Me bi gwéé i man tison ba nsébél le Saxe i loñ Jaman. Niñ yés i lihaa i bé lam ngandak, yak bagwal bem ba bi niiga me bilem bilam. Inyu bôt ba bé yééne i tison yem i ligwééne ni i loñ Jaman ha ngéda i, base i bééna bé nseñ. Inyu yem, Nyambe a bé bé. Ngéda me bé njohok, me bé hémle mam ima: Nyambe a ta bé, ni le bôt bobasôna ba nlama kon maséé ni minlélém mi gwom.

Inyuki me bé hoñol le bôt ba nlama kon maséé ni minlélém mi gwom ? Inyule inyu yem bés bobasôna di yé nlélém. U héya hala, me bé hoñol le liyep ni njal bi yé le bi mal ibale hiki mut a yé ngwañ. Jon me bé sal ni ngui inyu hôñôs nya mahoñol i. Ngeñ me bi pamna 14 nwii, me bôdôl tégbaga ngéda yem yosôna inyu héñha pépa. Bôt ba tison i Aue ba bi kônôl me maséé kayéle ba ti me bibom. Ki me yii njohok, me bi yina ni bôt ba pôlitk bakeñi i loñ Jaman. Me bé hoñol le me yé yônôs njômbi yem ni le me ga yila bañga mut.

Ndi niñ yem i bi héñha kunda yada. I nwii 1989, Libap li Berlin li bi kwo, hala a bagal bôt i loñ Jaman. Kiki hala a bé bé a kôli, me sôk me léba le ngitelepsép i bé nyonok mu loñ yosôna. Kiki hihéga, ba bé nyiip i bôt ba bé nit bé nlôñ wés m’bô. Inyuki? Baa di bé hémle ha bé le bôt ba binam bobasôna ba yé nlélém? Baa mahoñol ma ma bé ndigi eem? Hala a suk me.

Mbus me bi héñha mahoñol, me bôdôl gwés nsik ni ôt bititii. Kiki me bi bôdôl nigil nsik—ni mahoñol i ke i université—me bé sômbôl ôt bititii ni yila nkôt nsik. U héya hala, me bi tjôô bilem bilam bagwal bem ba bi niiga me mañge. I tuk niñ yon i bé lémél me, me héñhaga bôda kii me ngwés. Ndi i tuk nsik, i ôt bititii, ni i héñha bôda bi bé yônôs bé ngôñ yem. Yak bititii me bé ôt bi bé unda le me nkon woñi. Bilôl gwem bi ga ba lelaa? Baa niñ i gwé nseñ?

Ngeñ me bi sôk me léba mandimbhe, ma hélés me ngandak. Kôkôa yada i suklu, me bé kwel ni mawanda mem ma suklu inyu bilôl. Mandy * nu a bé ñudu wada ni Mbôgi Yéhôva a bé ni bés. Kôkôa i a bi ti me maéba malam. A bi kal me le: “Andréas, nigil Bibel ibale u nsômbôl kôhna mandimbhe inyu niñ ni bilôl.”

Me bééna ngôñ i yi iloo ha, me péénaga, ndi ngôñ i yi iloo ha i bééna ngui ngandak. Mandy a bi kal me le me añ kaat Daniel pes 2, yom me bi añ i bi hélés me. I mbañ i i mpôdôl biane bi bi ga énél nkoñ ’isi, letee ni ngéda yés. Mandy a bi éba me mbañ ipe i i ga yon i dilo di nlo. Mambadga mem ma bi sôk ma kôhna ndimbhe! Njee a bi tila mbañ i, njee a bé le a pot maliga ­inyu bilôl? Bebek le Nyambe ­a yé?

Mandy a bi yoñ bitelbene le Horst bo Angélika, babiina ba ba yé Mbôgi Yéhôva ba bôdôl nigil Bibel ni me. Me bi hoo yimbe le base i Mbôgi i Yéhôva yotama yon i ngwélél ni i ndiihe jôl li Yéhôva. (Tjémbi 83:18; Matéô 6:9) Me bi nigil le Yéhôva Nyambe a mbôn le bôt ba binam ba ga niñ i bôga ni boga hana ’isi. Kaat Tjémbi 37:9 i nkal le: “Ba ba mbem Yéhôva bon b’a kôdôl hisi.” Hala a bi lémél me i yi le i bôt bobasôna ba nôgôl mambén ma Nyambe ma ma yé ikété Bibel ba gwé botñem i.

Ndi, hala a bé lédél me i noñ mambén ma Bibel. Me bi yila ngôk inyule me bi yila ntuk nsik ni ñôt bititii nunkeñi, i bé ndutu i bana suhulnyuu. U héya hala, i bé ndutu i tjôô niñ yem i nyega. Me nti Yéhôva mayéga inyule a ñéba le a nhônba ni le a nok i bet ba mboñ biliya i noñ maéba ma Bibel!

Pôlitik ni i hémle le Nyambe a ta bé gwon bi bi éga niñ yem ngéda me bé njohok; ndi Bibel i yé héñha niñ yem. Mam me bé nigil ma mélés woñi wem inyu bilôl, ma boñ ki le niñ yem i gwé nseñ. I nwii 1993, me bi yila Mbôgi Yéhôva, i nwii 2000, me ni Tabitha nu a ngwés Yéhôva, di biiba. Di ntégbaha ngandak ngéda i niiga Bibel ni bôt. Kiki me, ngandak bôt i di bé boma i bé i nlélém nlôñ pôlitik, i hémlege le Nyambe a ta bé. Me yé maséé i hôla bo i yi Yéhôva.

Ngeñ me bi bôdôl kiha ni Mbôgi Yéhôva, hala a bi lémél bé bagwal bem. Ndi, ba bi sôk ba léba i kiha ni bo i yé nseñ mu niñ yem. Me yé maséé le ba ñañ Bibel len, ba kenek i makoda ma Mbôgi Yéhôva.

Me ni Tabitha di gwé niñ i lihaa i i yé maséé inyule di noñ maéba Bibel i nti babiina. Kiki hihéga, babiina ba ba nkeñgle niñ i nyega ba nlédés libii jap.—Lôk Héber 13:4.

Niñ yem i gwé nseñ, to bilôl gwém bi nkôhna ha bé me woñi. Me yé wada mu i lihaa li lôk kéé ikété nkoñ ’isi wonsôna, li li niñ ikété nsañ ni adna. Bésbobasôna di yé nlélém mu lihaa li. I jam li jon me bé me gwé ngôñ mu niñ yem.