1. Нәјә ҝөрә дејә биләрик ки, бу ҝүн инсанлар доғмаларыны севмир?

МҮГӘДДӘС КИТАБДА пејғәмбәрлик олунмушду ки, ахырзаманда доғма инсанларын бир-биринә севҝиси сојујаҹаг (2 Тим. 3:1, 3). Бу ҝүн биз бу пејғәмбәрлијин јеринә јетдијинин шаһидијик. Мәсәлән, милјонларла аилә дағылыр, буна ҝөрә дә тәрәфләр бир-биринә гаршы гәзәблидир, өвладлар исә өзләрини севҝидән мәһрум һисс едир. Еләләри дә вар ки, бир евдә јад инсан кими јашајырлар. Бир аилә психологу дејир: «Ана, ата вә өвладлары бир-бири илә бағларыны гопарыб, компүтерә, планшетә, телефона вә видеоојунлара бағланыблар. Бир дамын алтында јашасалар да, демәк олар ки, бир-бирини танымырлар».

2, 3. а) Ромалылара 12:10 ајәсинә әсасән, кими нәвазишлә севмәлијик? б) Бу мәгаләдә нәји арашдыраҹағыг?

² Биз бу дүнјанын мәһәббәти сојумуш инсанларына бәнзәмәк истәмирик (Ром. 12:2). Әксинә, истәјирик ки, аилә үзвләримизи, о ҹүмләдән јығынҹагдакы баҹы-гардашлары нәвазишлә севәк. (Ромалылара 12:10 ајәсини охујун.) Бәс нәвазишли мәһәббәт нәдир? Бу ифадә меһрибан аилә үзвләри арасында олан ҝүҹлү мәһәббәти тәсвир едир. Биз үрәјимиздә руһани аиләмизә, иман баҹы-гардашларымыза бу ҹүр мәһәббәт јетишдирмәлијик, онлары нәвазишлә севмәлијик. Бунун сајәсиндә пак ибадәтин ваҹиб һиссәси олан бирлији горумуш олаҹағыг (Мик. 2:12).

³ Ҝәлин ҝөрәк бу ҹүр мәһәббәти јетишдирмәк вә ону тәзаһүр етдирмәк үчүн кимләрдән нүмунә ҝөтүрә биләрик.

4. Јагуб 5:11 ајәсиндә Јеһованын бизә севҝиси неҹә тәсвир олунуб?

⁴ Мүгәддәс Китабда Јеһованын ҝөзәл хүсусијјәтләри  барәдә данышылыр. Мәсәлән, орада дејилир ки, «Аллаһ мәһәббәтдир» (1 Јәһ. 4:8). Тәкҹә буну билмәјимиз өзү-өзлүјүндә бизи Јеһоваја јахынлашдырыр. Һәмчинин Мүгәддәс Китабда дејилир ки, «Јеһова чох меһрибан» Аллаһдыр. (Јагуб 5:11 ајәсини охујун.) Бу, Јеһованын бизә олан һиссләринин нә гәдәр дәрин олдуғуну ҝөстәрир. Әлбәттә ки, буну дујмаг чох хошдур!

5. Јеһованын бизә мәрһәмәти нәдән ҝөрүнүр вә Онун нүмунәсиндән неҹә өрнәк ала биләрик?

⁵ Јагуб 5:11 ајәсиндә Јеһованын меһрибан олмасы илә јанашы, бизи Она ҹәлб едән диҝәр хүсусијјәти, мәрһәмәти дә вурғуланыр (Чых. 34:6). Јеһованын бизә мәрһәмәт ҝөстәрдији саһәләрдән бири бизим ҝүнаһларымызы бағышламасыдыр (Зәб. 51:1). Мүгәддәс Китаба әсасән, мәрһәмәт һисси тәкҹә бағышламагла мәһдудлашмыр. Мәрһәмәт киминсә ағры-аҹы чәкдијини ҝөрән заман инсанын дахилиндә баш галдыран ҝүҹлү бир һиссдир. Бу, инсаны она көмәк етмәјә тәшвиг едир. Јеһова дејир ки, Онун бизә көмәк етмәк истәји о гәдәр ҝүҹлүдүр ки, һәтта ананын көрпәсинә бәсләдији һиссләрдән дә ҝүҹлүдүр (Әшј. 49:15). Ағры-аҹы ичиндә оланда Јеһова мәрһәмәтиндән ирәли ҝәләрәк бизим дадымыза јетир (Зәб. 37:39; 1 Кор. 10:13). Баҹы-гардашлар бизи мәјус едәндә онлары бағышламагла, аҹыглы галмамагла онлара мәрһәмәт ҝөстәрмиш олуруг (Ефес. 4:32). Мәрһәмәт ҝөстәрмәјин башлыҹа үсулу чәтинликләрлә үзләшән баҹы-гардашларымыза дәстәк олмагдыр. Мәһәббәтдән ирәли ҝәләрәк башгаларына мәрһәмәт ҝөстәрәндә бу саһәдә бизә ҝөзәл өрнәк олан меһрибан Аллаһымыз Јеһовадан нүмунә ҝөтүрмүш олуруг (Ефес. 5:1).

6. Јонатанла Давудун достлуғу һаггында нә дејә биләрсиниз?

⁶ Мүгәддәс Китабда бир-бириләринә мәһәббәт ҝөстәрән гејри-камил инсанлардан бәһс олунур. Ҝәлин Јонатанла Давудун  нүмунәсинә бахаг. Мүгәддәс Китабда дејилир: «Јонатанын гәлби Давуда бағланды. Јонатан ону өз ҹаны кими севмәјә башлады» (1 Ишм. 18:1). Јеһова Талутун хәләфи кими Давуду мәсһ етмишди. Бир мүддәт сонра Талутун үрәјиндә Давуда гаршы гәзәб ојанды, һәтта ону бир нечә дәфә өлдүрмәјә ҹәһд етди. Лакин Талутун оғлу Јонатан атасынын Давуду өлдүрмәк ҹәһдләринә гошулмады. Јонатан вә Давуд бир-биринә анд ичмишди ки, һәмишә дост галаҹаглар вә бир-биринә дәстәк олаҹаглар (1 Ишм. 20:42).

7. Јонатанла Давудун достлуғуна әнҝәл олаҹаг амилләрдән бири һансы иди?

⁷ Јонатанла Давудун достлуғуна әнҝәл олаҹаг чох шеј вар иди. Бунлара рәғмән, онлар бир-бирилә јахын дост иди. Бу достлуг мүнасибәтини дә хүсуси едән мәһз бу иди. Мәсәлән, Јонатан Давуддан тәхминән 30 јаш бөјүк иди. Јонатан дүшүнмәди ки, белә ҹаван, һәјат тәҹрүбәси аз олан адам она дост ола билмәз, әксинә, о, Давуда бөјүк рәғбәт бәсләјирди.

8. Сизҹә, нәјин сајәсиндә Јонатан Давуда јахшы дост иди?

⁸ Белә ҝөтүрәндә, Јонатан Давуда пахыллыг едә биләрди. О, тәкид едә биләрди ки, падшаһ оғлу олдуғу үчүн атасындан сонра тахта чыхмаға онун һаггы чатыр (1 Ишм. 20:31). Амма Јонатан тәвазөкар инсан иди вә Јеһоваја садиг иди. Буна ҝөрә дә Јеһованын Давуду ҝәләҹәк падшаһ кими сечмәсини үрәкдән дәстәкләди. О, Давуда гаршы да сәдагәтли иди. Бахмајараг ки, онун бу һәрәкәти Талуту гәзәбләндирирди (1 Ишм. 20:32—34).

9. Јонатан Давуда рәгиби кими јанашырды? Изаһ един.

⁹ Јонатан Давуду чох истәјирди, ону өзүнә рәгиб ҝөрмүрдү. Јонатан баҹарыглы охатан вә ҹәсур дөјүшчү иди. Ел арасында һәм онун, һәм дә атасы Талут һаггында дејирдиләр ки, онлар «гарталдан чевик, асландан ҝүҹлү»дүрләр (2 Ишм. 1:22, 23). Буна ҝөрә дә Јонатан дөјүшләрдә ҝөстәрдији шүҹаәтлә өјүнә биләрди. Амма Јонатан рәгабәт апаран, хәбис инсан дејилди. Әксинә, Јонатан Давудун ҹәсарәтини, Јеһоваја етибарыны ҝөрүб, она валеһ олурду. Мәсәлән, Давудун Ҹалуту өлдүрдүјү һадисәдән сонра Јонатан ону өз ҹаны гәдәр чох истәди. Биз баҹы-гардашларымызы нәвазишлә севдијимизи неҹә ҝөстәрә биләрик?

10. Бир-биримизи «сәмими-гәлбдән, һәрарәтлә» севмәк нә демәкдир?

¹⁰ Мүгәддәс Китабда дејилир: «Бир-биринизи сәмими-гәлбдән, һәрарәтлә севин» (1 Бут. 1:22). Јеһова бу саһәдә бизә нүмунәдир. Онун бизә мәһәббәти о гәдәр ҝүҹлүдүр ки, бизи севмәсинә һеч нә әнҝәл ола билмәз (Ром. 8:38, 39). «Һәрарәтли» кими тәрҹүмә олунан јунан сөзү «там дартынмаг», «бүтүн ҝүҹүнү сәрф етмәк» мәнасыны верир. Бәзән иман баҹы-гардашымызы доғмамыз гәдәр севмәк үчүн бир нөв дартынмалы, бүтүн ҝүҹүмүзү сәрф етмәлијик. Бәзән онлар бизи мәјус етсә дә, биз нөвбәти мәсләһәтә ујғун давранмалыјыг: «Мәһәббәтлә бир-биринизә гаршы дөзүмлү олуб сүлһүн бирләшдириҹи телләри арасында руһун вердији бирлији горумаға үрәкдән чалышын» (Ефес. 4:1—3). Биз «сүлһүн бирләшдириҹи телләри»ни горумаға чалышсаг, баҹы-гардашларын сәһвләринә диггәтимизи ҹәмләмәјәҹәјик. Әксинә, әлимиздән ҝәләни едәҹәјик ки, онлара Јеһованын ҝөзү илә бахаг (1 Ишм. 16:7; Зәб. 130:3).

11. Нәјә ҝөрә бәзән баҹы-гардашларымызы доғмаларымыз кими севмәк чәтин ола биләр?

 ¹¹ Баҹы-гардашлары доғмамыз кими севмәк һеч дә һәмишә асан олмур, хүсусилә дә онларын сәһвини ҝөрәндә. Ҝөрүнүр, биринҹи әсрдәки бәзи мәсиһиләр үчүн дә бу, чәтин иди. Мәсәлән, Еводија вә Синтихи үчүн «мүждә уғрунда [Булусла] чијин-чијинә» хидмәт етмәк проблем дејил иди, амма мүәјјән сәбәбләрә ҝөрә, онлар бир-бирилә јола ҝедә билмирди, буна ҝөрә дә Булус онлара төвсијә едирди ки, «Рәббә хидмәтдә һәмфикир» олсунлар (Филип. 4:2, 3).

12. Иман баҹы-гардашларымыза гаршы үрәјимиздә нәвазишли мәһәббәти неҹә јетишдирә биләрик?

¹² Иман баҹы-гардашларымыза гаршы үрәјимиздә нәвазишли мәһәббәти неҹә јетишдирә биләрик? Онлары јахындан таныдыгҹа даһа јахшы баша дүшәҹәјик, даһа чох истәјәҹәјик. Јаш вә мәдәнијјәт јахын мүнасибәт гурмағымыза әнҝәл олмамалыдыр. Унутмајаг ки, Јонатан Давуддан һарадаса 30 јаш бөјүк иди. Буна бахмајараг, о, Давудла јахын дост олмушду. Јығынҹаға бир ҝөз ҝәздирин, ҝөрүн сиздән јашҹа бөјүк вә ја кичик киминлә достлуг едә биләрсиниз. Беләҹә, сиз ҝөстәрәҹәксиниз ки, «бүтүн гардашлығы» севирсиниз (1 Бут. 2:17).

13. Нәјә ҝөрә биздә јығынҹагда һамы илә ејни дәрәҹәдә јахын олмаг алынмаја биләр?

¹³ Диндашларымызы нәвазишлә севмәк о демәкдирми ки, јығынҹагдакы һәр кәслә ејни дәрәҹәдә јахын дост олмалыјыг? Әлбәттә ки, хејр. Бу, реал дејил. Хасијјәтимиз тутушдуғу үчүн кимләрләсә даһа јахын олмаг гәбаһәт дејил. Иса бүтүн һәвариләринә дост кими бахырды. Амма о, Јәһјаны хүсусилә чох истәјирди (Јәһ. 13:23; 15:15; 20:2). Бунунла белә, Иса башгалары илә Јәһја арасында ајрысечкилик етмирди. Мәсәлән, Јәһја илә гардашы Јагуб Аллаһын Падшаһлығында ән шәрәфли јерләри онлара вермәји хаһиш едәндә Иса демишди: «Кимин сағымда, кимин солумда отураҹағыны мән һәлл етмирәм» (Марк 10:35—40).  Иса Мәсиһдән өрнәк алараг биз дә јахын достларымызла башгалары арасында ајры-сечкилик етмәмәлијик (Јаг. 2:3, 4). Чүнки белә етсәк, парчаланма јарана биләр, бу исә мәсиһи јығынҹағында јол верилмәздир (Јһд. 17—19).

14. Филиппилиләрә 2:3 ајәсинә әсасән, рәгабәт руһуна јолухмамаға бизә нә көмәк едәҹәк?

¹⁴ Бир-биримизи доғмаларымызтәк севсәк, јығынҹагда рәгабәт руһунун јаранмасына јол вермәјәҹәјик. Јонатан һәр биримиз үчүн ҝөзәл өрнәкдир. О, Давуду рәгиб ҝөзү илә ҝөрүб, тах-таҹ уғрунда рәгабәт апармырды. Баҹы-гардашларын саһиб олдуғу баҹарыглара ҝөрә онлары өзүнүзә рәгиб ҝөрмәјин. Әксинә, «тәвазөкар олуб башгаларыны өзүнүздән үстүн сајын». (Филиппилиләрә 2:3 ајәсини охујун.) Унутмајын ки, јығынҹаға һәр кәс төһфә верир. Тәвазөкар олсаг, баҹы-гардашларын ҝөзәл хүсусијјәтләрини ҝөрәҹәјик вә онларын нүмунәсиндән өрнәк алаҹағыг (1 Кор. 12:21—25).

15. Танјаҝилин һадисәсиндән нә өјрәнирсиниз?

¹⁵ Һәјатда гәфил чәтинликләрлә үзләшәндә Јеһова баҹы-гардашларын мәһәббәти вә әмәли көмәји васитәсилә бизә дајаг олур. Ҝәлин ҝөрәк 2019-ҹу илдә Бирләшмиш Штатларда «Мәһәббәт һеч вахт түкәнмир!» адлы бејнәлхалг топланты заманы бир аилә илә нә баш вермишди. Үч ушаг анасы олан Танја баҹы дејир ки, шәнбә ҝүнү «топлантыдан евә гајыдаркән бир машын идарәетмәни итириб, онларын јолуна чыхды вә машынлары илә тоггушду». Баҹы башына ҝәләнләри белә нәгл едир: «Һеч биримиз хәсарәт алмамышдыг. Тәшвиш ичиндә машындан чыхыб, шосседә дурдуг. Бир дә ҝөрдүк  ки, јолун гырағында дуран бир нәфәр бизә әл едиб машынына чағырыр, чүнки дурдуғумуз јер тәһлүкәли иди. Бу елә индиҹә топлантыдан гајыдан бир гардашымыз иди. Бизи ҝөрүб дајанан тәкҹә о дејилди. Исвечдән топлантыја ҝәлән беш нәфәр дә бизи ҝөрүб дајанмышды. Баҹылар мәни дә, гызларымы да бағырларына басыб гуҹагладылар. Буна елә еһтијаҹымыз вар иди! Онлары нә гәдәр дилә тутсаг да ки, бизә ҝөрә нараһат олуб јолларындан галмасынлар, јенә дә бизи тәк гојмадылар. Һәтта тәҹили јардым ҝәләндән сонра да онлар бизим јанымызда галдылар. Бизи лазым олан һәр шејлә тәмин етдиләр. Бу һадисә заманы һәр аддымымызда Јеһованын мәһәббәтини һисс етдик. Бундан сонра һәм баҹы-гардашларымызы даһа чох севдик, һәм дә Јеһоваја миннәтдарлығымыз вә мәһәббәтимиз артды». Еһтијаҹ анынызда диндашынызын сизә неҹә нәвазишли мәһәббәт ҝөстәрдији јадыныздадырмы?

16. Бир-биримизи нәвазишлә севмәјимиз үчүн һансы сәбәбләримиз вар?

¹⁶ Бир-биримизи нәвазишлә севмәк һансы бәһрәләри ҝәтирир? Чәтин анларында баҹы-гардашларымыза дајаг олуруг, Јеһованын халгы арасында бирлији мөһкәмләндиририк, Исанын шаҝирди олдуғумузу сүбут едирик вә бу да сәмими гәлбли инсанлары пак ибадәтә ҹәлб едир. Ән әсасы исә «мәрһәмәтли Ата вә һәр ҹүр тәсәлли Аллаһы» олан Јеһованын адыны уҹалдырыг (2 Кор. 1:3). Ҝәлин һамымыз бундан сонра да баҹы-гардашларымыза гаршы үрәјимиздә мәһәббәтимизи артыраг вә әмәлдә тәзаһүр етдирәк!