1. Давуд падшаһ кими бәзән бизи һансы суал нараһат едир?

ГАЈҒЫЛАРДАН узаг динҹ һәјат. Бу һамынын арзусудур. Ким истәјәр ки, нараһатлыг кечирсин? Амма истәр-истәмәз һәјатымызда елә анлар олур ки, биз нәјинсә фикрини чәкирик. Бу сәбәбдән бәзән Јеһованын хидмәтчиләри Она Давуд падшаһын вердији суалы верирләр: «Нә вахтадәк ҹаным бу әзаба дөзәҹәк, ҝүнбәҝүн бу дәрди гәлбимдә дашыјаҹағам?» (Зәб. 13:2).

2. Бу мәгаләдә нә мүзакирә олунаҹаг?

² Бахмајараг ки, нараһатлыг һиссиндән тамамилә азад олмаг мүмкүн дејил, амма бу һиссләрә мүәјјән дәрәҹәдә һаким кәсилмәк мүмкүндүр. Бу мәгаләдә илк нөвбәдә мүәјјән едәҹәјик ки, нәләр нараһатлыг кечирмәјимизә сәбәб ола биләр. Сонра проблемләр заманы сакитлијимизи горумаға көмәк едәҹәк алты үсулу арашдыраҹағыг.

3. Нәләр нараһатлыг кечирмәјимизә сәбәб ола биләр, бәс онларын гаршысыны алмаг бизим әлимиздәдир?

³ Јәгин, разылашарсыныз ки, нараһатлыг кечирмәјимизә сәбәб олан бәзи шејләрин гаршысыны алмаг бизим әлимиздә дејил. Јемәјин, палтарын, евин гијмәтинин һәр ил артыб-артмамасына тәсир едә билмәрик. Иш јолдашымызын, синиф јолдашымызын бизи надүрүстлүјә вә әхлагсызлыға сөвг етмәмәси үчүн онларын дүшүнҹәсини идарә едә билмәрик. Әразимиздә баш верән ҹинајәткарлыға сон гојмаг да бизим  әлимиздә дејил. Бу ҹүр чәтинликләрлә үзләшмәјимизә сәбәб инсанларын Мүгәддәс Китаб принсипләринә ујғун јашамамасыдыр. Үстәлик, бу дүнјанын танрысы Шејтан истәјир ки, башымыз бу зәманәнин гајғыларына гарышсын вә Јеһоваја хидмәт етмәјәк (Мәт. 13:22; 1 Јәһ. 5:19). Она ҝөрә дә дүнјада бу гәдәр стрессли вәзијјәтин олмасы тәәҹҹүблү дејил.

4. Һәддән артыг нараһатлыг нәјә ҝәтириб чыхара биләр?

⁴ Ола биләр, бу кими проблемләрә ҝөрә о гәдәр нараһат олаг ки, даһа һеч нә дүшүнә билмәјәк. Мәсәлән, бизи фикир ҝөтүрә биләр ки, өзүмүзү доландыра биләҹәјикми, бирдән хәстәләнәрик, ишләјә билмәрик, јахуд бирдән ишимизи итирәрик. Һәмчинин Аллаһын ганунуну позмаға тәһрик олунанда садиг галыб-галмајаҹағымыза ҝөрә нараһатлыг кечирә биләрик. Тезликлә Шејтан әлалтыларыны Аллаһын халгына гаршы һүҹума галдыраҹаг. Она ҝөрә дә, ола билсин, бизи фикир ҝөтүрсүн ки, бу һүҹум заманы неҹә давранаҹағыг. Диҝәр тәрәфдән дә, дүшүнә биләрик: «Белә шејләрә ҝөрә нараһат олмағым сәһв дејил ки?»

5. Иса «даһа гајғы чәкмәјин» дејәркән нәји нәзәрдә тутурду?

⁵ Билдијимиз кими, Иса Мәсиһ давамчыларына демишди: «Даһа гајғы чәкмәјин» (Мәт. 6:25). Иса бунунла демәк истәјирди ки, биз һеч нәјә ҝөрә гајғы чәкмәмәлијик? Әлбәттә ки, јох! Кечмишдә Јеһованын бәзи хидмәтчиләри ҝүҹлү нараһатлыг кечирирди. Амма буна ҝөрә Јеһованын рәғбәтини итирмәмишдиләр * (1 Пад. 19:4; Зәб. 6:3). Иса бу сөзләри бизә тәскинлик үчүн демишди. О истәмирди ки, бу һәјатын гајғылары Јеһоваја ибадәтимизи үстәләсин. Бәс һәддән артыг нараһат олмамаг үчүн нә едә биләрик? (« Буна наил олмағын үсуллары» адлы чәрчивәјә бахын.)

6. Филиппилиләрә 4:6, 7 ајәләринә әсасән, сакитлик тапмаға бизә нә көмәк едә биләр?

⁶ 1) Тез-тез дуа един. Гајғылар бизи чулғајанда Јеһоваја дуа етмәк үрәјимизә арамлыг ҝәтирәҹәк (1 Бут. 5:7). Дуаларыныза ҹаваб олараг «Аллаһын һәр бир ағылдан үстүн олан сүлһү»нү алаҹагсыныз. (Филиппилиләрә 4:6, 7 ајәләрини охујун.) Јеһова бизә аман вермәјән фикирләри мүгәддәс руһу васитәсилә рам едәҹәк (Гал. 5:22).

7. Јеһоваја дуа едәркән нәји јадда сахламалыјыг?

⁷ Јеһоваја дуа едәндә бүтүн үрәјинизи Она бошалдын. Сизи нәјин нараһат етдијини конкрет дејин; һансы проблеминиз вар, өзүнүзү неҹә һисс едирсиниз, һамысыны Јеһова илә бөлүшүн. Һәлл олунасы проблемдирсә, һәлли үчүн Јеһовадан һикмәт вә ҝүҹ истәјин. Јох әҝәр проблемин һәлли сиздән асылы дејилсә, Јеһоваја дуа един ки, сизә бу мәсәләјә ҝөрә чох нараһат олмамаға көмәк етсин. Сизи нараһат едән мәсәләни Јеһоваја ајдын десәниз, Јеһованын ҹавабыны да ајдын ҝөрәҹәксиниз. Ишдир, дуаларыныза ҹавабы дәрһал алмасаныз, руһдан дүшмәјин. Јеһова конкрет дуа етмәјинизлә јанашы, тәкидлә дуа етмәјинизи истәјир (Лука 11:8—10).

8. Дуа едәркән нәји вурғуламағы унутмамалыјыг?

⁸ Јеһоваја дуада дәрдинизи дејәндә шүкран сөзләрини дә демәји унутмајын. Јахшы олар ки, һәтта проблемләр башымыздан ашанда белә, Јеһованын бизә вердији  немәтләрә ҝөрә миннәтдарлығымызы билдирәк. Ола билсин, бәзән о гәдәр нараһат олаҹагсыныз ки, Јеһоваја дуада нә дејәҹәјинизи билмәјәҹәксиниз. Бу заман садәҹә «көмәк ет» десәниз белә, Јеһова дуаныза ҹаваб верәҹәк (2 Салн. 18:31; Ром. 8:26).

9. Әсл мүдафиәни һарада тапа биләрик?

⁹ 2) Өзүнүзүн јох, Јеһованын һикмәтинә архаланын. Ерамыздан әввәл VIII әсрдә ашшурлулар Јәһудаја һүҹум етмәк истәјирди. Ашшурлулара мәғлуб олмагдан горхан халг көмәк үчүн бүтпәрәст Мисирә үз тутду (Әшј. 30:1, 2). Јеһова онлары хәбәрдар етди ки, Мисирә үз тутмалары онлара баһа баша ҝәләҹәк, ахырлары јахшы олмајаҹаг (Әшј. 30:7, 12, 13). Һәмчинин Јеһова Әшија пејғәмбәр васитәсилә әсл мүдафиәни һарада тапаҹагларыны да демишди: «Сакитлик вә [Јеһоваја] етибар сизин ҝүҹүнүз» олаҹаг (Әшј. 30:15б).

10. Һансы вәзијјәтләрдә Јеһоваја етибар етдијимизи ҝөстәрә биләрик?

¹⁰ Јеһоваја етибар етдијимизи неҹә ҝөстәрә биләрик? Мәсәлән, нөвбәти вәзијјәтләр јарана биләр. Тәсәввүр един ки, јүксәк маашлы иш тәклифи алмысыныз. Амма иш сааты чох олдуғуна ҝөрә руһани ишләрә әввәлки гәдәр вахт ајыра билмәјәҹәксиниз. Јахуд ишдә кимсә сизә романтик мараг ҝөстәрир. Амма һәмин инсан Јеһованын вәфтиз олмуш хидмәтчиси дејил. Ја да ки, доғма аилә үзвүнүз сизин гаршыныза шәрт гојуб дејир: «Ја мән, ја да Аллаһын». Бу вәзијјәтләрин һәр бириндә сиз гәрар вермәлисиниз. Амма һәр вәзијјәтлә бағлы Јеһова сизә јол ҝөстәрәҹәк (Мәт. 6:33; 10:37; 1 Кор. 7:39). Бәс Јеһоваја етибар едиб, Онун ҝөстәрдији јолла ҝедәҹәксиниз?

11. Аллаһын Кәламындакы һансы һадисәләр тәгибләрлә үзләшәркән сакитлијимизи горумаға бизә көмәк едә биләр?

¹¹ 3) Јахшы вә пис нүмунәләрдән нәтиҹә чыхарын. Аллаһын Кәламында сакитлијимизи горумағын вә Јеһоваја етибар етмәјин өнәмини ҝөстәрән чохлу нүмунәләр вар. Бу һадисәләри охујаркән ҝөрүн Аллаһын хидмәтчиләринә ҝүҹлү тәгибләр гаршысында сакитликләрини горумаға нә көмәк етмишди. Мәсәлән, јәһуди али мәһкәмәси һәвариләрә әмр едәндә ки, тәблиғи дајандырсынлар, онлар горхуја дүшмәдиләр. Әксинә, ҹәсарәтлә дедиләр: «Биз инсанлара јох, һөкмдарымыз Аллаһа итаәт етмәлијик» (Һәв. 5:29). Һәтта дөјүлсәләр дә, тәлаша дүшмәдиләр. Чүнки билирдиләр ки, Јеһова онларын тәрәфиндәдир вә онлардан разыдыр. Буна ҝөрә дә мүждәни тәблиғ етмәјә давам етдиләр (Һәв. 5:40—42). Ејнилә, Стефан өлүмлә үз-үзә дуранда дахилиндә о гәдәр сакитлик вар иди ки, үзү мәләк үзүнә бәнзәјирди (Һәв. 6:12—15). Чүнки Јеһованын ондан разы олдуғуна әмин иди.

12. 1 Бутрус 3:14 вә 4:14 ајәләринә әсасән, тәгибләрлә үзләшәркән нәјә ҝөрә хошбәхт ола биләрик?

¹² Һәвариләр Јеһованын онларла олдуғунун ајдын сүбутуну ҝөрүрдүләр: Јеһова онлара мөҹүзәләр ҝөстәрмәк габилијјәти вермишди (Һәв. 5:12—16; 6:8). Јеһова бу ҝүн бизә белә габилијјәт вермәсә дә, Кәламы васитәсилә архајын едир ки, салеһлик уғрунда әзаб чәкәркән хошбәхт ола биләрик, чүнки биздән мәмнундур вә руһу үзәримиздәдир. (1 Бутрус 3:14; 4:14 ајәләрини охујун.) Она ҝөрә дә ҝәләҹәкдә тәгибләрлә үзләшәркән неҹә давранаҹағымыза ҝөрә нараһат олмагданса, јахшы олар ки, инди диггәтимизи Јеһованын бизә гуртулуш вермәјә гадир олдуғуна  әминлијимизи неҹә артыра биләҹәјимизә ҹәмләјәк. Илк шаҝирдләр кими, биз дә Иса Мәсиһин вәдинә етибар етмәлијик: «Мән сизин дилинизә елә сөзләр гојаҹағам, сизә елә һикмәт верәҹәјәм ки, дүшмәнләриниз сизә бата билмәјәҹәк, сөзүнүзүн габағында сөз дејә билмәјәҹәк». Бизә белә бир зәманәт верилиб: «Дөзүмлә һәјатынызы хилас едәҹәксиниз» (Лука 21:12—19). Бир шеји дә унутмајын: Јеһова өләнә гәдәр садиг галан хидмәтчиләри һагда ән хырда тәфсилатлары белә јадында сахлајыр ки, онлары һәјата гајтарсын.

13. Садиглијини горумајан вә Јеһоваја етибар етмәјән инсанларын нүмунәсини арашдырмаг нәјә ҝөрә лазымдыр?

¹³ Мүгәддәс Китабда сакитлијини горумајан вә Јеһоваја етибар етмәјән инсанлардан да данышылыр. Бу пис нүмунәләр һагда охумаг онларын сәһвләрини тәкрарламамаға көмәк едәҹәк. Мәсәлән, Јәһуда падшаһы олан Асанын үстүнә бөјүк бир гошун јүрүш етмишди. Аса падшаһ Јеһоваја етибар етдији үчүн Јеһова она гәләбә нәсиб етди (2 Салн. 14:9—12). Амма сонралар Исраил падшаһы Баша гат-гат кичик ордусу илә Асаја гаршы чыханда о, хилас үчүн Јеһоваја үз тутмады. Бу дәфә о, Арам падшаһына гызыл-ҝүмүш ҝөндәриб, ондан көмәк истәди (2 Салн. 16:1—3). Һәмчинин Аса өлүмүнүн сонуна јахын хәстә јатағына дүшәндә дә көмәк үчүн Јеһоваја үз тутмады (2 Салн. 16:12).

14. Асанын сәһвләриндән һансы ибрәт дәрсини ҝөтүрүрүк?

¹⁴ Әввәл-әввәл Аса проблемлә үзләшәндә Јеһовадан көмәк истәјирди. Амма сонрадан Јеһоваја ҝүвәнмәк әвәзинә, мәсәләләри өзү һәлл етмәјә башлады. Илк бахышдан Аса падшаһын Исраилә гаршы чыхмаг үчүн Арам падшаһына үз тутмасы ағлабатан ҝөрүнә биләрди. Амма онун наил олдуғу сүлһ чох чәкмәди. Јеһова пејғәмбәр васитәсилә она белә деди: «Сән Аллаһын Јеһоваја јох, Арам падшаһына архаландығын үчүн Арам падшаһынын ордусу сәнин әлиндән гуртулду» (2 Салн. 16:7). Биз дә проблемләримизин һәллиндә өзүмүзә архаланмагдан еһтијат етмәлијик. Дүшүнмәмәлијик ки, Јеһованын Кәламына үз тутуб рәһбәрлик ахтармаға лүзум јохдур. Һәтта вәзијјәт тәҹили олса белә, сакитлијимизи горујуб, Јеһоваја ҝүвәнмәлијик. Онда О бизә дүзҝүн гәрар вермәјә көмәк едәҹәк.

15. Мүгәддәс Китабы мүталиә едәркән нә едә биләрик?

¹⁵ 4) Мүгәддәс Китабдан ајәләр әзбәрләјин. Мүталиә заманы сакитлији горумағын вә Јеһоваја етибарын ваҹиблијини ҝөстәрән ајәләр гаршыныза чыханда чалышын онлары әзбәрләјин. Бунун үчүн ајәләри уҹадан охумаг, јахуд бир јерә гејд едиб, тез-тез нәзәрдән кечирмәк олар. Јеһова Јушәјә бујурмушду ки, Төвраты алчаг сәслә охусун. Бунун сајәсиндә о, һикмәтлә һәрәкәт едәҹәкди, ону горхуја салаҹаг вәзијјәтләр гаршысында ҹәсур олаҹагды (Јуш. 1:8, 9). Ејнилә, Аллаһын Кәламындакы ајәләр сизә дә көмәк едә биләр. Онларын сајәсиндә сиз адәтән нараһатлыг вә горху кечирдијиниз вәзијјәтләрдә гәлб раһатлығынызы горуја биләҹәксиниз (Зәб. 27:1—3; Мәс. 3:25, 26).

16. Јеһова сакитлијимизи горумағымыза вә Она етибар етмәјимизә јығынҹаг васитәсилә неҹә көмәк едир?

¹⁶ 5) Аллаһын халгы илә јахын олун. Јеһова баҹы-гардашлар васитәсилә бизә сакитлијимизи горумаға вә Она етибар етмәјә көмәк едир. Јығынҹаг ҝөрүшләримиздә  сәһнәдән ешитдијимиз фикирләрин, баҹы-гардашларын вердији шәрһләрин вә руһландырыҹы үнсијјәтин бизә бөјүк фајдасы вар (Ибр. 10:24, 25). Һәмчинин јығынҹагдакы јахын достумуза үрәјимизин дәрдини ачмаг да бизи чох руһландыра биләр. Достумузун сөјләдији хош сөзүн нараһатлығымызын азалмасында әвәзсиз ролу ола биләр (Мәс. 12:25).

17. Ибраниләрә 6:19 ајәсинә әсасән, үмидимиз чәтин вәзијјәтләр гаршысында мөһкәм галмағымыза неҹә көмәк едир?

¹⁷ 6) Үмидинизи мөһкәмләндирин. Үмидимиз ҝәми лөвбәри кими һәјатымызын кешмәкешли, тәлатүмлү анларында мөһкәм галмағымыза көмәк едир. (Ибраниләрә 6:19 ајәсини охујун.) Јеһованын ҝәләҹәклә бағлы вердији вәд һагда дүшүнүн. Һәмин вахт ҝәрҝинлик јарадан вәзијјәтләр олмајаҹаг (Әшј. 65:17). Бир дүшүнүн, сүлһүн һөкм сүрәҹәји јени дүнјада артыг сизи тәлаша салан һеч бир вәзијјәтлә үзләшмәјәҹәксиниз (Мик. 4:4). Һәмчинин јени дүнја барәдә башгалары илә данышанда да үмидиниз мөһкәмләнир. Тәблиғ вә шаҝирд һазырламаг ишиндә әлиниздән ҝәләни един. Бунун сајәсиндә сиз үмидинизи ахырадәк мөһкәм сахлајаҹагсыныз (Ибр. 6:11).

18. Ҝәләҹәкдә бизи һансы чәтинликләр ҝөзләјир, онлара синә ҝәрмәјә бизә нә көмәк едәҹәк?

¹⁸ Бу дүнјанын сону јахынлашдыгҹа нараһатлығымыза сәбәб олан проблемләр даһа да артаҹаг. 2021-ҹи илин ајәси бизә проблемләрә синә ҝәрмәјә вә сакитлијимизи горумаға көмәк едә биләр. Әлбәттә ки, буна өз ҝүҹүмүзә јох, Јеһоваја етибар сајәсиндә наил ола биләрик. Ҝәлин ил бојунҹа Јеһованын нөвбәти вәдинә иманымызы әмәлдә ҝөстәрәк: Сакитлик вә етибар сизин ҝүҹүнүз олаҹаг (Әшј. 30:15).