Һизгијал 14:1—23
14 Исраил ағсаггалларындан бир нечәси ҝәлиб гаршымда отурду.+
2 Бу вахт мәнә Јеһованын сөзү назил олду:
3 «Еј бәни-адәм, бу адамлар өз ијрәнҹ бүтләриндән әл чәкән дејилләр. Онлар ҹамааты ҝүнаһа батыран, бүдрәдән даш гојублар. Нәјә ҝөрә онлара ҹаваб верим?+
4 Онлара де ки, Күлли-Ихтијар Јеһованын сөзү будур: “Өз ијрәнҹ бүтләриндән әл чәкмәк истәмәјән вә бүдрәдән даш гојуб ҹамааты ҝүнаһа сүрүкләјән исраилли ҝәлиб пејғәмбәрә суал етсә, Мән Јеһова она ијрәнҹ бүтләринин чохлуғуна мүвафиг ҹаваб верәҹәјәм.
5 Исраил әһлинин үрәјинә горху салаҹағам, чүнки һамысы Мәндән үз дөндәриб ијрәнҹ бүтләринин далынҹа ҝедибләр”.+
6 Буна ҝөрә Исраил евинә де ки, Күлли-Ихтијар Јеһова белә дејир: “Ијрәнҹ бүтләринизи атыб ҝери дөнүн, мурдар әмәлләриниздән әл чәкин.+
7 Әҝәр һансыса исраилли, јахуд Исраилдә јашајан јаделли Мәндән узаглашыб ијрәнҹ бүтләрә бағланса вә ҹамааты ҝүнаһа батыран, бүдрәдән даш гојса, сонра да ҝәлиб Мәним пејғәмбәримә мүраҹиәт етсә,+ онун ҹавабыны Мән Јеһова верәҹәјәм, шәхсән Өзүм.
8 Һәмин адамдан үзүм дөнәҹәк. Ону һамыја ибрәт дәрси едәҹәјәм, дилләрдә зәрби-мәсәл олаҹаг, халгымын ичиндән јох едәҹәјәм.+ Онда биләҹәкләр ки, Мән Јеһовајам”.
9 “Анҹаг пејғәмбәр алданыб ҹаваб верәрсә, демәли, һәмин пејғәмбәри аздыран Мән Јеһовајам.+ Әлими она гаршы галдырыб ону халгым Исраилин арасындан јох едәҹәјәм.
10 Онлар өз ҝүнаһларынын алтыны чәкәҹәкләр. Пејғәмбәрин јанына ҝәлән дә, пејғәмбәр дә ејни дәрәҹәдә ҝүнаһкар сајылаҹаг.
11 Бу, ондан өтрүдүр ки, Исраил әһли бир дә Мәним јолумдан сапмасын вә ҝүнаһ ишләрлә өзүнү ләкәләмәсин. О заман онлар Мәним халгым олаҹаг, Мән дә онларын Аллаһы”.+ Күлли-Ихтијар Јеһова белә бәјан едир».
12 Мәнә јенә Јеһованын сөзү назил олду:
13 «Еј бәни-адәм, әҝәр һансыса өлкә хәјанәт едиб Мәнә гаршы ҝүнаһ етсә, әлими она гаршы галдырыб әрзаг еһтијатыны мәһв едәҹәјәм,+ үстүнә аҹлыг ҝөндәрәҹәјәм.+ Өлкәдә нә бир адам галаҹаг, нә дә бир һејван.+
14 “Һәтта бу үч нәфәр — Нуһ+, Дәнјал+ вә Әјјуб+ да орада олсајды, онлар салеһликләри сајәсиндә јалныз өз ҹанларыны гуртара биләрдиләр”,+ — Күлли-Ихтијар Јеһова белә бәјан едир.
15 “Јахуд өлкәјә јыртыҹы һејванлар ҝөндәрсәјдим, онлар өлкәнин адамларыны гырсајдылар вә өлкә һејванларын горхусундан инсанларын ајаг басмадығы харабалыға чеврилсәјди,+ —
16 Күлли-Ихтијар Јеһова бәјан едир, — варлығыма анд олсун, һәтта о үч нәфәр белә, орада олсајды, онлар нә оғулларыны, нә дә гызларыны хилас едә билмәздиләр. Јалныз өз ҹанларыны гуртарардылар. Өлкә исә бош галарды”.
17 “Јахуд өлкәнин үстүнә гылынҹ ҝөндәриб+ “гој гылынҹ өлкәни тар-мар етсин” десәјдим, орадан адамларын да, һејванларын да көкүнү кәссәјдим,+ —
18 Күлли-Ихтијар Јеһова бәјан едир, — варлығыма анд олсун, һәтта бу үч нәфәр белә, орада олсајды, онлар нә оғулларыны, нә дә гызларыны хилас едә билмәздиләр. Јалныз өз ҹанларыны гуртарардылар”.
19 “Јахуд һәмин өлкәјә хәстәлик ҝөндәрсәјдим,+ гәзәбими үстләринә төкүб онлары ганларына гәлтан еләсәјдим, орадан инсанларын да, һејванларын да көкүнү кәссәјдим, —
20 Күлли-Ихтијар Јеһова бәјан едир, — варлығыма анд олсун, һәтта Нуһ+, Дәнјал+ вә Әјјуб+ да орада олсајды, онлар нә оғулларыны, нә дә гызларыны хилас едә билмәздиләр. Салеһликләри сајәсиндә јалныз өз ҹанларыны гуртарардылар”.+
21 Күлли-Ихтијар Јеһова белә бәјан едир: “Адамларын вә һејванларын көкүнү кәсмәк үчүн+ Јерусәлимә бу дөрд ҹәзаны+ — гылынҹы, аҹлығы, јыртыҹы һејванлары вә хәстәликләри+ ҝөндәрәндә мәһз белә олаҹаг.
22 Лакин оғул-гызларыныздан бәзиләри сағ галаҹаг вә орадан чыхарылаҹаг.+ Онлар јаныныза ҝәләҹәкләр. Сиз онларын һәрәкәтләрини, әмәлләрини ҝөрәндә Јерусәлимин мүсибәтинә, онун башына ҝәтирдијим бәлалара ҝөрә тохтаглыг тапаҹагсыныз”.
23 “Онларын һәрәкәтләрини, әмәлләрини ҝөрәндә тохтаглыг тапаҹагсыныз вә биләҹәксиниз ки, Мән бу шејләри онун башына сәбәбсиз јерә ҝәтирмәмишәм”.+ Күлли-Ихтијар Јеһова белә бәјан едир».
