Марк 4:1—41
4 Иса јенидән дәниз кәнарында вәз етмәјә башлады. Онун јанына чохлу адам јығышды, буна ҝөрә дә о, гајыға миниб саһилдән бир аз араланды. Ҹамаат исә саһилдә дајанмышды.+
2 Иса мәсәлләр+ чәкәрәк онлара чох шеј өјрәтмәјә башлады. О деди:+
3 «Гулаг асын. Бир әкинчи тохум сәпмәјә чыхды.+
4 Тохум сәпәркән тохумлардан бәзиси јол кәнарына дүшдү вә гушлар ҝәлиб онлары дәнләди.
5 Бәзиси торпағы аз олан дашлыға дүшдү вә торпаг дәрин олмадығындан дәрһал ҹүҹәрди.+
6 Амма ҝүнәш чыханда солду вә көкү олмадығындан гуруду.
7 Бәзи тохумлар тиканлыға дүшдү. Тикан коллары бөјүјүб онлары боғду вә онлар бар вермәди.+
8 Амма бәзиләри мүнбит торпаға дүшдү, ҹүҹәриб бој атды вә бар ҝәтирди. Онлар отузгат, алтмышгат вә јүзгат бар вердиләр».+
9 Иса әлавә етди: «Гулағы олан гој ешитсин!»+
10 Иса тәк галанда он ики һәвариси вә әтрафында оланлар чәкдији мәсәлләрлә бағлы ону сорғу-суала тутдулар.+
11 Иса онлара деди: «Сизә Аллаһын Падшаһлығынын мүгәддәс сиррини+ баша дүшмәк әнамы верилиб, амма галанларына һәр шеј мәсәлләрлә сөјләнилир ки,+
12 бахсалар да бир шеј ҝөрмәсинләр, ешитсәләр дә, бир шеј анламасынлар, һеч вахт ҝери дөнмәсинләр вә Аллаһ онлары бағышламасын».+
13 Сонра әлавә етди: «Бу мәсәли баша дүшмүрсүнүзсә, о бириләрини неҹә баша дүшәҹәксиниз?
14 Әкинчи Аллаһын сөзүнү сәпир.+
15 Бәзи адамларда сөз, санки, јол кәнарында әкилиб. Онлар сөзү ешидәр-ешитмәз Шејтан ҝәлиб+ үрәкләринә сәпилмиш тохуму апарыр.+
16 Диҝәр адамларда сөз, санки, дашлыгда әкилиб. Онлар сөзү ешидән кими севинҹлә гәбул едирләр.+
17 Амма көк атмадығындан узун мүддәт дура билмирләр. Аллаһын сөзүнә ҝөрә чәтинлик, тәгиб башлајан кими онлар имандан дөнүрләр.
18 Бәзиләриндә исә тохум, санки, тиканлыға дүшүб. Онлар сөзү ешидир,+
19 лакин бу зәманәнин гајғылары+, вар-дөвләтин алдадыҹы гүввәси+ вә диҝәр арзулар+ үрәкләринә јол тапыр, сөзү боғур вә сөз бар ҝәтирмир.
20 Нәһајәт, мүнбит торпагда әкиләнләр Аллаһын сөзүнү динләјән, ону сидги-үрәкдән гәбул едән адамлардыр. Белә адамлар отузгат, алтмышгат вә јүзгат бәһрә верирләр».+
21 Иса сөзүнә давам етди: «Һеч ҝөрмүсүнүз ки, чырағы сәбәтин вә ја чарпајынын алтына гојсунлар? Ону чырагдана гојурлар, елә дејил?+
22 Бәли, елә бир сирр јохдур ки, әввәл-ахыр үстү ачылмасын, елә бир ҝизли шеј јохдур ки, ашкар олунмасын.+
23 Гулағы олан гој ешитсин».+
24 Сонра Иса деди: «Сөзләримә диггәтлә гулаг асын.+ Һансы өлчү илә өлчүрсүнүзсә, о өлчү илә дә сизә өлчәҹәкләр, һәлә үстүнә әлавә дә едәҹәкләр.
25 Кимдә варса, она даһа чох вериләҹәк,+ кимдә јохдурса, әлиндәки дә алынаҹаг».+
26 Иса давам етди: «Аллаһын Падшаһлығы бир адамын торпаға тохум сәпмәсинә бәнзәјир.
27 О, ҝеҹә јатыр, сәһәр дурур, амма тохум неҹә ҹүҹәрир, неҹә бөјүјүр, о адамын хәбәри олмур.
28 Торпаг өз-өзүнә тәдриҹән бар јетишдирир: әввәлҹә ҝөвдә ҹүҹәрир, сонра сүнбүл әмәлә ҝәлир, нәһајәт, сүнбүлдә дән јетишир.
29 Мәһсул јетишән кими адам орағы ишә салыр, чүнки бичин вахты јетишиб».
30 Иса сөзүнә давам етди: «Аллаһын Падшаһлығыны нәјә бәнзәдәк? Ону һансы мәсәллә изаһ едәк?
31 Падшаһлыг хардал тохумуна бәнзәјир. Әкин вахты тохумлар арасында ән хырдасы одур.+
32 Амма јерә әкиләндән сонра бөјүјүб бүтүн бостан биткиләри арасында ән јекәси олур вә гол-будаг атыр, ҝөј гушлары да ҝәлиб онун көлҝәсиндә јува салырлар».
33 Иса буна бәнзәр чохлу мәсәл+ чәкир, Аллаһын сөзүнү онлара гавраја билдикләри гәдәр данышырды.
34 Бәли, Иса данышанда һәмишә мәсәл чәкирди, лакин сонра һәр шеји тәкликдә шаҝирдләринә изаһ едирди.+
35 Һәмин ҝүн ахшам дүшәндә Иса онлара деди: «Ҝәлин о бири саһилә үзәк».+
36 Онлар ҹамааты јола саландан дәрһал сонра Исаны гајыгла апардылар. Орада башга гајыглар да вар иди.+
37 Бирдән ҝүҹлү фыртына гопду. Амансыз далғалар гајыға чырпылырды. Гајыг батмаг үзрә иди.+
38 Иса бу заман гајығын дал тәрәфиндә башыны балыша гојуб јатмышды. Шаҝирдләр ону ојадыб дедиләр: «Устад, мәҝәр сәнин веҹинә дејил ки, биз батырыг?»
39 Иса дуруб күләји рам етди вә дәнизә әмр етди: «Дајан! Сакит ол!»+ Күләк јатды, әтрафа дәрин сүкут чөкдү.
40 О, шаҝирдләрә деди: «Нијә горхдунуз? Һәлә дә иманыныз јохдур?»
41 Онлар бәрк горхмушдулар вә бир-бириләринә дејирдиләр: «Бу кимдир ки, һәтта күләк дә, дәниз дә она итаәт едир?»+