1, 2. (a) Ni njel imbe ba nla hégha hiai hini ni ntonba u ba kokse le a kôli ni nyemb? (Béñge titii i bibôdle.) (b) Kii y’a ba bôña i mbus tjiba i hiai hini?

HÉGDA le jam lini. I ndap mok, ba yé pémés ntonba u u nyiba ni ngandak bôt, makôga ma bikei ma yibbaga mbus yé, mu kii batat ndap mok ba yé i kena nye, ba pôdhak nye makeñi le: “Bôk nyoo, a nwok mut unu!” Inyuki ba nkal nye hala? Tolakii ntonba mut u u yé yômi, u nen-ge mbôô, mbagi yé nyemb i bi pam behee. A yé kii bo le, a bi wo behee. *

² Di nla kal le nkon isi u len, u yé kiki ntonba mut unu. Nkoñ isi unu u bi kôs mbagi tjiba behee, a bak ki le, biyônôl bi mbagi ini bi gwé ni moo. Bibel i nkal le: “Ndi nkoñ isi u gwéa tagbe.” (1 Yôhanes 2:17) Mamélél ma hiai hini m’a set bé. Ndi mahéñha ma tôbôtôbô ma yé ipôla lisuk li ntonba unu ni mamélél ma hiai hini. I kel ba nol ntonba, bôt bahogi ba nla kal le ba nol bañ nye, ba pééna bikééhene bi, tole ba pide ipam linut li nsôk le bebek b’a ti  oda le ba nol ha bañ nye. Ndi inyu nkoñ isi unu, mbagi i tjiba yé i nlôl ni Nwet ngiiñda nu manjel mé momasôna ma téé sép. (Ndiimba Mbén 32:4) Ba ga yônôs mbagi i, ibabé set, to pééna yo ki yo i mba ha bé inyu yi too i téé sép tole to. Mbus biyônôl gwé, bihégél gwobisôna bi bi nhek pék bi ga neebe ni kiñ yada le: Hala a téé sép! Kinje hogbe!

3. Mambe mam makeñi ma-na m’a héñha ngéda Ane Djob y’a loo?

³ Ngéda ba nkal le “nkoñ isi u gwéa tagbe,” hala a ntihba yak kii? Ngandak gwom bi bôt ba nhoñol i len ini le bi yé siñ siñ tole bi ga mal bé, bi ga tagbe. Baa ñwin mbe u? To jam! Maliga, hala a yé litode jada mu “ñañ nlam u Ane” li nlôôha ba nseñ. (Matéô 24:14) Jon di wan kii i ga héñha ngéda Ane Djob y’a loo. Di ga tehe mam makeñi ma-na: Bibéba bi bôt, minlôñ mimbe, minson mimbe, ni mam ma nti bés ndutu i len ini. Inyu hiki jam mu, di ga wan (1) lelaa mam ma ma ntihba bés i len ini, (2) kii Yéhôva a’ boñ ni mam ma, ni (3) lelaa a’ héñha mo ni ma ma nlôôha ba malam.

4. Lelaa mam bibéba bi bôt bi mboñ len bi ntihba bés?

⁴ Lelaa mam bibéba bi bôt bi mboñ ma ntihba bés i len ini? Mbus le a bôn le kék ini i bé lama bana “ngéda y’a ba nledek kiyaga,” ñôma Paul a tila ki ni ngui i mbuu Djob le: “Ndi bôt babe, yak ni bajuñbaha bôt, b’a yémbi nyémbak, lakii ba nyôm, ndi ba yumhak ki bôt.” (2 Timôtéô 3:1-5, 13) Baa u nôgda le mbañ i i yé yon? Ngandak ikété yés i ma kôs mam mabe ma lôlak ni bibéba bi bôt. Bahogi ba nsôô bé le ba yé béba; bape ba yé bihéñba, ba ba nsôô mam ba mboñ, ba nen-ge bôt ba téé sép. To ibale bôt ba ba yé ngi boñ bés béba, maboñog map ma ntihba bés. Ñem u siida bés ngéda di nok bikuu ba nkand. Ngéda di ntehe lelaa bibéba bi bôt bi nsônha boñge ba wanda njonok, mimañ mi bôt, ni bôt bape ba ba gwé bé nsôñ bo, hala a nkônha bés woñi. Liboñog jap li mam li nene wengoñle ba ta bé bôt ba binam, le ba yé binuga, ni le pék i nlôl bo ni mimbuu mimbe. (Yakôbô 3:15) Masoda le, Bañga i Djob i nhéñha ñwin mbe u ni u nlam.

5. (a) Imbe pôla bibéba bi bôt bi ngi gwé? (b) Kii i ga ba lisuk li bibéba bi bôt bi bi ntjél héñha?

⁵ Kii Yéhôva a ga boñ? I len ini, Yéhôva a ngi tinak bibéba bi bôt pôla i héñha. (Yésaya 55:7) Tolakii i hiai hini hi mal kôhna mbagi tjiba, hiki mut mukété a yé ngi kôhna yé yé mbagi nsôk. Hiai hini hion hi mal kôhna mbagi tjiba. Ndi y’a ba lelaa inyu bôt ba ntjél héñha, ba kenek ni bisu i nit i hiai hini letee ni bibôdle bi njiiha keñi? Yéhôva a mbôn le a ga sas bibéba bi bôt hana isi mba ni mba. (Añ Tjémbi 37:10.) Bibéba bi bôt bi nla hoñol le i tjiba i, i ga tihba bé bo. Ngandak i bi nigil i sôô mam ba mboñ, kayéle ba bi meya ba keñgle bikééhene ni bikuu bi nlôl mu. (Hiôb 21:7, 9) Ndi Bibel i nhôñlaha bés le: “Inyule mis ma Nyambe ma nsie manjel ma mut; a nyimbe ki njañ yé yosôna. Jiibe li ta bé i het baboñ biyabda ba bak le ba solbene, to ngañgañ jiibe yaga.” (Hiôb 34:21, 22) Homa nye ki nye a sôli bé i mis ma Yéhôva Djob. Mut ngadla nye  ki nye a nla bé lôk nye, ngañgañ jiibe i ta bé i het mis ma Djob ma ta bé le ma tôp inyu tehe mam ma mbôña ikété. Mbus Armaguédôn, di ga béñge i het bibéba bi bôt bi bé, ndi di ga tehe ha bé bo. Ba ga tjiba mba ni mba!​—Tjémbi 37:12-15.

6. (a) Mbus tjiba i bibéba bi bôt bonje b’a kôdôl hisi, (b) Inyuki ñwin nlam u?

⁶ Mbus tjiba i bibéba bi bôt, bonjee b’a kôdôl hisi? Yéhôva a nti bés mbônga nlam unu: “Ndi ba ba nsamb b’a kôdôl hisi, b’a nok ki lingoñoo inyu ngandak nsañ. Bôt ba téé sép b’a kôdôl hisi, Ba yén ki mu mba ni mba.” (Tjémbi 37:11, 29) Bonje ba yé bôt “ba nsamb” ni “bôt ba téé sép”? Bôt ba nsamb ba yé bôt ba ba neebe biniigana ni maéba ma Yéhôva ni suhulnyu; bôt ba téé sép ba yé bôt ba ngwés boñ mam malam i mis ma Yéhôva Djob. I len ini ikété nkoñ isi, nsoñgi u bibéba bi bôt u yé ngandak iloo u bôt ba téé sép. Ndi i mbok yondo i nlo, i bet ba nsamb ni ba ba téé sép, nsoñgi wap w’a ba ndik bé ndék, to ngandak. Ndi bo ni bo bon b’a niñ mu mbok yondo i. Ntiik, limut li bôt li, jon li ga yilha hisi paradis!

7. Lelaa maboñog ma minlôñ mimbe ma ntihba bés i len ini?

⁷ Lelaa maboñog ma minlôñ mimbe ma ntihba bés i len ini? Libim li bibéba bi mam bi mbôña munu nkoñ isi unu, li nlôl bé ni bôt ndi ni minlôñ mi bôt tole makoda ma m’bô. Kiki hihéga, ni hoñol lelaa bibase bi nyumus didun di bôt inyu libak li Djob, i hémle mam Bibel i nkal, bilôl bi hisi ni bi bôt ba binam, ni inyu ngandak mam mape. Tole ni hoñol ki biane bi bi nhôñôs gwét, ni bisañ ipôla matén, bi bi ntét hiyeyeba. Tole di béñge ki bi-ingin bi bet bap, inyu ngandak yap hép nkus, ba ñôbôs mbebi, ba ôbhak mapan ni disi, ba lôgôk bôt ba ba nyoñ bé yihe i somb gwom gwap; hala a nyilha ndék bôt ngwañ ki le didun di bôt di nwo yep. Ibabé pééna, minlôñ mimbe mini, yak nwo mi yé njom ni njom i ndutu di ntehe len ikété nkoñ isi.

8. Inoñnaga ni Bibel, kii i mbem minlôñ mi nene siñ siñ inyu ngandak bôt i len ini?

⁸ Kii Yéhôva a ga boñ? Njiiha nkeñi i ga bôdôl ngéda bôt ba m’bô ba ga telep i kolbaha bikwéha bi base gwobisôna, hala wee Babilôn nunkeñi. (Masoola 17:1, 2, 16; 18:1-4) Bibase gwobisôna bi ga tjiba hies. Y’a ba lelaa inyu mini minlôñ mimbe mimpe? Bibel i ngwélél titii i hikôa ni hi ônd inyu hégha minlôñ mi makoda mi mi nene le mi yé siñ siñ ikété nkoñ isi i len ini. (Añ Masoola 6:14.) Bañga i Djob i nkal le, biane bi ni minlôñ nwap nwominsôna bi ga yugdana ibôdôl hikuu hiap. Njiiha keñi i ga pam likala jé li nsôk ni tjiba i biane bi ñunuk nkoñ isi unu, ni i ba bobasôna ba ntémb i pes yap inyu kolba Ane i Djob. (Yérémia 25:31-33) Mbus mam mana, minlôñ mimbe mi mba ha bé.

9. Inyuki di gwé binet le hisi yondo u mba ntjegek loñge?

⁹ Kii i ga héñha minlôñ mimbe? Baa i mbus Armagédôn, nlôñ to wada w’a ba ki hana isi? Bibel i nkal bés le: “Ndi kingéda likak jé bés di mbem ngii yondo ni hisi hi yondo, mu nyen telepsép i nyééne.” (2 Pétrô 3:13) Ngii i kôba hala wee biane bibe ni hisi hi kôba hala wee bibéba bi bôt bi bi yé isi ane yap bi ga tjiba. Kii i ga héñha bo?  Bini bibañga le “ngii yondo ni hisi hi yondo” bi nkobla le ane i mondo ni bôt ba ba mba isi énél i ane i. Ane isi énél i Yésu Kristô i ga éba libak li Yéhôva i nya i yôni, Djob li oda.(1 Korintô 14:33) Jon “hisi hi yondo” hi ga ba ntjegek loñge. Biloñge bi bôt bi ga éga mam i nya i kôli. (Tjémbi 45:17) Kristô ni basobaane bé 144 000, ba ga ane ntôñ. Hégda ki i ngéda minkoda mi minlôñ nwominsôna mi ga héñhana ni ntôñ nlam wada u u édi!

10. (a) Mambe mam mabe ma ntôl i het u niñil? (b) Lelaa hala a ntihba we ni lihaa joñ?

¹⁰ Lelaa minson mimbe mi ntihba bés len ini? Di niñ i nkoñ isi u u yé nyonok ni mam mabe: Bôt ba ndéñg, ba ba ta bé maliga, ba ba mbép bape. Téntén bagwal ba nliya i tat bon bap le i mam mabe ma, ma gwel bañ bon bap. Mintuk mi nkoñ isi mi ntibil gwélél likeñge inyu lémés mam mabe, ni le mi yanak matiñ ma Yéhôva inyu loñge ni béba. (Yésaya 5:20) Bañga bikristen i mboñ biliya inyu kolbaha bilem bi. Ba njo ni ngui inyu tééda ndéñbe yap i het bôt ba nyan matiñ ma Yéhôva.

11. Bimbe biniigana di nla ôt i mbagi Yéhôva a bi pémhene bôt ba Sôdôm ni Gômôra?

¹¹ Kii Yéhôva a ga boñ inyu mam mabe ma mbôña hana isi? Ni béñge lelaa a boñ ni mam mabe ma bé i Sôdôm ni Gômôra. (Añ 2 Pétrô 2:6-8.) Mam mabe ma bé bôña i pañ Lôt ni lihaa jé ma bé tééñga bo ngandak. Ngéda Yéhôva a bi lona tjiba mu libôga li jolisôna, a bi mélés ndik bé mam mabe ma, ndi a bi boñ ki jam lipe. A bi ti ‘bayan Nyambe ndémbél i mam ma nlo.’ Nlélém kiki Yéhôva a bi mélés i ndéñg yosôna i bé bôña ha ngéda i, hala ki nyen a ga boñ inyu mélés i mam mabe momasôna ma mbôña i len ini, ngéda a ga pémhene hiai hini mbagi.

12. Mimbe minson ni nyamnda ni ngôñ le ni ga boñ ngéda ñunuk hiai hini u ga mal?

¹² Kii i ga héñha minson mimbe? Paradis hana isi y’a ba nyonok ni minson mi mi nti bés maséé. Ni hoñol ki minson minlam nwominsôna mi ga bôña ngéda hisi hi ga yila paradis, tole i mandap di ga bana inyu bésbomede tole inyu bôt di ngwés. Ni hégda lelaa di ga leege didun di bôt di ga lo bitugne, ni lelaa di ga niiga bo manjel ma Yéhôva, ni lelaa di ga la ki añle bo kiki lisuk li nkoñ isi li bé. (Yésaya 65:21, 22; Minson mi baôma 24:15) Niñ yés y’a ba nyonok ni ngandak minson minlam i i ga ti bés maséé, i tinak ki Yéhôva bibégés!

13. Lelaa ndok i Satan, Adam ni Eva i nlédés niñ i len ini?

¹³ Lelaa niñ ibe di gwé i len ini i ntihba bés? Bibéba bi bôt, minlôñ mimbe, ni minson mimbe; i mam ma momasôna ma nlédés niñ hana isi. Njee a nla kal le gwét, liyep, mbagla matén, makon ni nyemb bi mah bé tihba nye? Mam mana ma ntihba bés bobasôna. Mam mana ma nlôl ni njel le Satan, Adam ni Eva ba bi ndogbene Yéhôva. I len ini, to wada ikété yés a nla bé pei i yubda ndok yap i bi lona.

14. Kii Yéhôva a ga boñ inyu i mam mabe momasôna ma mbôña hana isi? Ti hihéga.

¹⁴ Kii Yéhôva a ga boñ inyu i mam mabe momasôna ma mbôña hana isi? Di yoñ hihéga hi gwét. Yéhôva a bi  bôn le a ga mélés gwét, mélés yosôna. (Añ Tjémbi 46:9, 10.) Kii a ga boñ inyu makon? A ga mélés mo. (Yésaya 33:24) Kii a ga boñ inyu nyemb? Yéhôva a ga mélés nyemb i mba ni mba! (Yésaya 25:8) A ga mélés yak liyep. (Tjémbi 72:12-16) A ga boñ hala inyu mam momasôna ma ma nlédés niñ i len ini. A ga héya yak i béba “mbebi” i hiai hini, yak béba mbuu u u nlôl ni Satan ni mimbuu nwé mimbe bi bi ga sôk tjiba.​—Efésô 2:2.

15. Sima mam ma ga ba ha bé i mbus Armagédôn?

¹⁵ Baa u ma hégda nkoñ isi ngi gwét, to makon, to nyemb? Hégda le mintôñ ni bisitima bi gwét, ni dinuni di bikei di gwét, bi ta ha bé! Bijôl bi gwét to ôñgba yo ki yo i i nhôñlaha gwét bi ga ba ha bé. To madokta, to litéédana li moni inyu matibla, to litéédana li mim, to babañ minkuu ni gwom bi majôna, ndi to bikotoo bi soñ! Kiki mintonba mi ga ba ha bé, jon bi-ingin bi bi mbañ gwom inyu sôñ bôt, tole inyu gwel bôt ba wip, bi ga ba ha bé, to bisônda ndi to diliba! Ni hoñol ki le, kon mahoñol u ga tééñga ha bé baboña bés to miñem nwés.

16, 17. (a) Imbe hogbe i bôt b’a pei i Armagédôn ba ga kôhna? Ti hihéga. (b) Kii i nla kwés bés nkaa le di ga pei ngéda nlômbi nkoñ isi unu u ga tjiba?

¹⁶ Lelaa niñ i ga ba ngéda i mam mabe mana momasôna ma ga mal? Hala a ta bé jam li ntomb i hégda. Di niñ munu nlômbi nkoñ isi unu ntandaa ngéda i het di nwaa tehe mam ma ma nti bés njôô. Nlélém jam ni bôt ba niñil i pañ nloñ u mashin, liyôgbe li mashin li ga tééñga ha bé bo, hala a yé ki nlélém ni bôt ba ba nyén bebee ni likund, ba njiñ ibe i ga ntééñga ha bé bo. Ibale mam mabe mana momasôna ma mal —kinje hogbe!

¹⁷ Nduña yosôna di nôgda len, kii i ga héñha yo? Tjémbi 37:11 a ntimbhe le: “B’a nok ki lingoñoo inyu ngandak nsañ.” Baa bini bibañga bi ntihba bé miñem minan? Hala nyen Yéhôva a nhoñol inyu nan. Inyu hala nyen, boñ biliya gwoñ gwobisôna inyu yén bebee ni Yéhôva Djob ni ntôñ wé munu mangéda mabe ma nsôk mana! Diihe botñem yoñ, u ôt pék mu, u boñ le i ba yômi ikété mahoñol ni ñem woñ, u yoñ ki ngéda i kap yo ni bôt bape! (1 Timôtéô 4:15, 16; 1 Pétrô 3:15) Ni i njel i, u nla ba nkwoog nkaa le u ga tagbe bé ni nlômbi nkoñ isi unu u u mbem ndik tjiba. Ndi w’a niñ hana isi, ikété maséé, i boga ni boga!