Sukkun-Sukkun sian na Manjaha

Olo do Saksi Jahowa Manjalo Fraksi Darah?

Nungnga hea dicetak jawaban na di toru on di Joujou Paboahon 15 Juni 2000.

Dang olo Saksi Jahowa manjalo transfusi darah. Pos do rohanami, dang boi diganti hukum ni Debata taringot mudar asa sadalan tu pandangan ni jolma na muba-uba. Alai gabe adong do masalah na baru ala nungnga boi saonari mudar dibahen gabe opat komponen utama dohot akka fraksi ni komponen utama i. Asa boi halak Kristen mambahen keputusan naeng manjalo i manang dang, ikkon dipikkirhon nasida do resiko dohot manfaatna. Ikkon dipikkirhon nasida do aha na didok Bibel taringot i, jala gabe boha ma annon hubungan ni nasida tu Debata molo dijalo nasida i.

Asa boi dipasae halak Kristen masalah taringot i, ikkon diparrohahon nasida do aha na didok Bibel, sejarah ni halak Kristen, jala aha na didok medis taringot i.

Didok Debata Jahowa do tu si Noak, dang boi lomo-lomo ni nasida tu mudar. (1 Musa 9:3, 4) Di pudian ni ari, dilehon Debata ma hukum tu halak Israel na mandok, “Molo adong halak Israel manang halak sian bangso na asing . . . mangallang mudar ni manang aha pe, dang jalookku be ibana.” Molo adong halak Israel na mangalo hukum ni Debata i, boi do gabe dohot halak na asing ramun alani ibana. Alani i ma didok Debata, “Pamateonku ma ibana.” (3 Musa 17:10) Di abad na parjolo, tikki rapat akka apostel dohot akka sintua di Jerusalem, didok nasida do, ‘Ikkon tapadao do diritta sian mudar.’ Molo adong halak na mangallang mudar manang mamakke i tu tujuan na asing, sarupa ma ibana songon na mangulahon seks na so patut dohot na manomba patung.—Ulaon ni Apostel 15:28, 29.

Di tikki i, aha do lapatanna “padaohon diri” sian mudar? Lapatanna, dang boi halak Kristen mangallang mudar na segar manang mudar naung dibekuhon. Jala dang boi nasida mangallang jagal na so diusehon dope mudarna. Asing ni i, dang boi diallang nasida sipanganon naung dicampur dohot mudar, misalna sosis darah. Molo diallang nasida i, berarti na mangalo hukum ni Debata do nasida.—1 Samuel 14:32, 33.

Godangan halak najolo lomo-lomona do mangallang mudar. Songon na boi taida sian tulisan ni si Tertullian (abad paduahon dohot patoluhon M). Jala adong na mandokkon, dohot do tong halak Kristen mangallang mudar. Alai dipaboa si Tertullian ma akka suku na mangallang mudar tikki mambahen perjanjian. Didok ibana do muse, “Tikki mambahen pertujukan nasida di arena, adong do piga-piga halak na mokkus manginum mudar ni akka parjahat . . . asa boi malum sahit epilepsi ni nasida.”

Dang olo halak Kristen mangulahon i (nang pe adong halak Roma na mangallang mudar lao tu kesehatan). Adong do halak Roma na mamakke sipanganon naung dicampur dohot mudar lao manguji haporseaon ni halak Kristen na sittong. Jadi didok si Tertullian ma, “Tiap ari, dang hea hami mangallang sipanganon naung dicampur dohot mudar ni binatang. Jadi husukkun ma jo hamu, boasa ma didokkon hamu olo halak Kristen mangallang mudar ni jolma? Hape dibereng hamu do, haru tu mudar ni binatang pe nasida magigi.”

Saonari on molo disuru dokter halak manjalo transfusi darah, holan piga-piga halak ma na olo mamikkirhon boha pandangan ni Debata taringot i. Alai molo Saksi Jahowa, bertekad do nasida lao mangihutton hukum ni Jahowa. Boha do pandangan ni medis taringot keputusan ni nasida on?

Dung Porang Dunia II, nungnga biasa be halak manjalo transfusi darah. Alai nang pe songon i, diattusi Saksi Jahowa di tikki i do na maralo i tu hukum ni Debata jala songon i dope sahat tu saonari. Dung piga-piga leleng, muba ma cara ni medis mamakke mudar. Saonari dang darah utuh be na sering ditransfusihon. Alai sada sian komponen utama darah do na ditransfusihon, i ma (1) sel darah merah; (2) sel darah putih; (3) trombosit; (4) plasma darah na cair. Tergantung tu kondisi ni pasien, olo do disuru dokter asa ditransfusihon tu ibana sada sian komponen utama i. Ala songon i dibahen, boi ma sada unit darah utuh dibagi-bagihon tu godang pasien. Alai diboto Saksi Jahowa do, maralo do tu hukum ni Debata molo dijalo nasida transfusi darah utuh manang transfusi sada sian komponen utama darah. Ala songon i pendirian ni nasida, gabe boi ma nasida terhindar sian sahit na boi bali sian darah, misalna hepatitis dohot AIDS.

Alai boi dope komponen utama darah on diproses gabe piga-piga fraksi darah. Alani i gabe adong ma sukkun-sukkun, boi do dijalo halak Kristen fraksi darah? Jala aha do na porlu dipikkirhon nasida tikki naeng mambahen keputusan taringot i?

Godang do komponen ni darah. Misalna, nang pe aek do 90 persen isi ni plasma darah, alai godang do disi akka hormon, garam anorganik, enzim, mineral, dohot gula. Asing ni i adong do di plasma darah i akka protein songon albumin, zat pembeku darah, dohot antibodi na marguna lao mangalo sahit. Adong do tenaga medis na olo papulikkon akka protein na adong di plasma darah jala dipakke nasida ma i. Misalna dibuat nasida ma sian i zat pembeku darah dohot faktor VIII, jala dilehon nasida ma i tu halak na marsahit hemofilia ala sering nasida pendarahan. Manang molo adong sasahalak na marsahit, olo do ra disuru dokter asa disuntikkon tu ibana gamma globulin na dibuat sian plasma darah ni halak na sehat. Jala dipakke do tong akka protein na asing na adong di plasma darah i lao tu medis. Alai sian contoh on boi ma taida, sian sada komponen utama darah boi do dibahen gabe piga-piga fraksi darah. *

Songon i ma tong tu komponen utama darah na asing, misalna sel darah merah, sel darah putih, dohot trombosit. Boi do i diproses gabe piga-piga fraksi darah. Misalna, boi do sel darah putih diproses lao mambahen interferon dohot interleukin na dipakke lao mangubati sahit alani virus dohot mangubati sahit kanker. Boi do tong diproses trombosit lao mambahen zat penyembuh luka. Jala adong do tong ubat na asing na dibahen sian akka fraksi ni komponen utama darah. Dang mamakke komponen utama darah akka ubat i. Molo songon i, boi do halak Kristen manjalo ubat na mengandung fraksi darah? Dang adong didok Bibel boi do i tajalo manang na dang. Jadi ikkon halak Kristen i sandiri do na mambahen keputusan mangihutton hati nuranina di jolo ni Debata.

Adong do halak na so olo manjalo manang aha pe na dibuat sian mudar, termasuk ma ubat na membangun kekebalan tubuh na dibahen sian fraksi darah. Songon i ma menurut nasida cara mangoloi paretta ni Debata ‘asa tapadao diritta sian mudar’. Menurut nasida, molo nungnga kaluar mudar sian sada makhluk hidup, ikkon diusehon do i sude tu tano. (5 Musa 12:22-24) Contohna, pasti ikkon jolo dibuat do mudar jala diproses tikki naeng mambahen gamma globulin, i ma zat pembeku darah. Alani i ma makana dang olo piga-piga halak manjalo ubat na dibahen sian fraksi darah. Sarupa ma i dibahen nasida songon na so olo manjalo transfusi darah utuh manang transfusi sada sian komponen utama darah. Sian ias ni roha do nasida mambahen keputusan i jala mangihutton hati nurani ni nasida. Alani i porlu do taargai keputusan ni nasida.

Alai adong do halak na mambahen keputusan na berbeda. Dang dijalo nasida transfusi darah utuh, sel darah merah, sel darah putih, trombosit, manang plasma darah. Jala taringot on pe, marasing-asing do pilihan ni ganup halak. Misalna, adong do ra halak na olo disuntikkon gamma globulin tu ibana. Alai dang olo ibana manjalo manang aha pe na dibahen sian sel darah merah dohot sel darah putih. Jadi boasa ma adong halak Kristen na olo manjalo fraksi darah?

Menurut Menara Pengawal 1 Juni 1990 di bagian “Pertanyaan Pembaca” didok, boi do pinda protein manang fraksi na sian plasma darah na adong di daging ni sahalak ina na hamil tu sistem darah ni anakna na adong di butuhana. Gabe boi ma immunoglobulin na sian omakna pinda tu anakna jala gabe adong ma kekebalan tubuh ni anakna i. Dung piga-piga leleng, baru pe terbentuk sel darah merah ni bayi i na mamboan oksigen. Deba sian i gabe bilirubin na boi kaluar sian plasenta ni omakna jala dibolokkon ma i rap dohot kotoran ni omakna. Jadi menurut piga-piga halak Kristen, ala boi do pinda fraksi darah secara alami sian sasahalak tu halak na asing, berarti boi ma nasida manjalo fraksi darah na dibuat sian plasma darah manang sian sel darah.

Attong gabe masalah do ala berbeda keputusan ni ganup halak na dibahen mangihutton hati nurani ni nasida? Daong. Nang pe keputusan na penting i, alai boi ma tabahen sada kesimpulan. Dang olo Saksi Jahowa manjalo transfusi darah utuh manang transfusi sada sian komponen utama darah. Alana didok Bibel do tu halak Kristen, ‘Padao hamu ma dirimuna sian naung dipelehon tu akka patung, sian mudar, dohot sian seks na so patut.’ (Ulaon ni Apostel 15:29) Alai molo taringot fraksi na sian komponen utama darah, masing-masing do halak Kristen mambahen keputusan tu diri ni nasida mangihutton hati nurani ni nasida.

Godang do halak saonari on na olo manjalo perawatan medis manang aha pe asa boi malum, termasuk ma manjalo perawatan medis na beresiko songon perawatan na mamakke ubat na dibahen sian mudar. Alai molo halak Kristen, ikkon dilului nasida do informasi taringot i jala ikkon seimbang do pandangan ni nasida. Olo do Saksi Jahowa manjalo perawatan medis na denggan jala dipikkirhon nasida do resiko dohot manfaat ni setiap perawatan. Alai molo sian mudar do dibahen ubat ni sada perawatan, pasti dipikkirhon nasida do pandangan ni Debata dohot hubungan ni nasida tu Ibana.—Psalmen 36:9.

Pasti las do roha ni halak Kristen ala boi nasida marhaposan tu Debata. Songon na didok panurat psalmen, “Ai dos songon mataniari dohot perisai do Debata Jahowa. Dipatudu Ibana do haburjuon dohot hasangapon. Dang holit Jahowa mangalehon na denggan tu halak na setia tu Ibana. Ale Jahowa . . . , marlas ni roha ma akka halak na marpos ni roha tu Ho.”—Psalmen 84:11, 12.

[Surat na di Toru]

[Kotak]

NA PORLU DISUKKUN HAMU TU DOKTER

Molo naeng operasi hamu manang naeng dipakke hamu ubat na dibahen sian fraksi darah, sukkun ma on tu dokter:

Sude do tenaga medis dison mamboto na Saksi Jahowa au jala dang olo au manjalo transfusi darah (darah utuh, sel darah merah, sel darah putih, trombosit, manang plasma darah) manang songon dia pe situasikku?

Molo dihilala hamu ubat na direseppon dokter tu hamu dibahen sian plasma darah, sel darah merah, sel darah putih, manang trombosit, sukkun ma tu ibana:

Na dibahen sian komponen utama ni darah do ubat on? Boi do dipaboa hamu aha komposisina?

Sadia godang do ubat on lao diallang jala boha do carana mamakke on?

Molo dang terganggu hati nuranikku manjalo ubat na dibahen sian fraksi darah, aha ma resikona?

Molo terganggu do hati nuranikku manjalo i, adong do pengobatan na asing?

Molo nungnga hupikkir-pikkiri keputusanku taringot on, andigan do boi hupaboa i tu hamu?