Hea do Au Tartuktuk Alani Pakkean dohot Penampilan ni na Asing

SONGON NA DICERITAHON SI EILEEN BRUMBAUGH

MULAI sian na gelleng, gareja Bruder Baptis Jerman Ordo Lama do au, na mirip tu agama Amish dohot kaum Mennon. Di taon 1708 do adong gerakan Bruder di Jerman, i ma bagian ni kebangunan rohani na digoari Pietisme. The Encyclopedia of Religion mandok, Pietisme i ma “pandangan na mandok porlu do jolma mamboto injil ni Kristus”. Alani pandangan i, gabe dibahen ma kampanye missionaris na marhasil di piga-piga negara.

Di taon 1719, ro ma sada kelompok na dipimpin si Alexander Mack tu inganan na saonari digoari Pennsylvania, Amerika Serikat. Mulai sian i gabe adong ma muse kelompok-kelompok na asing jala dang marsada akka kelompok i. Ganup kelompok, asing-asing be do mangalapati ajaran ni si Alexander Mack. Molo kelompok manang garejanami, adong do 50 anggotana. Porlu hian do di hami manjaha Bibel dohot mangihutton keputusan naung dibahen anggota gareja.

I ma na gabe agama keluarganami, mulai sian oppungku sahat tu au. Tikki marumur 13 taon ma au tardidi jala gabe anggota ni gareja i. Mulai sian na gelleng sai didok do tu au, sala do mamakke mobil, traktor, telepon, radio, manang benda na asing na mamakke tenaga listrik. Molo akka borua di garejanami, sederhana do pakkeanna. Dang olo nasida mamangkas obukna jala sai mamakke tudung do nasida. Asing ni i, marjenggot do akka bawa di garejanami. Menurut hami ala dang sian portibi on hita, berarti dang boi hita mamakke pakkean na modern, kosmetik, manang perhiasan. Menurut hami, molo tapakke i berarti na ginjang do rohatta jala gabe mardosa ma hita.

Sai diajari do hami asa sangap tu Bibel na huetong hami songon sipanganon partondion di hami. Tiap pagi sebelum sarapan, marpungu do hami di ruang tamu lao manangihon bapak manjahahon sada pasal sian Bibel jala dikomentari hami ma na dijahana i. Dung i, marsinggang ma hami sude tikki dipasahat bapak tangiang. Dung sae i, didok omak ma tangiang Ale Amanami. Sai tarpaima-ima do au tu acara ibadat pagi i. Alana, boi ma hami na sakeluarga marpungu jala holan tu Debata ma pikkirannami.

Tinggal di peternakan di jonok ni Delphi, Indiana do hami. Jala disi do hami manuan akka sayur. Mamakke hoda manang kareta hoda do hami mamboan i tu kota. Dung i hugadis hami ma i di dalan manang tu jabu ni akka halak. Menurut hami, molo kerja keras hita sarupa na manomba Debata do i. Jadi gabe kerja keras ma hami torus asing ni ari Minggu. Alai sipata olo do godang hian karejo di ladang. Sappe dang sanga be hami mangalehon roha dohot tikkinami tu Debata.

Menikah jala Margelleng

Di taon 1963, tikki 17 taon umurhu, menikah ma au tu si James. Sahalak anggota gareja Bruder Lama do tong ibana. Nungnga gabe anggota ni gareja i keluargana, mulai sian oppung ni natua-tuana. Lomo hian do rohanami na dua manomba Debata jala pos do rohanami, holan garejanami do agama na sittong.

Di taon 1975, nungnga onom gellengnami. Jala di taon 1983, tubu ma anaknami na papituhon, i ma siappudan. Holan si Rebecca do borunami, i ma si nomor dua. Kerja keras do hami, hemat, jala sederhana do parngoluonnami. Berusaha do hami mangajarhon prinsip ni Bibel tu gellengnami songon na dibahen natua-tuanami dohot sude anggota gareja Bruder Lama.

Penting hian do penampilan di gareja Bruder Lama. Menurut hami ala dang boi hita manjaha roha, boi do tarida na di bagasan roha ni halak sian cara marpakkeanna. Alani i molo adong anggota ni gareja i na palobihu gaya ni obukna, pittor dianggap do na ginjang rohana. Molo balga tabahen gambar na di bajutta, on pe patuduhon ginjang ni roha do. Jadi sipata, gabe uppetting do mambahas taringot penampilan sian mambahas isi ni Bibel.

Pengalaman di Penjara

Di ujung ni taon 1960, dipenjara ma anggi dolikku si Jesse ala dang olo dohot tu dinas militer. Ibana pe anggota ni gareja Bruder Lama do. Tikki di penjara, pajuppang ma ibana dohot Saksi Jahowa. Dang olo tong nasida dohot marporang, ala dang sadalan i ninna tu prinsip ni Bibel. (Jesaya 2:4; Mateus 26:52) Lomo do roha ni si Jesse martukkar pikkiran dohot Saksi Jahowa i jala boi do langsung diida ibana sifat ni nasida. Dung godang na diparsiajari ibana taringot Bibel, tardidi ma ibana jala gabe Saksi Jahowa ma ibana. Kecewa hian do hami alani i.

Dipaboa si Jesse ma na diparsiajari ibana tu suamikku. Jala dibahen ibana ma suamikku gabe marlangganan majalah Menara Pengawal dohot Sadarlah! Dung dijaha suamikku akka majalah i, gabe lomo hian ma rohana mamboto taringot isi ni Bibel. Alana sian najolo lomo do rohana naeng jonok tu Debata. Alai saleleng on hira na dao do dihilala ibana sian Debata. Jadi lomo hian do rohana tu manang aha pe na boi mambahen jonok hubunganna tu Debata.

Disuru akka sintua di garejanami ma asa hujaha hami majalah ni kaum Amish, kaum Mennon, dohot kelompok Bruder Lama na asing. Hape menurut hami sian portibi on do akka agama i. Alai dang lomo roha ni bapakku tu Saksi Jahowa jala diorai ibana do hami manjaha Menara Pengawal dohot Sadarlah! Jadi dang lomo rohakku molo huida suamikku manjaha akka majalah i. Mabiar au gabe terpengaruh ibana tu agama na so sittong.

Alai sebenarna nungnga leleng si James bingung tu piga-piga ajaran ni gareja Bruder Lama na menurut ibana dang sadalan tu isi ni Bibel. Tarlumobi ajaran na mandok, mardosa do hita molo “kerja keras” di ari Minggu. Misalna menurut gareja Bruder Lama, boi do hita mangalehon binatang minum di ari Minggu, alai dang boi mancabut lalang. Jala dang boi akka sintua patuduhon alasan ni peraturan i sian Bibel. Lam leleng, au pe gabe dohot do bingung mangida ajaran i.

Nungnga leleng hami porsea, gareja ni Debata do garejanami. Jala huboto hami do akibatna molo kaluar hami sian i. Alani i gabe maol ma huhilala hami kaluar sian gareja Bruder Lama. Alai terganggu do hati nuraninami ala torus bergabung tu agama na so mangihutton isi ni Bibel. Jadi di taon 1983, hubahen hami ma surat pengunduran diri tu gareja i. Jala hupangido hami do asa dijahahon surat i di gareja. Dung i dipecat ma hami sian gareja i.

Mangalului Agama na Sittong

Dukkon i, mulai ma hami mangalului agama na sittong. Hulului hami do agama na mangulahon na diajarhon nasida. Jadi parjolo-jolo, hucoret hami do sian daftarnami akka agama na dohot marporang. Lomo dope rohanami tu akka agama na “sederhana”. Alana menurut hami, molo sederhana parngoluon dohot cara marpakkean ni nasida, on ma na patuduhon dang sian portibi on nasida. Mulai sian taon 1983 sahat tu taon 1985, lao do hami tu piga-piga negara lao mamareso akka agama. Mulai ma i sian kaum Mennon, kaum Quakers, dohot kelompok na asing na menurut hami “sederhana”.

Tikki i sering do ro Saksi Jahowa tu peternakannami di jonok ni Camden, Indiana. Olo do hami manangihon nasida. Alai hupangido hami do asa holan Bibel King James Version na dipakke nasida. Lomo do rohakku tu pendirian Saksi Jahowa na so olo marporang. Alai maol do tarjalo au nasida, ala huhilala dang sederhana cara marpakkean ni nasida. Jadi menuruthu, dang pulik dope nasida sian portibi on jala dang mungkin nasida agama na sittong. Menuruthu muse, na ginjang do roha ni halak molo dang sarupa cara marpakkeanna tu cara marpakkeannami. Jala holan mambahen ginjang ni roha do arta dohot hamoraon.

Dung i lao ma si James tu Bale Harajaon ni Saksi Jahowa rap dohot piga-piga anaknami. Muruk hian ma au. Diajak ibana ma au asa dohot marpungu, alai dang olo au. Dung i di sada tikki didok ibana ma tu au, “Nang pe dang setuju ho tu ajaran ni nasida, alai ida ma songon dia pambahenan ni nasida tu donganna.” I do na mambahen ibana tertarik.

Ujungna dohot ma au marpungu, alai tetap do au hati-hati. Lao ma au tu Bale Harajaon ni nasida mamakke baju dohot topikku na sederhana. Piga-piga gellengnami pe dang marsolop manang marsipatu jala sederhana do tong pakkean ni nasida. Nang pe songon i, tetap do burju akka Saksi Jahowa i tu hami. Gabe ninna rohakku ma, ‘Berbeda do hami tu nasida, alai tetap do dijalo nasida hami.’

Salut do au mangida haburjuon na dipatudu nasida, alai tetap do au bertekad holan na mamereng-mereng. Tikki marende pe nasida, tetap do au hundul jala dang dohot marende. Dung sae parpunguan i, husukkuni ma nasida taringot arti ni piga-piga ayat. Jala husukkun ma muse taringot piga-piga na diulahon disi na so sittong menuruthu. Nang pe dang ramah au tu nasida, alai tetap do burju halak na husukkuni i tu au. Salut do tong au tu nasida ala sarupa do alus ni sukkun-sukkunhu nang pe husukkun i tu halak na berbeda. Jala sipata, disurat nasida do alusna. Marguna hian do i di au. Alana di pudian ni ari, huparsiajari do i muse sahalakku.

Di musim panas taon 1985, lao ma hami tu kebaktian ni Saksi Jahowa di Memphis, Tennessee—holan lao mamereng-mereng. Tikki i marjenggot dope si James jala sederhana do pakkeannami sude. Tikki istirahat, sai adong do halak na manjuppangi hami. Lomo do rohanami mangida holong dohot haburjuon na dipatudu nasida tu hami. Jala marsada do nasida sude.

Ala mangida haburjuon ni Saksi Jahowa i, gabe olo ma si James marsiajar Bibel. Sai dipareso ibana do sude na diparsiajari ibana di Bibel. (Ulaon ni Apostel 17:11; 1 Tessalonik 5:21) Ujungna diboto si James ma, on do ajaran na sittong. Alai molo au, bingung dope. Lomo do memang rohakku mangulahon na sittong, alai dang olo au gabe halak na “modern” jala gabe bagian ni portibi on. Jadi tikki parjolo sahali au marsiajar Bibel, dua ma Bibel na hubukka. Sada Bibel terjemahan King James Version jala na sada nai Terjemahan Dunia Baru. Sai hubukka do ayat na huparsiajari di dua Bibel i, asa boi hupastihon dang ajaran na so sittong na huparsiajari i.

Boasa Gabe Pos Rohakku

Dung marsiajar Bibel au dohot Saksi Jahowa, gabe huboto ma sada do Debata, dang sitolusada. Jala huboto ma dang adong hape tondi ni halak naung mate. (1 Musa 2:7; 5 Musa 6:4; Hesekiel 18:4; 1 Korint 8:5, 6) Gabe huboto ma muse, dang disiksa Debata halak di api narokko na marnala-nala. Alai manggombarhon hamatean do api narokko i. (Job 14:13; Psalmen 16:10; Parjamita 9:5, 10; Ulaon ni Apostel 2:31) Taringot api narokko on ma pelajaran na paling penting di au. Alana dang setuju gareja Bruder Lama api narokko i manggombarhon hamatean.

Alai sukkun-sukkun dope rohakku, toho do Saksi Jahowa agama na sittong? Hape menuruthu, diihutton nasida dope portibi on jala dang “sederhana” parngoluon ni nasida. Alana penting hian do i menuruthu. Alai sadar do au, holan nasida do na mangulahon paretta ni Jesus paboahon barita na uli tu sude halak. Gabe bingung hian ma au tikki i!—Mateus 24:14; 28:19, 20.

Alani holong na dipatudu Saksi Jahowa, torus ma au marsiajar nang pe bingung dope au di tikki i. Sude do halak di huria burju tu hami na sakeluarga. Jala olo do tong dongan na sian huria na asing singgah tu jabunami. Alasan ni nasida, lao manuhor susu dohot tolor sian hami. Alani i gabe boi ma huhilala hami, memang toho do nasida halak na burju. Alana olo do nasida singgah tu jabunami nang pe nungnga marsiajar hami dohot Saksi Jahowa na asing. Songon i do tong akka dongan na di huria. Molo pas lagi jonok nasida tu jabunami, sai singgah do halak i. Marguna hian do i tu hami. Alana gabe boi ma hami lam mananda Saksi Jahowa jala gabe lam huargai hami ma holong dohot haburjuon na dipatudu nasida tu hami.

Dang holan Saksi na jonok tu jabunami patuduhon haburjuon. Tikki bingung dope au mamikkiri taringot pakkean dohot penampilan, ro ma tu jabukku si Kay Briggs na sian huria na asing. Sederhana do pakkeanna jala dang mamakke kosmetik ibana. Gabe tabo ma huhilala makkata-hatai dohot ibana. Dung i di sada tikki, ro ma si Lewis Flora tu jabukku. Ibana pe sian agama na “sederhana” hian do. Boi ma diida ibana sian bohikku na lagi bingung au. Jadi dikirim ibana ma sappulu lembar surat tu au asa boi paposson rohakku. Gabe naeng tangis ma au mangida haburjuonna i jala marulak-ulak do hujaha suratna i.

Hupangido ma tu sahalak pengawas wilayah, i ma si O’Dell, asa dipatorang tu au lapatan ni Jesaya 3:18-23 dohot 1 Petrus 3:3, 4. Jala husukkun ma tu ibana, “Molo menurut ayat i, ikkon sederhana do pakkeanta asa boi mambahen las roha ni Debata kan?” Dialusi ibana ma, “Menurut hamu, sala do mamakke topi? Sala do mandandan obuk?” Tikki di agama Bruder Lama, hudandan hami do obuk ni gellengnami. Jala dipakke akka borua do topi. Gabe huboto ma, dang sude hape isi ni Bibel diihutton gareja Bruder Lama i. Jala salut do au mangida hasabaron dohot haburjuon ni pengawas wilayah i.

Palan-palan mulai ma pos rohakku. Alai adong dope sada na mambahen au bingung—boasa dipangkas borua obukna. Jadi diajak sintua ma au martukkar pikkiran. Didok nasida, adong memang piga-piga borua na so boi paganjangkon obukna. Alai adong do muse akka borua na boi paganjangkon i. Molo songon i situasina, boi do dokkonon umburju borua na ganjang obukna sian borua na so ganjang obukna? Jala dipaboa nasida ma muse tu au, pasti diihutton akka dongan do hati nuranina tikki mambahen keputusan taringot pakkean dohot penampilan. Dung i disurat nasida ma na hubahas hami i asa boi hujaha-jaha di jabu.

Mangulahon na Huparsiajari Hami

Saleleng on, hulului hami do agama na mangulahon na diajarhonna jala nungnga dapotnami be i. Songon na didok Jesus, “Molo marsihaholongan hamu, botoon ni sude jolma ma na siseanku hamu.” (Johannes 13:35) Pos do rohanami holan Saksi Jahowa do na patuduhon holong, na gabe tanda ni sisean ni Jesus nasida. Alai tikki i, bingung dope si Nathan anaknami dohot si Rebecca borunami. Alana nungnga leleng nasida bergabung tu gareja Bruder Lama jala nungnga tardidi nasida disi. Alai dung diparsiajari nasida ajaran na sittong na sian Bibel jala dihilala nasida holong na dipatudu Saksi Jahowa, gabe dohot ma nasida bergabung.

Misalna, sai lomo do roha ni si Rebecca asa jonok nian hubunganna tu Debata. Jadi dung diboto ibana dang ditottuhon Debata hape ngolu ni halak dohot masa depanna, gabe ummura ma ibana martangiang tu Debata. Jala dung diboto ibana dang bagian sian Tritunggal Debata jala boi do ibana maniru sifat ni Debata, gabe lomo ma rohana naeng mananda Debata. (Epesus 5:1) Asing ni i, las do muse rohana mamboto dang ikkon mamakke bahasa kuno na sian Bibel King James Version ibana tikki martangiang tu Debata. Dung diboto ibana i jala diboto ibana na lao mangolu seleleng ni lelengna do hita di paradeiso na di tano on, gabe lam jonok ma hubunganna tu Debata.—Psalmen 37:29; Pangungkapon 21:3, 4.

Tanggung Jawab na Mambahen Las Rohanami

Di musim panas taon 1987, tardidi ma au, si James, dohot lima anaknami, i ma si Nathan, si Rebecca, si George, si Daniel, dohot si John. Di taon 1989, tardidi ma si Harley. Jala di taon 1994, tardidi ma si Simon. Sahat tu saonari sude dope hami mangulahon paretta ni Jesus, i ma paboahon barita na uli taringot Harajaon ni Debata.

Hea do onom gellengnami melayani di kantor cabang ni Saksi Jahowa di Amerika Serikat, i ma si Nathan, si George, si Daniel, si John, si Harley, dohot si Rebecca. Disi dope si George melayani jala nungnga 14 taon ibana disi. Si Simon na baru tamat di taon 2001, baru-baru on dohot do tong gabe anggota staf ni kantor cabang. Sude do anaknami gabe sintua manang gabe parhobas di huria. Molo suamikku, sintua do ibana di huria Thayer na di Missouri. Molo au, tetap dope sibuk marbarita na uli.

Saonari nungnga tolu pahoppunami, i ma si Jessica, si Latisha, dohot si Caleb. Las do rohanami ala disuatton natua-tuana do holong ni Jahowa i tu roha ni nasida na polos i. Las do rohanami na sakeluarga ala diurupi Jahowa do hami asa boi jonok tu Ibana. Jala diurupi Ibana do hami lao mamboto na dia naposona na mamakke goarna jala na patuduhon holong na sian Debata i.

Boi do hurasahon hami songon dia perasaan ni akka halak na naeng mananda Debata alai nungnga dipengaruhi lingkungan hati nuranina, dang dipengaruhi Bibel. Hirim do rohanami boi hilalaon ni nasida las ni roha songon na dihilala hami. Las do rohanami lao tu jabu ni akka halak, dang lao manggadis hasil panen, alai lao paboahon barita na uli taringot Harajaon ni Debata dohot pasu-pasu na lao bahenon ni i. Manetek do ilukku molo huingot holong dohot hasabaron ni akka halak na mamakke goar ni Jahowa!

[Gambar]

Tikki marumur pitu taon au, jala dung dewasa

[Gambar]

Si James, si George, si Harley, dohot si Simon, sederhana do pakkean ni nasida

[Gambar]

Masuk do fotokku na lagi mamboan hasil panen tu pasar di koran

[Credit Line]

Journal and Courier, Lafayette, Indiana

[Gambar]

Hami na sakeluarga baru-baru on