Téé mam ma nlama bôk. Bibel i nti mana maéba le: “Wan mambe mam ma nlôôha ba nseñ.” (Filipi 1:10) Jon, tila mam ma yé we nseñ, tole i mam ma nlama pala bôña, tole gwobiba, u bigdaga le i mam ma yé we nseñ, kiki bo i oñ ndap, i ke i bôm inyu somb bijek, bebek ma nla bé ba mam ma nlama pala bôña. Ni le, i jam li nla nene le li nlama pala bôña, kiki bo i béñge ngim ntuk u ngwés i télé, i nla ba le li ta bé nseñ. *

Bôk u hoñol. Kaat i Ñañal 10:​10 i nkal le: “Ibale sélél i ntuu, ndi mut a hôl bé yo, a nlama sal ni ngui ngandak.” I nkônde ki le: “Ndi pék i nhôla i yônôs mam.” Bimbe biniigana di ñôt mu? I hôl nkwade woñ, hala wee bôk ndugi u hoñol i mam u nlama boñ kayéle u tibil gwélél ngéda yoñ. I mam u nla boñ i mbus ngéda, bii nduk mo ipañ, tole héya mam ma ta bé nseñ nano, ma ma nla je we ngéda ni ngui. Ibale i pam le, ngéda i ngi yii we inyule u mpala mal bôlô yoñ, baa u ta bé le u yoñ bôlô ipe, mu bibôlô u bak u kal le w’a sal i mbus ngéda? I ngéda u mbôk ndugi u hoñol, u ga pala mal bibôlô gwoñ, kiki mut bôlô nu pék nu a mbôk a hôl nkwade wé.

Pégbaha bañ niñ yoñ. Tjél i mam ma ta bé nseñ tole i mam ma nje we ngéda yañga. Ibale i bôt u nlama yuuga, tole bibôlô u nlama sal, bi nloo hihéga, hala a nla kônde we nduña yañga ni mélés maséé moñ.

Litiñha i yoñ makidik. “I mut a mbéñge kiki mbebi i nhôñ, a ga nwes bé mbôô; yak nu a nun ond a ga bumbul bé.” (Ñañal 11:4) Bimbe biniigana di ñôt mu? Litiñha i yoñ makidik li yé kiki mut wip nu a nip ndik bé ngéda yés bôlô, ndi yak matam ma bôlô yés. Nsalwom nu a mbem letee ngéda i ba ilam, bebek a ga sem bé mbôô tole a ga bumbul bé matam ma nson wé. Nlélém, di nla was le mam ma niñ ma ma mpémél bés ma tômbôs bés kayéle di yila ntén mut u u nyi bé mambe makidik a nla yoñ. Tole di nla hoñol le di bem yaga, letee di tehe le njel i nahap loñge loñge, di ntehe makas momasôna, iloole di nyoñ makidik. I yé ntiik le inyu makidik ma tôbôtôbô, di nlama tibil wan mam. Kaat Bingéngén 14:15 i nkal le: “Mut yihe a ntibil béñge i homa a mbiine kôô.” Ndi maliga ma yé le, ngandak makidik di nyoñ ma nla sôk ma ba malam kiki ma nla sôk ma ba mabe. —Ñañal 11:6.

Lem i yéñ boñ mam ngi hihôha. Kaat Yakôbô 3:​17 i nkal le: “Ndi pék i nlôl i ngii [tole i nlôl yak Nyambe] i . . . nai bé ni litehge jé li mam.” Maliga ma yé le i bana ngôñ i boñ mam i nya i nlôôha loñge i ta bé ibe! Ndi ngoo le, di yé di sômbôl lôôha boñ jam loñge le, li sôk li bep. Kiki hihéga, i mut a nigil hilémb hi mondo, a nlama neebe le a ga boñ dihôha, a nlama yi ki le a ga niglene mu dihôha di. Ndi i mut a gwé lem i yéñ boñ mam ngi hihôha, a ga bôdôl sehla ndik inyule a nhoñol a ga boñ dihôha —i lem i, i ga kéñ mahol mé. Jon i yé loñge i neebe minwaa nwés i ngim jam! Kaat Bingéngén 11:2 i nkal le: “I bôt ba nyi minwaa nwap ba gwé pék.” I bak ki le i mut a nyi minwaa nwé lôñni i mut a suhus nyemede, ba nhoñol bé ngandak inyu yap bomede, ba gwé yak lem i nol bomede hiol ngeñ ba mboñ ngim dihôha.

Litehge li kôli li bôlô ni li noi. “Ndék noi i yé nseñ iloo ngandak ndumbba nson ni linoñ mbebi.” (Ñañal 4:6) I bôt ba nuu bé bôlô, bomede ba nje bé to matam ma “ndumbba” yap. To ngéda to ngui ba gwé ha bé. Mut yeñge nye a mpohol “ngandak” noi, hala nyen yak nye a ñôbôs ngéda i i bak le i bane nye nseñ. Bibel i nti bés makénd i bana litehge li kôli: Sal ni ngui, i nlélém ngéda, u jek matam ma bôlô yoñ ni maséé. Maséé ma mon ma yé “likébla li Nyambe.”​—Ñañal 5:​19.

Tibil ke ’ilo. Ntila Bibel wada a bi kal le: “M’a nañal, me kee ’ilo ni nsañ.” (Tjémbi 4:8) Inyu tibil nôgda nyuu ni tibil hek pék, di nlama ke ’ilo juu bebee le ngeñ juem. Di nla kal le, ibale di nyoñ ngéda i ke ’ilo kiki i mbéda, hala a ga hôla bés i tibil bok mahoñol i ngim jam, boña wés a ga tééda ngandak, di ga kônde ki nigil. Ibale di nke bé ’ilo kiki i mbéda, hala a nla kéñ bés i tibil nigil, di ga boñ bé mam i nya i mbéda, di ga boñ dihôha, di palga unup.

Tjek mam u nla yônôs. “I yé nseñ le mut a kon maséé ni mam mis mé ma ntehe iloole a kahal yéñ mam a nla bé bana.” (Ñañal 6:9) Bimbe biniigana di ñôt mu? Mut nu a gwé pék a nwas bé le ngôñ a gwé yon i kahal éga nye, téntén i ngéda i ngôñ i i kôli bé, tole a nla bé yônôs yo. I gwom ba nhôñôs mu mbégdé inyu tinde bôt i somb gwo tole i pala kôhna moni, bi nlop bé nye. Inyule, a nigil i kon maséé ni mam a nla yônôs hanano, hala wee “mam mis mé ma ntehe.”

Wan matiñ ma niñ ma ma ñéga we. Matiñ u mpohol i noñ ma ga hôla we i yi jam li yé loñge ni li li yé nseñ. Ibale niñ yoñ i bak kiki likoñ, matiñ u mpohol i noñ mon ma nhôla likoñ li i yônôs i njômbi yoñ. Matiñ malam, ma nhôla we i tjek mam ma yé we nseñ i niñ ni i tibil gwélél ngéda yoñ hiki kel. Hee u nla léba i nya matiñ i? Ngandak bôt i nwan Bibel, ba nléba ki le pék i Bibel i nloo i mut binam huum.​—Bingéngén 2:6, 7.

Gwéha i nlama ba litiñ joñ li bisu bisu. Kaat Kolôsé 3:​14 i nkal le gwéha “yon i ñat toi bôt bobasôna i nya i yôni.” Di nla bé ba maséé, to bana ñem nwee, ibabé gwéha, téntén ikété lihaa. Ngim bôt i ntjél neebe i jam li, bebek inyule i jam li yé bo nseñ li yé linoñ nkus tole i bana bañga bôlô, ndi i nya bôt i, i ta bé maséé. Jon Bibel i ñunda le gwéha i yé litiñ li bisu bisu, i nsima ki gwéha ngandak ngélé.​—1 Korintô 13:​1-3; 1 Yôhanes 4:​8.

Yoñ ngéda inyu lédés maada moñ ni Djob. Mut wada, nu jôl li yé le Jeff, a bééna loñge nwaa, bon balam iba, biloñge bi mawanda, ni bôlô i i bé ti nye moni, mu kiki a bé sal ni lôk dokta. Ndi mu bôlô yé, a bé tehe bôt ba nok ndutu, a tehge ki bôt ba nwo. Jon a bé badba le: “Baa hala nyen niñ i nlama ba?” Kel yada a añ bikaat bi ntoñol Bibel, le Mbôgi Yéhôva i bi pémés, a léba ki mandimbhe malam mu.

Jeff a bi kal nwaa ni bon i mam a bé nigil, yak bo ba gwés mo. Hala nyen lihaa li, li bi bôdôl nigil Bibel, niñ yap i bi kônde lama, yigil i hôla yak bo i tibil gwélél ngéda yap ni pék. Yigil yap i Bibel i bi ti ki bo botñem ilam i niñ i boga ni boga ikété nkoñ ’isi ngi ndutu to nduña yo ki yo. —Masoola 21:​3, 4.

Hihéga hi Jeff i nhôñlaha bés i jam Yésu Kristô a bi kal: “Maséé ni bôt ba nyi le mam ma mbuu ma yé bo nseñ.” (Matéô 5:3) Baa u nla neebe i somb ndék ngéda inyu lédés maada moñ ni Djob? Ba nkwoog nkaa le, jam lipe li nloo bé li, inyu hôla we i tibil gwélél ngéda yoñ ni pék, ha inyu hilo hiada bé, ndi mu niñ yoñ yosôna.