Һизгијал 39:1—29
39 “Еј бәни-адәм, пејғәмбәрлик едиб Јәҹуҹа+ сөјлә ки, Күлли-Ихтијар Јеһова дејир: “Мән сәнә гаршыјам, еј Јәҹуҹ, еј Мәшәг вә Тубалын баш әмири!+
2 Сәни јолундан гајтараҹағам, узаг шималдан чыхарыб+ Исраил дағларына апараҹағам.
3 Сол әлиндән каманы, сағ әлиндән охлары вуруб салаҹағам.
4 Сән дә, гошунларын да, сәнинлә олан халглар да Исраил дағларында мәһв олаҹагсыныз.+ Сәни һәр ҹүр јыртыҹы гуша, вәһши һејвана јем едәҹәјәм”.+
5 “Сән чөлдә мәһв олаҹагсан,+ чүнки буну Мән дедим”, — бәјан едир Күлли-Ихтијар Јеһова.
6 “Мәҹуҹун вә адаларда әмин-аманлыг ичиндә јашајанларын үстүнә од ҝөндәрәҹәјәм.+ О заман биләҹәкләр ки, Мән Јеһовајам.
7 Халгым Исраилин арасында мүгәддәс адымы таныдаҹағам, даһа гојмајаҹағам, адыма ләкә вурсунлар. Халглар биләҹәкләр ки, Мән Јеһовајам,+ Исраилдә Мүгәддәс Аллаһам”.+
8 “Бәли, пејғәмбәрлик јеринә јетмәлидир, јетәҹәк дә, — дејир Күлли-Ихтијар Јеһова. — Мән бу ҝүн һаггында хәбәр вермишәм.
9 Исраил шәһәрләринин сакинләри чыхыб силаһларла од галајаҹаглар, бөјүк вә кичик галханлары, ох-каманлары, топпузлары* вә низәләри ода атаҹаглар. Онларла једди ил од галајаҹаглар.+
10 Чөлдән чырпы јығмаг, мешәдән одун ҝәтирмәк лазым ҝәлмәјәҹәк, чүнки силаһларла од галајаҹаглар”.
“Онлары гарәт едәнләри гарәт, талан едәнләри талан едәҹәкләр”, — бәјан едир Күлли-Ихтијар Јеһова.
11 “О ҝүн Јәҹуҹа+ Исраилдә, дәнизин шәрг тәрәфиндән кечәнләрин дәрәсиндә дәфн јери верәҹәјәм, о јер јолчуларын јолуну кәсәҹәк. Орада Јәҹуҹ вә онунла олан издиһам басдырылаҹаг. О јер Һәмун-Јәҹуҹ дәрәси*+ адланаҹаг.
12 Исраил еви једди ај әрзиндә онлары басдырыб өлкәни тәмизләјәҹәк.+
13 Бүтүн өлкә әһли онлары дәфн етмәклә мәшғул олаҹаг вә бунунла ад-сан газанаҹаг. О ҝүн Мән Өзүмү шәрәфләндирәҹәјәм”,+ — Күлли-Ихтијар Јеһова бәјан едир.
14 “Ҹамаата өлкәни сәрасәр долашмаг, өлкәни тәмизләмәк үчүн орталыгда галан ҹәсәдләри дәфн етмәк тапшырылаҹаг. Ахтарышлар једди ај давам едәҹәк.
15 Өлкәни долашанлар инсан сүмүјү ҝөрдүкләри јердә нишан гојаҹаглар. Сонра гәбиргазанлар онлары Һәмун-Јәҹуҹ дәрәсиндә+ басдыраҹаглар.
16 Орада һәмчинин Һәмунаһ* адлы шәһәр олаҹаг. Беләҹә, ҹамаат өлкәни тәмизләјәҹәк”.+
17 Сәнә исә, еј бәни-адәм, Күлли-Ихтијар Јеһова белә дејир: “Һәр ҹүр гуша, вәһши һејвана сөјлә: “Топлашыб ҝәлин. Сизин үчүн һазырладығым гурбанын, Исраил дағларындакы бөјүк гурбанын әтрафына топлашын.+ Сиз әт јејиб ган ичәҹәксиниз.+
18 Иҝидләрин әтини јејиб, дүнја рәһбәрләринин ганындан ичәҹәксиниз. Онларын һамысы Башанын бәсләнмиш һејванлары — гоч, гојун, кечи, өкүздүрләр.
19 Сизин үчүн һазырладығым гурбанын пијиндән дојунҹа јејиб, ганындан сәрхош оланадәк ичәҹәксиниз”.
20 Күлли-Ихтијар Јеһова бәјан едир: “Сиз атларын, арабачыларын, иҝидләрин вә дөјүшчүләрин әтини јејиб сүфрәмдә дојаҹагсыныз”.+
21 “Мән халглар арасында иззәтими ҝөстәрәҹәјәм. Онлар һөкмүмүн иҹрасыны вә голумун ҝүҹүнү ҝөрәҹәкләр.+
22 О ҝүндән Исраил еви биләҹәк ки, Мән онларын Аллаһы Јеһовајам.
23 Онда халглар биләҹәк ки, Исраил еви өз ҝүнаһына ҝөрә сүрҝүнә апарылды, чүнки Мәнә бивәфа чыхмышдылар.+ Буна ҝөрә дә Мән онлардан үз дөндәрдим,+ онлары дүшмәнләринә тәслим етдим,+ һамысы гылынҹдан кечирилди.
24 Мурдарлыгларына вә асиликләринә ҝөрә онлара ҹәза вердим. Онлардан үз дөндәрдим”.
25 Күлли-Ихтијар Јеһова дејир: “Мән Јагубун әсир дүшмүш балаларыны ҝери гајтараҹағам,+ бүтүн Исраил евинә рәһм едәҹәјәм,+ адымын мүгәддәслијини горујаҹағам.+
26 Вәфасызлыгларына ҝөрә алчалдыгдан сонра+ өз јурд-јуваларында динҹ јашајаҹаглар, онлары горхудуб-һүркүдән олмајаҹаг.+
27 Онлары сәпәләндикләри диҝәр халглар арасындан ҝери гајтаранда, дүшмән өлкәләриндән топлајанда+ Өзүмү онларын арасында уҹалдаҹағам, халглар да буна шаһид олаҹаг”.+
28 “Онлары халглар арасына сүрҝүн едиб, сонра һамысыны бир нәфәр кими јурд-јувасына гајтаранда биләҹәкләр ки, Мән онларын Аллаһы Јеһовајам.+
29 Бир дә онлардан үз дөндәрмәјәҹәјәм,+ чүнки Исраил евинин үзәринә руһуму төкәҹәјәм”,+ — Күлли-Ихтијар Јеһова бәјан едир».
