Ганунун тәкрары 9:1—29
9 Динлә, еј Исраил! Сиз өзүнүздән бөјүк, өзүнүздән ҝүҹлү халглары говмаг, онларын мөһтәшәм, истеһкамлары ҝөјләрә дирәнән шәһәрләрини әлә кечирмәк үчүн Иорданы кечмәк үзрәсиниз.+
2 О халгларын адамлары, Анаг оғуллары+ ҹүссәли, һүндүр адамлардыр. Буну јахшы билирсиниз. Өзүнүз дә ешитмисиниз ки, онлар һаггында: “Кимин Анаг оғулларынын гаршысына чыхмаға һүнәри чатар?” — дејирләр.
3 Амма билин ки, Аллаһыныз Јеһова сизин гаршынызда ҝедәҹәк.+ О јандырыб-јахан аловдур,+ онларын һамысыны күлә дөндәрәҹәк. Ҝөзләринизин өнүндә онлары мәғлуб едәҹәк вә сиз Јеһованын вәд етдији кими, тез бир заманда онларын торпағыны тутаҹаг, өзләрини исә мәһв едәҹәксиниз.+
4 Аллаһыныз Јеһова онлары өнүнүздән гованда үрәјиниздә: “Јеһова бизи салеһ олдуғумуз үчүн ҝәтириб бу торпаға саһиб едиб”, — дејә фикирләшмәјин.+ Јох, бу халгларын шәр әмәлләринә ҝөрә Јеһова онлары сизин өнүнүздән говур.+
5 О торпағы тутмағыныз салеһ олдуғунуза, үрәјинизин дүзлүјүнә ҝөрә дејил. Әксинә, Аллаһыныз Јеһова шәр әмәлләринә ҝөрә о халглары өнүнүздән говур.+ Һәм дә Јеһова буну улу бабаларыныз Ибраһимә,+ Исһага+ вә Јагуба+ ичдији анда ҝөрә едир.
6 Билин ки, Аллаһыныз Јеһованын бу ҝөзәл дијары сизә мүлк олараг вермәјинә сәбәб сизин салеһлијиниз дејил, әслиндә, сиз дикбаш халгсыныз.+
7 Аллаһыныз Јеһованы сәһрада неҹә гәзәбләндирдијинизи һеч вахт јадыныздан чыхармајын.+ Мисирдән чыхдығыныз ҝүндән бу јерә ҝәлиб чатанадәк Јеһоваја аси олдунуз.+
8 Һәтта Һурибдә дә Јеһованы гәзәбләндирдиниз. Онда Јеһова елә гәзәбләнмишди ки, аз гала сизи мәһв едәҹәкди.+
9 Мән даш лөвһәләри, Јеһованын сизинлә бағладығы әһдин лөвһәләрини алмаг үчүн даға галхыб гырх ҝүн-гырх ҝеҹә аҹ-сусуз орада галмышдым.+
10 Јеһова Өз әли илә үстүндә јаздығы ики даш лөвһәни мәнә верди. О лөвһәләрин үстүндә дағын әтәјиндә топлашдығыныз ҝүн Јеһованын аловун ичиндән сизә дедији сөзләр јазылмышды.+
11 Гырх ҝүн-гырх ҝеҹәнин тамамында Јеһова ики даш лөвһәни, әһд лөвһәләрини мәнә верди.
12 Сонра Јеһова деди: “Тез ол, дүш ашағы. Мисирдән чыхардығын халг рәзиллик едир.+ Бујурдуғум јолдан јаман тез дөндүләр. Одур, өзләри үчүн төкмә бүт дүзәлдибләр”.+
13 Сонра Јеһова мәнә деди: “Ҝөрүрәм, бу халг дикбаш халгдыр.+
14 Бурах онлары мәһв едим, ҝөјләр алтындан адларыны силим, сәндән исә онлардан да ҝүҹлү, онлардан да бөјүк бир халг јарадым”.+
15 Мән дағдан ендим. Дағ од тутуб јанырды.+ Әһд лөвһәләри дә әлимдә иди.+
16 Ҝөрдүм ки, Аллаһыныз Јеһоваја гаршы ҝүнаһ етмисиниз. Өзүнүз үчүн төкмә дана дүзәлтмисиниз. Јеһованын бујурдуғу јолдан чох тез дөнмүшдүнүз.+
17 Онда мән әлимдәки ики даш лөвһәни ҝөзүнүзүн габағында јерә чырпыб парча-парча еләдим.+
18 Сонра биринҹи дәфә олдуғу кими, јерә дөшәниб гырх ҝүн-гырх ҝеҹә Јеһованын өнүндә сәрили галдым. Етдијиниз ҝүнаһа ҝөрә — Јеһованын ҝөзүндә шәр иш тутуб Ону тәһгир етдијинизә ҝөрә нә ағзыма чөрәк алдым, нә дилимә су вурдум.+
19 Јеһованын күкрәјән гәзәби, сизи мәһв етмәк истәмәси+ мәни горхуја салмышды. Амма Јеһова бу дәфә дә мәним сөзүмү јерә салмады.+
20 Јеһова Һаруна елә һирсләнмишди ки, ону өлдүрмәк истәјирди.+ Мән онда Һарун үчүн дә јалварыб-јахардым.
21 Сонра сизин ҝүнаһ едиб дүзәлтдијиниз дананы+ јандырдым, әзиб тоза дөндәрдим вә дағдан ахан чаја ахытдым.+
22 Сиз Тәбирәдә+, Масаһда+ вә Һәбрут-Һәттәвада+ да Јеһованы гәзәбләндирмишдиниз.
23 Јеһова: “Галхын, сизә верәҹәјим дијара саһиб олун!” — дејиб Гәдис-Барнидән+ сизи ҝөндәрәндә јенә дә Аллаһыныз Јеһованын әмриндән чыхдыныз+, Она иман ҝәтириб итаәт етмәдиниз.+
24 Мән сизи таныјандан сиз Јеһоваја асилик едирсиниз.
25 Беләҹә, мән гырх ҝүн-гырх ҝеҹә Јеһованын өнүндә јерә сәрили галдым,+ чүнки Јеһова демишди ки, сизи мәһв едәҹәк.
26 Јеһоваја јалварыб дејирдим: “Еј Күлли-Ихтијар Јеһова, нә олар, мәһв етмә халгыны. Мәхсуси халгына+, әзәмәтинлә гуртардығын, ҝүҹлү әлинлә Мисирдән чыхардығын бу ҹамаата рәһмин ҝәлсин.+
27 Гулун Ибраһими, Исһагы, Јагубу+ јадына сал. Бу халгын дикбашлығына, асилијинә, ҝүнаһына нәзәр салма.+
28 Јохса бизи чыхардығын өлкәнин ҹамааты дејәҹәк ки, Јеһова онлары вәд етдији дијара апара билмәди. Онлара нифрәт етдији үчүн апарыб сәһрада гырды.+
29 Ахы бу ҹамаат Сәнин халгындыр,+ бөјүк гүдрәтинлә, гүввәтли әлинлә Мисирдән чыхардығын әмлакындыр”.+