1. Исанын бизә вердији һәдијјәләрдән бәзиләри һансылардыр?

 ДҮНЈАДА Иса Мәсиһ гәдәр сәхавәтли инсан олмајыб. О, јер үзүндә оланда инсанлара көмәк етмәк үчүн тез-тез мөҹүзәләр ҝөстәрирди (Лука 9:12—17). Иса бизә тајы-бәрабәри олмајан бир һәдијјә бәхш етди: биздән өтрү өз һәјатыны гурбан верди (Јәһ. 15:13). Дириләндән сонра да Иса сәхавәт ҝөстәрмәјә давам етди. О, сөзүнүн үстүндә дурараг Јеһовадан давамчыларына мүгәддәс руһ вермәсини диләди. Бу руһун көмәји илә тәлим вә тәсәлли алырыг (Јәһ. 14:16, 17, һашијә; 16:13). Һәмчинин бүтүн дүнјада шаҝирд һазырламағымыз үчүн Иса ибадәт ҝөрүшләри васитәсилә бизи лазым олан һәр шејлә тәмин едир (Мәт. 28:18—20).

2. Ефеслиләрә 4:7, 8 ајәләриндәки «инсан тимсалында һәдијјәләр»ә кимләр дахилдир?

² Исанын бизә вердији даһа бир һәдијјә вар. Булус јазмышды ки, Иса ҝөјә галхандан сонра «инсан тимсалында һәдијјәләр» верди. (Ефеслиләрә 4:7, 8 ајәләрини охујун.) Булусун сөзләринә әсасән Иса бу һәдијјәләри јығынҹаға мүхтәлиф саһәләрдә дәстәк олмалары үчүн вермишди (Ефес. 1:22, 23; 4:11—13). Бизим дөврүмүздә инсан тимсалында һәдијјәләрә јығынҹаг хидмәтчиләри, ағсаггаллар вә рајон нәзарәтчиләри дахилдир a. Әлбәттә, бу гардашлар гејри-камилдир, она ҝөрә дә сәһвләр едирләр (Јаг. 3:2). Амма Ағамыз Иса Мәсиһ бизә онлар васитәсилә көмәк едир. Онлар Исанын бизә һәдијјәләридир.

3. «Инсан тимсалында һәдијјәләр» олан гардашларын ҝөрдүјү ишләрә неҹә дәстәк ола биләрик? Нүмунә чәкин.

³ Иса «инсан тимсалында һәдијјәләр»и јығынҹағы мөһкәмләндирмәләри үчүн тәјин едиб (Ефес. 4:12). Һәр биримиз бу ваҹиб ишдә онлара көмәк едә биләрик. Буну ибадәт евинин иншасына  бәнзәтмәк олар. Һәмин вахт бәзиләри тикинти ишләри илә мәшғул олур, диҝәрләри исә онлара бу ишдә дәстәк олур. Мәсәлән, јемәклә тәмин едир, дашынма илә мәшғул олур вә диҝәр ишләри ҝөрүр. Ејнилә биз дә сөзләримизлә вә әмәлләримизлә јығынҹаг хидмәтчиләринә, ағсаггаллара вә рајон нәзарәтчиләринә јығынҹағы мөһкәмләндирмәкдә дәстәк ола биләрик. Ҝәлин ҝөрәк онлар биздән өтрү нә гәдәр зәһмәт чәкир вә биз һәм онлара, һәм дә онлары бизә һәдијјә верән Иса Мәсиһә миннәтдарлығымызы неҹә ҝөстәрә биләрик.

ЈЫҒЫНҸАГ ХИДМӘТЧИЛӘРИНИН ҜӨРДҮЈҮ «ЈАРДЫМ ИШЛӘРИ»

4. Биринҹи әсрдә јығынҹаг хидмәтчиләри һансы «јардым ишләри» илә мәшғул олурдулар?

⁴ Биринҹи әсрдә бәзи гардашлар јығынҹаг хидмәтчиси кими тәјин олунурду (1 Тим. 3:8). Ҝөрүнүр, 1 Коринфлиләрә 12:28 ајәсиндә Булус «јардым ишләри илә мәшғул оланлар» дејәндә онлары нәзәрдә тутурду. Ајдындыр ки, јығынҹаг хидмәтчиләри зәрури ишләри ҝөрдүкләри үчүн ағсаггаллар диггәтләрини тәлим вермәјә, јығынҹағы руһландырмаға ҹәмләјә билирдиләр. Мәсәлән, јығынҹаг хидмәтчиләри, ола билсин, Мүгәддәс Јазыларын көчүрүлмәсинә көмәк едирдиләр, јахуд да бу иш үчүн лазым олан материаллары алыб ҝәтирирдиләр.

5. Бу ҝүн јығынҹаг хидмәтчиләри һансы јардым ишләрини ҝөрүрләр?

⁵ Инди исә сизин јығынҹағыныздакы јығынҹаг хидмәтчиләринин ҝөрдүјү бәзи јардым ишләриндән данышаг (1 Бут. 4:10). Мәсәлән, онлар јығынҹағын малијјә вә ја саһә ишләринә бахырлар, тәблиғчиләр үчүн нәшрләр сифариш верирләр, аудио-видео аваданлыға нәзарәт едирләр, ҝөрүш вахты хидмәтчи тәјин олунурлар, јахуд ибадәт евинин гуллуғуна көмәк едирләр. Бүтүн бу ишләр јығынҹағын низамла фәалијјәт ҝөстәрмәсиндә ваҹиб рол ојнајыр (1 Кор. 14:40). Бунлардан әлавә, бәзи јығынҹаг хидмәтчиләри ачыг нитгләр сөјләјирләр вә Мәсиһи һәјаты вә ибадәти ҝөрүшүндә бәндләрлә чыхыш едирләр. Һәмчинин јығынҹаг хидмәтчиси груп нәзарәтчисинин көмәкчиси кими тәјин олуна биләр. Һәрдән сәриштәли јығынҹаг хидмәтчиләри ағсаггалларла бирликдә баҹы-гардашлары зијарәт едирләр.

6. Јығынҹаг хидмәтчиләринә миннәтдар олмаг үчүн һансы сәбәбләримиз вар?

⁶ Јығынҹаг хидмәтчиләринин ҝөрдүјү ишләрин јығынҹаға һансы хејри олур? Боливијада јашајан Беберли b баҹы бөлүшүр: «Сағ олсун јығынҹаг хидмәтчиләримиз, онларын сајәсиндә ҝөрүшләрдән бөјүк зөвг ала билирәм». О, сөзүнә белә давам едир: «Онларын әмәји сајәсиндә јығынҹагда нәғмә охујурам, шәрһләр верирәм, нитгләрә гулаг асырам, видео вә шәкилләрә бахыб өјрәнә билирәм. Онлар јығынҹағын тәһлүкәсизлијинә нәзарәт едир вә ибадәт евинә ҝәлә билмәјәнләрин ҝөрүшү видеоконфранс васитәсилә изләмәсинә көмәк едир. Бу гардашлар ҝөрүш битәндән сонра тәмизлик, малијјә ишләринә бахырлар, бизи нәшрсиз гојмурлар. Онлара үрәкдән миннәтдарам!» Колумбијада јашајан вә јолдашы ағсаггал кими хидмәт едән Лесли баҹы дејир: «Јығынҹаг хидмәтчиләри әримин сағ әлидир. Онларын көмәји олмасајды, јолдашымын иши башындан ашарды. Бу ҹүр шөвглә хидмәт етдикләринә вә көмәк етмәјә һазыр олдугларына ҝөрә онлара миннәтдарам». Шүбһәсиз, бу сөзләрә сиз дә шәриксиниз (1 Тим. 3:13).

7. Јығынҹаг хидмәтчиләринә миннәтдарлығымызы неҹә ҝөстәрә биләрик? (Һәмчинин шәклә бахын.)

⁷ Ола билсин, јығынҹаг хидмәтчиләринә ҝөрә үрәјимиздә миннәтдарлыг дујуруг. Мүгәддәс Китаб бизи тәшвиг едир ки, буну онлара һәм дә ҝөстәрәк (Кол. 3:15). Финландијада ағсаггал кими хидмәт едән Кшиштоф гардаш јығынҹаг хидмәтчиләринә миннәтдарлығыны бу ҹүр билдирир: «Мән ачыгҹа вә ја месаж ҝөндәрирәм. Ора ајә јазырам вә  һансыса сөзүнүн вә ја һәрәкәтинин мәни руһландырдығыны гејд едирәм, јахуд да ҝөрдүјү иши нә үчүн гијмәтләндирдијими билдирирәм». Јени Каледонијада јашајан Паскал вә Жаел јығынҹаг хидмәтчиләри үчүн тез-тез дуа едир. Паскал дејир: «Бу јахынларда јығынҹаг хидмәтчиләримизә ҝөрә һәрарәтли дуалар етмишик. Бу гардашлара ҝөрә Јеһоваја миннәтдарлығымызы билдирмишик вә онлара көмәк етмәси үчүн јалвармышыг». Јеһова бу ҹүр дуалары ешидир вә бунун бәһрәсини бүтүн јығынҹаг ҝөрүр (2 Кор. 1:11).

«АРАНЫЗДА ЗӘҺМӘТ ЧӘКӘН» АҒСАГГАЛЛАР

8. Нәјә ҝөрә Булус биринҹи әсрдәки ағсаггалларын зәһмәт чәкдијини демишди? (1 Салоникилиләрә 5:12, 13).

⁸ Биринҹи әсрдә ағсаггаллар јығынҹағын рифаһы үчүн чох зәһмәт чәкирдиләр. (1 Салоникилиләрә 5:12, 13 ајәләрини охујун; 1 Тим. 5:17.) Онлар јығынҹаға «рәһбәрлик» едирдиләр, јәни ҝөрүшләр кечирир вә ағсаггаллар шурасы олараг гәрарлар гәбул едирдиләр. Һәмчинин онлар баҹы-гардашлара иманда мөһкәм галмалары үчүн «нәсиһәт» верирдиләр (1 Салон. 2:11, 12; 2 Тим. 4:2). Сөзсүз, бу гардашлар аиләләрини доландырмаг үчүн ишләјирдиләр. Бундан башга, өз руһани тәләбатларынын да гејдинә галырдылар (1 Тим. 3:2, 4; Тит. 1:6—9).

9. Бу ҝүн ағсаггалларын өһдәсинә һансы мәсулијјәтләр дүшүр?

⁹ Бу ҝүн дә ағсаггаллар чох мәшғулдурлар. Онлар хош мүждәнин тәблиғчиләридир (2 Тим. 4:5). Ағсаггаллар саһә хидмәтиндә фәал иштирак едәрәк башгаларына нүмунә гојурлар. Јығынҹағын әразисиндә тәблиғ ишини тәшкил едирләр вә даһа јахшы тәблиғ етмәјимиз, дәрс кечмәјимиз үчүн бизә тәлим верирләр. Бундан әлавә, ағсаггаллар мәрһәмәтли, ајры-сечкилик етмәјән һакимләрдир. Һансыса мәсиһи ҹидди ҝүнаһ ишләјәндә ағсаггаллар онун Јеһова илә мүнасибәтини бәрпа етмәсинә көмәк едирләр. Ејни заманда онлар јығынҹағын руһани тәмизлијинин горунмасына нәзарәт едирләр (1 Кор. 5:12, 13; Гал. 6:1). Ән әсасы исә ағсаггаллар чобанлардыр (1 Бут. 5:1—3). Онлар Мүгәддәс Китаба әсасланан ҝөзәл нитгләр сөјләјир, јығынҹагда һәр кәси јахындан танымаға чалышыр вә баҹы-гардашлара ағсаггал зијарәтләри едирләр. Бүтүн бу ишләрдән савајы, бәзи ағсаггаллар ибадәт евләринин тикинтиси вә гуллуғу илә мәшғул олур, Хәстәханаларла әлагә комитәләриндә вә Хәстәләрә зијарәт групларында хидмәт едирләр. Доғрудан да, ағсаггаллар бизим үчүн чох зәһмәт чәкирләр!

10. Зәһмәткеш ағсаггалларымыза миннәтдар олмаг үчүн һансы сәбәбләримиз вар?

¹⁰ Јеһова габагҹадан демишди ки, ағсаггаллар бизим гејдимизә јахшы галаҹаглар вә биз даһа горхмајаҹағыг, дәһшәтә ҝәлмәјәҹәјик (Әрм. 23:4). Финландијада јашајан Јоһанна адлы баҹы бу сөзләрин һәгигәт олдуғуну өз һәјатында ҝөрмүшдү. Онун анасы ҹидди хәстәлијә тутулмушду. Баҹы бөлүшүр: «Кечирдијим һиссләр барәдә киминләсә данышмаг мәнә чәтиндир. Амма елә дә јахшы танымадығым бир ағсаггал мәнимлә сәбирлә давранды, мәнимлә бирликдә дуа етди вә Јеһованын мәни севдијинә әмин етди. Һәмин вахт онун нә дедикләри дәгиг јадымда галмаса да, үрәјимә раһатлыг чөкдүјү јахшы јадымдадыр. Әминәм ки, ону мәнә көмәк етмәси үчүн Јеһова ҝөндәрмишди вә бу, дүз вахтында иди!» Бәс јығынҹағыныздакы ағсаггаллар сизә неҹә көмәк едибләр?

11. Ағсаггаллара миннәтдар олдуғумузу неҹә ҝөстәрә биләрик? (Һәмчинин шәклә бахын.)

¹¹ Јеһова истәјир ки, ағсаггаллара чәкдикләри зәһмәтә ҝөрә үрәкдән миннәтдар олдуғумузу ҝөстәрәк (1 Салон. 5:12, 13). Финландијада јашајан Һенријета белә бир  фикир дејир: «Ағсаггаллар башгаларына ҹанла-башла көмәк едирләр. Бу о демәк дејил ки, онларын бош вахтлары чохдур, енержиләри түкәнмир, ја да өзләринин проблемләри јохдур. Бәзән онлара садәҹә олараг белә дејирәм: “Билирсән, сән чох јахшы ағсаггалсан. Истәдим, буну сәнә дејим”». Түркијәдә јашајан Сера адлы баҹы дејир: «Ағсаггалларын хидмәтләрини давам етмәләри үчүн “јанаҹаға” еһтијаҹлары вар. Буна ҝөрә дә онлара ачыгҹа јазмаг, гонаг дәвәт еләмәк вә ја саһә хидмәтиндә әмәкдашлыг етмәк олар». Бәлкә дә, һансыса ағсаггалын ҝөрдүјү ишләрә ҝөрә хүсусилә миннәтдарсыныз. Миннәтдарлығынызы ҝөстәрмәк үчүн мүхтәлиф јоллар ахтарын (1 Кор. 16:18).

ЈЫҒЫНҸАҒЫ МӨҺКӘМЛӘНДИРӘН РАЈОН НӘЗАРӘТЧИЛӘРИ

12. Биринҹи әсрдә даһа кимләр јығынҹағы мөһкәмләндирирди? (1 Салоникилиләрә 2:7, 8).

¹² Исанын вердији инсан тимсалында һәдијјәләрдән бәзиләри исә јығынҹаға башга ҹүр хидмәт едирләр. Мәсиһин рәһбәрлији алтында Јерусәлимдәки ағсаггаллар Булусу, Барнәбаны вә диҝәрләрини сәјјар нәзарәтчи кими тәјин етмишдиләр (Һәв. 11:22). Сәбәб нә иди? Јығынҹаг хидмәтчиләри вә ағсаггаллар кими онларын да тәјин олунмасына сәбәб јығынҹаглары мөһкәмләндирмәк иди (Һәв. 15:40, 41). Бу гардашлар өз раһатлыгларыны гурбан верирдиләр. Баҹы-гардашлара тәлим вермәк, онлары руһландырмаг үчүн һәтта һәјатларыны тәһлүкәјә атырдылар. (1 Салоникилиләрә 2:7, 8 ајәләрини охујун.)

13. Рајон нәзарәтчиләринин һансы мәсулијјәтләри вар?

¹³ Рајон нәзарәтчиләри һәмишә јол үстәдирләр. Бәзиләри бир јығынҹагдан о бири јығынҹаға ҝетмәк үчүн јүзләрлә километр јол гәт едир. Һәр һәфтә рајон нәзарәтчиси бир нечә нитг сөјләјир, ағсаггал зијарәтләри едир, өнҹүл ҝөрүшү, ағсаггалларла ҝөрүш вә тәблиғ үчүн ҝөрүшләр кечирир. О, нитгләр һазырлајыр,  рајон вә реҝионал топлантыларынын тәшкили илә мәшғул олур, өнҹүл мәктәбләриндә дәрс дејир, рајонун өнҹүлләри илә хүсуси ҝөрүшүн кечирилмәсини тәшкил едир. Бүтүн бунларла јанашы, о, филиалын тапшырдығы диҝәр ишләри дә ҝөрүр. Бәзән бу ишләр чох тәҹили олур.

14. Һансы сәбәбләрә ҝөрә зәһмәткеш рајон нәзарәтчиләримизә миннәтдарыг?

¹⁴ Рајон нәзарәтчиләринин ҝөрдүјү ишләрдән јығынҹаг һансы фајданы әлдә едир? Түркијәдә јашајан бир гардаш сәјјар нәзарәтчиләрин зијарәти илә бағлы белә демишди: «Һәр дәфә онларын зијарәтиндән сонра баҹы-гардашлара көмәк етмәк үчүн даһа чох вахт ајырмаға һәвәсләнирәм. Мән чох рајон нәзарәтчиси ҝөрмүшәм, амма һәлә елә олмајыб ки, онлардан һансынаса јахынлашмаг чәтин ҝөрүнсүн вә ја онлар өзләрини чох мәшғул ҝөстәрсин». Бајаг ады чәкилән Јоһанна саһә хидмәтиндә рајон нәзарәтчиси илә әмәкдашлыг етмишди. Амма онлар евдә бир нәфәр дә олсун тапмамышдылар. Баҹы дејир: «Буна бахмајараг, о ҝүнү һеч вахт јаддан чыхармајаҹағам. Һәмин вахт баҹыларымын икиси дә тәзәҹә көчмүшдү вә онлардан өтрү бурнумун уҹу ҝөјнәјирди. Рајон нәзарәтчиси мәнә үрәк-дирәк верди. Деди ки, бу ҝүн јахынларымызла арамызда олан мәсафәләр мүвәггәтидир, јени дүнјада бир-биримизлә дојунҹа вахт кечирә биләҹәјик». Бу баҹы кими чохларымызын рајон нәзарәтчиләри илә бағлы ҝөзәл хатирәләри вар (Һәв. 20:37—21:1).

15. а) 3 Јәһја 5—8 ајәләринә әсасән рајон нәзарәтчиләринә миннәтдар олдуғумузу неҹә ҝөстәрә биләрик? (Һәмчинин шәклә бахын.) б) Тәјин олунмуш гардашларын һәјат јолдашларына нәјә ҝөрә миннәтдар олмалыјыг вә буну неҹә ҝөстәрә биләрик? (« Онларын һәјат јолдашларыны унутмајын» адлы чәрчивәјә бахын.)

¹⁵ Һәвари Јәһја Гајы тәшвиг етмишди ки, јығынҹағы зијарәт едән гардашлара гонагпәрвәрлик ҝөстәрсин вә онлары «Аллаһымыза лајиг тәрздә» јола салсын. (3 Јәһја 5—8  ајәләрини охујун.) Буну етмәјин бир јолу зијарәт һәфтәсиндә рајон нәзарәтчисини јемәјә дәвәт етмәкдир. Диҝәр јолу онун кечирдији тәблиғ ҝөрүшләриндә иштирак етмәкдир. Бајаг ады чәкилән Лесли баҹы миннәтдарлығыны башга јолларла да ҝөстәрир. О дејир: «Дуа едирәм ки, Јеһова онларын бүтүн еһтијаҹларыны өдәсин. Бундан башга, јолдашымла онлара мәктублар јазырыг. Зијарәтләринин бизә нә гәдәр көмәк етдијини гејд едирик». Унутмајын ки, рајон нәзарәтчиләри “супермен” дејилләр, онлар да хәстәләнирләр, нараһатлыг кечирирләр, һәтта руһдан дүшә биләрләр. Ола билсин, сизин хош сөзүнүз, јахуд кичик һәдијјәниз онларын дуаларына ҹаваб олсун (Мәс. 12:25).

ИНСАН ТИМСАЛЫНДА ҺӘДИЈЈӘЛӘРӘ ЕҺТИЈАҸ ДУЈУРУГ

16. Мәсәлләр 3:27 ајәсинә әсасән гардашлар өзләринә һансы суаллары верә биләр?

¹⁶ Бүтүн дүнјада инсан тимсалында һәдијјә кими хидмәт едән даһа чох гардаша еһтијаҹ дујуруг. Әҝәр сиз вәфтиз олунмуш гардашсынызса, бу саһәдә хидмәт етмәк сиздә алынар? (Мәсәлләр 3:27 ајәсини охујун.) Јығынҹаг хидмәтчиси олмаға ҹан ата биләрсиниз? Әҝәр сиз јығынҹаг хидмәтчисисинизсә, баҹы-гардашларынызын гејдинә галмаг үчүн ағсаггал олмағы гаршыныза мәгсәд гоја биләрсиниз? c Һәјатынызда дәјишикликләр едиб Падшаһлыг Мүждәчиләри Мәктәбинә әризә јаза биләрсиниз? Бу мәктәбдә алдығыныз тәлим сајәсиндә Исанын әлиндә даһа јарарлы аләт олаҹагсыныз. Әҝәр бу ишләри баҹармајаҹағынызы дүшүнүрсүнүзсә, Јеһоваја дуа един. Ондан хаһиш един ки, истәнилән тәјинатын өһдәсиндән ҝәлә билмәјиниз үчүн сизә мүгәддәс руһундан версин (Лука 11:13; Һәв. 20:28).

17. «Инсан тимсалында һәдијјәләр» Падшаһымыз Иса һагда нәји сүбут едир?

¹⁷ Исанын «инсан тимсалында һәдијјә» кими тәјин етдији гардашларын чәкдији зәһмәтдән ҝөрүрүк ки, о бу ахырзаманда бизә рәһбәрлик едир (Мәт. 28:20). Белә мәһәббәт долу, сәхавәтли Падшаһымыза ҝөрә чох миннәтдарыг. О бизим еһтијаҹларымыздан аҝаһдыр, бизә көмәк етмәк үчүн гардашлар бәхш едир. Одур ки, бу зәһмәткеш гардашлара миннәтдарлығынызы ҝөстәрмәк үчүн фүрсәтләр ахтарын. Һәмчинин «һәр бир ҝөзәл пај вә һәр бир камил немәт» Мәнбәји Јеһоваја миннәтдарлығынызы билдирмәји һеч вахт унутмајын (Јаг. 1:17).