?

⁹ Иса Мәсиһ дә чох зәһмәткеш инсан иди. О, ҝәнҹ јашларында дүлҝәр ишләјирди (Марк 6:3). Әлбәттә, Исанын валидејнләри она миннәтдар иди ки, бөјүк күлфәти доландырмагда онлара дәстәк олур. Иса камил олдуғу үчүн мүкәммәл дүлҝәр иди, јәгин ки, мүштәриси дә чох иди! Сөзсүз ки, о, ишини чох севирди, ишинә ҹан јандырырды. Амма руһани ишләрә дә һәмишә вахт ајырырды (Јәһ. 7:15). Сонралар Иса өзүнү хидмәтә һәср едәндә тәблиғ етдији инсанлара демишди: «Хараб олуб ҝедән гида үчүн әлләшмәјин, әбәди һәјат ҝәтирән вә даим галан гидадан өтрү чалышын» (Јәһ. 6:27). Дағүстү вәзиндә исә Иса Мәсиһ белә сөзләр демишди: «Хәзинәнизи ҝөјдә топлајын» (Мәт. 6:20).

10. Бәзиләринин ишдә нә кими чәтинлији ола биләр?

¹⁰ Илаһи һикмәт бизә дә ишә дүзҝүн јанашмаға көмәк едә биләр. Бир мәсиһи кими, биз әлимизин һалал зәһмәти илә доланмалыјыг (Ефес. 4:28). Дүрүст вә зәһмәткеш  ишчи олмағымыз мүдирләримизин ҝөзүндән јајынмыр, бәзән онлар бир ишчи кими биздән разы олдугларыны дејирләр. Белә һалларда јахшы нијјәтдән ирәли ҝәләрәк дүшүнә биләрик ки, Јеһованын Шаһидләри һагда даһа да јахшы тәәссүрат ојатмаг үчүн иш саатындан артыг ишләјәк. Амма белә етсәк, бир мүддәт сонра ҝөрәҹәјик ки, аиләмизә вә руһани ишләрә вахт тапмырыг. Белә олан һалда таразлығы горумаг үчүн дәјишиклик етмәлијик.

11. Бир гардаш ишә дүзҝүн јанашмагла бағлы нә өјрәниб?

¹¹ Вилјам адлы гардаш ишә дүзҝүн јанашмағы бир ағсаггалдан өјрәниб. Һәмин ағсаггал әввәлләр онун мүдири олуб. Вилјам дејир: «Бу гардаш ишә дүзҝүн јанашмаг мәсәләсиндә чох ҝөзәл өрнәкдир. О, чох зәһмәткешдир, ишини кејфијјәтли ҝөрдүјүнә ҝөрә мүштәриләри илә јахшы мүнасибәти вар. Амма ахшам иш гуртарандан сонра о, иши ишдә гојур вә бүтүн диггәтини аиләсинә, ибадәтинә ҹәмләјир. Дејәрдим ки, о, таныдығым ән хошбәхт инсанлардан биридир!» *

12. Сүлејман падшаһ бир вахтлар өзү һагда һансы фикирдә иди, бәс сонра нә баш верди?

¹² Сүлејман падшаһ Јеһоваја садиг галдығы вахтларда өзүнә дүзҝүн гијмәт верирди. О, ҝәнҹлијиндә, һакимијјәтинин илк илләриндә баша дүшүрдү ки, тәҹрүбәсиздир, буна ҝөрә дә Јеһовадан рәһбәрлик истәмишди (1 Пад. 3:7—9). Сүлејман һәм дә дәрк едирди ки, гүрур тәһлүкәлидир. О јазмышды: «Әҹәлдән габаг гүрур, сүгутдан өнҹә тәкәббүр ҝәләр» (Мәс. 16:18). Амма әфсуслар олсун ки, Сүлејман падшаһ вердији мәсләһәтә өзү әмәл етмәди. Сонралар о гүрурланды вә Аллаһын ганунларына итаәтсизлик етди. Мәсәлән, Аллаһын ганунларынын бириндә дејилирди ки, ибрани падшаһ «чохлу арвад  алмамалыдыр, јохса үрәји һагг јолундан дөнәр» (Ган. 17:17). Сүлејман падшаһ бу гануна мәһәл гојмајыб, 700 арвад вә 300 ҹаријә алды, онларын да чоху бүтпәрәст иди! (1 Пад. 11:1—3). Бәлкә дә, Сүлејман дүшүнүрдү ки, бу, онун үчүн һеч бир тәһлүкә јаратмаз. Һәр неҹә олса да, о, бир мүддәт сонра Јеһовадан узаглашмағын аҹы нәтиҹәләрини јашады (1 Пад. 11:9—13).

13. Иса Мәсиһин тәвазөкарлығындан нә өјрәнә биләрик?

¹³ Иса Мәсиһ һәмишә өзүнә дүзҝүн гијмәт вермиш вә тәвазөкарлығыны горумушду. Јер үзүнә ҝәлмәздән өнҹә о, мөһтәшәм ишләр ҝөрмүшдү. «Ҝөјдә вә јердә олан һәр шеј» онун васитәсилә јарадылмышды (Кол. 1:16). Ҝөрүнүр, вәфтиз олунанда о, Атасы илә бирҝә ҝөрдүјү ишләри хатырламышды (Мәт. 3:16; Јәһ. 17:5). Амма о, бу шејләрә ҝөрә ловғаланмады. Һеч вахт өзүнү башгаларындан үстүн тутмамышды. Иса шаҝирдләринә өзү барәдә белә демишди: «Инсан Оғлу да она ҝөрә ҝәлмәјиб ки, она гуллуг етсинләр, әксинә, о, хидмәт етмәк вә бир чохлары уғрунда һәјатыны фидјә кими вермәк үчүн ҝәлиб» (Мәт. 20:28). Һәмчинин белә демишди: «Оғул өзүндән бир шеј едә билмәз» (Јәһ. 5:19). Бу, неҹә дә бөјүк тәвазөкарлыг иди! Доғрудан да, Иса Мәсиһ бизим үчүн чох ҝөзәл нүмунәдир.

14. Исадан өзүмүзә дүзҝүн гијмәт вермәклә бағлы нә өјрәнирик?

¹⁴ Иса Мәсиһ давамчыларына да өзләри һагда дүзҝүн фикирдә олмағы өјрәдирди. Онлары үрәкләндириб демишди: «Сизин исә башыныздакы түкләр белә, бир-бир сајылыб» (Мәт. 10:30). Бу сөзләр бизә чох гәлб раһатлығы верир, хүсусилә дә өзүмүз һагда мәнфи фикирдәјиксә. Бу, о демәкдир ки, Јараданымыз бизимлә марагланыр, биз Онун ҝөзүндә дәјәрлијик. Әҝәр биз Јеһованын хидмәтчиси олмаға вә јени дүнјада јашамаға лајиг олмадығымызы дүшүнүрүксә, бир нөв,  Јеһованын бизимлә бағлы гәрарында јанылдығыны демиш олуруг. Биз исә буну етмәк истәмәздик.

15. а) «Ҝөзәтчи гүлләси»ндә һансы мәсләһәт верилирди? б) 24-ҹү сәһифәдәки шәкилләрә әсасән, фикримизи өзүмүзә ҹәмләсәк, һансы немәтләри итирәрик?

¹⁵ Тәхминән 15 ил бундан өнҹә «Ҝөзәтчи гүлләси»ндә өзүмүзә дүзҝүн гијмәт вермәклә бағлы нөвбәти мәсләһәт верилмишди: «Әлбәттә, биз өзүмүз һаггында бөјүк фикирдә олмамалыјыг. Ејни заманда ифрата гапылыб өзүмүзү һеч бир шејә јарамајан һесаб етмәк дә дүзҝүн олмазды. Әксинә, мәгсәдимиз өзүмүз һаггында сағлам нөгтеји-нәзәрә малик олмаг, јәни һәм ҝүҹлү, һәм дә зәиф ҹәһәтләримизи нәзәрә алмагдыр. Бир мәсиһи гадын белә дејир: “Мән пис инсан дејиләм, амма мәләк дә дејиләм. Һамыда олдуғу кими, мәним дә һәм јахшы, һәм дә пис ҹәһәтләрим вар”» *. Ҝөрдүјүмүз кими, өзүмүзә дүзҝүн гијмәт вермәк бизим хејримизәдир.

16. Нәјә ҝөрә Јеһова бизә һикмәтли мәсләһәтләр верир?

¹⁶ Јеһова Кәламы васитәсилә бизә һикмәтли мәсләһәтләр верир. О бизи севир, истәјир ки, хошбәхт олаг (Әшј. 48:17, 18). Ән һикмәтли вә ән чох хошбәхтлик ҝәтирән гәрар Јеһованын гәлбини севиндирән ишләр ҝөрмәкдир. Онда биз бүтүн диггәти пула, ишә вә өзүнә ҹәмләјән инсанларын јашадығы проблемләрдән узаг олаҹағыг. Одур ки, ҝәлин һәр биримиз һикмәтли олаг вә Јеһованын көнлүнү шад едәк! (Мәс. 23:15).