1. 1935-ҹи илдә топлантыда сөјләнилән мәрузә бир оғланын һәјатында һансы ролу ојнады?

МҮГӘДДӘС КИТАБ ТӘДГИГАТЧЫСЫ олан бир аилә вар иди. (Һәмин вахт Јеһованын Шаһидләри белә адланырды.) Онларын үч оғлу, ики гызы вар иди. Бу валидејнләр ушагларына Јеһоваја ибадәт етмәји вә Мәсиһдән өрнәк алмағы ашылајырды. Оғулларындан бири 1926-ҹы илдә 18 јашында вәфтиз олунмушду. Бүтүн Мүгәддәс Китаб Тәдгигатчылары кими, бу оғлан да һәр ил Ағанын шам јемәји мәрасиминдә чөрәкдән јејир, шәрабдан ичирди. Амма 1935-ҹи илдә Вашингтонда (АБШ) кечирилән бөјүк топлантыдан сонра онун ҝәләҹәјә олан бахышы тамамилә дәјишди. Һәмин топлантыда Рутерфорд гардаш «Бөјүк издиһам» адлы тарихи мәрузә сөјләди. Бу мәрузәдә һансы һәгигәт ачыгланды?

2. Рутерфорд гардаш өз мәрузәсиндә һансы һәгигәти ачыгламышды?

² Бу мәрузәдә Рутерфорд гардаш Вәһј 7:9 ајәсиндә бәһс олунан бөјүк издиһамын ким олдуғуну ачыглады. О вахта гәдәр Мүгәддәс Китаб Тәдгигатчылары елә һесаб едирди ки, бу груп да ҝөјдә јашајаҹаг, амма онлар даһа аз садиг олдуглары үчүн Иса Мәсиһлә бирҝә падшаһлыг етмәјәҹәк. Рутерфорд гардаш ајәләр васитәсилә изаһ етди ки, бөјүк издиһам ҝөјләр һәјаты үчүн сечилмәјиб, онлар Мәсиһин башга гојунларыдыр * вә бөјүк мүсибәтдән сағ чыхыб, јер үзүндә әбәди јашајаҹаглар (Вәһј 7:14). Иса вәд етмишди: «Бу ағылдан  олмајан башга гојунларым да вар. Мән онлары да ҝәтирмәлијәм. Онлар сәсимә гулаг асаҹаг. Һамысы бир сүрүдә бирләшәҹәк. Онларын бир чобаны олаҹаг» (Јәһ. 10:16). Бу група дахил олан инсанлар Јеһованын садиг шаһидләридир. Онларын јерүзү Ҹәннәтдә әбәди јашамаг үмиди вар (Мәт. 25:31—33, 46). Ҝәлин ҝөрәк бу һәгигәтин ачыгланмасы, 18 јашлы гардашымыз да дахил олмагла, бир чох Јеһованын Шаһидинин һәјатыны неҹә дәјишди (Зәб. 97:11; Мәс. 4:18).

3, 4. 1935-ҹи илдә кечирилән топлантыда минләрлә инсан үмидләри илә бағлы нәји баша дүшдү вә нәјә ҝөрә?

³ Нәһајәт, топлантынын ән һәјәҹанлы аны јетишди. Натиг аудиторијаја мүраҹиәт едәрәк деди: «Јер үзүндә јашамаг үмидинә малик оланлар, зәһмәт олмаса, ајаға галхын». Һадисәнин ҹанлы шаһидләри дејир ки, орада олан тәхминән 20 000 инсанын јарыдан чоху ајаға галхды. Рутерфорд гардаш уҹадан деди: «Бахын! Бөјүк издиһам будур!» Бу сөзләри һамы ҝурултулу алгышларла гаршылады. Ајаға галханлар баша дүшдүләр ки, онлар ҝөјдә јашамаг үчүн сечилмәјибләр. Чүнки онлар ајдын анладылар ки, Аллаһын мүгәддәс руһу илә мәсһ олунмајыблар. Топлантынын нөвбәти ҝүнү 840 нәфәр вәфтиз олунараг Јеһованын Шаһиди олду вә онларын әксәријјәти башга гојунлара дахил иди.

⁴ Мәрузәдән сонра мәгаләнин әввәлиндә һаггында данышдығымыз ҝәнҹ гардаш вә минләрлә диҝәр инсан анма мәрасими заманы символлардан гәбул етмәји дајандырды. Бир гардаш тәвазөкарҹасына чохларынын да үрәјиндән кечән нөвбәти сөзләри демишди: «1935-ҹи илдә кечирилән анма мәрасими символлардан гәбул етдијим сонунҹу анма мәрасими олду. Баша дүшдүм ки, Јеһова Аллаһ Өз мүгәддәс руһу илә мәним гәлбимдә ҝөјләрдә јашамаға үмид ојатмајыб. Әксинә, мән үмид едирәм ки, јер үзүндә јашајаҹағам вә ораны ҹәннәтә чевирмәк ишиндә иштирак едәҹәм» (Ром. 8:16, 17; 2 Кор. 1:21, 22). О вахтдан бөјүк издиһамын сајы ҝетдикҹә артыр, онлар һал-һазырда јер үзүндә јашајан мәсһ олунмушларла чијин-чијинә әмәкдашлыг едир.

5. Анма мәрасиминдә символлардан гәбул етмәји дајандыранлара Јеһова неҹә јанашыр?

⁵ 1935-ҹи илдән сонра анма мәрасиминдә символлардан гәбул етмәји дајандыранлара Јеһова неҹә јанашыр? Бәс индики дөврдә анма мәрасиминдә символлардан гәбул едиб, сонра исә мәсһ олунмуш олмадығыны баша дүшән инсанлара неҹә јанашыр? (1 Кор. 11:28). Онлардан бәзиләри һансы үмидә малик олдугларыны дүзҝүн мүәјјән едә билмәмишдиләр. Амма әҝәр онлар сәмими-гәлбдән сәһвләрини баша дүшүрләрсә, даһа символлардан гәбул етмирләрсә вә Јеһоваја сәдагәтлә хидмәтләрини давам етдирирләрсә, шүбһәсиз ки, Јеһова онлары башга гојунларын арасына гәбул едәҹәк. Онлар символлардан гәбул етмәсәләр дә, анма мәрасиминдә иштирак едирләр, чүнки Јеһоваја вә Исаја һәр шејә ҝөрә миннәтдардырлар.

6. Иса мәләкләрә һансы әмри вериб?

⁶ Тезликлә бөјүк мүсибәт башлајаҹаг. Она ҝөрә дә Вәһј 7-ҹи фәсли арашдырмаг бизим үчүн руһландырыҹы олар. Орада мәсһ олунмуш мәсиһиләр вә башга гојунлардан ибарәт бөјүк издиһам һагда данышылыр. Иса  мәләкләрә әмр едиб ки, јерин мәһведиҹи дөрд күләјини тутуб сахласынлар. Јер үзүндә олан мәсһ олунмушларын һамысы мөһүрләнмәјинҹә, јәни сонунҹу дәфә Јеһовадан разылыг алмајынҹа мәләкләр бу дөрд күләји јер үзүнә бурахмамалыдыр (Вәһј 7:1—4). Мәсиһин бу мәсһ олунмуш гардашлары садиг галмаларынын мүкафаты кими ҝөјдә онунла бирҝә падшаһ вә каһин кими хидмәт едәҹәкләр (Вәһј 20:6). Јеһова, Иса вә мәләкләр 144 000 мәсһ олунмушун ҝөјләр мүкафатыны алдығыны ҝөрәндә чох севинәҹәк.

7. Вәһј 7:9, 10 ајәләриндә Јәһја ҝөрүнтүдә кимләри ҝөрүр вә онлар нә едир? (Үз габығындакы шәклә бахын.)

⁷ Јәһја бу 144 000 падшаһ вә каһин һагда данышандан сонра валеһедиҹи бир шеј, Армаҝеддондан сағ чыхан бөјүк издиһамы ҝөрүр. Бөјүк издиһам 144 000-дән сајҹа чох-чох бөјүкдүр, һәтта онларын сајы бәлли дејил. (Вәһј 7:9, 10 ајәләрини охујун.) Онларын әјниндә «ағ либас» вар. Бу ону ҝөстәрир ки, онлар өзләрини Шејтан дүнјасында ләкәсиз сахлајыблар, Аллаһа вә Мәсиһә садиг галыблар (Јаг. 1:27). Онлар уҹадан дејирләр ки, хиласларына ҝөрә Јеһоваја вә Онун Гузусу Исаја борҹлудурлар. Һәмчинин онларын әлиндә «хурма будаглары» вар. Бунунла онлар бөјүк севинҹлә Исанын Јеһованын тәјин етдији Падшаһ олдуғуну гәбул етдикләрини ҝөстәрирләр. (Јәһја 12:12, 13 ајәләри илә әлагәләндирин.)

8. Вәһј 7:11, 12 ајәләриндән Јеһованын сәмави аиләси барәдә нә өјрәнирик?

⁸ Вәһј 7:11, 12 ајәләрини охујун. Сәмави аләмдә оланлар буну ҝөрәндә һансы һиссләри кечирир? Јәһја ҝөрүр ки, бөјүк издиһам пејда оланда Јеһованын бүтүн сәмави аиләси севинҹлә долур вә Аллаһа һәмд едир. Онлар бу ҝөрүнтүнүн јеринә јетдијини, бөјүк издиһамын бөјүк мүсибәтдән сағ чыхдығыны ҝөрәндә севиниб-шадланаҹаглар.

9. Вәһј 7:13—15 ајәләринә әсасән, бөјүк издиһам һал-һазырда нә едир?

⁹ Вәһј 7:13—15 ајәләрини охујун. Јәһја бөјүк издиһамын «либасларыны Гузунун ганында јујуб» ағартдығыны јазыр. Бу о демәкдир ки, онларын Јеһованын гаршысында тәмиз виҹданы вар вә Јеһова онлардан разыдыр (Әшј. 1:18). Онлар һәср олунмуш вә вәфтиз олунмуш мәсиһиләрдир, онларын Иса Мәсиһин фидјә гурбанлығына ҝүҹлү иманлары вар вә Јеһова илә сых мүнасибәтә саһибдирләр (Јәһ. 3:36; 1 Бут. 3:21). Елә буна ҝөрә дә онлар Јеһованын тахтынын гаршысында дурмаға лајиг ҝөрүлүрләр вә руһани мәбәдин јерүзү һәјәтиндә ҝеҹә-ҝүндүз Она гуллуг едирләр. Онлар әзмлә тәблиғ вә шаҝирд һазырламаг ишинин бөјүк гисмини ҝөрүрләр. Чүнки Падшаһлығын ишини өз истәкләриндән үстүн тутурлар (Мәт. 6:33; 24:14; 28:19, 20).

10. Бөјүк издиһам нәјә әминдир вә онлар һансы вәдин јеринә јетдијинин шаһиди олаҹаг?

¹⁰ Бөјүк издиһам бөјүк мүсибәтдән сағ чыхандан сонра да Аллаһ онларын гајғысына галаҹағына әминдир. Чүнки «тахтда отуран чадырыны онларын үзәринә чәкәҹәк». Нәһајәт, башга гојунларын бөјүк һәсрәтлә ҝөзләдикләри вәд јеринә јетәҹәк: «[Аллаһ] онларын ҝөзләриндән бүтүн јашлары силәҹәк. Артыг өлүм олмајаҹаг. Нә дәрд, нә фәрјад, нә дә ағры олмајаҹаг» (Вәһј 21:3, 4).

11, 12. а) Вәһј 7:16, 17 ајәләринә әсасән, бөјүк издиһамы һансы немәтләр ҝөзләјир? б) Анма мәрасиминдә башга гојунлар нә едә биләр вә буну етмәјә онлары нә тәшвиг едир?

¹¹ Вәһј 7:16, 17 ајәләрини охујун. Һал-һазырда Јеһованын бәзи хидмәтчиләри  ағыр игтисади вәзијјәтә, өлкәдахили иғтишашлар вә мүһарибә уҹбатындан аҹлыг ичиндәдир. Бәзиләри исә иманларына ҝөрә һәбсдәдир. Амма бөјүк издиһама дахил олан бүтүн бу кәсләр чох хошбәхтдир. Чүнки билирләр ки, бу шәр дүнјанын мәһвиндән хилас олаҹаглар вә һәмишә бол руһани вә физики гидалары олаҹаг. Шејтан дүнјасынын мәһви заманы Јеһова «гызмар исти»јә бәнзәр гәзәбини халгларын үзәринә төкәндә бөјүк издиһамы горујаҹаг. Бөјүк мүсибәт битәндән сонра Иса јер үзүндә сағ галан бу кәсләри әбәди «һәјат сују булагларына апараҹаг». Бөјүк издиһамын мөһтәшәм үмиди вар! Индијә кими јер үзәриндә јашамыш милјардларла инсандан фәргли олараг, онлар һеч вахт өлмәјә биләр! (Јәһ. 11:26).

¹² Башга гојунлар әсрарәнҝиз үмидләринә ҝөрә Јеһова вә Исаја миннәтдардыр! Онлар ҝөјдә јашамаг үчүн сечилмәсәләр дә, Јеһованын ҝөзүндә дәјәрләри һеч дә мәсһ олунмушлардан аз дејил. Һәр ики група дахил оланларын Аллаһы вә Мәсиһи мәдһ етмәк имканы вар. Мәсәлән, онлар Ағанын шам јемәјиндә иштирак етмәклә буну едирләр.

13, 14. Нәјә ҝөрә Мәсиһин өлүмүнү анма мәрасиминдә һәр кәс иштирак етмәлидир?

¹³ Сон илләр анма мәрасиминдә иштирак едәнләрин тәхминән һәр 1000 нәфәрдән 1-и символлардан гәбул едир. Әксәр јығынҹагларда бир нәфәр дә олсун символлардан гәбул етмир. Анма мәрасиминдә иштирак едәнләрин бөјүк әксәријјәти јер үзүндә јашамаг үмидинә саһибдир. Бәс онда нәјә ҝөрә онлар бу мәрасимдә иштирак едир? Белә бир нүмунәјә бахаг. Аилә гуран ҹүтлүјүн тојуна достлары нәјә ҝөрә ҝәлир? Севҝиләрини ҝөстәрмәк, дәстәк олмаг үчүн. Башга гојунлар да ејни мәгсәдлә анма мәрасиминә гатылыр. Онлар Мәсиһә вә онун мәсһ олунмуш гардашларына севҝиләрини ҝөстәрмәк, дәстәк олмаг истәјирләр. Һәмчинин Мәсиһин фидјә гурбанлығына миннәтдарлыгларыны ифадә етмәк истәјирләр. Чүнки бу гурбанлыг сајәсиндә онларын јер үзүндә әбәди јашамаг имканы вар.

¹⁴ Башга гојунлар анма мәрасиминдә бир ваҹиб сәбәбә ҝөрә дә иштирак едирләр. Бунунла Исанын әмринә итаәт едирләр. Иса садиг һәвариләри илә бирҝә бу мәрасими  тәсис едәндә онлара белә демишди: «Хатирәми јад етмәк үчүн буну һәмишә един» (1 Кор. 11:23—26). Буна ҝөрә дә һәлә ки јер үзүндә бәзи мәсһ олунмушлар вар вә анма мәрасими гејд олунур, башга гојунлар бу мәрасимдә иштирак етмәјә давам едирләр. Үстәлик, онлар башгаларыны да бу мәрасимә дәвәт едирләр.

15. Анма мәрасиминдә һәр биримиз шәхсән Аллаһы вә Мәсиһи неҹә мәдһ едә биләрик?

¹⁵ Анма мәрасиминдә бизим һәм Аллаһы, һәм дә Мәсиһи нәғмәләрдә вә дуада мәдһ етмәк имканымыз вар. Бу ил анма мәрасиминдә сөјләниләҹәк мәрузә «Аллаһын вә Иса Мәсиһин сизин үчүн етдикләрини гијмәтләндирин» адланыр. Мәрузә Јеһоваја вә Исаја миннәтдарлығымызы артыраҹаг. Чөрәк вә шәраб өтүрүлдүкҹә онларын Исанын бәдәнини вә ганыны тәмсил етдији һагда дүшүнәҹәјик. Хатырлајаҹағыг ки, биз јашајаг дејә Јеһова Оғлуну гурбан верди (Мәт. 20:28). Сәмави Атамызы вә Онун Оғлуну севән һәр бир кәс Мәсиһин өлүмүнү анама мәрасиминдә иштирак етмәк истәјәҹәк.

16. Мәсһ олунмушларла башга гојунлар һансы мәнада ејнидир?

¹⁶ Мәсһ олунмушларла башга гојунлар арасындакы фәрг биринин диҝәриндән даһа дәјәрли олдуғуну ҝөстәрмир. Һәр ики груп Јеһованын ҝөзүндә ејни дәрәҹәдә гијмәтлидир. Ахы Јеһова һәм мәсһ олунмушлары, һәм дә башга гојунлары сатын алмаг үчүн ејни дәјәри өдәјиб, севимли Оғлунун һәјатыны гурбан вериб. Бу ики груп арасындакы фәрг садәҹә онларын үмидләринин фәргли олмасындадыр. Һәр ики груп Аллаһа вә Мәсиһә садиглијини горумалыдыр (Зәб. 31:23). Бир мәгамы да гејд етмәк лазымдыр ки, инсанын һансы група аид олмасындан асылы олмајараг, Јеһова мүгәддәс руһундан һәр кәсә еһтијаҹы олдуғу гәдәр верир.

17. Мәсһ олунмушларын јердә галан һиссәси нәји сәбирсизликлә ҝөзләјир?

¹⁷ Мәсһ олунмушлар ҝөјләр үмиди илә доғулмур. Онларын үрәјинә бу үмиди Јеһова гојур. Онлар бу үмидләри барәдә дүшүнүрләр, дуа едирләр вә ҝөјләр һәјаты мүкафатыны алаҹагларыны һәсрәтлә ҝөзләјирләр. Руһани бәдәнләринин неҹә олаҹагларына даир һеч бир тәсәввүрләри олмаса да, Јеһованы, Исаны, мәләкләри вә диҝәр мәсһ олунмушлары ҝөрмәјин һәсрәтиндәдирләр (Филип. 3:20, 21; 1 Јәһ. 3:2). Онлар сәмави Падшаһлыгда өз јерләрини тутмағы сәбирсизликлә ҝөзләјирләр.

18. Башга гојунлар нәји сәбирсизликлә ҝөзләјир?

¹⁸ Башга гојунлар јер үзүндә әбәди јашамаг  үмидләринин ҝерчәкләшмәсини ҝөзләјирләр. Бу, инсана хас тәбии истәкдир. (Ваиз 3:11). Онлар бүтүн планети ҹәннәтә чевирәҹәкләри ҝүнүн һәсрәтиндәдирләр. Онлар өз евләрини тикәҹәкләри, өз бағларыны салаҹаглары, сағлам өвладлар бөјүдәҹәкләри вә өзләринин дә сағлам олаҹаглары ҝүнү сәбирсизликлә ҝөзләјирләр (Әшј. 65:21—23). Онлар бүтүн дүнјаны ҝәзиб долашыб дағлары, мешәләри, океанлары кәшф етмәјин, Јеһованын јаратдығы бүтүн шејләри тәдгиг етмәјин һәсрәтиндәдирләр. Онлары ән чох севиндирән исә ҝәләҹәкдә Јеһова илә мүнасибәтләринин даһа сых, даһа мөһкәм олаҹағыдыр.

19. Анма мәрасими һәр биримиз үчүн һансы имканы ачыр вә бу ил анма мәрасими нә вахт кечириләҹәк?

¹⁹ Јеһова һәр бир һәср олунмуш хидмәтчисинә ҝәләҹәјә даир мөһтәшәм үмид вериб (Әрм. 29:11). Анма мәрасиминдә хүсуси имканымыз олаҹаг: Јеһованын вә Иса Мәсиһин бизим сонсуз һәјата саһиб олмағымыз үчүн етдикләринә ҝөрә онлары мәдһ едә биләҹәјик. Бәли, анма мәрасими мәсиһиләр үчүн илин ән хүсуси ҝөрүшүдүр. Бу ҝөрүш 2021-ҹи ил 27 март шәнбә ҝүнү ҝүн батандан сонра олаҹаг. Чохлары елә әразиләрдә јашајыр ки, бу ҝөрүшү нисбәтән азад шәкилдә кечирә биләҹәк. Бир башгалары тәгибләрә рәғмән, ҝөрүшләрдә иштирак едәҹәк. Еләләри дә олаҹаг ки, анма мәрасимини һәбсдә гејд едәҹәк. Һансы шәраитдә кечирмәјимиздән асылы олмајараг, ҝәлин унутмајаг ки, Јеһованын, Исанын, мәләкләрин вә ҝөјдә олан мәсһ олунмушларын нәзәри бу мәрасимин үзәриндә олаҹаг. Һәр бир јығынҹағын, һәр бир групун вә һәр бир кәсин ҝөзәл анма мәрасими кечирмәси диләји илә!