Sukkun-Sukkun sian na Manjaha

Ala dang adong ditaringoti di Bibel taringot bersulang, boasa ma dang olo Saksi Jahowa dohot bersulang?

Nungnga leleng adong hasomalan bersulang di piga-piga negara, i ma tos mamakke galas na marisi anggur (manang minuman beralkohol na asing). Molo adong sasahalak na mangajak donganna bersulang, biasana na mangido ditangiakkon do ibana. Manang na adong do pangidoanna asa bahagia, sehat, ganjang umurna, dohot na asing. Jadi molo dohot halak na asing bersulang manang olo ibana mangangkat galasna, on patuduhon na setuju do ibana tu pangidoan ni donganna i. Di piga-piga halak dang sala hasomalan on, holan sekedar sopan santun do. Alai adong do alasanna boasa dang olo Saksi Jahowa dohot bersulang.

Dang na so lomo roha ni halak Kristen asa bahagia jala sehat donganna. Tikki mambahen surat Punguan na Mangaradoti tu akka huria di abad na parjolo, sai dibahen nasida do di ujung ni suratna hata na mandok, “sai anggiat ma hamu toktong sehat!” manang “sehat sehat ma hamu da”. (Ulaon ni Apostel 15:29) Jala adong do piga-piga naposo ni Debata na olo mandokkon songon on tu rajana, ‘Sai ganjang ma umur ni raja!’—1 Raja-Raja 1:31; Nehemia 2:3.

Molo songon i, sian dia do asal usul ni hasomalan bersulang? Di The Watchtower 1 Januari 1968, dikutip do hatorangan sian The Encyclopædia Britannica (1910), Jilid 13, halaman 121 na mandok, “Olo do ra sian upacara ni akka agama najolo hasomalan bersulang i, i ma lao martangiang tu akka dewa dohot tu halak naung mate. Tikki mangan halak Junani dohot Romawi, diusehon nasida do minuman lao gabe pelean tu akka dewa ni nasida. Jala tikki adong upacara perjamuan, bersulang do nasida lao martangiang tu akka dewa dohot tu halak naung mate.” Didok ensiklopedia i do muse, “Mirip do hasomalan bersulang jaman saonari tu hasomalan bersulang najolo. Jadi pasti berkaitan do na dua i.”

Marlakku dope i saonari? International Handbook on Alcohol and Culture taon 1995 mandok, “Olo do ra hasomalan bersulang i sisa ni upacara ni akka agama najolo. Biasana dipelehon akka halak do siinumon na badia, i ma mudar manang anggur. Jala tikki dipelehon nasida siinumon i, didok nasida do, ‘sai ganjang ma umurmu!’ manang ‘sai sehat ma ho!’”

Memang adong do hasomalan manang lambang na tetap dipakke naposo ni Debata, nang pe asal usulna sian agama na so sittong. Misalna buah delima. Sada ensiklopedia Bibel na terkenal mandok, “Dipakke akka agama sipelebegu do ra buah delima lao manggombarhon akka na badia.” Alai nang pe songon i, disuru Debata do asa dibahen akka naposona hiasan buah delima di pinggir rompi ni sintua ni malim. Jala dibahen do tong hiasan buah delima di ulu ni tiang tombaga di bagas joro na dipajongjong si Salomo. (2 Musa 28:33; 2 Raja-Raja 25:17) Asing ni i, sian agama palsu do hasomalan mamakke cincin kawin. Alai ala dang godang be halak saonari na mamboto asal usulna, gabe holan sekedar tanda naung menikah do cincin kawin i di nasida.

Attong sala do mamakke minuman anggur di ulaon ni sada agama? Misalna di sada tikki lao ma halak Sikem na manomba Baal “tu jabu ni debata ni nasida. Mangan minum ma nasida disi huhut mamburai si Abimelek”, anak ni si Gideon. (Panguhum 9:22-28) Menurut hamu, molo setia sasahalak tu Jahowa, olo do ibana minum-minum rap dohot halak Sikem i lao manangiakkon asa diurupi Debata si Abimelek? Alai tikki mangalo halak Israel tu Jahowa, songon on ma na didok si Amos, ‘Dipahembang nasida do abit na gabe jaminan i di labbung ni akka inganan panombaon ni nasida. Dituhor nasida do anggur mamakke hepeng ni halak na didenda jala diinum ma i di jabu ni akka debata ni nasida.’ (Amos 2:8) Molo setia sasahalak tu Jahowa, pasti dang olo ibana manginum anggur i manang dohot mangusehon i lao gabe pelean tu akka dewa. (Jeremia 7:18) Jadi molo setia sasahalak tu Jahowa, pasti dang olo ibana mangangkat sagalas anggur tu ginjang tikki manangiakkon halak na asing, manang tikki martangiang mangido asa sukses ibana.

Memang olo do naposo ni Debata mangangkat tanganna tikki martangiang. Alai tu Debata na sittong do nasida mangangkat tanganna. Bibel mandok, “Jongjong ma si Salomo di jolo ni langgatan ni Jahowa, huhut mangangkat tanganna doppak langit. Didok ibana ma, ‘Ale Jahowa Debata ni Israel, dang adong Debata na songon Ho. Sai anggiat ma ditangihon Ho hami sian surgo ingananmi jala sai anggiat ma disesa Ho dosanami.’” (1 Raja-Raja 8:22, 23, 30) Asing ni i, “Dipuji si Esra ma Jahowa . . . Sude ma bangso i mandok, ‘Amen! Amen!’ huhut ma nasida mangangkat tangan ni nasida be. Marsinggang ma nasida marsomba tu Jahowa sappe dais bohi ni nasida tu tano.” (Nehemia 8:6; 1 Timoteus 2:8) Takkas ma, diangkat naposo ni Debata pe tanganna tu ginjang, dang na lao mangido pasu-pasu sian dewa.—Jesaya 65:11.

Saonari on, godangan halak na dohot bersulang dang na lao martangiang tu akka dewa. Jala dang diboto nasida boasa olo nasida dohot mangangkat galasna na marisi anggur tu ginjang. Alai nang pe songon i, dang gabe alasan on tu halak Kristen lao dohot maniru nasida.

Nungnga godang na mamboto, dang olo Saksi Jahowa maniru hasomalan ni godang halak. Misalna, godang do halak na menghormat bendera. Didok nasida dang na manomba bendera i nasida. Memang dang olo halak Kristen mangorai halak na asing mangulahon i. Alai dang olo nasida dohot mangulahon i. Molo diboto Saksi Jahowa naeng adong upacara, marbisuk do nasida. Dang olo nasida gabe tartuktuk halak na asing. Jala bertekad do nasida dang olo mangihutton hasomalan na bersifat patriotis, na so sadalan tu isi ni Bibel. (2 Musa 20:4, 5; 1 Johannes 5:21) Saonari on godang do na mandok, dang adong hubungan ni bersulang tu agama. Nang pe songon i, adong do alasanna boasa dang olo halak Kristen dohot bersulang. Alana sian hasomalan ni agama na so sittong do asal usulna. Jala saonari pe molo bersulang sasahalak, dianggap do ibana songon na mangido pasu-pasu sian ‘surgo’.—2 Musa 23:2.