Me bi gwé i Acul, i nimlak libôga i ngii dikôa di pes hiôñk i loñ Guatémala. Lihaa jem li mpémél litén li Ixil, li li nlôl mu litén li Maya. U héya hop Panya, me mpot hilémb hi Ixil ibôdôl me mañge. Me bi gwéé i ngéda gwét bi bé i loñ Guatémala, bi bi nom 36 nwii. Ha ngéda i, ngandak bôt ba litén jem ba bi wo.

I ngéda me bééna nwii 4, mankéé nu munlôm nu mañ nu a bééna nwii 7 a bi wo ki a ntuk ni kindim. Inyu jam li, me ntehna ha bé; ndi nyemb i mankéé i bi lôôha nôgha me njôghe. I mbus ngéda, ki me yii mañge, ba bi tila me jôl i suklu i bôt ba ndim i tison i Guatémala. Nyoo i suklu i, inyu manjom ma me bé yi bé, balét ba bi kal bana boñge bape le ba keñgle me. Hiki ngéda me bé metama, jon me bé maséé i tégbaha sôñ iba ni mama yem, nu a bé tôñ me, a undga me loñgeñem hiki ngéda. Ngoo ngandak le a bi wo ki me gwé 10 nwii. Nyemb yé i bi pat me ñem inyule nyetama nyen a bé gwés me.

I ngéda me bi pamna 11 nwii, me bi témb i tison het me bi gwé inyu niñ ni maasañ wem ni lihaa jé. Ba bé tôñgôl me i pes minsôn, ndi ba bé nok bé me. Ngim mangéda, me bé me bégle Nyambe le: “Inyuki mama a bi wo? Inyuki me bi kwo ndim?” Bôt ba bé kal me le sômbôl i Nyambe i. Me bé tehe le Nyambe a téé bé sép ni le a ntôñ bé bôt ba binam. Me bi nitba bé ndik inyule me bi bana bé pôla i boñ hala.

Inyu libak jem li ndim, ba bé le ba boñ me to kii. I ngéda me bé mañge, ngandak ngélé ba bi noode lalna me ni ngui. Me bi kal bé mut nye ki nye i jam li—inyule me bé hoñol le mut nye ki nye a ntôñ bé me. Me bé pôdôs bé to mut, mut nye ki nye a bé kwel bé ni me. Me bé me modop, me bé bôdôl bé to mut ñem.

Ki me ntip yila njohok, babiina iba ba ba bé Mbôgi Yéhôva ba bi kôôge me bebee i suklu i ngéda récréation. Malét wem suklu wem wada nu a bé yi libak jem a bi kal bo le ba loo i yuuga me. Ba bi kal me le Bibel i mbôn le kel yada, bawoga ba ga tuge ni le bôt ba ndim ba ga témb ba tehna. (Yésaya 35:5; Yôhanes 5:28, 29) Me bé gwés mam ba bé niiga me, ndi kiki me bé pot bé ngandak, i bé me ndutu i kwel ni bo. Tolakii me bé pot bé, ba bi ke ni bisu i niiga me Bibel ni wongut. Ba bé ba ke yom kiki 10 kilôméta, ba bet ki hikôa inyu lo meeni.

Maasañ wem a bé a kal me le ba nhaba loñge ndi ba ta bé mingwañ. Ndi to hala, ba bé éba le ba ntôñ me inyule ba bé ti me makébla. Inyu yem, ndik bañga bikristen yon i bé le i boñ nya bisesema i.

Me bé gwélél bikaat bi bôt ba ndim inyu nigil Bibel. Tolakii me bé nok i mam me bé nigil, hala a bé me ndutu i neebe mo. Kiki hihéga, hala a bé me ndutu i neebe le Nyambe a ntôñ me ni le yak bôt bape ba ntôñ me. Me bi nok inyuki Yéhôva a bi neebe béba inyu ngim ngéda, ndi i bé me ndutu i tehe nye kiki Tata nu gwéha. *

Ndék ni ndék, i mam me bé nigil i Bibel ma bi hôla me i héñha litehge jem li mam. Kiki hihéga, me bi nigil le Nyambe a nkônôl i bôt ba nok ndutu ngoo. I ngéda a bi tehe bagwélél bé ba nok ndutu, Nyambe a kal le: “Me mal yaga tehe ndééñga i loñ yem . . . Me nyi njôghe yap.” (Manyodi 3:7) I ngéda bilem bi Yéhôva bi bi bôdôl lémél me, me yoñ makidik i ti nye niñ yem nkikip. I nwii 1998, me bi sôblana kiki Mbôgi Yéhôva.

I mbus nwii wada, me jôp i suklu i bôt ba ndim bebee ni tison i Escuintla. Mañ wada u likoda jés u bi yimbe le i bé me ndutu i lo makoda me bak me yii i tison Acul. Hala wee, likoda li bé bebee li bé ii pes i hikôa babiina ba ba bé tégbaha yigil yem ba bé bet inyu lo meeni, i bé ndutu i boñ liké li. Inyu hôla me, mañ u u bi lébna me lihaa jada i tison i Escuintla i het me bé lama yééne ni li li bé lama hôla me i ke makoda. Ibôdôl ha ngéda i, ba bi yoñ ndun ni me kiki mut wada nu lihaa jap.

Me nla sima ngandak dihéga di lôk kéé i likoda i i bi éba me gwéha yap i lisañ li bôt. I mam ma, ma nkwés me nkaa le Mbôgi Yéhôva i yé bañga bikristen.—Yôhanes 13:34, 35.

Me nôgda ha bé me wee me gwé ha bé nseñ ni le me gwé bé botñem. Nano niñ yem i gwé ngim njômbi. Kiki me yé nsañal nu ngéda yosôna, me mbok mis he i ngii bibôk gwem bé ndi i ngii maliga ma Bibel me ntjam. U héya hala, me gwé nsima i ba mañ ikété likoda ni i ti minkwel mi Bibel mi mbamba i makoda mape. Me bi bana ki nsima i ti minkwel i makoda ma ndôn bisu bi dikôô di baemble.

I nwii 2010, me bi kôhna diplôm i suklu ba bé sébél ni hop Pulasi le École de Formation Ministérielle (nano ba nsébél yo le Suklu i Baañal ñañ nlam u Ane) i i bi tagbe i tison El Salvador. I suklu i i bi hôla me i tibil yônôs minson nwem mi likoda. I hôla ki me i nok le Yéhôva Nyambe a ngwés me ni le a ndiihe me, ni ki le a nla ti to numbe mut ngap inyu yônôs nson wé.

Yésu a bi kal le: “Ti i nlona maséé iloo kôhna.” (Minson mi baôma 20:35) I len ini, me yé toi maséé, ni ki le tolakii me bé bé le me hégda jam li, nano me nla hôla bôt bape.