1. Sadia godang do halak na porsea tu datu manang ilmu gaib?

Buku African Traditional Religion mandok, “Di Afrika, dang adong gunana tasukkun adong datu manang na dang”, jala “di halak Afrika penting hian do datu i”. Mulai sian halak na so adong sikkolana sahat tu halak parsikola na timbo porsea do tu datu dohot tu ilmu gaib. Jala akka pamimpin agama pe songon i do.

2. Menurut godangan halak, sian dia do ilmu gaib manang mistis i?

² Godang do halak na porsea memang adong do ilmu gaib manang mistis. Didok roha ni nasida sian Debata do i, jala boi do i dipakke akka suru-suruan dohot akka omputta naung mate. Adong do piga-piga halak na mamboto carana mangalului jala mamakke ilmu gaib i. Dipakke nasida ma i tu na denggan (na digoari ilmu putih) manang tu na jahat (na digoari ilmu hitam).

3. Aha do ilmu hitam i, jala aha do na boi masa alani ilmu hitam i?

³ Ilmu hitam manang santet dipakke halak do lao pamatehon musu. Didok nasida, boi do akka datu parohon kalelawar, pidong, lanok, manang akka binatang na asing lao menyerang musu ni nasida. Jala godang do halak porsea molo ilmu hitam on boi mambaen halak marbada, mandul, marsahit, manang mate.

4. Aha do na dihaporseai godang halak, jala aha do na didok akka halak na hea gabe datu?

⁴ Saling berkaitan do ilmu hitam dohot datu. Godang na mandok, boi do sahalak datu maninggalhon dagingna jala habang lao manjuppangi datu na asing manang mangalului mangsana. Halak na hea gabe datu do na mandok songon i. Alana tikki i di podoman dope ibana. Di sada majalah di Afrika, akka datu (godangan sian nasida anak boru dope) mandok, “Mate do 150 halak hubaen alani kecelakaan.” “Nungnga hupamate lima dakdanak. Huoccop mudar ni nasida.” “Nungnga mate hubahen tolu mantan halettu ala disirakkon halak i au.”

5. Aha do ilmu putih i jala songon dia do akka halak mamakke i?

⁵ Najolo porsea do akka halak molo ilmu putih i dipakke lao manjaga halak sian akka na jahat. Dipakke nasida do cincin manang golang gabe jimat. Manang adong do na manginum ramuan manang mambahen i tu dagingna. Sipata adong do halak na manippan jimat di jabuna manang ditanom di tano lao gabe panjaga ni nasida. Jala porsea do nasida tu jimat na marisi akka hata na dibuat sian Quran manang Bibel.

6. Aha do na hea dibahen Sibolis dohot akka suru-suruanna najolo, jala ikkon songon dia do sikapta?

⁶ Memang musu na gogo do Sibolis dohot akka suru-suruanna. Boi do nasida mempengaruhi pikkiran ni jolma dohot ngolu ni jolma. Najolo hea do nasida songgop tu jolma dohot tu binatang. (Mateus 12:43-45) Alai nang pe songon i, unang ma gabe pabiarhu hita tu nasida. Jala unang ma gabe sepele hita tu gogo ni nasida.

7. Aha do na dibahen Sibolis lao mangoto-otoi jolma? Bahen ma tudosanna.

⁷ Panipu ulung do Sibolis. Dioto-otoi ibana do jolma, asa dirippu akka halak na gogo situtu ibana. Sarupa ma i songon na masa di Afrika. Tikki naeng marporang akka tentarana, diputar ma rekaman lao pabiar-biarhon musuna. Diputar ma soara ni akka tentara dohot senjata. Gogo ma i dibahen, asa dirippu musuna godang jala gogo do alo ni nasida i. Songon i ma Sibolis mangoto-otoi akka jolma. Dipabiar-biar ibana ma akka halak, asa dirippu na gogo situtu ibana. Tujuanna asa ibana na dihabiari jolma, dang Debata. Parrohahon ma tolu contoh gabus ni Sibolis.

8. Aha do sada gabus na dibahen Sibolis?

⁸ Sada gabus na dibahen Sibolis i ma: Molo adong na masa tu sasahalak, pasti adong do na mambahen i. Boi do langsung manang marhite ilmu gaib. Misalna, adong ma sahalak dakdanak mate ala hona sahit malaria. Ra diboto omakna do molo sahit malaria on ala diharat rongit. Alai olo do ra ibana porsea na adong halak na mangido tu datu asa disuru rongit mandoit anakna i.

9. Sibolis do na mambahen sude hasusaan? Aha do didok Bibel?

⁹ Nang pe Sibolis boi mambahen hasusaan, alai dang sude hasusaan alani Sibolis. Bibel mandok, “Dang halak na hatop marlojong na sai monang di parlumbaan, dang halak na gogo na sai monang di parporangan, dang halak na marbisuk na sai mandapot sipanganon, dang halak na malo na sai mamora, jala dang halak na adong parbinotoanna na sai marhasil. Ai boi do masa tu nasida sude akka na so diharappon di tikki na so panagaman.” (Parjamita 9:11) Adong do sahalak pelari na ukkatop sian donganna. Alai dang monang ibana ala masa “na so panagaman” tu ibana. Ra olo do tartuktuk ibana, madabu jala gabe marsahit. Manang olo do ra taralit patna. Boi do i masa tu manang ise pe. Dang Sibolis manang datu na mambahen i. I ma na didok “na so panagaman”.

10. Aha do na didok akka halak taringot akka datu? Sian dia do taboto na gabus do i?

¹⁰ Gabus ni Sibolis na paduahon i ma: Boi do akka datu maninggalhon dagingna di tikki borngin lao manjuppangi datu na asing, mangoccop mudar, manang mambuat hosa ni halak. Saonari rimangi ma on, ‘Aha do lapatanna tikki didok maninggalhon dagingna?’ Songon naung taparsiajari, tikki ditoppa jolma dang na gabe pulik tondina sian dagingna. Alani i, dang adong sian bagasan ni jolma i na boi kaluar jala mangulahon na denggan manang na roa. Sian i taboto ma, dang boi akka datu i maninggalhon dagingna nang pe didok nasida songon i.

11. Songon dia do Sibolis mambahen akka jolma porsea tu kejadian na so tutu masa?

¹¹ Alai boasa boi didokkon akka datu na hea nasida mangulahon i? Boi do dibahen Sibolis sasahalak merasa akka na so masa gabe songon na kenyataan. Jala sian parnidaan boi do tong dibahen Sibolis akka halak mangida, mambege, manang mangulahon sada kejadian na so tutu masa. Boasa dibahen Sibolis songon i? Asa lam dao do akka jolma sian Jahowa jala dang porsea be tu isi ni Bibel.

12. (a) Denggan do ilmu putih i? (b) Aha do na dipatorang Bibel taringot i?

¹² Gabus na patoluhon, i ma ilmu putih. Didok akka halak, denggan do ilmu putih on jala dipakke do on lao mangalo ilmu hitam. Di Bibel dang adong dibedahon ilmu putih dohot ilmu hitam. Maralo do i sude tu paretta ni Jahowa. Parrohahon ma aha na didok di patik na dilehon Jahowa tu bangso Israel najolo taringot akka datu manang akka na porsea tusi.

• “Unang lao hamu tu peramal manang tu datu.”—3 Musa 19:26.

• “Molo adong bawa manang borua na boi makkatai tu na mate manang na gabe peramal, ikkon dipamate do nasida.”—3 Musa 20:27.

• “Unang ma adong sian hamu . . . na mamakke ilmu gaib, na mangido tanda sian datu, na mamakke ilmu sihir, parula-ula, na mangido tudu-tudu tu halak na boi makkatai tu na mate.”—5 Musa 18:10-14.

13. Boasa dibahen Jahowa patik taringot ulaon hadatuon?

¹³ Sian akka patik i taboto ma dang lomo roha ni Debata akka sisomba Ibana mangulahon ulaon hadatuon. Alani holongna do dibahen Jahowa patik i. Dang lomo rohana sisomba Ibana gabe mabiar manang diparhatoban ajaran na so sittong. Jala dang olo Ibana dioto-otoi akka suru-suruan na jahat akka na manomba Ibana.

14. Songon dia do Bibel patuduhon na umgogo Jahowa sian Sibolis?

¹⁴ Memang dang sude dipaboa di Bibel akka na boi dohot na so boi diulahon suru-suruan na jahat. Alai takkas do dipaboa di Bibel umgogo do Debata Jahowa sian Sibolis dohot akka suru-suruan na jahat. Nungnga disappatton Jahowa Sibolis sian surgo. (Pangungkapon 12:9) Jala najolo parmisi do Sibolis lao mancobai si Job. Tikki didok Debata unang pamate si Job, mabiar do Sibolis jala dioloi ibana do paretta i.—Job 2:4-6.

15. Tu ise do hita mangido parlinggoman?

¹⁵ Poda 18:10 mandok, “Dos songon menara na togu do goar ni Jahowa. Tusi do marlojong halak na tigor marroha lao marlinggom.” Ikkon tu Jahowa do hita mangido parlinggoman. Dang porsea akka sisomba Jahowa tu akka jimat dohot akka ubat na sian datu, na didok boi mangalinggomi nasida sian akka na jahat na dibahen Sibolis dohot akka suru-suruanna. Jala dang mabiar nasida tu akka na dibahen datu. Pos do roha ni nasida tu hata ni Bibel na mandok, “Diparrohahon Jahowa do saluhut na di tano on lao mangurupi akka halak na manomba Ibana sian nasa rohana.”—2 Kronika 16:9.

16. Songon na disurat di Jakobus 4:7, aha do na mambahen pos rohatta? Jala aha do na ikkon taulahon?

¹⁶ Hamu pe boi do songon i pos ni rohamuna molo disomba hamu Jahowa. Jakobus 4:7 mandok: “Oloi hamu ma Debata. Alo hamu ma Sibolis, dung i lari ma ibana sian hamu.” Molo disomba hamu Debata na sittong, jala unduk hamu tu Ibana, pos ma rohamuna pasti linggomanna do hamu.