Solusina
Godang halak nungnga mangulahon akka cara na dipaboa di majalah on. Jala nungnga dibahen nasida upaya asa unang mambeda-bedahon halak. Alai sasittongna dang boi dope mago sian rohatta asa unang mambeda-bedahon halak. Jadi memang na so boi do mago i sian rohatta?
Pamarettaon na Dumenggan
Dang tolap pamarettaon ni jolma mambahen akka halak asa unang mambeda-bedahon. Alai memang na so adong do pamarettaon na sanggup mangulahon i?
Na ikkon diulahon sada pamarettaon asa unang adong na mambeda-bedahon halak be
-
1. Mangajari akka halak asa mambolokkon i sian rohana.
-
2. Mangubati roha ni halak na hea gabe korban, na mambahen nasida gabe tong mambeda-bedahon halak.
-
3. Pemimpinna dang mambeda-bedahon rakyatna.
-
4. Pasadahon sude halak sian marragam bangso.
Dipaboa do di Bibel dibahen Debata do sada pamarettaon na boi pasautton i sude, i ma “Harajaon ni Debata”.—Lukas 4:43.
On ma na lao bahenon ni pamarettaon ni Debata.
1. Mangajari Rakyatna
“Antusannasida ma aha do hasintongan i.”—JESAYA 26:9, Bibel siganup ari.
“Jadi hadameon ma upa ni hatigoran, jala pangkorhon ni hatigoran hademakon dohot hasonangan salelenglelengna.”—JESAYA 32:17.
Aha do maksud ni ayat i? Harajaon ni Debata mangajarhon akka na denggan tu sude halak. Muba do cara marpikkir ni nasida dung diboto nasida dia na sittong. Gabe diboto sude jolma ma ikkon masihaholongan do nasida.
2. Dang Adong be na So Adil
“Apusan ni Debata ma nasa ilu-ilu sian mata ni nasida. Ndang adong be hamatean nang arsak ni roha, nang angguk-angguk, nang na hansit, ndang disi be. Ai nunga salpu na parjolo i.”—PANGUNGKAPON 21:4.
Aha do maksud ni ayat i? Haduan Harajaon ni Debata naeng manghapus sude haccit ni roha ala dibahen na so adil tu nasida. Dang adong be na mambahen haccit roha ni nasida.
3. Pemimpin na Denggan
“Ndang manguhum ibana marguru tu parnida ni matana, jala ndang manguhum ibana marguru tu na binege ni pinggolna. Marhitehite hatigoran tahe uhumonna angka na pogos, jala marhitehite hasintongan patingkosonna uhum tu angka na dangol di tano on.”—JESAYA 11:3, 4.
Aha do maksud ni ayat i? Jesus Kristus do Raja ni Harajaon ni Debata. Adil do ibana lao mamaretta jala dang mambeda-bedahon halak di tano on. Sarupa do sude bangso di adopan ni Jesus. Jala pos do rohana unduk do sude halak tu parettana.
4. Marsada
Harajaon ni Debata mangajari akka halak asa “mardos ni roha jala masihaholongan, saroha jala sapingkiran”.—PILIPPI 2:2.
Aha do maksud ni ayat i? Dang holan marsada rakyat ni Harajaon ni Debata, alai gabe marsada ni roha do nasida ala masihaholongan.
