TIKKI di Gadara Jesus, i ma di sabola selatan ni Laut Galilea, hea do didok ibana tu halak na naeng gabe siseanna, “Mulak ma ho tu keluargam. Paboa ma sude na binahen ni Jahowa tu ho jala paboa ma songon dia Ibana patuduhon asi ni rohana tu ho.” Sian hata ni Jesus on tarida ma, diboto ibana do lomo roha ni akka halak paboahon akka na denggan manang na penting tu keluargana.—Mrk. 5:19.

Songon i dope godangan halak sahat tu saonari, nang pe dang sude. Tikki adong sasahalak na gabe Saksi Jahowa, biasana pittor naeng paboaonna do haporseaonna i tu keluargana. Alai songon dia do carana asa boi barita i hona tu roha ni keluarga na so sahaporseaon, manang na so maragama? Dipaboa do di Bibel carana.

Tikki di abad na parjolo, si Andreas ma na parjolo sahali mamboto molo Jesus i Messias. Tu ise do parjolo sahali dipaboa ibana taringot i? “Parjolo ma dijuppangi ibana si Simon donganna saama. Ninna ma, ‘Nungnga juppangnami Messias i’ (lapatanna ‘Kristus’).” Diboan si Andreas ma si Petrus manjuppangi Jesus, jala i ma dalanna si Petrus gabe sisean ni Jesus.—Joh. 1:35-42.

Hira-hira onom taon dukkon i, diundang ma si Petrus tu jabu ni si sahalak perwira na margoar si Kornelius. Ibana tinggal di sabola utara ni Kaesarea. Jala tikki i, di Joppe do si Petrus. Tikki lao si Petrus tu jabuna, “nungnga dipaima si Kornelius haroro ni si Petrus [dohot akka na rap dohot ibana]. Jala nungnga dijou ibana asa marpungu keluargana dohot akka ale-alena”. Ala dijou si Kornelius do keluargana mambege hata ni si Petrus, gabe boi ma nasida mambahen keputusan.—Ul. 10:22-33.

Aha do na boi taparsiajari sian si Andreas dohot si Kornelius?

Dipatudu si Andreas dohot si Kornelius do dalan tu keluargana. Dipatandahon si Andreas do si Petrus tu Jesus. Jala diatur si Kornelius do songon dia carana asa boi dibege keluargana hata ni si Petrus. Alai dang dipaksa si Andreas manang si Kornelius keluargana asa gabe murid ni Jesus. Aha do parsiajaranna tu hita? Tatiru ma nasida. Boi do tapaboa tu keluargatta taringot Hata ni Debata, manang boi do tapatandahon nasida tu donganta sahaporseaon. Alai unang ma tapaksa nasida. Ikkon taargai do nasida. Asa taboto cara na denggan lao mangurupi keluargatta, taparrohahon ma pengalaman ni si Jürgen dohot si Petra, suami istri na sian Jerman.

Marsiajar Bibel ma si Petra dohot Saksi Jahowa. Ujungna tardidi ma ibana. Suamina, i ma si Jürgen sahalak komandan ni tentara. Mulana i, sogo do rohana ala marsiajar Bibel istrina. Alai di pudian ni ari disadari si Jürgen ma hasittongan na sian Bibel do na dibaritahon Saksi Jahowa. Di pudian ni ari, tardidi ma si Jürgen. Jala saonari nungnga gabe sintua be ibana. Dipaboa ibana do piga-piga saran tikki lao mangurupi keluarga asa olo marsiajar Bibel. Akka aha ma saranna i? Taida ma.

Si Jürgen mandok, “Unang ma tajamitai keluargatta manang tapaksa nasida manghaporseai aha na tahaporseai. Boi do i mambahen gabe lam sogo roha ni nasida. Tumagon do tapaboa saotik-saotik isi ni Bibel tikki makkata-hatai dohot nasida. Jala denggan do molo tapatandahon nasida tu dongan sahaporseaon na saumur dohot nasida manang na sarupa hobina. Molo tabahen songon i gabe kompak ma nasida.”

Hatop do Apostel Petrus dohot keluarga ni si Kornelius mambahen keputusan. Alai dang sude songon i. Di abad na parjolo adong do halak na leleng mambahen keputusan.

Tikki di tano on Jesus, adong do piga-piga keluargana na porsea tu ibana. Contohna, si Jakobus dohot si Johannes. Tubu ni si Salome do nasida. Inang uda ni Jesus do ra si Salome on. Jala ibana do ra sada sian akka borua na mamakke “arta ni nasida lao mangurupi Jesus dohot akka apostelna”.—Luk. 8:1-3.

Alai anggo keluarga ni Jesus na asing, dang pittor porsea tu ibana. Misalna, sataon dukkon tardidi Jesus marpungu ma godang halak di sada jabu lao manangihon ibana. “Alai tikki dibege keluargana taringot i, ro ma nasida mangalap ibana. Ai didok nasida do, ‘Nungnga rittik be ibana.’” Piga-piga leleng dukkon i disukkun akka anggi ni Jesus ma ibana taringot pardalananna. Alai dang dialusi Jesus nasida. Ai “dang porsea akka anggina i tu ibana”.—Mrk. 3:21; Joh. 7:5.

Aha do na boi tatiru sian Jesus? Dang haccit rohana tikki didok keluargana ibana nungnga rittik. Buktina dung dihukum mate Jesus jala dipahehe, ro do ibana manjuppangi si Jakobus. Dipatogu ibana do si Jakobus. Alani i, gabe porsea ma si Jakobus dohot anggi ni Jesus na asing na tutu do Jesus i Messias. Jala i do na mambahen gabe rap nasida dohot akka apostel na asing marpungu di ruang atas di Jerusalem lao manjalo tondi parbadia. Di pudian ni ari, mandapot hasangapon na balga do anggi ni Jesus i, i ma si Jakobus dohot si Johannes.—Ul. 1:12-14; 2:1-4; 1 Kor. 15:7.

Songon di abad na parjolo, saonari pe godang do keluarga na leleng asa mambahen keputusan. Contohna si Roswitha. Tikki tardidi suamina taon 1978, maragama Katolik Roma do ibana. Ala porsea do ibana tu agamana i, gabe sogo ma rohana tu suamina. Alai lam leleng moru ma sogo ni rohana i. Jala diboto ibana ma sittong do na diajarhon Saksi Jahowa i. Tardidi ma ibana taon 2003. Aha do na mambahen ibana muba? Dang hea haccit roha ni suamina tikki dipatudu ibana sogo ni rohana. Sabar do suamina paimahon si Roswitha paubahon cara marpikkirna. Aha ma didok si Roswitha? “Godang do hasil na denggan tadapot molo sabar, sabar, jala torus sabar.”

Si Monika tardidi taon 1974, jala sappulu taon dukkon i tardidi ma dua anakna. Memang dang pola olo suamina si Hans menentang. Alai dung taon 2006 do asa tardidi suamina i. Sian pengalaman ni nasida, aha ma saran ni nasida? “Toktong ma setia tu Jahowa jala unang meol-eol haporseaotta.” Torus do dipatudu nasida holong ni nasida tu si Hans. Jala pos do roha ni nasida pasti boi si Hans gabe Saksi Jahowa.

Hea do dipatudos Jesus barita hasittongan on songon aek na boi mambahen sasahalak mangolu saleleng ni lelengna. (Joh. 4:13, 14) Pasti lomo do rohatta mangalehon aek na lambok jala na ias tu keluargatta. Alai molo pahatoppu jala pagodangku aek i tu nasida, boi do gabe mogap jala batuk-batuk nasida. Songon i ma tong tikki paboahon hasittongan tu nasida. Las manang na dang roha ni nasida mambege hata i bergantung tu caratta paboahon i. Bibel mandok, “dipikkiri halak na tigor marroha do hata na lao sidohononna” jala “manat do halak na marbisuk mandok hatana. Jala paposson roha do na nidokna”. Songon dia do hita mangulahon i?—Poda 15:28; 16:23.

Molo lomo do roha ni sahalak istri paboahon haporseaonna tu suamina, ikkon “dipikkiri” ibana do hatana sebelum makkatai dohot suamina. Pillit ma hata na denggan. Sian hatamuna unang dok hamu na ussittong manang na ummalo hamu sian suamimuna. Molo denggan caramuna, boi do i mambahen las roha jala dame. Pikkirhon ma, hira-hira andigan do santai suamimuna jala tabo donganan makkatai. Hira-hira aha do lomo ni rohana? Taringot ilmu pengetahuan do, politik, manang olahraga? Songon dia do hira-hira carana mambahen ibana asa penasaran tu isi ni Bibel? Jala argai hamu ma perasaan dohot pandapotna. Molo diulahon hamu i, boi ma denggan hamu paboahon haporseaonmuna.

Asa boi tertarik keluargatta lao gabe Saksi, dang sae holan tapaboa haporseaotta. Alai ikkon tapatudu do muse pangalaho na denggan.

Si Jürgen na dipaboa sebelumna mandok, “Torus ma ulahon poda ni Bibel di ngolumuna siganup ari. On ma cara na denggan na mambahen keluargatta olo mambege nang pe dang setuju nasida.” Si Hans pe sapandapot do tu si Jürgen. Ibana tardidi 30 taon dukkon istrina tardidi. Ibana mandok, “Penting do tabahen sitiruon na denggan. Asa diboto keluargatta, lam denggan pangalahotta dung mananda hasittongan.” Ikkon boi do diida keluargatta berbeda do hita sian halak na asing, ala nungnga lam denggan pangalahotta.

Adong do poda na denggan na dipaboa Apostel Petrus tu akka istri na so sahaporseaon dohot suamina. Didok, “Unduk ma hamu tu suamimuna. Asa molo adong sian nasida na so mangoloi hata ni Debata, gabe porsea ma nasida tu hata i alani pangalahomuna, so pola didok hamu manang aha. Ai idaon ni nasida ma pangalahomuna na denggan dohot unduk ni rohamuna. Unang ma sian luar dipabagak-bagak hamu dirimuna, marhite mandandan obuk, mamakke perhiasan na sian mas, manang mamakke pakkean na arga. Alai rohamuna i ma pabagak hamu marhite perhiasan na so olo sega, i ma roha na lambok jala na dame, ai i do na arga di Debata.”—1 Ptr. 3:1-4.

Songon na disurat si Petrus, boi do sahalak istri mambahen suamina gabe halak na porsea alani pangalahona na denggan. Alani i, diulahon sahalak donganta borua na margoar si Christa ma poda i. Mulai sian tardidi ibana taon 1972, berupaya do ibana patuduhon pangalaho na denggan, asa boi hasittongan i hona tu roha ni suamina. Hea do suamina marsiajar Bibel, marpungu, jala mardongan dohot akka dongan di huria. Alai dang pos dope rohana tu hasittongan on. Nang pe songon i, diargai akka donganta do keputusanna i. Aha ma na diulahon si Christa?

“Torus do au berupaya mangulahon hata ni Jahowa i. Berupaya do au mambuat roha ni suamikku marhite pangalaho na denggan, dang holan sian hata-hata. Molo sadalan dope dohot Bibel, huoloi do sude pangidoanna. Huargai do keputusanna i jala hutangiakkon tu Jahowa.”

Sian na binahen ni si Christa i, taboto ma ikkon marbisuk do hita. Teratur do ibana marpungu jala marbarita. Alai marbisuk do ibana. Diboto ibana do ikkon dipatudu ibana do holong tu suamina, dilehon ibana do tikki tu suamina, jala diparrohahon. Jadi ikkon songon i do hita tu keluargatta na so sahaporseaon. Bibel mandok, “Martikki be do sude.” Tikki na didok dison termasuk ma tikki na talehon tu keluarga na so sahaporseaon, tarlumobi ma suami manang istritta. Molo talehon tikki, gabe boi ma hita makkata-hatai dohot nasida. Pengalaman ni akka dongan patuduhon molo jotjot do hita makkata-hatai dohot nasida, dang kesepian be nasida, dang merasa dang dipardulihon, manang cemburu.—Pjm. 3:1.

Si Holger mandok, “Porlu do tapatudu holong tu keluarga na so sahaporseaon jala tatangiakkon ma nasida.” Bapak ni si Holger tardidi 20 taon dukkon tardidi halak i. Si Christa paboahon ‘sai pos do rohana haduan pasti boi do suamina gabe sisomba Jahowa jala masuk tu hasittongan on’. Hita pe ikkon songon i do. Ikkon pos do rohatta, sada tikki pasti boi do keluargatta i gabe sisomba Jahowa.

Tujuanta i ma manjaga asa denggan hubunganta dohot keluargatta. Dung i adong ma dalan ni nasida mananda hasittongan jala boi ma dijalo nasida Hata ni Debata. Di sudena i, ikkon ‘lambok ma hamu jala sangap ma nasida bahen hamu’.—1 Ptr. 3:15.