1. Aha do na didok Panurirang Jesaya tu halak Israel?

 DIDOK Panurirang Jesaya, “Debata na sittong” do Jahowa i. Hata “sittong” diterjemahon sian bahasa aslina, i ma “amen”. (Jes. 65:​16, surat na di toru.) “Amen” lapatanna “masa ma songon i” manang “tutu”. Molo adong do kaitan ni hata “amen” on tu Jahowa manang Jesus, on gabe jaminan pasti saut do hata i. Alani i, takkas do barita na dipasahat si Jesaya tu halak Israel: Aha pe na didok Jahowa boi do dihaporseai. Jala torus do Jahowa pasautton akka janjina.

2. Boasa pos rohatta tu janji ni Jahowa taringot ari na naeng ro? Jala sukkun-sukkun aha do na lao tabahas?

² Boi do tahaporseai pasti saut do sude janji ni Jahowa taringot ari na naeng ro? Hira-hira 800 taon dung didok si Jesaya i, dipaboa Apostel Paulus ma boasa boi dihaporseai janji ni Debata i. Apostel Paulus mandok, “Dang boi Ibana margabus.” (Heb. 6:18) Pikkirhon ma taringot on: Dang mungkin kaluar sian sada mata mual, aek na tawar dohot aek na accim. Dos songon i ma, dang mungkin Jahowa margabus ala sian  Ibana do ro hasittongan i. Jadi boi do tahaporseai sude janji ni Jahowa, termasuk ma sude janjina taringot ari na naeng ro. Di artikel on, tabahas ma aha do janji ni Jahowa tu hita taringot ari na naeng ro? Jala songon dia do Jahowa paposson rohatta na lao saut do sude janjina?

3. (a) Janji ni Jahowa na dia do na massai arga tu naposo ni Debata? (Pangungkapon 21:​3, 4) (b) Boha do didok piga-piga halak tikki tapaboa janji on tu nasida?

³ Massai arga do janji na lao tabahas on tu naposo ni Debata di liat portibi on. (Jaha Pangungkapon 21:​3, 4.) Marjanji do Jahowa di tikkina annon “Dang adong be hamatean nang arsak ni roha, nang angguk-angguk, nang na haccit, dang disi be.” Godang do sian hita na manjahahon ayat on lao mangapuli akka halak tikki marbarita na uli jala patuduhon songon dia ngolutta di Paradeiso annon. Boha do didok piga-piga halak tikki tajahahon ayat on? Olo do ra didok nasida, “Dang mungkin on boi terjadi.”

4. (a) Tikki dibahen Jahowa janji taringot Paradeiso, aha do naung diboto Ibana na lao terjadi di tikkitta saonari? (b) Aha do muse na dipaboa Jahowa taringot janjina?

⁴ Ditogu-togu tondi parbadia ni Jahowa do si Johannes manuratton janji taringot Paradeiso on. Pasti diboto Jahowa do na lao tapaboa janji on tu na asing di tikkitta saonari. Diboto Jahowa do muse godang do halak na so porsea na lao bahenonna do perubahan di ari naeng ro. (Jes. 42:9; 60:2; 2 Kor. 4:​3, 4) Jadi songon dia do hita boi paposson roha ni na asing dohot diritta na lao saut do na disurat di Pangungkapon 21: 3, 4? Dipaboa Jahowa do muse alasanna boasa boi pos rohatta tu janjina i. Aha ma i?

5. Ayat na dia do na boi paposson rohatta tu janji ni Debata?

⁵ Adong do alasanna boasa boi pos rohatta na lao saut do janji ni Jahowa. Didok do di Bibel, “Dung i didok Ibana na hundul di tahta i ma, ‘Ida ma! Hupaimbaru do saluhutna.’ Didok Ibana muse, ‘Suratton ma on, ai sittong jala boi do dihaporseai akka hata on.’ Didok Ibana ma tu au, ‘Nungnga saut be akka i! Au do Alpa dohot Omega, mulana dohot ujungna.’”—Pgk. 21:​5, 6a.

6. Boasa jaminan na disurat di Pangungkapon 21:​5, 6 boi paposson rohatta tu janji ni Debata?

⁶ Boasa ayat on patoguhon haporseaotta tu janji ni Debata? Janji ni Debata i disurat di Pangungkapon 21:​3, 4. Jala di ayat 5 dohot 6, hira na ditambai Jahowa ma tanda tanganna lao paposson rohatta pasti saut do janjina i. Jadi boi didok di akka ayat on dipatudos do tindakan ni Jahowa songon dokumen na ditanda tangani Ibana. b Saonari taida ma songon dia Jahowa paposson rohatta na boi do tahaporseai janjina i.

7. Ise do na makkatai di ayat lima i, jala boasa istimewa on?

⁷ Di mula ni ayat 5 didok do, “Dung i didok Ibana na hundul di tahta i ma.” (Pgk. 21:5a) Istimewa do hata on. Alana, tolu hali ma hata sisongon on disurat di bukku Pangungkapon, na patuduhon Jahowa sandiri do na mandok on. Dang sian suru-suruan manang sian Jesus ro jaminan on, alai sian Jahowa sandiri do. On gabe bukti na boi do hita porsea tu hata ni Jahowa berikutna. Boasa boi songon i? Ala “Debata na so margabus” do Jahowa. (Tit. 1:2) Pasti saut do janji na disurat di Pangungkapon 21:​5, 6.

8. Aha do na didok Jahowa na patuduhon ikkon saut do janjina i? (Jesaya 46:10)

⁸ Dung i didok Jahowa ma muse, “Ida ma!” (Pgk. 21:5) Hata Junani na diterjemahon gabe “ida ma”, jotjot do dipakke di bukku Pangungkapon. Sada referensi paboahon, jotjot do dipakke hata on lao manogihon na manjaha asa mamparrohahon hata na didok berikutna. Aha do huroha na didok Debata muse? Didok Debata, “Hupaimbaru do saluhutna.” Memang di ari na naeng ro do pasauton ni Jahowa i, alai pos do roha ni Jahowa pasti saut do janjina i. Gariada hira naung saut do janjina i.—Jaha Jesaya 46:10.

9. (a) Aha do lapatan ni hata “Hupaimbaru do saluhutna”? (b) Aha do na lao masa tu “langit” dohot “tano” na adong saonari?

⁹ Saonari taida ma lapatan ni hata, “Hupaimbaru do saluhutna.” Di ayat on adong dua na lao bahenon ni Jahowa. Na parjolo, lao dihancurhon Jahowa do sistem na leleng. Jala na paduahon, lao dibahen Jahowa do sistem na baru. Di Pangungkapon 21:1 didok, “Ai nungnga salpu langit dohot tano na parjolo i.” ‘Langit na parjolo’ maksudna sistem politik na dirajai Sibolis dohot suru-suruan na jahat. (Mat. 4:​8, 9; 1 Joh. 5:19) Jotjot do dipakke hata “tano” di Bibel, lao manggombarhon jolma na adong di tano on. (1 Mus. 11:1; Ps. 96:1) “Tano na parjolo”, maksudna akka jolma na jahat na mangolu saonari. Dang lao patureon ni Jahowa “langit” dohot “tano” on, alai lao digatti Ibana do i. Digatti Ibana ma langit dohot tano na adong saonari tu “langit na imbaru dohot tano na imbaru”. Langit na imbaru, i ma pamarettaon na baru. Jala tano na imbaru, i ma rakyat na baru na tigor marroha.

10. Aha do na naeng dipaimbaru Jahowa?

¹⁰ Di Pangungkapon 21:5 tajaha ma aha do na didok Jahowa taringot na lao paimbaruonna. Dang didok Jahowa, “Bahenokku do na baru tu saluhutna.” Alai didok Ibana, “Hupaimbaru do saluhutna.” Jadi lao bahenon ni Jahowa do tano dohot jolma gabe sempurna muse. Songon surirang ni si Jesaya, bahenon ni Jahowa ma saluhut tano on gabe inganan na bagak songon Taman Eden. Dipaimbaru ma hita sude, dipamalum ma nasa sahit. Lao dipamalum ma na pakpang, na buta, dohot halak na so marbinege. Jala mulak mangolu muse halak naung mate.—Jes. 25:8; 35:​1-7.

11. Aha do na didok Jahowa tu si Johannes jala aha do alasanna?

¹¹ Aha do muse jaminan sian Debata asa boi pos rohatta tu hatana? Didok Jahowa do tu si Johannes, “Suratton ma on, ai sittong jala boi do dihaporseai akka hata on.” (Pgk. 21:5) Dang holan disuru Jahowa asa ‘disuratton’ on. Alai dipaboa Jahowa do alasanna. Didok Jahowa do, “Ai sittong jala boi do dihaporseai akka hata on.” Maksudna, boi do diandalhon hata ni Debata. Mandok mauliate do hita ala olo si Johannes manuratton on. Gabe boi ma tajaha janji ni Debata taringot Paradeiso jala boi ma tabayakkon akka pasu-pasu na lao tajalo.

12. Boasa sanggup Jahowa mandok, “Nungnga saut be akka i”?

¹² Aha do muse na didok Jahowa? Didok Ibana do, “Nungnga saut be akka i!” (Pgk. 21:6) Boasa didok Jahowa songon i? Sanggup do Ibana mandok songon i, ala dang  adong na boi mangabbati Ibana lao pasautton tujuanna. Dung i dilehon Jahowa do muse jaminan na asing, na boi paposson rohatta pasti saut do janjina i. Aha ma i?

13. Boasa didok Jahowa, “Au do Alpa dohot Omega.”?

¹³ Songon na dipaboa nakkin, di parnidaan i tolu hali ma Jahowa sandiri makkatai tu si Johannes. (Pgk. 1:8; 21:​5, 6; 22:13) Setiap makkatai Jahowa sai didok Ibana do, “Au do Alpa dohot Omega.” Huruf alpa, i ma huruf na parjolo di abjad Junani. Jala huruf na parpudi, i ma omega. Jadi tikki didok Jahowa “Alpa dohot Omega”, on mangurupi hita mangattusi pasti marhasil do Jahowa pasaehon sude naung dimulai Ibana.

14. (a) Tikki sadihari do hata ni Jahowa gabe “Alpa” dohot “Omega”? (b) Jaminan aha do na dipaboa di 1 Musa 2:​1-3?

¹⁴ Dukkon ditoppa Jahowa si Adam dohot si Hawa, dipaboa Jahowa do tu nasida aha tujuanna manoppa jolma dohot tano on. Bibel mandok, “Dipasu-pasu Debata ma nasida jala didok ma, ‘Marpinoppari ma hamu asa lam godang hamu. Gohi hamu ma tano on jala rajai ma i.’” (1 Mus. 1:28) Tikki didok Jahowa i, on ma mulana manang “Alpa” i. Molo nungnga saut sude tujuan ni Jahowa i, on ma na gabe “Omega”. Gabe paradeiso ma tano on jala holan pinoppar ni si Adam dohot si Hawa na setia ma na manggohi tano on. Dukkon sae ditoppa Jahowa “akka na di langit, akka na di tano on, dohot nasa isina”, dipaboa Jahowa do jaminan na lao saut do janjina. Taboto ma i sian 1 Musa 2:​1-3. (Jaha.) Di ayat i didok do Jahowa pabadiahon ari papituhon. Aha do maksudna? Dijamin Jahowa do pasti saut do tujuanna manoppa jolma dohot tano on di ujung ni ari papituhon.

15. Boasa dirippu Sibolis boi ibana mambahen gagal tujuan ni Debata?

 ¹⁵ Dukkon mangalo si Adam dohot si Hawa tu Debata, gabe mardosa jala mate ma nasida dohot akka pinopparna. (Rom 5:12) Alani i hira na so mungkin be adong jolma na sempurna na manggohi tano on. Boi do Sibolis mambahen gagal tujuan ni Debata? Didok roha ni Sibolis, dang boi be Jahowa pasauton janjina. Dirippu Sibolis do ra lao pamateon ni Debata si Adam dohot si Hawa, jala ditoppa muse jolma na sempurna na asing asa boi saut tujuan ni Jahowa. Alai molo dibahen Debata songon i, gabe didok Sibolis ma Debata pargabus. Boasa? Alana songon na disurat di 1 Musa 1:​28, nungnga marjanji Jahowa tu si Adam dohot si Hawa, ikkon pinoppar ni nasida do na manggohi tano on.

16. Aha do muse na dirippu Sibolis boi mambahen gagal tujuan ni Debata?

¹⁶ Aha do muse na dirippu Sibolis lao bahenon ni Debata? Dirippu Sibolis do ra molo tung pe marianakkon si Adam dohot si Hawa, dang na lao boi pinoppar ni nasida sempurna muse. (Pjm. 7:20; Rom 3:23) Molo dang boi sempurna pinoppar ni si Adam dohot si Hawa, boi ma didok Sibolis naung gagal Debata pasautton tujuanna. Alana dang jolma na sempurna na lao manggohi tano on.

17. Dung mangalo Sibolis, si Adam, dohot si Hawa, aha do solusi na dibahen Jahowa? Jala ada ho hasilna? (Ida gambar.)

¹⁷ Dibahen Jahowa do solusi na terbaik lao pasautton janjina i, nang pe mangalo Sibolis, si Adam, dohot si Hawa. (Ps. 92:5) Dipaloas Jahowa do si Adam dohot si Hawa marianakkon jala gabe saut ma hata ni Jahowa. Dang margabus Ibana. Jala sian on dipatudu Jahowa do muse dang adong na boi mangabbati tujuanna i. Dipastihon Jahowa do saut tujuanna i marhite paradehon sada “pinoppar”, na lao paluahon pinoppar ni si Adam dohot si Hawa na setia. (1 Mus. 3:15; 22:18) Pinoppar on ma na mangalehon ngoluna gabe tobusan lao paluahon jolma. Dang hea tarpikkir Sibolis tu solusi na dibahen Jahowa on. Boasa? Alana, holong na so makkarikkotton diri do na mambahen adong tobusan. Sifat on dang adong di Sibolis, alana holan dirina do na dipikkiri Sibolis. Jadi aha ma na lao terjadi alani tobusan on? Di ujung ni pamarettaon saribu taon, gabe sempurna ma pinoppar ni si Adam dohot si Hawa na setia. Nasida ma na mangingani tano on. Gabe saut ma tujuan naung didok Jahowa. Di tikki i hira didok Jahowa ma, “Omega”.

18. Paboa ma tolu alasan na boi mambahen pos rohatta tu janji Debata. (Ida kotak “ Tolu Alasan na Mambahen Pos Rohatta tu Janji ni Jahowa”.)

¹⁸ Di artikel on nungnga tabahas alasanna boasa boi pos rohatta na lao saut do janji ni Debata taringot Paradeiso. Molo adong halak na so porsea tu janji ni Debata, aha ma na boi tadokkon lao paposson roha ni nasida? Na parjolo, Jahowa sandiri do na marjanji. Bukku Pangungkapon mandok, “Dung i didok Ibana na hundul di tahta i ma, ‘Ida ma! Hupaimbaru do saluhutna.’” Marbisuk do Jahowa, marhuaso do Ibana, jala lomo do rohana pasautton janjina. Na paduahon, diboto Jahowa do na lao saut hatana i. I do alana marhak do Ibana mandok, “Ai sittong jala boi do dihaporseai akka hata on. . . . Nungnga saut be akka i!” Na patoluhon, dang adong na boi pasohon ulaon na dimulai Jahowa. I do alana didok Ibana, “Au do Alpa dohot Omega.” Patuduon ni Jahowa ma molo Sibolis pargabus jala dang boi ibana mangabbati tujuan ni Jahowa.

19. Molo maol porsea akka halak tu janji ni Debata, aha do na lao bahenonmuna?

¹⁹ Tikki dipaboa hamu tu akka halak jaminan sian Debata na lao saut do janjina, pasti gabe togu ma haporseaonmuna tu Ibana. Molo dijahahon hamu janji ni Debata na disurat di Pangungkapon 21:​3, 4 tu halak jala didok nasida, “Dang mungkin on terjadi”, aha do na lao didok hamu? Jaha jala patorang hamu ma ayat 5 dohot 6. Paboa ma nungnga dijamin Jahowa pasti saut janjina i, songon dokumen naung ditanda tangani Ibana.—Jes. 65:16.