Me ngwés bihégél ibôdôl me mañge. Lihaa jem li bééna lem i ke memle mapan malam, ni biloñge bi bititimba bi bi bé mu i tison yés le Jyväskylä, i ñemkété Finland. Me ngwés yak binuga. I ngéda me bé mañge, me bééna lem i hôôba hiki siñgi ni hiki ngwo me bé tehe! I ngéda me bi nañ, me bé gwés bé me ntehe ba ntééñga binuga. Ha ngéda i, me bi jôp i nlôñ u bôt ba ba nsôñ binuga.

Di bé nit minlôñ mi mi nsôñ binuga. Di bé gwélél manjel momasôna inyu boñ le bôt ba neebe bañ le ba nuñul mahuu ma binuga, tole ba gwélél binuga inyu hôñôs mam ma njoñ yi. Di bi bot yak nlôñ u mondo inyu sôñ binuga. Kiki manjel di bé gwélél inyu yis bôt mahoñol més ma bé lémél bé ngim bôt, bisônda bi bi kahal tééñga bés. Bi bi gwel me, bi ha me i mok ngandak ngélé.

U héya binuga, mandutu mape bôt ba bé boma ikété nkoñ ’isi ma bé tééñga me. Jon me bi jôp minlôñ mi pôlitik. Njômbi yem i bé le me boñ kii yosôna me nla inyu sôñ diyeyeba di bôt, bôt ba njal ni bôt ba ngoo.

Ndi ndék ni ndék, me bi kahal nok le me nla bé héñha nkoñ ’isi. Tolakii minlôñ mi, mi bé boñ biliya inyu kodol ngim mam, mam ma bé ôbi ndigi ôbi ni ôbi. I bé pôna ndik wee mimbuu mimbe nwon mi bé éga nkoñ ’isi. Me bi sôk me tomb.

Kiki me ntehe le me nla bé héñha mam, me hielba yak Djob, me bôdôl nigil Bibel. Me bi bôk me nigil Bibel ni Mbôgi Yéhôva. Tolakii me bi yimbe le ba yé minyaô ni liyômba, me bé bé bebee i lona mahéñha i niñ yem. Ndi nano, mam ma bi héñha.

Me bi témb me bôdôl añ Bibel. I bi yila bee inyu mbabaa yem. Me bi yimbe le ngandak minlôñ mi Bibel mi bé niiga le ba nlama tôñ binuga. Kiki hihéga, kaat Bingéngén 12:10 i nkal le: “Mut a téé sép a ntôñ niñ i lém yé.” (Kaat Nyambe) Me bi nok yak le Djob bé nyen a mboñ le di nok ndutu. Ndi mandutu ma nai inyule bôt ba binam ba ntop bé noñ maéba ma Djob. Gwéha ni wongut i Djob bi bi lôôha tihba me.​—Tjémbi 103:​8-​14.

Ha ngéda i, me bi yônôs lipep inyu bat kaat ni hop Pulasi le Qu’enseigne réellement la Bible? Ba bi ômle me yo. I mbus ngéda, babiina ba ba bé Mbôgi Yéhôva ba bi yuuga me inyu bat me too me ngwés nigil Bibel, me neebe. Me bôdôl yak ke i makoda i ndap Ane. Sôk i nsôk, maliga ma bôdôl tihba me.

Ni mahôla ma Bibel, me bi lona ngandak mahéñha i niñ yem. Me bi waa ôt siga, me waa ngandak nyôba. Me héñha bieñk gwem ni bipôdôl gwem. Me bôdôl suhus memede isi ngomin. (Rôma 13:1) Me bi tjôô yak niñ yem i mpuñgu, inyule i pot maliga, me bé ndaab.

Hala a bé me ndutu i héñha litehge jem li minlôñ mi pôlitik me bi nit. Hala a bi yoñ toi me ngéda. Me bi bôk me hoñol le ibale me nit ha bé minlôñ mi, wee me nliibana bo. Ndi, me bi sôk me nok le Ane i Djob yon di nlama ndik bôdôl ñem. Me bi yoñ makidik i boñ kii yosôna me nla inyu nit i Ane i, ni i hôla bôt bape i boñ nlélém.​—Matéô 6:​33.

Pôlitik i bi boñ le me kap bôt ba binam môga ima: Biloñge bi bôt ni bibéba bi bôt. Me bé jôs bibéba bi bôt sañ ikeñi. Ndi ni mahôla ma Bibel, me ñoo ha bé bôt. Me noode gwés mintén mi bôt nwominsôna. (Matéô 5:​44) U héya hala, me ñañle bôt bape ñañ nlam u Ane i Djob. Me yé maséé i yoñ ngaba mu nson u u nlona maséé ni nsañ, ni u u nti bôt botñem.

I len ini, me yé nwee inyule me bi bii mam momasôna i moo ma Yéhôva. Me yé nkwoog nkaa le Nhek mam momasôna a ga nwas bé le bôt ba binam ba tééñga binuga i boga ni boga, a ga neebe bé to le hisi hi tjiba. Ndi ni njel Ane yé, a ga tibil i mam momasôna bôt ba binam ba ñôbôs. (Yésaya 11:​1-9) Me ta ndik bé maséé i yi maliga, ndi me niiga yak mo bôt bape. Me nhoñol ha bé me le, me nlama héñha nkoñ ’isi.