СИНОПТИК радар васитәсилә ҝөрүр ки, дәһшәтли туфан сүрәтлә јахынлашыр. Инсанларын тәһлүкәсизлијинә ҝөрә нараһат олдуғу үчүн онлары јубанмадан хәбәрдар едир.

Буна бәнзәр тәрздә Јеһова бүтүн бәшәријјәти һава прогнозунда ешидә биләҹәкләриндән даһа дәһшәтли бир «туфан» барәдә хәбәрдар едир. О, бу хәбәрдарлығы неҹә верир? Нәјә ҝөрә әмин ола биләрик ки, Јеһова бу хәбәрә һај верә билмәләри үчүн инсанлара кифајәт гәдәр вахт вериб? Бу суаллара ҹаваб вермәздән өнҹә, ҝәлин Јеһованын кечмишдә етдији хәбәрдарлыглара нәзәр салаг.

Кечмишдә Јеһова Онун әмрләринә билә-билә итаәт етмәјәнләрин үзәринә «туфан» ҝөндәрәҹәји, башга сөзлә, онлара һөкм чыхараҹағы барәдә хәбәрдарлыглар едирди (Мәс. 10:25; Әрм. 30:23). Һәр дәфәсиндә буну хејли габаг дејирди вә ирадәсинә ујғун дәјишикликләр етмәли олдугларыны билдирирди (2 Пад. 17:12—15; Нәһ. 9:29, 30). Инсанларын хәбәрдарлыға һај вермәси үчүн Јеһова адәтән јер үзүндәки садиг хидмәтчиләриндән истифадә едирди. Хидмәтчиләри Јеһованын һөкмләрини инсанлара чатдырыр вә тәҹили тәдбир ҝөрмәли олдугларыны баша салырдылар (Амс. 3:7).

Јеһованын бу ҹүр сәдагәтли хидмәтчиләриндән бири Нуһ пејғәмбәр иди. О, узун илләр әрзиндә өз дөврүнүн әхлагсыз вә зоракы инсанларыны Дашгын барәдә хәбәрдар етмишди (Јар. 6:9—13, 17). Һәмчинин Дашгындан хилас олмаг үчүн нә етмәли олдугларыны да демишди. Пејғәмбәр о гәдәр тәблиғ етмишди ки, Јеһова сонралар ону «салеһлик ҹарчысы» адландырмышды (2 Бут. 2:5).

Нуһун ҹәһдләринә бахмајараг, инсанлар Аллаһын хәбәрдарлығына мәһәл гојмады. Онларда зәррә гәдәр дә олсун, иман јох иди. Нәтиҹәдә, Дашгын ҝәлиб онларын һамысыны апаранда тәләф олдулар (Мәт. 24:39; Ибр. 11:7). Онлар өлүмлә үз-үзә галанда «Аллаһ мәни хәбәрдар етмәјиб» дејә билмәздиләр.

Елә вахтлар да олуб ки, Јеһова инсанлары һөкм «туфаны» башламаздан гыса мүддәт өнҹә хәбәрдар едиб. Һәтта белә һалларда да онларын дүзәлмәләри үчүн кифајәт гәдәр вахты вар иди. Мәсәлән, О, гәдимдә мисирлиләрин үзәринә Он бәла ҝөндәрәндә габагҹадан хәбәрдарлыг вермишди. Ҝөтүрәк једдинҹи бәланы. Јеһова Муса пејғәмбәрлә Һаруну фирон вә хидмәтчиләринин јанына ҝөндәрәрәк ҝүҹлү долунун јағаҹағы барәдә хәбәрдар етмишди. Долу сәһәриси ҝүн јағаҹагды. Бәс онларын сығынаҹаг тапмаг үчүн јетәринҹә вахтлары вар иди? Мүгәддәс Китабда јазылыб: «Фиронун хидмәтчиләри арасында Јеһованын сөзүндән горхуја дүшәнләр тез өз гулларыны вә һејванларыны ичәри салды. Лакин Јеһованын сөзүнү саја салмајанлар гулларыны вә һејванларыны бајырда гојдулар» (Чых. 9:18—21). Бәли, Јеһова кифајәт гәдәр өнҹәдән хәбәр вермишди, белә ки, хәбәрдарлыға һај верәнләр ҹәлд тәрпәниб бәладан гуртула билдиләр.

Фирон вә хидмәтчиләри онунҹу бәладан өнҹә дә хәбәрдарлыг алмышды. Лакин онлар хәбәрдарлығы ахмагҹасына рәдд етдиләр (Чых. 4:22, 23). Нәтиҹәдә, илк доғулмуш өвладларынын өлүмүнә шаһид олдулар. Неҹә дә ағыр фаҹиә иди! (Чых. 11:4—10; 12:29). Онлар вахтында һај верә биләрдиләр? Әлбәттә! Муса исраиллиләри онунҹу бәла барәдә дәрһал хәбәрдар етмишди вә аиләләрини неҹә горуја биләҹәкләринә даир ҝөстәришләр вермишди (Чых. 12:21—28). Бу ҝөстәришләрә нә гәдәр адам  әмәл етди? Бәзи һесабламалара әсасән, үч милјон адам — исраиллиләр, һәмчинин гејри-исраиллиләрдән вә мисирлиләрдән ибарәт издиһам Аллаһын һөкмүндән хилас олуб Мисири тәрк етди (Чых. 12:38, һаш.).

Бу нүмунәләрдән ҝөрдүјүмүз кими, Јеһова хәбәрдарлыға һај вермәләри үчүн инсанлара һәмишә кифајәт гәдәр вахт вериб (Ган. 32:4). Нәјә ҝөрә? Һәвари Бутрус гејд етмишди ки, Јеһова «һеч кәсин мәһв олмасыны истәмир, әксинә, истәјир ки, һамы төвбәјә ҝәлсин» (2 Бут. 3:9). Бәли, Јеһова буну инсанларын рифаһыны дүшүндүјү үчүн едиб. О истәјирди ки, һөкмүнү иҹра етмәздән өнҹә инсанлар төвбә едиб лазыми дәјишикликләр етсин (Әшј. 48:17, 18; Ром. 2:4).

Бу ҝүн дә бүтүн дүнјада бәјан олунан мүһүм хәбәрдарлыға һамы һај вермәлидир. Иса Мәсиһ јер үзүндә оланда индики системин «бөјүк мүсибәт» заманы мәһв олаҹағыны сөјләмишди (Мәт. 24:21). Пејғәмбәрликдә һәмин вахт јахынлашдыгҹа давамчыларынын шаһид олаҹаглары вә башларына ҝәләҹәк һадисәләри әтрафлы вурғуламышды. Бунунла Иса бүтүн дүнјада баш верәҹәк мүһүм һадисәләрин иҹмалыны вермишди. Бу ҝүн өзүмүз онларын шаһиди олуруг (Мәт. 24:3—12; Лука 21:10—13).

Бу пејғәмбәрлијә ујғун олараг, Јеһова бу ҝүн һәр кәси рәһбәрлијинә табе олмаға тәшвиг едир. О истәјир ки, итаәткар инсанлар һәм инди јахшы һәјат сүрсүнләр, һәм дә ҝәләҹәкдә салеһлијин һөкм сүрәҹәји јени дүнјада немәтләр алсынлар (2 Бут. 3:13). Бу вәдләрә иман етмәләри үчүн Јеһова инсанлара һәјатларыны хилас едәҹәк хәбәр — Падшаһлыг һаггында мүждә вериб. Бу мүждә, Иса Мәсиһин дә өнҹәдән дедији кими, «халгларын һамысына шәһадәт олсун дејә, бүтүн јер үзүндә» тәблиғ едилир (Мәт. 24:14). Јеһованын низамла тәшкил етдији хидмәтчиләри һал-һазырда тәхминән 240 өлкәдә бу илаһи хәбәрә шәһадәт верир. О, мүмкүн гәдәр чох инсанын Онун хәбәрдарлығына һај вериб јахынлашан адил һөкмүнүн «туфанындан» гуртулмасыны истәјир (Сәф. 1:14, 15; 2:2, 3).

Демәли, әсас мәсәлә Јеһованын хәбәрдарлығы кифајәт гәдәр өнҹәдән вериб-вермәмәси дејил. Фактлар ҝөстәрир ки, О, дәјишмәләри үчүн инсанлара һәмишә кифајәт гәдәр вахт вериб. Әсас, инсанларын һәлә ки вахт вар, Аллаһын хәбәрдарлығына гулаг асыб-асмајаҹағыдыр. Одур ки, ҝәлин Аллаһын елчиләри олан бизләр мүмкүн гәдәр чох инсана бу дүнјанын сонундан хилас олмаға көмәк едәк.