1-2. (a) Songon dia do situasitta sarupa tu situasi ni halak Jahudi na mulak tu Jerusalem? (b) Dung mulak halak Jahudi tu Jerusalem songon dia do situasi ni nasida? (Ida ma kotak “ Jaman ni si Hagai, si Sakaria, Dohot si Esra”.)

 HEA DO marsak hamu mamikkiri ngolumuna tu ari na naeng ro? Olo do ra mabiar hamu dang adong be passarianmuna jala dang boi be hamu mangalehon mangan keluargamuna. Manang olo do ra mabiar hamu mamikkiri keamanan ni keluargamuna molo terjadi masalah politik di negaramuna, terjadi penganiayaan, manang diorai ulaonta marbarita. Songon i do situasimuna saonari? Molo songon i, parrohahon ma songon dia Jahowa mangurupi halak Israel najolo. Alana sai diurupi Jahowa do nasida tikki masa situasi songon i tu nasida.

² Ikkon togu do haporseaon ni halak Jahudi na tinggal di Babel tikki naeng mulak nasida tu Jerusalem. Alana, nga tabo ngolu ni nasida di Babel. Jala dang diboto nasida dope songon dia situasi di Jerusalem. Dang leleng dung sahat nasida di Jerusalem, terjadi ma masalah ekonomi dohot politik. Asing ni i, ro ma paraloan sian akka negara di sakaliling ni nasida. Akibatna, gabe maol ma nasida mangalehon rohana lao padenggatton bagas joro ni Jahowa. Jadi hira-hira di taon 520 SM, disuru Jahowa ma Panurirang Hagai dohot Panurirang Sakaria patoguhon naposona asa semangat muse. (Hag. 1:1; Sak. 1:1) Molo taida ceritana di Bibel, marhasil do dua panurirang i mambahen nasida semangat. Alai, hira-hira 50 taon dukkon i, ikkon dipatogu do muse halak Jahudi. Jadi ro ma muse si Esra sahalak panalin sian Babel tu Jerusalem. Dipatogu ibana ma nasida asa semangat muse lao mangulahon ibadat na sittong.—Esr. 7:​1, 6.

3. Sukkun-sukkun aha do na lao tabahas? (Poda 22:19)

 ³ Alani hata ni Debata na dipasahat Panurirang Hagai dohot si Sakaria, gabe lam pos do roha ni halak Jahudi najolo tu Jahowa nang pe godang masalah ni nasida. Alai boi do tong hata na dipasahat akka panurirang i paposson rohatta saonari, pasti diurupi Jahowa do hita dang soal aha pe na masa. (Jaha Poda 22:19.) Saonari, tabahas ma hata ni Debata na dipasahat Panurirang Hagai dohot si Sakaria. Jala taida ma songon dia teladan ni si Esra. Dung i tabahas ma sukkun-sukkun on: Masalah aha do na diadopi halak Jahudi na mulak tu Jerusalem? Nang pe maol situasitta, boasa ikkon tetap urrikkot di hita mangulahon lomo ni roha ni Debata? Jala songon dia do asa lam marpos ni roha hita tu Jahowa nang pe adong tantangan?

4-5. Boasa gabe dang semangat be halak Jahudi lao padenggatton bagas joro ni Jahowa?

⁴ Dung sahat halak Jahudi di Jerusalem, godang do na ikkon dikarejohon nasida. Ikkon hatop do dibahen nasida langgatan tu Jahowa dohot fondasi ni bagas joro. (Esr. 3:​1-3, 10) Alai dang leleng dukkon i, moru ma semangat ni nasida. Boasa? Alana dang holan bagas joro na ikkon dipadenggan nasida. Ikkon dipajongjong nasida do tong jabu ni nasida sandiri, ikkon marsuan do nasida, jala ikkon massari do nasida asa boi mangan keluarga ni nasida. (Esr. 2:​68, 70) Asing ni i, adong do tong akka musu na sai berusaha mambahen asa sundat dipadenggan bagas joro.—Esr. 4:​1-5.

⁵ Gabe susa do muse halak Jahudi na mulak i alani masalah ekonomi dohot masalah politik. Di tikki i dohot do luat ni nasida diparetta Imperium Persia. Dung mate Raja Sirus taon 530 SM, anakna si Kambises ma na gabe raja manggattihon ibana. Lomo do roha ni si Kambises naeng manaluhon Mesir. Tikki naeng manaluhon Mesir, dipangido akka tentarana do sian halak Israel sipanganon, siinumon, dohot inganan marborngin. Gabe lam susa ma halak Jahudi dibahen nasida. Bahkan tikki mulai mamaretta si Darius I manggattihon si Kambises, godang dope terjadi masalah. Misalna, terjadi do kerusuhan, dohot pemberontakan di Imperium Persia. Alani sude na masa on, gabe susa jala marsak ma halak Jahudi lao memenuhi kebutuhan keluarga ni nasida. Gabe adong ma halak Jahudi na marpikkir dang tikkina dope nasida lao padenggatton bagas joro ni Jahowa.—Hag. 1:2.

6. Songon na disurat di Sakaria 4:​6, 7, aha do masalah na diadopi halak Jahudi? Jala songon dia do si Sakaria paposson roha ni nasida?

⁶ Jaha Sakaria 4:​6, 7. Adong do muse masalah ekonomi, politik, dohot paraloan na diadopi halak Jahudi. Di taon 522 SM, marhasil do akka musu pasohon ulaon padenggatton bagas joro. Alai dipapos si Sakaria do roha ni halak Jahudi na urupan ni Jahowa do nasida, dang soal aha pe tantangan na diadopi nasida. Di taon 520 SM dipaloas Raja Darius do nasida asa padenggatton bagas joro, jala dilehon do bantuan tu nasida. Gariada disuru do akka gubernur di daerah i lao mangurupi nasida.—Esr. 6:​1, 6-10.

7. Ala dijumolohon halak Jahudi padenggatton bagas joro, pasu-pasu aha do na dijalo nasida?

 ⁷ Marjanji do Jahowa marhite Panurirang Hagai dohot si Sakaria, na urupanna do nasida molo dijumolohon padenggatton bagas joro. (Hag. 1:​8, 13, 14; Sak. 1:​3, 16) Ala dipatogu akka panurirang i, boi ma dipadenggan nasida bagas joro di taon 520 SM. Jala dang gok lima taon nungnga sae dipadenggan bagas joro i. Ala dijumolohon halak Jahudi mangulahon lomo ni roha ni Debata nang pe  godang masalah ni nasida, gabe diurupi Jahowa do nasida. Dilehon Jahowa do kebutuhan ni nasida ganup ari jala diurupi do nasida asa toktong jonok tu Jahowa. Hasilna, marlas ni roha ma nasida manomba Debata Jahowa.—Esr. 6:​14-16, 22.

8. Songon dia do Hagai 2:4 mangurupi hita asa boi manjumolohon lomo ni roha ni Debata? (Ida surat na di toru.)

⁸ Ala lam jonok nama hasusaan bolon, gabe urrikkot ma di hita marbarita na uli. (Mrk. 13:10) Alai mungkin dang mura di hita lao mangulahon i ala susa di parhepengon, manang adong na mangorai hita marbarita na uli. Aha do na mangurupi hita lao manjumolohon Harajaon ni Debata? Toktong ma taingot, sai ‘didongani Jahowa Pamimpin ni Akka Tentara i do hita’. b Molo tajumolohon Harajaon ni Debata di ngolutta, pasti diurupi Jahowa do hita. Alani i, dang porlu hita mabiar.—Jaha Hagai 2:4.

9-10. Songon dia do pengalaman ni pasangan suami istri na makkilala sittong do hata ni Jesus na disurat di Mateus 6:33?

⁹ Saonari tabahas ma pengalaman ni suami istri, i ma si Oleg dohot si Irina. c Perintis biasa do nasida. Dung pinda nasida tu huria na makkahaporluhon parbarita, dang adong be sumber penghasilan ni nasida ala dang denggan situasi ekonomi di negara ni nasida. Jadi dang adong karejo tetap ni nasida saleleng sataon. Nang pe songon i, toktong do diurupi Jahowa nasida. Jala sipata, olo do akka dongan mangurupi nasida. Songon dia do nasida mangatasi situasi i? Di mulana marsak do si Oleg. Alai didok ibana, “Ala toktong hami ringgas marbarita na uli, gabe diurupi ma hami mamboto dia na urrikkot di ngolunami.” Jadi huhut dilului nasida karejo, toktong do nasida ringgas marbarita na uli.

 ¹⁰ Di sada tikki dung mulak nasida marbarita na uli, diboto nasida ma adong ale-ale ni nasida na manaruhon kebutuhan ni nasida. Dua tas ma godangna. Hape dao do pardalanan ni donganna i, hira-hira 160 kilometer. Didok si Oleg, “Di sadari i, huhilala hami ma muse songon dia Jahowa dohot huria manarihon hami. Pos do rohanami dang hea Jahowa lupa tu akka naposona dang soal sadia porsuk sitaonon ni nasida.”—Mat. 6:33.

11. Aha do manfaatna molo tajumolohon mangulahon lomo ni roha ni Debata?

¹¹ Lomo do roha ni Jahowa asa tajumolohon ulaon marbarita. Alana ulaon on boi paluahon ngolu ni halak. Songon na didok di  paragraf 7, dijujui si Hagai do naposo ni Jahowa asa semangat mangulahon lomo ni roha ni Debata, i ma padenggatton bagas joro. Molo diulahon nasida i marjanji do Jahowa, ‘pasu-pasuonna’ do nasida. (Hag. 2:​18, 19) Hita pe boi do pos rohatta, pasti sai dipasu-pasu Jahowa do hita molo tajumolohon ulaon mambahen sisean.

12. Boasa ikkon togu haporseaon ni si Esra dohot rombongan na paduahon tikki naeng lao tu Jerusalem?

¹² Di taon 468 SM ro do si Esra dohot rombongan na paduahon sian Babel tu Jerusalem. Porlu do togu haporseaon ni nasida lao mangulahon i. Boasa? Alana godang do mas dohot perak na diboan nasida na dilehon raja lao padenggatton bagas joro. Jadi boi do nasida dirampok saleleng di pardalanan. (Esr. 7:​12-16; 8:31) Asing ni i muse, diboto nasida do dang aman tong di Jerusalem. Alana otik dope akka halak na tinggal disi. Jala dang dipadenggan dope tembok dohot gerbang ni nasida. Jadi aha ma na boi taparsiajari sian si Esra taringot songon dia asa lam marpos ni roha tu Jahowa?

13. Songon dia do si Esra patoguhon haporseaonna tu Jahowa? (Ida surat na di toru.)

¹³ Nungnga dihilala si Esra songon dia Jahowa mangurupi naposona tikki mangadopi tantangan. Piga-piga taon sebelumna, i ma taon 484 SM dibahen Raja Ahasweros ma paretta asa dipamate sude halak Jahudi na di luat Persia. Di tikki i, nungnga di Babel si Esra tinggal. (Est. 3:​7, 13-15) Pasti terancam do ngoluna di tikki i. Jadi alani paretta i, marpuasa, tangis jala mangandungi ma halak Jahudi “di sude provinsi” mangido bantuan sian Jahowa. (Est. 4:3) Bayakkon ma, songon dia lungun ni roha ni si Esra dohot halak Jahudi tikki direncanahon naeng dipamate nasida sude. (Est. 9:​1, 2) Alani pengalaman ni si Esra tikki i, gabe pos ma rohana lao mangadopi tantangan di ari na naeng ro. Jala lam pos ma roha ni si Esra na boi do Jahowa mangalinggomi sude naposona. d

14. Aha do na boi diparsiajari sahalak donganta borua ala disarihon Jahowa ibana saleleng mangadopi sitaonon?

¹⁴ Tikki tahilala na dilinggomi Jahowa hita mangadopi sitaonon, gabe lam togu ma haporseaotta tu Ibana. Parrohahon ma pengalaman ni si Anastasia na tinggal di Eropa Timur. Gabe kaluar do ibana sian parkarejoanna ala dang olo terlibat tu politik. Didok ibana, “Dang hea dope huhilala sebelumna dang adong hepengku.” Didok ibana muse, “Hupasahat ma i sude tu Jahowa jala boi ma huhilala na disarihon Ibana au. Jadi nang pe dang adong be karejokku di joloan ni ari, dang pola mabiar au. Molo diparrohahon Jahowa au saonari, pasti diparrohahon Ibana do au di ari na naeng ro.”

15. Aha do na mangurupi si Esra asa toktong marpos ni roha tu Jahowa? (Esra 7:​27, 28)

 ¹⁵ Diida si Esra do songon dia Jahowa mandongani Ibana saleleng ngoluna. Molo dirimangi si Esra songon dia saleleng on Jahowa mangurupi ibana, gabe toktong ma ibana marpos ni roha tu Jahowa. Tarida ma i sian hatana na mandok, “Didongani Jahowa Debatakku do au.” (Jaha Esra 7:​27, 28.) Lobi sian onom hali ma dipakke si Esra hata on di bukku na disurat ibana.—Esr. 7:​6, 9; 8:​18, 22, 31.

16. Di situasi na songon dia do hita boi takkas mangida pangurupion ni Jahowa di ngolutta? (Ida gambar.)

¹⁶ Tikki mangadopi tantangan hita, boi do Jahowa mangurupi hita. Uppamana, ikkon mangido ijin do hita tu bosta asa boi ro tu kebaktian manang asa boi ro marpungu. On gabe kesempatan di hita lao mangida songon dia Jahowa mangurupi hita. Olo do ra longang rohatta mangida cara ni Jahowa mangalusi tangiangta lobi sian na taharappon. Alani i, gabe lam tamba ma pos ni rohatta tu Jahowa.

17. Songon dia do si Esra patuduhon serep ni roha tikki mangadopi tantangan? (Ida gambar sampul.)

¹⁷ Serep do roha ni si Esra mangido pangurupion sian Jahowa. Tikki dang sanggup dihilala si Esra mangulahon tugasna, serep do rohana mangido bantuan tu Jahowa. (Esr. 8:​21-23; 9:​3-5) Ala mangandalhon Jahowa si Esra, gabe olo ma na asing mangurupi ibana jala maniru haporseaonna. (Esr. 10:​1-4) Dos songon i ma hita, molo holsoan hita alani kebutuhanta siganup ari, manang keamanan ni keluargatta, ikkon marpos ni roha do hita tu Jahowa. Jala tapasahat ma i di tangiangta.

18. Aha do na mangurupi hita asa lam tamba pos ni rohatta tu Jahowa?

¹⁸ Molo serep rohatta, tottu talului do bantuan sian Jahowa jala tajalo do bantuan ni akka donganta. Molo taulahon on, gabe lam tamba ma las ni rohatta tu Debata. Songon i ma pengalaman ni si Erika, sahalak ina na adong tolu gellengna. Toktong do pos rohana tu Jahowa nang pe mangadopi situasi na borat. Susa do ibana ala keguguran jala dang leleng dukkon i mate ma suamina. Didok ibana, “Dang taboto songon dia cara ni Jahowa mangurupi hita. Alai olo do longang rohatta mangida cara ni Jahowa mangurupi hita. Dipakke Ibana do akka dongan lao mangurupi au jala patoguhon au. Molo hupaboa tu akka dongan aha na massa tu au, gabe mura ma nasida mangurupi au.”

19-20. Aha do na boi taparsiajari sian halak Jahudi na so boi mulak tu Jerusalem?

¹⁹ Boi do hita muse marsiajar sian halak Jahudi na so boi mulak tu Jerusalem. Piga-piga  sian nasida dang boi mulak ala nungnga matua, marsahit na posi, manang ala situasi ni nasida. Nang pe songon i, rade do nasida mangalehon sumbangan lao padenggatton bagas joro i. (Esr. 1:​5, 6) Hira-hira 19 taon dung sahat rombongan na parjolo tu Jerusalem, dikirim akka halak na tinggal di Babel dope sumbangan tu Jerusalem.—Sak. 6:10.

²⁰ Molo tahilala dang godang be na boi talehon tu Jahowa, pos ma rohatta diargai Jahowa do sude na tabahen lao pasonakkon Ibana. Sian dia taboto? Di jaman ni si Sakaria, dipangido Jahowa do panurirangna mambahen sada mahkota. Mahkota i dibahen sian mas dohot perak na dilehon halak Jahudi na tinggal dope di Babel. (Sak. 6:11) “Mahkota” i ma na gabe “parningotan”, asa sai diingot halak Israel sumbangan na dilehon halak Jahudi na tinggal di Babel. (Sak. 6:14) Jadi pos ma rohatta, dang lupahonon ni Jahowa sude upaya na tabahen lao manomba Ibana nang pe mangadopi sitaonon na borat.—Heb. 6:10.

21. Aha do na mangurupi hita asa marpos ni roha tu Jahowa lao mangadopi na masa tu ari na naeng ro?

²¹ Saleleng ari parpudi pasti adong do sitaonon na masa tu hita. Jala lam tu susana do situasitta di ari na naeng ro. (2 Tim. 3:​1, 13) Alai unang ma gabe holsoan hita alani i. Taingot ma hata ni Jahowa na didok tu naposona di jaman ni si Hagai. Didok Ibana, “Ai donganakku do hamu. . . . Unang ma mabiar hamu.” (Hag. 2:​4, 5) Hita pe boi do pos rohatta, donganan ni Jahowa do hita molo tabahen na dumenggan tu Ibana. Taulahon ma hata ni Debata na dipasahat Panurirang Hagai dohot Panurirang Sakaria, jala tatiru ma teladan ni si Esra. Molo taulahon on, gabe boi ma toktong pos rohatta tu Jahowa dang soal songon dia situasitta di ari na naeng ro.