Na Taparsiajari taringot Debata sian Alam

“Sukkun ma jo akka binatang, asa diajari ho, Jala sukkun ma jo akka pidong na di langit, asa dipaboa tu ho. Parrohahon ma tano on asa diajari ho, Jala ida ma akka dekke na di laut asa dipaboa i tu ho.”​—JOB 12:7, 8.

PIGA-PIGA taon na parpudi on, nungnga marsiajar be akka ilmuwan dohot insinyur sian akka suan-suanan dohot binatang. Didok do on biomimetika. Diparsiajari jala ditiru nasida ma akka rancangan na adong di alam lao mambahen sada mesin na baru manang mambahen mesin na leleng gabe lam denggan. Tikki dijaha hamu akka contoh on, pikkirhon ma, ‘Ise do na patut dipuji alani akka rancangan i?’

Marsiajar Sian Ikan Paus Bungkuk

Aha do na boi diparsiajari sahalak perancang pesawat sian ikan paus bungkuk? Godang. Ikan paus on boratna hira-hira 30 ton. Nungnga sarupa i songon truk na gok isina. Jogal do daging ni ikan paus on. Ganjangna 12 meter, jala siripna balga songon habong. Alai hatop do marlange ikan on. Misalna, tikki mangalului siallangonna, marlange ma ikan on sambil marputar sian toru sahat tu ginjang. Diameterna hira-hira sada satonga meter. Diombusson ikan paus on ma gelembung na gelleng-gelleng. Masuk ma akka dekke siallangonna i manang kurtasea tu bagasan ni gelembung na marputar i. Dung i pittor dialtup ikan paus on ma akka dekke naung pungu i.

Heran do akka ahli mangida ikan paus on. Boasa ma boi ikan paus on marlange sambil marputar, hape jogal do dagingna. Diboto nasida ma boasa boi songon i, i ma alani siripna. Ujung ni siripna margarigi, dang songon ujung ni pesawat. Dung i, adong muse benjolan di ujung ni siripna i na digoari tuberkel.

Tuberkel on ma na mambahen gabe lam mura ikan paus on marlange. Songon dia carana? Jurnal Natural History paboahon, ala adong tuberkel i, gabe lam hatop ma aek mangalewati siripna, jala mambahen lingkaran. Boi do i masa nang pe sian toru tu ginjang ikan paus i marlange. Molo dang margarigi ujungna, dang boi ikan paus i marlange tu ginjang sambil mambahen lingkaran na gelleng. Alana gabe marputar ma aek di pudi ni siripna i jala dang boi be mangangkat ikan paus i.

Aha do guna ni on tu ari na naeng ro? Molo songon sirip ni ikan paus on do dibahen sayap ni pesawat terbang, dang pola porlu be dibahen godang siripna manang alat na asing lao mengubah aliran udara. Undenggan do sayap sisongon on jala mura dirawat. Pakar biomekanik na margoar si John Long mandok, dang sadia leleng nai “bahenon nama benjolan-benjolan di pesawat jet penumpang songon na adong di sirip ni ikan paus bungkuk”.

Maniru Habong ni Burung Camar

Memang saleleng on nungnga dibahen be bentuk ni sayap pesawat songon habong ni pidong. Alai baru-baru on adong muse na ditiru akka ahli. Majalah New Scientist paboahon, akka peneliti di University of Florida “nungnga mambahen sada pesawat na gelleng na boi dikendalihon pakke remot. Pesawat on boi habang songon burung camar. Boi habang di tempat, tu toru jala hatop muse habang tu ginjang.”

Longang do roha mangida cara ni burung camar on habang. Alana boi do dipapeol pidong on habongna. Asa boi songon i, majalah i paboahon “dibahen ma mesin na gelleng di pesawat na 60 sentimeter i lao manggerakkon akka sayapna.” Alani i, gabe boi ma pesawat on habang di tempat jala habang di holang-kolang ni bangunan na timbo. Lomo do roha ni Angkatan Udara ni Amerika Serikat mambahen pesawat sisongon on. Molo adong pesawat na songon i, boi ma dilului nasida senjata kimia manang biologi di akka kota na balga.

Maniru Pat ni Cicak

Godang do tong na boi taparsiajari sian binatang na mangolu di darat. Misalna songon cicak. Boi do cicak mardalan di dinding jala patna boi lokkot di langit-langit ni jabu. Mulai sian najolo pe nungnga diboto akka halak taringot on. (Poda 30:28) Aha do na mambahen cicak boi mardalan di langit-langit ni jabu alai dang madabu?

Dang alani na adong lem di patna. Alai ala adong do bulu na halus di patna na mambahen cicak boi lokkot di inganan na songon dia pe. Termasuk ma di inganan na landit songon kaca. Sasittongna alani gaya gravitasi, dang boi hita manjakkit molo holan tabahen tanganta tu tembok. Alai asing do molo cicak. Alani bulu na halus i boi ma ibana lokkot di dinding. Adong marribu bulu na halus di pat ni cicak. Gabe boi ma i manean borat ni cicak i.

Aha ma guna ni on? Ditiru akka halak na malo ma pat ni cicak on lao mambahen Velcro manang kancing perekat. * Jurnal The Economist paboahon hata ni sahalak peneliti na mandok, “pita perekat na maniru pat ni cicak” boi do “dipakke di kedokteran tikki dang adong perekat kimia na boi dipakke”.

Ise do na Patut Dipuji jala Dipasangap?

Asing ni i, Badan Antariksa Amerika Serikat naeng mambahen robot na godang patna jala na boi mardalan songon kalajengking. Akka insinyur di Finlandia pe naeng mambahen traktor na patna adong onom asa boi lewat sian inganan na songon dia pe. Akka peneliti na asing naeng mambahen baju na songon sisik ni parbue ni hau tusam, na boi tarbukka jala tartutup sandiri. Jala pabrik na mambahen mobil pe naeng mambahen mobil na songon bentuk ni ikan buntal kotak. Alani bentukna i gabe rendah ma hambatan ni mobil i. Jala akka peneliti na asing naeng mambahen baju na karas alai neang, songon na adong di cangkang korang abalone.

Godang nai dope na boi ditiru akka peneliti sian alam. Sappe boi do disusun nasida gabe songon bank data. The Economist mandok, boi do dilului akka ilmuwan “solusi ni rancangan ni nasida” sian bank data on. Biasana halak manang perusahaan do na mendaftarhon hak paten sada ide manang mesin. Alai asing do molo rancangan na maniru alam on. The Economist paboahon, “Ala digoari do rancangan na maniru alam i gabe ‘hak paten biologi’, sasittongna alam i sandiri ma nappunasa hak patenna.”

Boasa boi songon i dengganna akka ide i? Godang akka peneliti mandok, alani evolusi do i saleleng marjuta-juta taon. Alai asing do pandapot ni akka peneliti na asing. Sahalak pakar mikrobiologi na margoar si Michael Behe manurat di sada koran na goarna The New York Times taon 2005. Didok ibana di koran i, “Sian akka rancangan i takkas ma tarida sada bukti na paposson roha: Molo adong taida sesuatu na berbentuk, na mardalan, jala na marsoara songon soara ni bebek, jala dang adong bukti na mandok i dang bebek, pasti yakin do hita tutu do i bebek.” Artina, “Unang ma tadok dang adong na mangarancang sude na di tano on, hape nungnga takkas taida buktina.”

Patut do dipuji jala diargai insinyur na mambahen rancangan sayap pesawat na lebih aman jala na hemat. Songon i nang penemu perban, bahan pakaian na bagak, dohot penemu kendaraan na hemat. Sasittongna, halak na maniru rancangan ni halak na asing alai dang mangargai perancangna, didok do i tindakan kriminal.

Ditiru akka peneliti do rancangan na adong di alam on lao pasaehon masalah na rumit. Alai didok nasida alani evolusi do adong rancangan na rumit di alam on. Menurut hamu, masuk akkal do i? Haru maniru sajo, ikkon malo do akka peneliti i, apalagi ma na parjolo sahali mangarancang i. Ise do na patut dipuji, na maniru rancangan i do manang na parjolo sahali mambahen rancangan i?

Kesimpulan na Pas

Dung mangida akka bukti sian rancangan na adong di alam, gabe godang do halak na setuju tu panurat ni psalmen na mandok, “Tung godang situtu do na binahenmu, ale Jahowa! Dibahen Ho do sudena i alani bisukmu. Gok do na binahenmu di tano on.” (Psalmen 104:24) Songon i do tong hata ni si Paulus, sahalak bawa na manurat Bibel. Ibana mandok, “Alai boi do taattusi akka pangalahona molo taparsiajari songon dia portibi on ditoppa.... Tarida do sian akka na tinoppana na tutu Ibana Debata jala martahan sahat tu saleleng ni lelengna do huasona.”​—Rom 1:​19, 20.

Alai godang do halak na porsea tu isi ni Bibel dohot tu Debata na mandok, dipakke Debata do evolusi lao manoppa akka na adong di tano on. Tutu do i? Aha do na diajarhon di Bibel?

[Surat na di Toru]

[Kutipan]

Boasa boi songon i dengganna akka ide i?

[Kutipan]

Ise do nappunasa hak paten ni alam on?

[Kotak/​Gambar]

Haru maniru sajo, ikkon malo do akka peneliti i, apalagi ma na parjolo sahali mangarancang i

Sayap pesawat na maniru habong ni burung camar

Dang boi kotor pat ni cicak, jala dang berbekas na nidegena, boi do i lokkot tu manang aha pe, kecuali teflon. Mura do lokkot patna i jala mura malua. Dicoba akka peneliti do maniru pat ni cicak

Bentuk ni ikan buntal kotak, na ditiru lao mambahen mobil na rendah hambatan

[Credit Lines]

Airplane: Kristen Bartlett/​University of Florida; gecko foot: Breck P. Kent; box fish and car: Mercedes-Benz USA

[Kotak/​Gambar]

AKKA BINATANG NA MARBISUK

Godang do binatang na “marbisuk”. Boi do nasida denggan manottuhon pardalananna. (Poda 30:24, 25) Parrohahon ma dua contoh on.

◼ Cara ni Porngis Mangatur Pardalananna. Boasa boi akka porngis na kaluar mangalului sipanganon boi muse mulak tu sarang ni nasida? Akka peneliti di Inggris mandok, ditadingkon nasida do bau na khas gabe jejak di nasida. Alai asing ni i, adong do piga-piga porngis na mamakke sistem geometri lao mambahen jalur, jala on ma na mambahen nasida gabe mura manottuhon dalan lao mulak. Misalna, didok New Scientist, adong sada porngis goarna semut firaun. Dibahen porngis i do jalur sian sarangna. Dung i dibahen ma jalur i gabe marcabang, jala sudutna 50 sahat tu 60 derajat. Aha do na menarik sian cara on? Tikki naeng mulak porngis i tu sarangna, sahat ma ibana di cabang ni jalur i nakkin. Dipillit ibana do jalur na paling lurus sian cabang i. Jala nungnga pasti jalur i menuju tu sarangna. Didok di artikel i, “Alani geometri jalur on, gabe denggan ma akka porngis i mangatur pardalananna. Molo pe dibahen nasida dua arah jalur i, dang sala be jalur ni nasida jala dang gabe loja alani i.”

◼ Cara ni pidong manontuhon arah sidalananna. Somalna, boi do akka pidong denggan manottuhon arah sidalananna nang pe dao pardalananna jala margatti-gatti cuaca na didalani. Boasa boi songon i? Didok akka peneliti, boi do dihilala akka pidong medan magnet bumi on. Alai didok jurnal Science, “dang sarupa medan magnet bumi di sude inganan jala sipata olo do dang tu utara arah ni medan magnet i”. Jadi aha do na mambahen akka pidong i dang sala arah tikki marpinda tu inganan na asing? Boi do diatur nasida arah pardalananna sesuai tu mataniari na bonom ganup botari. Sasittongna, olo do muba-uba posisi ni mataniari na bonom alani garis lintang dohot musim. Alai didok akka peneliti, boi do akka pidong i mangihutton akka perubahan i marhite jam biologis nasida, alana didok jurnal Science “marhite jam biologis i, boi do diboto nasida musim aha do di tikki i”.

Jadi, ise do na mambahen porngis boi mamboto sistem geometri? Ise do na mambahen pidong boi mamboto arah, mamakke jam biologis, jala boasa nasida boi denggan mamakke i sude? Na toppu do i adong sandiri? Manang na adong do Panoppa na malo mambahen i?

[Credit Line]

© E.J.H. Robinson 2004