1. Нәјә ҝөрә хошбәхтлијимиз Аллаһа еһтијаҹымызын олдуғуну дәрк етмәјимиздән асылыдыр?

 ӘСЛ хошбәхтлик ани олараг дујулан вә өтүб-кечән хош һиссләр дејил. Бу, инсанын өмүрбоју дуја биләҹәји бир һиссдир. Бу неҹә мүмкүндүр? Иса Мәсиһ Дағүстү вәзиндә демишди: «Аллаһа еһтијаҹы олдуғуну дәрк едәнләр хошбәхтдир» (Мәт. 5:3). Аллаһ инсанлары јарадаркән онларын дахилинә Ону танымаг вә Она ибадәт етмәк истәјини гојуб. Иса Мәсиһ буну билдији үчүн инсанларын «Аллаһа еһтијаҹы» олдуғуну демишди. Билдијимиз кими, Јеһова «хошбәхт Аллаһ»дыр, Она ибадәт едәнләр дә хошбәхт ола биләр (1 Тим. 1:11).

2, 3. а) Иса Мәсиһин сөзләринә әсасән, башга кимләр хошбәхт ола биләр? б) Бу мәгаләдә нәји арашдыраҹағыг вә нәјә ҝөрә бунлары билмәјимиз лазымдыр?

² Хошбәхт олмаг үчүн һәјатымызда һәр шеј јағ кими ҝетмәлидир? Хејр. Исанын Дағүстү вәзиндә дедикләри сизи тәәҹҹүбләндирә биләр. О демишди ки, «дәрд чәкәнләр... хошбәхтдир». Дәрд чәкәнләр ҝүнаһларына ҝөрә пәришан олан вә ја һәјатда ҹидди проблемләмләрлә үзләшән кәсләр ола биләр. Иса «салеһлик јолунда тәгиб олунанлар», һәмчинин онун шаҝирди олдуғу үчүн «тәһгир» олунанлар барәдә дә ејни шеји демишди (Мәт. 5:4, 10, 11). Ҝөрәсән, белә вәзијјәтләрдә инсанын хошбәхт олмасы неҹә мүмкүндүр?

³ Иса өјрәдирди ки, инсанын хошбәхтлији һәјатында һәр шејин мүкәммәл олмасындан јох, Аллаһы танымасындан вә Она ибадәт етмәсиндән асылыдыр (Јаг. 4:8). Бәс бунун үчүн нә етмәлијик? Бу мәгаләдә әсл хошбәхтлијә апаран үч аддымдан данышаҹағыг.

4. Хошбәхтлијә апаран илк аддым һансыдыр? (Зәбур 1:1—3).

⁴ АДДЫМ 1. Әсл хошбәхтлијә саһиб олмаг үчүн руһани ҹәһәтдән гидаланмалыјыг. Һәм инсанларын, һәм дә һејванларын јашамаг үчүн јемәјә еһтијаҹы вар. Амма јалныз инсан руһани ҹәһәтдән гидалана биләр вә онун буна тәләбаты вар. Буна ҝөрә дә Иса демишди: «Инсан јалныз чөрәклә јашамамалыдыр, Јеһованын ағзындан чыхан һәр бир кәлмә илә јашамалыдыр» (Мәт. 4:4). Буна ҝөрә дә Аллаһын дәјәрли Кәламы олан Мүгәддәс Китабы охумадан кечән бир ҝүнүмүз белә олмамалыдыр. Бир мәзмурчу јазмышды: «Хошбәхтдир о кәс ки,.. Јеһованын ганунундан һәзз алыр, ҝеҹә-ҝүндүз Онун ганунунун дәринлијинә варыр». (Зәбур 1:1—3 ајәләрини охујун.)

5, 6. а) Мүгәддәс Китабдан нәләр өјрәнирик? б) Мүгәддәс Китабы охумаг бизә неҹә көмәк едә биләр?

⁵ Мәһәббәтли Аллаһымыз Јеһова Мүгәддәс Китаб васитәсилә бизә хошбәхт олмағын јолуну ачыглајыр. Орада Јеһованын бизимлә бағлы нијјәти јазылыб. Бу китабдан өјрәнирик ки, Јеһоваја неҹә јахынлаша биләрик, ҝүнаһларымызын бағышланмасы үчүн нә едә биләрик. Һәмчинин Кәламдан Јеһованын ҝәләҹәјә даир вердији мөһтәшәм үмид барәдә өјрәнирик (Әрм. 29:11). Мүгәддәс Китабы мүталиә едәркән өјрәндијимиз бу һәгигәтләр гәлбимизи севинҹлә долдурур!

⁶ Һәмчинин билирик ки, Мүгәддәс Китабда ҝүндәлик һәјатымызла бағлы практики мәсләһәтләр вар. Бу мәсләһәтләрә әмәл едәндә хошбәхт олуруг. Буна ҝөрә дә  һәјатда сизи мәјус едән чәтинликләрлә үзләшәндә Јеһованын Кәламыны охујуб үзәриндә дүшүнмәк үчүн даһа чох вахт ајырын. Иса Мәсиһ демишди: «Аллаһын сөзүнү ешидиб она әмәл едәнләр хошбәхтдирләр!» (Лука 11:28).

7. Мүгәддәс Китабы охумаға ајырдығыныз вахтын сизә там фајда ҝәтирмәси үчүн нә едә биләрсиниз?

⁷ Мүгәддәс Китабы охујаркән ондан ләззәт алмаг үчүн вахт ајырмаг лазымдыр. Мисал үчүн, тәсәввүр един ки, кимсә сизә ән севдијиниз јемәји бишириб. Амма сиз ја тәләсдијиниздән, ја да фикирли олдуғунуздан јемәјин дадыны дујмадан лоғмалары удурсунуз. Бир дә ајылырсыныз ки, јемәк артыг гуртарыб. Һејифсиләнирсиниз ки, ону јаваш-јаваш јемәдиниз, һәр лоғманын дадындан ләззәт алмадыныз. Ҝәлин бу нүмунәни Мүгәддәс Китабын мүталиәсинә тәтбиг едәк. Елә олуб ки, тез-тәләсик охудуғунуз үчүн орада јазыланларын «дадыны дујмамысыныз»? Аллаһын Кәламыны охумагдан һәзз алмаг үчүн вахт ајырын: орадакы сәһнәләри тәсәввүрүнүздә ҹанландырын, сәсләри дујмаға чалышын вә охудугларынызын үзәриндә дүшүнүн. Онда бүтүн бу просес сизин хошбәхтлијинизә хошбәхтлик гатаҹаг.

8. «Садиг вә ағыллы нөкәр» она тапшырылан ишин өһдәсиндән неҹә ҝәлир? (Һәмчинин һашијәјә бахын.)

⁸ Иса Мәсиһ бизә вахтлы-вахтында руһани гида вермәси үчүн «садиг вә ағыллы нөкәр» тәјин едиб * (Мәт. 24:45). Һәгигәтән дә, биз руһани ҹәһәтдән бол гида илә тәмин олунмушуг! Садиг вә ағыллы нөкәрин һазырладығы һәр бир руһани гиданын әсас ингредијенти Мүгәддәс Китабдыр (1 Салон. 2:13). Буна ҝөрә дә руһани гида бизә көмәк едир ки, Јеһованын Мүгәддәс Китабда әкс олунан дүшүнҹәсини дәрк едәк. Бу сәбәбдән биз «Ҝөзәтчи гүлләси», «Ојанын!» журналларыны вә jw.org сајтында олан мәгаләләри охујуруг, һәфтәичи вә һәфтәсону ҝөрүшләрә һазырлашырыг. Һәмчинин JW телевизијасынын ајлыг програмына бахырыг. Әҝәр бу бол руһани гиданы гәбул етсәк, хошбәхтлијә апаран икинҹи аддымы ата биләҹәјик.

9. Әсл хошбәхтлијә апаран икинҹи аддым һансыдыр?

⁹ АДДЫМ 2. Әсл хошбәхтлијә саһиб олмаг үчүн Јеһованын гајда-ганунларына ујғун јашамалыјыг. Мәзмурчу јазмышды: «Нә хошбәхтдир Јеһовадан горхан, Онун јоллары илә јеријән инсан!» (Зәб. 128:1). Јеһовадан горхмаг о демәкдир ки, биз Она бөјүк еһтирам һисси бәсләјирик вә буна ҝөрә дә Ону наразы салаҹаг һәрәкәтләрдән узаг дурмаға чалышырыг (Мәс. 16:6). Мүгәддәс Китабда Јеһованын нәјин доғру, нәјин јанлыш олдуғу илә бағлы гојдуғу ганунлар јазылыб вә биз бу ганунлара ујғун јашамаг үчүн әлимиздән ҝәләни едирик (2 Кор. 7:1). Әҝәр биз Јеһованын севдији ишләри ҝөрсәк вә нифрәт етдији әмәлләрдән узаг олсаг, хошбәхт олаҹағыг (Зәб. 37:27; 97:10; Ром. 12:9).

10. Аллаһын ирадәсини билмәклә јанашы, биздән нә ҝөзләнилир? (Ромалылара 12:2).

¹⁰ Ромалылара 12:2 ајәсини охујун. Ола билсин, инсан Јеһованын нәјин доғру, нәјин јанлыш олдуғуна даир гајдалар гојмаға һаггы чатдығыны билир. Амма буну билмәк кифајәт дејил. Инсанда бу гајдалара әмәл етмәк истәји олмалыдыр. Мәсәлән, инсан дөвләтин јолда максимум сүрәт һәддини мүәјјән етмәјә  һаггы чатдығыны билә биләр. Бәс о өзү бу гајдалара риајәт етмәк истәјир? Әсас мәсәлә будур, әкс һалда, о, сүрәт һәддини ашаҹаг. Јеһованын ганунларынын хејримизә олдуғуна һәгигәтән инандығымыз әмәлләримиздән ҝөрүнүр (Мәс. 12:28). Давуд пејғәмбәр буна әмин иди. Елә буна ҝөрә дә белә демишди: «Мәнә һәјат јолуну өјрәдирсән, һүзурунда севинҹ, шадлыг ашыб-дашыр, сағында олмаг мәнә әбәди сәадәт ҝәтирир» (Зәб. 16:11).

11, 12. а) Нараһатлыг кечирәндә вә ја мәјус олдуғумуз вахтларда нәдә еһтијатлы олмалыјыг? б) Филиппилиләрә 4:8 ајәсиндәки сөзләр әјләнҹә сечиминдә бизә неҹә көмәк едә биләр?

¹¹ Бәзән нараһатлыг кечирәндә вә нәсә бизи мәјус едәндә башымызы нә иләсә гатмаг истәјирик. Бу, баша дүшүләндир, амма бу заман еһтијаты әлдән вермәмәлијик, Јеһованын нифрәт етдији әмәлләрдән узаг олмалыјыг (Ефес. 5:10—12, 15—17).

¹² Һәвари Булус филиппилиләрә мәктубунда мәсиһиләри тәшвиг едирди ки, онлар салеһ, пак, севилмәли вә нәҹиб нә варса, онлар һагда дүшүнсүнләр. (Филиппилиләрә 4:8 ајәсини охујун.) Дүздүр, Булус бурада конкрет олараг әјләнҹә һагда данышмырды, амма онун дедикләрини әјләнҹә сечимимизә тәтбиг едә биләрик. Мәсәлән, дүшүнүн: гулаг асдығыныз мусиги, бахдығыныз филм, охудуғунуз китаб вә ја ојнадығыныз видеоојун Булусун дедикләринә ујғун ҝәлир? Беләҹә, биләҹәксиниз, нәләр Јеһованын хошуна ҝәлир, нәләр јох. Биз истәјирик ки, һәјатымыз Јеһованын јүксәк әхлаг нормаларына ујғун ҝәлсин (Зәб. 119:1—3). Бунун сајәсиндә виҹданымыз раһат олаҹаг вә әсл хошбәхтлијә апаран үчүнҹү аддымы ата биләҹәјик (Һәв. 23:1).

13. Әсл хошбәхтлијә апаран үчүнҹү аддым һансыдыр? (Јәһја 4:23, 24).

¹³ АДДЫМ 3. Јеһоваја ибадәти һәјатынызда һәр шејдән үстүн тутун. Јеһова Јараданымыз олдуғу үчүн Она ибадәт етмәлијик (Вәһј 4:11; 14:6, 7). Јеһоваја ибадәт һәјатымызда һәр шејдән үстүн олмалыдыр; Она мәгбул ибадәт «руһа вә һәгигәтә ујғун ибадәт»дир. (Јәһја 4:23, 24 ајәләрини охујун.) Бу, о демәкдир ки, ибадәтимизи мүгәддәс руһ јөнәлтмәлидир вә ибадәтимиз Аллаһын Кәламындакы һәгигәтләрә ујғун олмалыдыр. Һәтта биз ибадәтимизә мәһдудијјәт вә ја гадаға гојулан әразидә јашасаг да, бизим үчүн Јеһоваја ибадәт һәр шејдән өндә ҝәлмәлидир. Һал-һазырда 100-дән чох баҹы-гардашымыз һәбсдәдир, сәбәб исә онларын садәҹә олараг Јеһованын Шаһиди олмасыдыр *. Буна бахмајараг, онлар хошбәхтдирләр, чүнки дуа етмәк, мүталиә етмәк вә инсанлара Аллаһ вә Онун Падшаһлығы һагда данышмаг үчүн әлләриндән ҝәләни едирләр. Биз тәгиб вә тәһгир олунанда хошбәхт ола биләрик, чүнки билирик ки, Јеһова бизә дајаг олаҹаг вә бизи мүкафатсыз гојмајаҹаг (Јаг. 1:12; 1 Бут. 4:14).

14. Таҹикистандан олан бир ҝәнҹ гардашын башына нәләр ҝәлмишди вә сәбәб нә иди?

¹⁴ Арашдырдығымыз үч аддым, һәгигәтән дә, хошбәхтлијә апарыр. Чәтин вәзијјәтләрлә үзләшмиш баҹы-гардашларын һадисәси буну сүбут едир. Ҝәлин Таҹикистандан олан Ҹовидон Бобоҹонов гардашын 19 јашы оланда башына ҝәләнләрдән  данышаг. О, һәрби хидмәтдән имтина етмишди. 2019-ҹу ил октјабрын 4-ү ону евиндән зорла апарыб, ајларла һәбсдә сахладылар вә онунла ҹинајәткар кими даврандылар. Ҹовидону дөјүрдүләр, мәҹбур едирдиләр ки, һәрби анд ичсин вә һәрби форма ҝејинсин. Гардашын үзләшдији бу һагсызлыг бејнәлхалг иҹтимаијјәтин нәзәринә чатдырылды. О, һәбсә мәһкум едилди вә әмәк дүшәрҝәсинә ҝөндәрилди. Ҹовидон өлкәнин президентинин әфв фәрманына әсасән азадлыға бурахылана гәдәр орада галмышды. Бүтүн бу вахт әрзиндә о, сәдагәтини горумушду вә хошбәхт иди. Чүнки о, Аллаһа еһтијаҹы олдуғуну дәрк едирди.

15. Һәбсдә олдуғу мүддәтдә Ҹовидон руһани ҹәһәтдән неҹә гидаланырды?

¹⁵ Һәбсдә оланда Ҹовидонун әлиндә Мүгәддәс Китаб вә нәшрләримиз олмаса да, о, руһани ҹәһәтдән гидаланырды. Бу неҹә мүмкүн иди? Баҹы-гардашлар она әрзаг ҝәтирәндә әрзағы ҝәтирдикләри пакетләрин үзәринә һәмин ҝүнүн ајәсини јазырдылар. Беләҹә, о, һәр ҝүн Мүгәддәс Китабы мүталиә едирди. Һәбсдән чыхандан сонра онун баҹы-гардашлара белә бир төвсијәси олмушду: «Һәјатларында ҹидди сынаглары олмајанлар азадлыгларындан максимум истифадә етмәли вә Мүгәддәс Китабы вә нәшрләримизи охумагла  Јеһова һаггында биликләрини артырмалыдырлар».

16. Ҹовидон фикрини нәјә ҹәмләмишди?

¹⁶ Ҹовидон гардашымыз Јеһованын гајда-ганунларына ујғун јашајырды. О, јанлыш һиссләрә гапылмырды, јанлыш һәрәкәтләрә јол вермирди. Әксинә, диггәтини Јеһоваја вә Онун дәјәр вердији шејләрә ҹәмләјирди. Ҹовидону Јеһованын јаратдыглары һејран едирди. О, сәһәрләр ҝөзләрини гушларын ҹиккилтиси илә ачырды, ҝеҹәләр исә ајы вә улдузлары сејр едирди. Ҹовидон дејир: «Јеһованын бу әнамлары мәнә севинҹ верир вә руһландырырды». Јеһованын вердији һәм руһани, һәм дә физики немәтләрә ҝөрә миннәтдар оланда үрәјимиз севинҹлә долур вә бу севинҹ бизә дөзмәјә ҝүҹ верир.

17. Ҹовидонун вәзијјәтинә бәнзәр вәзијјәтлә үзләшәндә дөзүм ҝөстәрмәјимизин һансы бәһрәси олаҹаг? (1 Бутрус 1:6, 7).

¹⁷ Ҹовидон һәмчинин Јеһоваја ибадәти һәјатда һәр шејдән үстүн тутурду. О, Јеһоваја сәдагәтини горумағын ваҹиблијини баша дүшүрдү. Иса Мәсиһ демишди: «Аллаһын Јеһоваја сәҹдә гыл вә јалныз Она гуллуг ет» (Лука 4:8). Командирләр вә әсҝәрләр истәјирди ки, о өз дининдән дөнсүн. Амма Ҹовидон ҝеҹә-ҝүндүз Јеһоваја һәрарәтлә дуа едиб јалварырды ки, тәслим олмамаға вә иманда садиг галмаға она көмәк етсин. О, үзләшдији һагсыз рәфтара бахмајараг, сәдагәтини горуду. Бунун сајәсиндә Ҹовидон она севинҹ ҝәтирән дәјәрли бир шејә саһибдир. Евиндән зорла чыхарылмаздан, дөјүлмәздән вә һәбс олунмаздан өнҹә онда бу шеј јох иди: бу, онун сынанмыш иманыдыр. (1 Бутрус 1:6, 7 ајәләрини охујун.)

18. Хошбәхтлијимизи неҹә горуја биләрик?

¹⁸ Јеһова һәгигәтән хошбәхт олмағымыз үчүн бизә нә лазым олдуғуну билир. Әҝәр сиз хошбәхтлијә апаран бу үч аддымы атсаныз, үзләшдијиниз чәтинликләрә бахмајараг, хошбәхт олаҹагсыныз. Онда сиз дә нөвбәти сөзләри дејә биләҹәксиниз: «Аллаһы Јеһова олан халг нә бәхтијардыр!» (Зәб. 144:15).