“Marsitutu ma Hita Asa Toras ala Nungnga Jonok Ari ni Jahowa”

“Marsitutu ma hita asa toras.”—HEB. 6:1.

1, 2. Boasa gabe boi halak Kristen na di Jerusalem dohot di Judea “lari tu dolok”?

TIKKI di tano on Jesus, hea do ro akka siseanna mandapotton ibana lao manukkun, “Aha do tanda ni harorom dohot tanda ni panutup ni jaman on?” Dialusi Jesus do sukkun-sukkun ni nasida i. Dipaboa Jesus do akka aha na lao masa jala terjadi do i di abad na parjolo. Dipaboa Jesus do taringot sada kejadian na luar biasa na gabe tanda naung jonok ari i. Molo nungnga masa kejadian i, “ikkon lari do halak na di Judea tu dolok”. (Mat. 24:1-3, 15-22) Boi do akka sisean ni Jesus mangida tanda i jala mangulahon sipasingot ni Jesus i?

² Hira-hira 30 taon dukkon i, i ma taon 61 M, dibahen Apostel Paulus ma surat na tegas tu halak Kristen na di Jerusalem dohot di akka luat di sekitarna. Dang diboto si Paulus dohot akka donganna, na lao terjadi tanda ni “hasusaan bolon” i lima taon dukkon i. (Mat. 24:21) Di taon 66 M, ro ma pasukan Rom na dipimpin si Cestius Gallus lao manaluhon kota Jerusalem jala hampir berhasil do nasida. Alai toppu ma nasida lao sian i. Gabe adong ma dalan di akka halak lao melarihon diri tu tempat na aman.

3. Aha do nasehat ni si Paulus tu halak Kristen di tikki i? Jala boasa dilehon si Paulus nasehat i?

³ Ikkon diattusi nasida do hata ni Jesus. Jala ikkon manat do nasida mamparrohahon akka na masa asa boi nasida melarihon diri. Alai godangan sian nasida di tikki i ‘lambat do mangattusi’. Jala dos songon dakdanak do nasida na porlu dope “susu” lao inumonna. (Jaha Heber 5:11-13.) Jala adong do halak naung marpulu-pulu taon mamboto hasittongan, “gabe mandao sian Debata na mangolu i”. (Heb. 3:12) “Somal” do nasida dang ro marpungu, hape “nungnga lam jonok ari” na parohon hasusaan i. (Heb. 10:24, 25) Alani i, cocok do nasehat na dipaboa si Paulus tu nasida na mandok, “Dung sae taparsiajari ajaran na parjolo taringot tu Kristus, marsitutu ma hita asa toras.”—Heb. 6:1.

4. Boasa ikkon toktong hita jaga? Jala aha do na boi mangurupi hita mangulahon i?

⁴ Nungnga terjadi be na didok Jesus di jamanta saonari. Didok di Bibel, “Nungnga jonok be ari ni Jahowa, ari na balga i” lao menghapus sude pengaruh ni Sibolis di portibi on. (Sep. 1:14) Jadi saonari justru ikkon toktong do hita jaga jala manat mamparrohahon akka na masa. (1 Ptr. 5:8) Taulahon do i? Molo halak na toras do hita, pasti torus do taingot jonok ni ari ni Jahowa i.

Aha do Maksudna Halak na Toras

5, 6. (a) Aha do maksudna halak na toras? (b) Asa boi hita gabe halak na toras, aha do na porlu tausahahon?

⁵ Apostel Paulus dang holan mandok asa marsitutu halak Kristen di abad na parjolo asa toras. Alai dipaboa ibana do tong aha do maksudna halak na toras i. (Jaha Heber 5:14.) Halak na “toras” dang sae holan na manginum “susu”. Alai diallang nasida do tong “sipanganon na karas”. Alani i, gabe diboto nasida ma “ajaran na parjolo sian hata ni Debata” dohot “bisuk ni Debata na massai bagas i”. (1 Kor. 2:10) Asing ni i, nungnga tarlatik nasida lao mamboto dia na sittong dohot na sala. Alana diterappon nasida do na diparsiajari nasida. Jadi tikki naeng mambahen keputusan nasida, boi ma nasida mamikkirhon prinsip ni Bibel na dia na adong hubunganna tusi jala boha carana menerappon i.

⁶ Didok Apostel Paulus do, “Alani i do ikkon lam marsitutu hita mamparrohahon akka naung tabege, asa unang maup hita.” (Heb. 2:1) Di na so pamotoanta, boi do hita gabe maup manang gabe gale haporseaonta. Alai boi do tetap togu haporseaonta molo marsitutu hita “mamparrohahon” tikki dibahas hata ni Debata. Alani i, tasukkun ma tu diritta be, ‘Holan ajaran na parjolo sian hata ni Debata do na huparsiajari? Holan alani kewajiban do au marpungu dohot marbarita jala dang sian ias ni rohakku au mangulahon i? Boha do carana asa memang toho au maju?’ Asa boi hita gabe halak na toras, adong dua aspek na porlu tausahahon. Na parjolo, ikkon takkas do tatanda Hata ni Debata. Jala na paduahon, ikkon marlatik do hita asa gabe sipangoloi.

Takkas ma Hamu Mananda Hata ni Debata

7. Aha do manfaatna molo takkas hita mananda Hata ni Debata?

⁷ Didok Apostel Paulus do muse, “Akka halak na ikkon susu dope inumonna, dakdanak dope i. Dang diboto i dope dia na sittong dohot na so sittong.” (Heb. 5:13) Asa boi hita gabe halak na toras, ikkon takkas do hita mananda Hata ni Debata, i ma Bibel. Jadi ikkon taparsiajari do isi ni Bibel dohot akka publikasi na sian Bibel na dibahen “naposo haposan jala na marbisuk”. (Mat. 24:45-47) Molo boi hita mangattusi cara marpikkir ni Debata sian Bibel, gabe boi ma hita tarlatik mamboto dia na sittong dohot na sala. Songon i ma na dihilala sahalak donganta na margoar si Orchid. * Didok ibana, “Nasehat na paling balga pengaruhna di ngolukku, i ma nasehat na mandok asa taratur au manjaha Bibel. Dua taon ma au manjaha asa sae sude isi ni Bibel. Alai huhilala hira baru i dope au mananda Debata. Huboto ma akka dalanna, aha lomo ni rohana dohot na mambahen sogo rohana, balga ni huasona, dohot bagas ni bisukna. Ala tiap ari au manjaha Bibel, gabe boi ma au margogo tikki adong situasi na maol di ngolukku.”

8. Songon dia do carana asa marhuaso Hata ni Debata di diritta?

⁸ Molo taratur hita manjaha Bibel, boi ma isi ni Bibel i marhuaso di diritta. (Jaha Heber 4:12.) Boi ma i padenggatton pikkiranta dohot rohatta asa boi palashon roha ni Jahowa. Porlu do hamu mangalehon tikkimuna asa boi taratur manjaha Bibel dohot mangarimangi isina?

9, 10. Aha do lapatanna mananda Hata ni Debata? Paboa ma sada contoh.

⁹ Mananda Hata ni Debata lapatanna dang holan mamboto isi ni Bibel. Alana akka halak na so toras di jaman ni si Paulus pe, diboto nasida do Hata ni Debata. Alai dang diulahon nasida i. Alani i gabe dang boi dihilala nasida manfaat ni Hata ni Debata i di ngolu ni nasida. Boi do didok dang ditanda nasida Hata ni Debata, alana dang olo nasida ditogu-togu Hata ni Debata tikki mambahen keputusan.

¹⁰ Molo takkas do tatanda Hata ni Debata, berarti taboto do isina jala taulahon i di ngolutta. Dipaboa sahalak saudari na margoar si Kyle do boha carana mangulahon i. Di sada tikki, marbadai ma ibana dohot dongan sakarejona. Aha ma na diulahon ibana asa boi mardame? Didok ibana ma, “Pittor huingot do ayat di Rom 12:18 na mandok, ‘Molo boi dope, bahen hamu ma sian nasa tolapmuna lao mardame tu sude halak.’ Jadi huajak ma dongan sakarejokki makkatai dung mulak karejo.” Jala ujungna mardame ma nasida. Longang do dongan sakarejo ni si Kyle i mangida carana pasaehon masalah ni nasida i. Didok si Kyle muse, “Boi do huhilala, pasti sai denggan do hasilna molo mangihutton prinsip ni Bibel.”

Marlatik Asa Gabe Sipangoloi

11. Paboa ma contoh na patuduhon maol do sipata mangulahon Hata ni Debata tikki adong situasi na maol.

¹¹ Olo do gabe maol mangulahon na tajaha sian Bibel molo adong situasi na maol. Contohna, dang leleng dung dipalua Jahowa halak Israel sian parhatobanan di Mesir, “marsoal ma halak Israel dohot si Musa” jala torus do “diuji” nasida Jahowa. Alani aha? Ala dang adong aek siinumon ni nasida. (2 Mus. 17:1-4) Dang gok dope dua bulan nasida mambahen perjanjian tu Jahowa jala setuju nasida “lao mangulahon sude paretta ni Jahowa”, nungnga disomba nasida patung. (2 Mus. 24:3, 12-18; 32:1, 2, 7-9) Na mabiar do nasida ala palelengku si Musa di Dolok Horeb makana diulahon nasida i? Manang na dirippu nasida do lao ro muse halak Amalek mangalo nasida, jala pasti talu do nasida ala dang adong si Musa na hea mangangkat tanganna na mambahen halak Israel monang? (2 Mus. 17:8-16) Boi do ra alani i. Alai manang aha pe alasan ni nasida, takkas do “dang dioloi” nasida Hata ni Debata. (Ul. 7:39-41) Alani i ma didok si Paulus tu halak Kristen, ‘Tabahen ma sian nasa gogotta asa unang adong sian hita na mangihutton halak na so mangoloi i’, i ma na diulahon halak Israel ala mabiar nasida masuk tu Tano na Dijanjihon i.—Heb. 4:3, 11.

12. Songon dia carana Jesus marsiajar mangoloi hata ni Debata, jala aha do manfaatna?

¹² Asa boi hita gabe halak na toras, ikkon berusaha do hita sian nasa gogotta lao mangoloi hata ni Jahowa. Songon i ma na diulahon Jesus Kristus. Marsiajar do ibana asa toktong mangoloi Debata marhite akka sitaonon na masa tu ibana. (Jaha Heber 5:8, 9.) Sebelum ro ibana tu tano on, sai dioloi ibana do hata ni Bapakna. Alai asa boi saut lomo ni roha ni Bapakna tu tano on, ikkon ditaon ibana do na haccit. Ala tetap ibana mangoloi hata ni Debata nang pe adong sitaonon, gabe boi ma “tarida na dioloi ibana Debata di sasude”. Jala boi ma ibana mandapot tanggung jawab na istimewa sian Debata, i ma gabe Raja dohot Sintua ni Malim.

13. Aha do na patuduhon naung marsiajar hita mangoloi hata ni Debata?

¹³ Boha molo hita? Bertekad do hita lao mangoloi Jahowa nang pe adong masalahta? (Jaha 1 Petrus 1:6, 7.) Takkas do dipaboa Debata nasehatna tu hita taringot pangalaho, kejujuran, caratta makkatai, manjaha jala mamparsiajari Bibel, asa taratur marpungu dohot marbarita. (Jos. 1:8; Mat. 28:19, 20; Eps. 4:25, 28, 29; 5:3-5; Heb. 10:24, 25) Taoloi do nasehat ni Jahowa i nang pe adong masalahta na borat? Molo taoloi do nasehat ni Jahowa i, on patuduhon na toras do hita.

Manfaatna Molo Toras Hita

14. Ceritahon ma pengalaman na patuduhon boi do gabe perlindungan molo berusaha hita gabe halak na toras.

¹⁴ Songon sada perlindungan do molo boi halak Kristen mamboto dia na sittong dohot na sala di tonga-tonga ni akka halak na so “adong aturan di ngolu ni nasida”. (Eps. 4:19) Misalna, adong donganta na margoar si James na taratur manjaha jala mangarimangi akka publikasi na sian Bibel. Di sada tikki dapotna ma karejo. Alai borua sude dongan sakarejona. Didok si James, “Nang pe dang hasea pangalaho ni godangan akka borua i, alai adong sada borua hira na denggan pangalahona jala hira na lomo rohana mamboto isi ni Bibel. Alai tikki holan hami na dua di sada ruangan kerja, mulai ma ibana menggoda au lao mangulahon seks. Hurippu do holan gait-gaitna i, alai toho do hape. Pittor huingot ma pengalaman di Joujou Paboahon taringot sahalak donganta na hea digoda dongan sakarejona songon au. Dipakke do contoh ni si Josep dohot istri ni si Potifar di artikel i. * Jadi pittor huonjar ma borua i, dung i lari ma ibana.” (1 Mus. 39:7-12) Mandok mauliate do si James ala dang hea be terjadi na songon i mulai sian i. Jala boi ibana tetap mempertahatton hati nuranina na denggan.—1 Tim. 1:5.

15. Molo gabe halak na toras hita, aha do manfaat ni i tu rohatta?

¹⁵ Molo toras hita, boi do tong i mambahen togu rohatta asa ‘unang dililuhon akka ajaran na imbar sian na hea tajalo’. (Jaha Heber 13:9.) Jala molo berusaha hita mambahen kemajuan, boi ma fokus pikkiranta tu akka “na urrikkot”. (Plp. 1:9, 10) Dung i gabe lam taargai ma Debata dohot sude naung dibahen Ibana tu hita. (Rom 3:24) Molo “songon pikkiran ni halak na magodang” pikkiran ni halak Kristen, pasti sering ma ibana mandok mauliate tu Jahowa jala pasti jonok do hubunganna tu Ibana.—1 Kor. 14:20.

16. Aha do manfaatna ala berusaha si Louise ‘patoguhon rohana’?

¹⁶ Adong sahalak saudari na margoar si Louise na mangakkui, dung tardidi ibana piga-piga leleng holan penilaian ni halak tu dirina do na uppetting di ibana. Didok ibana, “Dang hea au mangulahon na sala. Alai dang pola semangat au melayani Jahowa. Sadar do au, ikkon hubahen do piga-piga perubahan asa boi hulehon na undenggan tu Jahowa. Alai tantangan na umbalga, i ma mangalehon nasa rohakku tu Ibana.” Dung i berusaha ma si Louise ‘patoguhon rohana’ jala bermanfaat do i hape tikki marsahit ibana. (Jak. 5:8) Didok si Louise, “Memang maol do situasikku. Alai jonok hian do hubunganku tu Jahowa.”

Mangoloi sian Roha

17. Boasa porlu diihutton halak Kristen di abad na parjolo sipasingot ni Jesus?

¹⁷ Gabe selamat do piga-piga halak Kristen na di Jerusalem dohot di Judea ala diihutton nasida nasehat ni si Paulus na mandok, “marsitutu ma hita asa toras”. Alana gabe boi ma nasida mangida tanda songon na dipaboa Jesus taringot andigan nasida ‘ikkon lari tu dolok’. Tikki diida nasida “akka na dihagigihon Debata na mambahen hancur jongjong di inganan na badia i”, i ma tentara ni Rom na mengepung jala na masuk tu Jerusalem, diboto nasida ma on ma tikkina ikkon lari nasida. (Mat. 24:15, 16) Ala dioloi nasida sipasingot ni Jesus, gabe boi ma nasida kaluar sian Jerusalem sebelum dihancurhon kota i. Menurut sejarawan si Eusebius, tinggal di kota Pela do nasida di daerah pegunungan Gilead. Jala gabe dang dohot nasida makkilala hasusaan na upparah na hea masa di Jerusalem.

18, 19. (a) Boasa porlu hita marlatik mulai sian saonari asa gabe sipangoloi? (b) Aha do na lao tabahas di artikel berikutna?

¹⁸ Molo gabe sipangoloi hita ala nungnga gabe halak na toras hita, boi do i paluahon hita tikki saut hata ni Jesus na mandok, “Ai masa ma di tikki i hasusaan bolon na so hea dope masa.” (Mat. 24:21) Di ari na naeng ro, boi do tarida na olo do hita mangihutton petunjuk na sian “naposo haposan”? (Luk. 12:42) Jadi mulai sian saonari, porlu do hita marsiajar asa ‘mangoloi sian roha’!—Rom 6:17.

¹⁹ Asa boi hita gabe halak na toras, ikkon talatik do pikkiranta mamboto dia na sittong dohot na sala. Boi ma taulahon i molo marsiajar hita mananda Hata ni Debata jala marlatik gabe sipangoloi. Godang do tantangan ni akka na poso na naeng berusaha gabe halak na toras. Di artikel berikutna lao tabahas ma boha carana mengatasi akka tantangan i.

[Surat na di Toru]

Aha do Naung Diparsiajari Hamu?

• Aha do maksudna halak na toras, jala boha do carana asa boi hita gabe halak na toras?

• Aha do manfaatna molo berusaha hita mananda Hata ni Debata jala berusaha gabe halak na toras?

• Boha do carana marlatik asa boi hita gabe sipangoloi?

• Aha do manfaatna molo gabe halak na toras hita?

[Sukkun-Sukkun Siparsiajaran]

[Gambar]

Molo taihutton nasehat na adong di Bibel, boi ma hita denggan pasaehon masalahta songon halak na toras

[Gambar]

Ala diihutton halak Kristen di abad na parjolo nasehat ni Jesus, boi ma nasida malua