Gwel ngim minson inyu ti nhek woñ lipém

“I ngéda u nyi bé limbe libôñ u kena môñgô woñ, u ga bana bé loñge mbebi.” I nene le mut njoñ yi Lôk Rôma i hiai hi bisu nyen a bi pot bibañga bini. Bibañga bi, bi nsômbôl ndik kal le: Inyu boñ le niñ yés i kee loñge, di nlama bana ngim njômbi.

Bibel i gwé dihéga di bôt ba ba bi kit le b’a yônôs ngim mam i nson u Nyambe. Nôa a bi tégbaha môm matan ma nwii i “bañ nkuu inyu tohol bôt ba ndap yé.” Mpôdôl Môsi “a bi tibil bok bibom mis.” (Lôk Héber 11:7, 26) Nyambe a bi ti Yôsua nu a bi yiha Môsi ngim nson, a bi kal nye le: yoñ hisi hi likak.—Ndiimba Mbén 3:21, 22, 28; Yôsua 12:7-24.

I hiai hi bisu N.Y, ibabé pééna, bipôdôl bi Yésu bini bi bi hôla Paul ngandak mu nson a bééna ngôñ i yônôs inyu Nyambe: “Unu ñañ nlam u Ane w’a añlana ni nkoñ ’isi wonsôna.” (Matéô 24:14) Kiñ i Nwet Yésu nyemede ni biyiinda a bi kôs bi bi kônde ti nye makénd. Nson a bi kôhna won u bé le: ‘A añal jôl li Yésu i biloñ bipe.’ Paul a bi sal ni ngui inyu bot ngandak makoda, mu Asia ntitigi ni Érôpa.—Minson mi baôma 9:15; Kôlôsé 1:23.

Ntiik, nwii ndi nwii, bagwélél ba Yéhôva ba ntéé ngim mam malam le ba nyônôs, ba nyônôs ki mo inyu ti Nyambe lipém. Lelaa di nla pohol i mam di gwé ngôñ i yônôs nson u Nyambe? Mambe mam di nla kit le di mboñ, kii di nlama boñ inyu yônôs mo?

Mahoñol malam ma yé nseñ

Ikété makas ma niñ yés yosôna, di nla pohol ngim mam i di nsômbôl yônôs. Ngandak bôt i mboñ i jam li len. Ndi i mam di nsômbôl yônôs i pes i mbuu, ma yé maselna ni minson mi nkoñ’ isi unu. Njômbi nkus ni ngôñ i bana tel ikeñi ni lipém yon i ntinde bôt i boñ ngandak mam i len ini. I mam di nkit le di mboñ i niñ yés, ma nti Yéhôva Nyambe lipém, ma gwé ki maada ni bibégés bi Nyambe ni gwéñe bi ane. (Matéô 6:33) I nya mam i, i nlôl i gwéha i Nyambe, ni gwéha inyu mut wés libôk, hala a ntinde bés i kônde kôôge bebee ni Nyambe.—Matéô 22:37-39; 1 Timôtéô 4:7.

Di bana mahoñol malam i ngéda di mpohol i mam di gwé ngôñ i yônôs i nson Nyambe, yak i ngéda di nyônôs mo. I nla ba le, di gwé ngôñ i kéñbaha nson wés likalô tole di nyéñ hôlôs bilem bilam. Ndi to ibale mahoñol malam mon ma ntinde bés i pohol ngim minson, d’a la bé yônôs mam momasôna. Lelaa di nla pohol i mam di gwé ngôñ i yônôs nson Nyambe?

U nlama bana ngôñ i yônôs njômbi yoñ

Ni hoñol lelaa Yéhôva a bi yônôs sômbôl yé i ngéda a bi hek ’isi. Bibuk bini le “Kôkôa i kwo, yak kel i ye” bi ñunda le Yéhôva a bi kap mangéda i ngeñ a bé hek. (Bibôdle 1:5, 8, 13, 19, 23, 31) I bibôdle bi hiki ngéda a bé hek, a bé tibil yi kii yé njômbi a bééna ngôñ i yônôs. Ha nyen a bi pam i hek gwom kiki a bééna ngôñ. (Masoola 4:11) Sôgôlsôgôl wés Hiôb a nkal le: “I ngéda [Yéhôva] a nyéñ boñ jam, a mboñ ndik jo.” (Hiôb 23:13) Ni hégda maséé Yéhôva a bi nôgda i ngeñ a bi “tehe mam momasôna a bi hek,” a kal le, “ma bé loñge ngandak.”—Bibôdle 1:31.

 Inyu pam i yônôs i mam di nkit le di mboñ, di nlama toi bana ngôñ i yônôs njômbi yés. Kii i ga hôla bés? To hala kiki hisi hi bé ngi unghana loñge, hi bak hôlô, Yéhôva nye a bé tehe hio hi ma mal héga: Loñge paradis mu ngiinda, i i nti nye lipém. Nlélém jam ni bés, di nla kéñbaha ngôñ i yônôs i yom di nkit le di mboñ, i ngéda di nhoñol lelaa di ga pam i boñ hala ni bisai hala a ga lona bés. Hala nyen Tony nu a gwé 19 nwii, a bi boñ. A bi hôya bé mayuuga mé i hikuu hi loñ hi Mbôgi Yéhôva hiada i hiôñk hi Érôpa. Ibôdôl i kel i, a bé badba le: ‘Niñ yem ni nson wem bi ga ba lelaa ibale me yé i nya homa ini?’ Tony a bi waa bé hoñol le, kel yada a bé le a sal nyoo, a bi boñ kii yosôna a bé la inyu yônôs njômbi yé. Kinje maséé a bi nôgda, i ngéda ba bi naña nye i Bétel ndék nwii mbus!

I ngéda di yé mawanda ni bôt ba ba bi yônôs, mam ba bi kit le ba ga yônôs nson Nyambe, hala a nla tinde bés i bana ngôñ i boñ kiki bo. Jayson nu a gwé 30 nwii a bé gwés bé ke i likalô i ngéda a bé njohok. Ndi i ngéda a bi net bacc, a bi pala yoñ nson nsañal, a yila nsañal nu ngéda yosôna. Kii i bi tinde nye i ba nsañal? A ntimbhe le: “Minkwel me bé kwel ni basañal, ni ki le me bé pam likalô ni bo.”

I tila makidik moñ i nla hôla we

I ngéda di yé ngi tila jam, li nene puye puye ikété mahoñol més, ndi i ngéda di ntila jo i lipep, li nene loñge i mis més. Salômô a bi yimbe le, i ngéda di ntibil pohol bibañga, bi nla bana ngui kiki bititii bi minsoñ mi makoñ bi bi ñunda bés i njel di nlama kil. (Ñañal 12:11) I ngéda di ntila mahoñol més, di ntibil tééda mo i boña wés, yak i ñem wés. Kii ipe i bé le i tinde Yéhôva i ti bikiñe bi Israel oda le, bomede ba tiimba tila Mbén? (Ndiimba Mbén 17:18) Di nla yoñ lipep di tila mam di gwé ngôñ i yônôs, di tila kii di ga boñ inyu yônôs i mam ma. Di nlama ki tila mandutu di nla boma, ni kii di nla boñ inyu yémbél mo. I nla ki ba loñge i tibil yi ngim mam, tole makeñge di nlama nigil, i bôt ba nla hôla bés, ba nit ki bés.

I téé ngim mam le u ga yônôs i pes mbuu, i yé jam li bi hôla Geoffrey i tibil bok niñ yé. Geoffrey a yé mankéé nu a bi sal bôlô nsañal nu tôbôtôbô ngandak nwii i loñ Asia yada. A bi kôhna ndutu ikeñi i ngéda nwaa a bi wo kunda yada. I ngéda mam ma bi bôdôl ke ndék loñge, Geoffrey a kit le a njôp sum sum mu nson wé nsañal, inyu pam i boñ hala, a bi téé ngim mam le a bé lama yônôs mu nson wé. A bi tila i mam ma i ngim lipep, a soohe. Mu masoohe mé, a kit le a nlama bôdôl gwigil bi Bibel baa ilole sôñ i i mal. Hiki kel, a bé a béñge kii a ma boñ mu mam a bi kit le a mboñ. I mbus, hiki jôm li dilo a bé a wan mahol mé. Baa a bi yônôs njômbi yé? Ñ, a bi bôdôl gwigil bi Bibel bina, hala a lona nyé ngandak maséé!

Téé disiina di mam le u ga boñ ndugi

Mam mape di nla kit le di gwé ngôñ i yônôs, ma nla ba ndutu ngandak i boñ. Inyu Tony, nu di mbôk sima len, i sal i bétel i bééne nye kiki eem. Inyule i ngéda i, a bé yubda njohok mañge wanda, a bé ngi to ti nyemede nkikip yak Nyambe. Ndi Tony a bi yoñ makidik le a mboñ sômbôl i Yéhôva, a kit le a nlama yônôs mam ma mbéda inyu sôblana. Kiki a bi yônôs i jam li, a yila nsañal nu pes ngéda, i mbus a yila nsañal nu ngéda yosôna. A bi tila i ngéda a bé nlama bôdôl minson mi. A bi ba nsañal inyu ngim ngéda, i mbus ha a bé tehe ha bé nson nsañal kiki eem.

Yak bés i yéne bés nseñ le, i ngéda di gwé ngôñ i yônôs mam ma ga yoñ bés ngandak ngéda, di nla kap mo, le ma yila disiina di mam di di ga pala yônôs jada i mbus jada. Disiina di mam ti, di yé kiki nyaañga u u nhôla i pam i bôm jam di gwé ngôñ i yônôs. Hiki ngéda di nlama béñge disiina di mam ti, inyu yi too mam ma yé héñha. Jam lipe li yé le, di soohe Yéhôva ibabé waa, di kal nye i mam di gwé ngôñ i yônôs; hala a ga hôla bés i téñbe i loñge njel: ‘Soohe hiki ngéda,’ kiki ñôma Paul.—1 Tésalônika 5:17.

I mbéda ndeñbe ni hônba

To ibale di ntibil tjek mam di gwé ngôñ i yônôs, ngim mam i yé mu le di ga pam bé i yônôs. Bebek hala a bi lôôha tééñga Yôhanes Markô i ngéda Paul a bi gwés bé ke lôñni nye liké jé li nyônôs iba! (Minson mi baôma 15:37-40) Markô a bi ôt biniigana mu jam li, a tiimba wan njômbi yé i a bé gwés yônôs: I kéñbaha nson wé likalô. I mbus ngéda, Paul a bi bôgôl nye mbôgi nlam, Markô a bi bana ki nsima nkeñi i sal ni Pétrô i Babilôn. (2 Timôtéô 4:11; 1 Pétrô 5:13) Bebek ki le i jam li nlôôha lilam a bi pam i yônôs li yé le, a bi tila kaat Bibel i i mpôdôl niñ ni nson u Yésu.

Mu kiki di mba di nyéñ yônôs mam di nkit le di gwé ngôñ i yônôs, i nla pam le mam ma kee bé kiki di ngwés. Iloole di somol, di wanba, di tiimba tjek mam. I ngéda di mboma mandutu, di nlama téñbe letee ni lisuk, boñ biliya gwobisôna inyu hol. Kiñe Salômô a bi ti bés makénd mana: “Bii hiki jam u mboñ i moo ma Yéhôva, ha nyen mam moñ ma ga ke loñge.”—Bingéngén 16:3.

I yé maliga le ngim mangéda, ngim mam ma niñ yés ma nla boñ le di laa bé yônôs i mam di ban-ga ngôñ i boñ. Kiki hihéga, makon tole i yoñ ndun ni lihaa jés. Kekikel di hôiga bañ bom yés i i nsok le niñ boga, i ngii tole ’isi hi ma yila paradis. (Lukas 23:43; Filipi 3:13, 14) Kii di nlama boñ inyu kôhna yo? Ñôma Yôhanes a tila le: “I mut a mboñ sômbôl i Nyambe a bana niñ i boga ni boga.” (1 Yôhanes 2:17) To ibale ngim jam i niñ yés i nkéñ bés i yônôs ngim njômbi, di nla ‘kon Nyambe woñi di nôgôl ki mambém mé ibabé waa.’ (Ñañal 12:13) I bana mam le di gwé ngôñ i yônôs i nson Nyambe, i nhôla bés i yéñ ndik boñ sômbôl yé. Di gwélél mo inyu ti nhek wés lipém

[Minkéñék mi matila i lipep 22]

Mam di nla kit le di ga yônôs nson Nyambe

○ Añ Bibel hiki kel

○ Añ hiki Nkum Ntat ni hiki Tôde ’ilo!

○ Lémés masoohe més

○ Hôlôs litam li mbuu

○ Yéñ kéñbaha nson wés likalô

○ Hôlôs likeñge joñ i téé likalô ni i niiga.

○ Hôlôs likeñge joñ i likalô libamba, likalô ni téléfôn ni i bahoma ba yuñga.