Sukkun-Sukkun sian na Manjaha

Didok di Bibel ikkon sadalan tu lomo ni roha ni Debata do caratta mamakke mudar. Jadi, boha ma pandangan ni Saksi Jahowa taringot perawatan medis na mamakke mudar ni nasida sandiri?

Dang boi halak Kristen mambahen keputusan holan mangihutton selera ni nasida sandiri manang holan mangihutton saran sian tenaga medis. Alai ikkon dipikkirhon nasida do boha didok Bibel taringot i. Alana berpengaruh do on tu hubungan ni nasida tu Jahowa.

Jahowa do na mangalehon hangoluan tu hita. Jala didok Ibana do dang boi taallang mudar. (1 Musa 9:3, 4) Najolo, dilehon Ibana do hukum tu halak Israel. Didok Debata do di hukum i, “Ai di mudar i do ngolu ni nasa na mangolu. Jala nungnga hutottuhon ikkon tu langgatan i do dibahen mudar i asa disesa dosamuna. Marhite ngolu na adong di mudar i boi ma disesa dosamuna.” Boha molo adong halak Israel na naeng maneat binatang lao allangonna? Didok Debata do, “Ikkon diusehon do mudar ni binatang i jala ikkon ditutup ma i dohot tano.” * (3 Musa 17:11, 13) Diulangi Jahowa do paretta on piga-piga hali. (5 Musa 12:16, 24; 15:23) Bukku Yahudi Soncino Chumash mandok, “Dang boi disippan manang diallang mudar, ikkon diusehon do i tu tano.” Jadi dang boi halak Israel manippan manang mamakke mudar lao tu tujuan na asing. Alana Debata do nappunasa hosa na adong di bagasan mudar i.

Memang dang marlakku be hukum ni si Musa dung mate Messias. Alai nang pe songon i, dang muba dope pandangan ni Debata taringot mudar. Diurupi tondi parbadia do akka apostel lao mandok tu halak Kristen na asing asa ‘dipadao nasida dirina sian mudar’. Penting hian do paretta on. Alana molo diallang sasahalak mudar, sarupa ma ibana songon na mangulahon seks na so patut manang manomba patung. (Ulaon ni Apostel 15:28, 29; 21:25) Mulai abad 20, nungnga sering be halak mendonorhon darah manang manjalo transfusi darah. Nang pe songon i, diboto Saksi Jahowa do i maralo tu Hata ni Debata. *

Sipata, disuru dokter do asa disippan pasien mudarna sandiri piga-piga minggu sebelum operasi (pendonoran darah autologus praoperasi, manang PAD). Jadi tikki operasi pasienna i, boi ma dipakke ibana mudarna i. Alai maralo do i tu Hata ni Debata, songon na disurat di 3 Musa dohot 5 Musa. Dang boi mudar disippan. Ikkon diusehon do i tu tano, na patuduhon hira na paulakkon i muse tu Debata. Memang dang marlakku be hukum ni si Musa. Alai nang pe songon i, diargai Saksi Jahowa do prinsip ni Debata na adong di hukum i. Jala bertekad do nasida lao padaohon diri ni nasida sian mudar. Jadi dang boi hita mendonorhon darah manang manippan mudarta sandiri lao dipakke tikki operasi. Maralo do i tu patik ni Debata.

Adong prosedur medis manang pemeriksaan na mamakke mudarta sandiri, na so pola taboto maralo do i tu prinsip ni Debata manang na dang. Misalna, olo do halak Kristen dibuat mudarna lao tu pemeriksaan jala dukkon i dibolokkon. Olo do ra muse disuru dokter nasida mangihutton prosedur medis na ummaol na mamakke mudarna sandiri.

Misalna, adong sada prosedur medis na margoar hemodilusi. Tikki dioperasi sahalak pasien, dipakaluar ma deba mudarna tu bagasan sada mesin. Dung i diencerhon ma mudar na adong di daging ni pasien i. Dung sae operasi, dipamasuk ma muse mudar na dipakaluar nakkin tu pasien i muse. Dung i boi ma gabe normal muse godang ni mudarna. Asing ni i, adong do muse na digoari penyelamatan sel (cell salvage). Tikki operasi sahalak pasien, dibuat ma mudarna na kaluar sian lukka operasi i. Dung i disaring ma i jala dipamasuk muse tu daging ni pasien i. Prosedur na asing, i ma mamakke mesin pengganti fungsi hati, paru-paru, manang ginjal. Tikki operasi sahalak pasien, dipakaluar ma mudarna jala dipamasuk tu mesin i. Dung i dipamasuk ma muse tu daging ni pasien. Jala adong muse prosedur medis na asing. Tikki operasi sahalak pasien, dipamasuk ma mudarna tu mesin sentrifugal asa dibolokkon akka na sega manang akka na cacat sian mudar i. Manang asa dipapulik piga-piga komponen darah, dung i dipakke ma i tu anggota tubuh na asing. Adong muse pemeriksaan medis na mambuat mudar ni pasien asa ditandai manang dicampur dohot obat, dung i dipamasuk muse tu tubuh ni pasien i.

Marragam do proses ni akka prosedur on jala pasti dipadenggan do torus akka prosedur, perawatan, dohot pemeriksaan medis on. Dang porlu tapareso sude prosedur medis sebelum mambahen keputusan. Tikki naeng operasi, periksa medis, manang terapi, ikkon diputusson halak Kristen do boha carana mudarna ditangani. Alai sebelum operasi ikkon disukkun ibana do tu dokter manang tu tenaga medis na asing, boha carana mudarna ditangani saleleng operasi i. Dung i pe asa dibahen ibana keputusan na mangihutton hati nuranina. (Ida kotak.)

Ikkon diingot halak Kristen do janjina tu Jahowa lao ‘makkaholongi Ibana sian nasa roha, sian nasa ngolu, sian nasa gogo, dohot sian nasa pikkiran’. (Lukas 10:27) Dang songon akka halak na di portibi on Saksi Jahowa. Penting hian do di nasida hubungan ni nasida tu Jahowa. Jala dijujui Jahowa do sude jolma asa marpos ni roha tu manfaat ni mudar ni Jesus. Didok di Bibel, “Marhite anakna i, ditobus jala dipalua ma hita. Disesa do dosatta marhite mudarna.”—Epesus 1:7.

[Surat na di Toru]

[Kotak/​Gambar]

SUKKUN MA TU DIRIMUNA

Boha molo dipakaluar deba mudarhu mamakke mesin jala dang mardalan mesin i satokkin? Molo dipamasuk muse i tu dagingku ala huhilala mudarhu dope i jala dang porlu diusehon “tu tano”, boha do hati nuranikku?

Boha molo adong prosedur medis na mambuat mudarhu, jala dimodifikasi mudarhi dung i dipamasuk muse tu dagingku? Terganggu do hati nuranikku manang na dang?